RÚV skapar verðmæti í Namibíu

RÚV er áhrifavaldur í namibískum stjórnmálum. Fyrst var íslenskur skipstjóri handtekinn og nú togari kyrrsettur.

Samkvæmt RÚV verða verða menn ríkir í Namibíu við samkrull opinbers valds, s.s. stjórnmála og fjölmiðla, annars vegar og hins vegar viðskipta.

Vænar fjárhæðir munu skipta um hendur til að leysa úr þeim vanda sem íslensk fyrirtæki og namibísk stjórnvöld eiga í. 

RÚV skapar verðmæti í Namibíu, landi sem RÚV-arar hafa lýst sem gjörspilltu.

Togarinn Heinaste kyrrsettur af dómara

Múslímar og femínistar

Pakistanskir múslímar efna til ráðstefnu um femínista án þess að nokkur kona fari með hlutverk.

Femínistar ræða reglulega karlmennsku án þess að karlar eigi þar orð.

Margt er líkt með skyldum.

Engar konur í pallborði um femínisma

Play, Excel og tiltrú

Fjárfestar sem eiga að hafa vit, og bera því forskeytið fag-, eru tregir til að setja pening í flugfélag sem aðeins er til á pappírunum og heitir Play.

Fjárfesting, hvort heldur fagfjárfesta eða annarra, byggir á tiltrú að fyrirtækið standi við loforð að skapa eigendum sínum arð.

Reikniforritið Excel útfærir loforðið í krónur og aura að gefnum forsendum. Sölumenn viðskiptahugmynda eru flinkir á Excel sem þó er aðeins skáldskapur um framtíðina.

Ferðaþjónusta óx hratt hér á landi á meðan WOW flutti hingað ferðamenn sem voru niðurgreiddir með peningum fjárfesta. Samdrátturinn í kjölfar falls WOW kom illa niður á ferðaþjónustunni.

Stofnendur Play biðla til ferðaþjónustunnar um ,,sameiginlega" fjárfestingu eins og hlutafélag sé eitthvað annað en einmitt það - sameiginleg fjárfesting hluthafa.

Á endanum ræður tiltrú fjárfesta á viðskiptahugmyndinni hvort nægt hlutafé safnast til að fyrsta flugvélin merkt Play taki á loft. Trúin flytur fjöll, segir orðtakið. Í þenslu og góðæri er meiri trú en minni í samdrætti og hallæri.

Tilboði um sameiginlegt skipbrot er auðvelt að hafna ef maður er ekki þegar munstraður á fleyið. 

Biðla til hóps fjárfesta

Stóra loftslagssvindlið 10 ára

Fyrir tíu árum komst upp um svindl og samsæri helstu vísindamanna í umræðunni um manngert veður. Viljinn birtir afmælisgrein sem tekur saman nokkur atriði.

Einn glópurinn skrifar: ,,Vandamálið er þessi fáránlegu raungögn. Ég er farinn að halda að módelið okkar sé farið að fjarlægjast raunveruleikann."

Það var og. Raungögn segja til um raunverulegt hitastig en módelin eru óskhyggja vísindamanna um manngert veðurfar. Hjá glópum er veruleikinn ,,fáránlegur" en ímyndunin væntanlega ekki.

RÚV-áhrif í Namibíu

Fyrir tveim dögum birti RÚV montfrétt að Efstaleiti væri ráðandi afl í namibískum stjórnmálum.

RÚV er líka duglegt að skrifa fréttir á ensku til að namibísk stjórnvöld fylgist með hvernig Samherji er ,,tekinn niður" hér heima.

Og nú er íslenskur skipstjóri handtekinn þar ytra.

Trauðla er það tilviljun.

Skipstjórinn í farbanni í Namibíu

Svandís: efi til hægri, fullvissa til vinstri

Þingmaður Vinstri grænna og ráðherra, Svandís Svavarsdóttir, játar að trúin á manngert veður er vinstripólitík. Ráherrann segir hægrimenn hafa ,,efa­semd­ir gagn­vart lofts­lags­breyt­ing­um" og dregur þar fram að málefnið er pólitískt fremur en vísindalegt.

Í leiðinni, og líklega án þess að ætla sér það, varpar Svandís ljósi á ólík eðliseinkenni hægri- og vinstrimanna. Þeir fyrrnefndu efast en fullvissan er öll til vinstri. Efahyggja er til hægri en trúarhiti til vinstri.

Karl Marx var hjáguð vinstrimanna á síðustu öld. Hann brást þegar á daginn kom að meint járnhörð lögmál sögulegrar efnishyggju stóðust ekki. Kommúnisminn var veraldleg trú sem stóðst ekki próf reynslunnar. Vinstrimenn leituðu fyrir sér með nýja hugmyndafræði og fundu hana í trú á manngert veður og yfirvofandi heimsendi.

Hægrimenn gjalda varhug við trúarhitanum. Offorsinu fyrir einatt yfirgangur, frekja og í mörgum tilfellum hrein illska. Allt í nafni málstaðarins, auðvitað.

Huggulegt af ráðherranum að viðurkenna þetta. Takk, Svandís.

