Bjarni Ben. í fangelsi djúpríkisins

,,Hvað í ósköpunum liggur mönnum á að komast undir sameiginlega raforkustofnun Evrópu á okkar einangraða landi með okkar eigið raforkukerfi? Hvers vegna í ósköpunum hafa menn áhuga á því að komast undir boðvald þessara stofnana?"

Bjarni Benediktsson formaður Sjálfstæðisflokksins er höfundur orðanna hér að ofan. Þau eru sögð fyrir einu ári á alþingi, eins og Gunnar Rögnvaldsson vekur athygli á.

Eitthvað undarlegt gerðist á þessu eina ári. Bjarni Ben. er orðinn talsmaður þess að setja Ísland ,,undir sameiginlega raforkustofnun Evrópu" - með innleiðingu 3. orkupakkans.

Djúpríkið vildi Icesave-lögin, djúpríkið vildi ESB-aðild og djúpríkið vill 3. orkupakkann.

Djúpríkið tekur alltaf hagsmuni ESB fram yfir þjóðarhagsmuni. Ástæðan er sú að kjarni djúpríkisins, embættismannaelítan, á meira sameiginlegt með starfsbræðrum sínum í Brussel en almenningi á Íslandi.

Umræðan leiðir í ljós að þjóðin vill ekki 3. orkupakkann, ekki frekar en hún vildi Icesave-lögin eða ESB-aðild. 

Bjarni Ben. ætti að nota páskana til að brjótast úr dýflissu djúpríkisins og taka afstöðu með þjóðarhagsmunum.

3. orkupakkinn er eitrað peð sem við eigum ekki að taka. Næsta leik okkar í skákinni við ESB má kalla biðleik, líkt og við frestuðum ESB-umsókninni, eða við látum tímann líða og bíðum eftir afturköllun ESB á peðsleiknum með þriðja orkupakkanum. 

Aðalatriðið er að þingsályktunin um afléttingu á fyrirvörum gagnvart 3. orkupakkanum verði tekin af dagskrá alþingis.

 

 

Trump og máttur einstaklingsins

Trump var sæmilegur auðmaður og þokkalega þekkt sjónvarpsstjarna þegar hann ákvað að sækjast eftir embætti forseta Bandaríkjanna. Þó nokkrir Ameríkumenn eru loðnir um lófana og slatti þekktur í sjónvarpi. Fæstir verða forsetar.

Hvers vegna Trump?

Tvær meginkenningar eru um einstaklinga og sögulega þróun. Í fyrsta lagi að stórir einstaklingar móti söguna. Alexander mikli, Sesar, Ágústus, Jesú, Múhameð spámaður, Djengis Kahn, Martin Lúther, Karl Marx, Darwin, Lincoln, Lenín, Hitler og Stalín og fáeinir aðrir marka djúp spor í söguna. En hefði sagan orðið önnur ef þeirra hefði ekki notið?

Í öðru lagi er kenningin um að sögulegar aðstæður leiði einstaklinga til áhrifa og valda sem svara kalli tímans. Samkvæmt þessari kenningu eru persónur leiksoppar örlaganna - sögunnar - en ekki gerendur.

Stórvirki skáldskapar s.s. Ilíonskviða og Biblían gefa til kynna að sögupersónur séu þrælar frásagnar án dauðlegs höfundar.

En hvað með Trump? Hann er ekki goðsögn heldur lifandi maður af holdi og blóði - þó ekki í mörg ár enn. Er karlinn dæmi um mátt einstaklingsins að skapa söguna? Eða er hann verkfæri afla sem engir dauðlegir ráða við?

Þegar stórt er spurt hlýtur svarið að vera einfalt. Til dæmis þetta: Trump er réttur maður á réttum stað á réttum tíma.

 

 

Vilja kæra Trump fyrir embættisbrot

Ég-veit-ekki, ég-skil-ekki þingflokkurinn

ESB bjó til orkusamband (energy union) árið 2015 á grunni orkupakka 1-3, sem höfðu verið samþykktir frá árinu 2005 þegar orkustefna ESB var mótuð. Þriðji orkupakkinn, sem er til umræðu á alþingi Íslendinga, var samþykktur af ESB árið 2009. 

Samandregið: á tíu ára tímabili, 2005 til 2015, verður fyrst til sameiginleg orkustefna ESB og síðan orkusamband.

Ef Ísland samþykkir 3. orkupakka ESB verðum við hluti af orkusambandi ESB. Yfirlýst markmið orkusambandsins er eitt orkunet fyrir öll aðildarríkin. Það á að útrýma orkueyjum. Ef Ísland verður aðili að orkusambandi ESB er það ekki spurning hvort heldur hvenær sæstrengur veriður lagður til Evrópu. Sæstrengurinn hefur í för með sér að við glötum kostum þess að eiga og stjórna okkar rafmagni.

Allir læsir skilja út að hvað orkusamband ESB gengur. En, óvart, þá er heill þingflokkur á Fróni sem harðneitar að skilja. Þingmenn Sjálfstæðisflokksins koma fram í halarófu á síðum Morgunblaðsins og segja allir það sama: ég-skil-ekki, ég-veit-ekki út á hvað orkusamband ESB gengur.

Þingmennirnir vilja að þjóðin tileinki sér valkvæða heimsku og fallist á 3. orkupakka ESB. Sjaldan hafa jafn fáir gert jafn mörgum hættulegan grikk. Þingmenn Sjálfstæðisflokksins eru ekki á vetur setjandi. 

Loftslagstrú, sálfræði og krossfesting vísinda

Óttinn við dauðann er manninum eðlislægur. Annar eðlisþáttur tegundarinnar er sektin; af hverju er ég lifandi en aðrir dauðir/dauðvona eða lifa ömurlegu lífi?. Trú svarar ótta og sekt. 

Kristna útgáfan boðar eilíft líf annars vegar og hins vegar að Jesú hafi dáið fyrir sekt/syndir mannanna endur fyrir löngu.

Veraldleg vesturlönd nenna ekki lengur kristni. Hjá stórum hópi fólks er loftslagstrú staðgengill opinberunar og þjónar sama hlutverki, að sefa ótta og milda sektarkennd. Loftslagstrúaðir telja ragnarök á næsta leiti og lifa í dauðaangist. Í annan stað líður þeim illa í allsnægtum og finna til sektar.

Loftslagstrú segist byggja á vísindum, líkt og eingyðistrú byggir á opinberun. Þegar loftslagstrúnni verður sópað undir teppið sem álíka bábilju og þúsaldarvanda tölvukerfa verða vísindin krossfest fyrir að leggja nafn sitt við trúarsefjunina.

Loftslagstrú getur ekki svarað einföldustu spurningum, t.d. hvert er kjörhitastig jarðarinnar? En samt flykkist fólk í þessa kirkjudeild og efnir til mótmæla og hávaða til að hrella fólk til fylgilags við sértrúarhópinn.

 

„Loftslagsváin er þögul ógn“

Guðlaugur, einfalt líf feita þjónsins og orkupakkinn

Hlutlausir aðilar, sem eiga engra hagsmuna að gæta, fjalla um orkustefnu ESB og komast að afdráttarlausri niðurstöðu: völdin eru flutt frá aðildarríkjum til Brussel.

Ef Ísland samþykkir orkupakka 3. erum við á orðin hluti af orkusambandi ESB. Þegar Norðmenn samþykktu orkupakka 3 fyrir ári var það sagt upphátt. Á Íslandi er ekki einu sinni hvíslað um orkusamband ESB. Það er talað um orkupakka 3. eins og afmarkað lítilræði en ekki meiriháttar stefnubreytingu íslenskra stjórnvalda.

Framkvæmdastjórn ESB kynnti fyrir nokkrum dögum stöðu orkusambandsins. Þar segir í niðurlagi að fyrirhugað er að orkuskattar verði hluti af orkustefnunni: ,,how energy taxation could better contribute to the EU's energy and climate policy objectives".

Er einhver umræða á íslandi um að flytja skattheimtuvald til Brussel? Nei. hér á landi höfum við utanríkisráðherra sem talar svona:

Í aldarfjórðung hafa hindranalaus viðskipti með vöru og þjónustu aukið hagsæld á Íslandi. Samningurinn um EES hefur gerbylt neytenda- og vinnuvernd og einfaldað líf Íslendinga sem stunda nám og störf innan Evrópu eða njóta þar efri áranna. Orkupakkinn er hluti af þeirri heild...

Gulli utanríkis er feiti þjóninn úr sögu Laxness sem mærir ,,einfaldað líf Íslendinga" og þakkar fyrir að útlendingar setji okkur lífsreglurnar.

Frjálslynt Rússahatur og Trumpfóbía

Sigur Trump 2016 olli raðbilun í dómgreind frjálslyndra vinstrimanna sem ekki sér fyrir endann á. Frjálslyndir neituðu blákalt að trúa veruleikanum eins og hann blasti við og hönnuðu þess vegna nýjan; að Pútín Rússlandsforseti stæði á bakvið sigur Trump.

Frjálslynda Rússahatrið stendur í vegi fyrir eðlilegum samskiptum kjarnorkuveldanna tveggja, Rússlands og Bandaríkjanna.

Frjálslynda Rússahatrið sýnir hve veruleikafirrt pólitíkin getur orðið.