Klausturmálið „birtingarmynd öfgahægris“

Falsfréttir Björns Leví ala á spillingu

Píratinn Björn Leví boðaði skipulega upplýsingasöfnun að hætti Stasi um íbúa landsins. Í dag birtir Björn Leví úrval af gagnasöfnunni með grein í Morgunblaðinu. Gefum píratanum orðið:

„Ég varð vitni að því að tveir starfsmenn voru að stela vörum af lager. Ég tilkynnti þjófnaðinn og annar var rekinn en hinn var vel tengdur og hélt starfinu.“
„Ríkisstarfsmaður skrifaði áfengi sem matvæli á reikning vegna ferðalags, þegar ég kvartaði þá var ég tekinn úr ferðalagi sem ég átti að fara í.“
„Menn verða að tilheyra réttum flokki til þess að eiga séns á að fá pláss á bát.“
„Ég hef fengið skammir í vinnunni fyrir það sem ég skrifa á netið og skilaboð um að það sé fylgst með því sem ég segi.“
„Stærsti vinnuveitandinn á staðnum skipaði öllu erlendu vinnufólki að kjósa ákveðinn flokk í sveitarstjórnarkosningum eða það myndi missa vinnuna.“

Allt eru þetta óstaðfestar ásakanir nafnleysingja. Gamla orðið er slúður en nýyrðið falsfréttir.

Með því að dreifa slúðri/falsfréttum elur Björn Leví á spillingu í tvennum skilningi. Í fyrsta lagi gefur þingmaðurinn til kynna að sjálfsagt sé að stela og hóta, þannig gerist kaupin á eyrinni. Í öðru lagi eru rangar sakargiftir ein tegund spillingar.

Eins og segir í viðtengdri frétt mbl.is um ástandið í Hong Kong: ,,Djúp­stætt van­traust á lög­reglu og yf­ir­völd­um verði til þess að mót­mæl­end­ur trúi frétt­um um ým­iss kon­ar sam­særis­kenn­ing­ar..."

Björn Leví ,,normalíserar" spillingu í einn stað og í annan stað býr hann til vettvang fyrir nafnlausar ásakanir. Hvorttveggja grefur undan trausti í samfélaginu.

Stjórnmálamenn eins og Björn Leví ná helst árangi í samfélagslegri ormagryfju. Enda safnar þingmaðurinn ormum.

 

Falsfréttir kynda undir óróa

Loftslagsmarxismi fyrir börn í boði Háskóla Íslands

,,Hamfarahlýnun af mannavöldum er ein af stærstu áskorunum samtímans," segir tilkynningu frá menntavísindasviði Háskóla íslands vegna fyrirlestra um að kenna börnum og unglingum að heimurinn sé að farast.

Það á að ,,stuðla að hugarfarsbreytingu" sem er annað orð yfir innrætingu.

Meðal þeirra sem taka máls er manneskja sem kynnir sig svona: ,,baráttukona og dósent við Deild kennslu- og menntunarfræði." Aðgerðasinnar stýra ferðinni, vísindaleg yfirvegun er úrelt. 

Karl Marx sagði á sínum tíma að ekki væri nóg að skilja heiminn, það yrði að breyta henni veröld. Ráðstefna menntavísindasviðs HÍ er loftslagsmarxismi sem beinist að innrætingu barna. 

Heimurinn er ekki að farast vegna aukins lofthita. Meðalhiti á Íslandi er lægri en hann var á landnámsöld. Manngert veðurfar er ímyndun. Maðurinn bjó ekki til litlu ísöld heldur náttúran.

700 vísindamenn og sérfræðingar birtu nýverið yfirlýsingu þar sem varað er við heimsendaspám eins og þeirri sem Háskóli Íslands leggur blessun sina yfir.

Píratar og Samfó vilja lögregluríki

Samherja-Namibíumálið nota Píratar og Samfylking til að krefjast aukins eftirlits og inngripa yfirvalda í líf borgaranna. Fjárframlög skulu aukin til eftirlitsstofnana og opinberar valdheimildir auknar.

Sjálfir gera Píratar Stasi-tilraunir til að koma upp gagnasöfnun um óæskilega hegðun Jóns og Gunnu.

Lögregluríki í boði Pírata og Samfylkingar er orðinn pólitískur valkostur.

„Áframhaldandi plástrapólitík“

Guðni Th., elíta, múgur og þriðja þjóðin

Hversdags starfar forseti Íslands fyrir elítuna. Forsetinn heldur boð, veitir verðlaun, flytur ávörp, opnar starfsstöð og margt fleira í þágu viðskiptaelítunnar - og gerir það sama fyrir menningarelítuna, sem er önnur ella.

Bakland Guðna Th. er múgurinn sem lyfti honum til valda úr stóli álitsgjafa RÚV um skandalinn sem þá stundina var á dagskrá Efstaleitis. Til að friðþægja múginn grípur Guðni Th. til þess ráðs að hallmæla elítunni sem hann þjónustar hverdags. Tungutakið er ættað úr vinstrisinnaðri orðræðu um síðnýlendukúgun hvíta mannsins.

Þriðja þjóðin, þessi sem hvorki aðhyllist múgræði né er hluti elítunnar, er ekki til í huga Guðna Th. 

Óverjandi framferði