Stál í stál eftir skýrslu Mueller

Þórdís og tortímda orkueyjan

Yfirlýst markmið orkustefnu ESB er að tortíma orkueyjum. Það er gert með samtengingu allra orkukerfa þeirra ríkja sem eiga aðild að orkustefnu ESB. Í evrópskri umræðu er markmiðið útskýrt svona:

The goal of a real internal energy market requires a fully integrated electricity grid that has eliminated ‘energy islands’ of EU countries not connected to the rest of the grid, and removed bottlenecks.
(Markmið sameiginlegs orkumarkaðar krefst fulls samruna orkukerfa sem tortímir ,,orkueyjum" meðal ESB þjóða sem ekki eru tengdar kerfinu og fjarlægir flöskuhálsa)

Ísland er orkueyja í tvennum skilningi orðsins. Bæði eigum við næga raforku og við erum ótengd raforkukerfi Evrópu. Þriðji orkupakki Þórdísar iðnaðarráðherra og félaga hennar í stjórnarráðinu mun breyta þeirri stöðu í einu vetfangi. 

Tilvitnunin hér að ofan er í evrópsku umræðuna fyrir fjórum árum. Síðan vinnur ESB jafnt og þétt að útfæra framkvæmdina. Núna í apríl, fyrir rúmri viku, tilkynnti ESB nýtt orkusambandi undir fyrirsögninni: Orkusambandið, frá hugsjón til veruleika (The Energy Union: from vision to reality).

Viðskiptatímaritið Forbes útskýrir veruleika orkustefnu ESB með þessari fyrirsögn: ESB flytur vald yfir orkumálum frá höfuðborgum [aðildarríkja] til Brussel.

Hér ber allt að sama brunni. Ef Ísland innleiðir 3. orkupakka ESB erum við orðin fangar orkustefnu Stór-Evrópu. Með orðalagi Brusselvaldsins yrðum við ,,tortímd orkueyja".

Viljandi verið að afvegaleiða umræðuna

Guðmundur Andri og valdefling reiðinnar

Reiðin er vopn í stjórnmálum, það vita samfylkingarmenn upp á hár. Reiðinni var beitt miskunnarlaust af vinstrimönnum eftir hrun. Útgerðamenn, landsbyggðin, Sigmundur Davíð, Hanna Birna og nú síðast Sigríður Andersen urðu fyrir barðinu á skipulögðum reiðiköstum.

En nú finnst Guðmundi Andra þingmanni Samfylkingar nóg komið, Reiðiköstum í þágu valdeflingar pólitískra sjónarmiða verður að linna.

Guðmundur Andri fann á eigin skinni reiðikast samborgara. Samkvæmt greiningu þingmannsins hefst reiðin á netmiðlum og flýtur þaðan inn á daglegan vettvang, s.s. í stórmarkaði.

Ef tilgáta Guðmundar Andra er rétt ber þeir mesta ábyrgð sem stunda gífuryrði á netinu. Ekki þarf flókna textafræðirannsókn til að leiða í ljós að fáir komast þar með tærnar sem valinkunnir vinstrimenn eru með hælana - og er þá ekki átt við tjaldhæla. 

Kallaði þingmann „Samfylkingardrullu“

Umsóknin, pakkinn og fiktið við fullveldið

ESB-umsókn Samfylkingar var sett í skúffu áramótin 2012/2013. Embættismenn héldu þó áfram að þvæla Íslandi í net ESB og þar leikur EES-samningurinn lykilhlutverk. Þriðji orkupakkinn er hluti af ferli skuggastjórnenda, bandalags embættismanna og peningamanna, sem telja forræði íslenskra mála betur komið í Brussel en Reykjavík. 

Þórólfur Gíslason kaupfélagsstjóri á Sauðárkróki veit hvernig fjármálamenn hugsa. Embættismenn segja orkupakki og peningamenn heyra sæstrengur. Þórólfur varar við bandalaginu og kallar ,,fikt" við sæstreng hættuspil.

Embættismenn og fjárfestar leika sér að ístöðulitlum stjórnmálamönnum. Þórdís iðnaðarráðherra talar samfóísku þegar hún segir Ísland þurfa bjargráð frá Brussel. Ísland er ónýtt, sagði Samfylking, og vildi fullveldið feigt. Þórdís fetar sömu slóð.

Þeir sem börðust gegn ESB-umsókn Samfylkingar láta ekki skuggastjórnendur komast upp með að taka völdin og framfylgja stefnu ESB-sinna.

Ráðherrar og þingmenn sem selja fjöregg þjóðarinnar í hendur skuggastjórnenda verða krafðir reikingsskila gjörða sinna. Í stríðinu um fullveldið er hálfvelgja ekki samþykkt.

 

 

 

 

Gagnrýnir þjóðarsjóðinn

Þórdís; Ísland getur ekki, ESB bjargar okkur

Þórdís iðnaðarráðherra með mörgu nöfnin segir í viðtali á útvarpsstöð að Íslendingar kunni ekki að umgangast raforkumál, kunni ekki samkeppni og geti ekki sett reglur um auðlindir landsins.

En, segir Þórdís, ESB kann og getur.

Er ekki tímabært að Þórdís hætti ráðherradómi og leiti sér að starfi í Brussel?