Rússagrýlan er amerísk falsfrétt

Bandaríkin skipta sér reglulega af innanríkismálum annarra ríkja. Allt frá því að styrkja með fjárframlögum pólitísk öfl sem hliðholl eru bandarískum hagsmunum yfir í innrás í ríki sem teljast óvinveitt Bandaríkjunum.

Þetta er það sem stórveldi gera, segir í bandarísku íhaldsútgáfunni American Conservative. Þar er rifjað upp að bandaríkin hafi með leynilegum aðgerðum skipt um stjórnvöld í eftirfarandi ríkjum: Íran, Guatemala, Suður-Víetnam, Chile, Nikaragua, Grenada, Serbía, Írak, Líbýa, Sýrland og Úkraínu. 

Þrátt fyrir þessa sögu, eða kannski vegna hennar, eru Bandaríkin haldin þeirri þráhyggju að Rússland undir Pútín séu sérstaklega illskeytt með því að setja upp nokkrar vefsíður til að hafa áhrif á bandarísk stjórnmál.

Sitjandi forseti Bandaríkjanna er beinlínis sakaður um að vera kjölturakki Pútín. Annars væri Trump ekki jafn umhugað og raun ber vitni að verða vinur Pútin, er skrifað í útgáfum sem teljast marktækar í umræðunni.

Á þessum grunni er búin til grýla um að Rússland stefni að heimsyfirráðum. En Rússland er óvart umkringt bandarískum Nató-herstöðvum. Grýlusagan um heimsyfirráðastefnu Rússa er best heppnaða falsfrétt allra tíma.

Farðu að föndra, Þorsteinn

Stjórnlynt fólk vill að alþingi samþykki lög til að skipta sér sem mest af lífi okkar. Stjórnlyndir eru haldnir þeim misskilningi að fleiri lög bæti samfélagið.

Lagafjöldi segir ekkert um velferð þjóðríkja. Þess vegna er fjöldi laga ekki mælikvarði í alþjóðlegum samanburði ríkja heldur þættir eins og lífslíkur, hagvöxtur, menntun, tekjudreifing og fleiri slíkir. Engum dettur í hug að telja lög í því samhengi.

Þorsteinn Víglundsson þingmaður Viðreisnar er stjórnlyndur. Hann líkir málafæð á þingi við hráefnisskort í fiskvinnslu. En alþingi er ekki fiskvinnsla. Oft líkist málstofa þjóðarinnar leikskóla. Þegar fátt er á dagskrá þar má alltaf föndra. Þorsteinn gerði betur að finna sér eitthvað til föndurs fremur en að framleiða lög í akkorði.

Þingið væri sent heim vegna hráefnisskorts

Laun og kjarasamningar eru sitthvað

Forsendur kjarasamninga kunna að vera brostnar en allt önnur ella er hvort launakjör séu óásættanleg. Almenni vinnumarkaðurinn, þar sem ASÍ-félög semja um laun, borgar ekki samkvæmt kjarasamningum, - þeir eru aðeins viðmið.

Hjá opinberum starfsmönnum, BHM, BSRB og kennurum eru laun borguð samkvæmt kjarasamningum. 

ASÍ þarf að útskýra hvaða forsendur eru brostnar. Það hljóta að vera aðrar forsendur en þær sem ríkja á vinnumarkaði opinberra starfsmanna, sem samþykktu 1,3 prósent launahækkun nýverið.

Forsendur kjarasamninga brostnar

Holland er fríríki eiturlyfjaglæpa

Glæpahópar stjórna hollensku samfélagi í auknum mæli, segir í skýrslu samtaka hollenskra lögreglumanna. Frjálslynd löggjöf, sem leyfir hass og vændi, er orsök þess að Holland er miðstöð eiturlyfjasmygls í Evrópu og mansals.

Hollenska lögreglan ræður ekki við glæpahópana sem nota illa fengið fé til að koma sér fyrir á ólíkum sviðum samfélagsins, s.s. í heilsugæslu, ferðaþjónustu og á fasteignamarkaði.

Glæpahóparnir herja m.a. á aldraða og aðra sem standa höllum fæti. Aðeins um fimmtungur afbrota er kærður til lögreglunnar. Í skýrslunni kemur fram að auðvelt sé að kaupa leigumorðingja fyrir 400 þús. ísl. kr. en slík viðskipti voru óþekkt til skamms tíma.

Móðganir og hatursorðræða

Aflétting á móðgunarbanni gagnvart útlenskum þjóðhöfðingjum og erlendum erindrekum er eflaust þarfasta mál.

Aftur er verra að þingmenn ætla ekki að afnema lög sem leyfa lögreglu og saksóknara að sækja til saka þá sem halla orði að fólki sem kallar sig minnihlutahóp og þykist ofsóttur með hatursorðræðu.

Hatursorðræða er aðeins annað orð yfir móðgun. Og það má móðga, þjóðhöfðingja sem aðra.

Megi móðga erlenda þjóðhöfðingja

Akstur þingmanna, símtöl þeirra og ferðalög

Almenningur á vitanlega að fylgjast með þingmönnum í rauntíma. Hvar þeir eru og hverja þeir hitta; fá aðgang að sím- og tölvunotkun þjóna almennings. Og - auðvitað - ferðalögum.

Píratar eru sérstaklega áhugasamir um persónueftirlitið. Þeir hljóta að ríða að vaðið og setja sjálfir á sig ökklaband í þágu gegnsæis.

Fyrirséður prófíll á dæmigerðum Pírata: tölvuleikir um nætur, símtal við styrktarsjóði George Soros um hádegi, síðdegisrölt um kaffihús í hverfi 101. Akstur utan höfuðborgarinnar er Reykjanesbraut á leið í flugvél til útlanda á kostnað skattgreiðenda.

Allt um aksturskostnað á nýjum vef

Valdabarátta lamar ASÍ

Uppreisn VR gegn forystu Alþýðusambandsins og stjórnarkosningar í Eflingu lama almennu verkalýðshreyfinguna, sem veit ekki í hvorn fótinn hún á að stíga í kjaramálum.

Á meðan BHM-félögin gera kjarasamning er ekkert að frétta af ASÍ. Munurinn er sá að BHM glímir ekki við innanmein á meðan hver höndin er upp á móti annarri í ASÍ.

Í ASÍ er tekist á um raunsæi forystunnar annars vegar og hins vegar popúlisma andófshópa, sem m.a. kenna sig við sósíalisma, og boða afturhvarf til stéttabaráttu liðins tíma.

Alls óákveðið hjá ASÍ

Ekkert sumar á Sýrlandi

Tyrkneski herinn réðst inn í Afrin-héraðið í Norður-Sýrlandi til að hrekja þaðan hersveitir Kúrda. Til að verja héraðið taka Kúrdar upp samvinnu við sveitir Assad Sýrlandsforseta.

Assad er náinn bandamaður Rússa sem veita stjórnarhernum margvíslega aðstoð í lofti og láði. 

Hersveitir Tyrkja, sem eru að stórum hluta skipaðar sýrlenskum andstæðingum Assad, gætu átt von á harðri viðtöku sameinaðs herstyrks Kúrda og sýrlenska stjórnarhersins er nýtur stuðnings Rússa.

Die Welt gerir því skóna að borgarastyrjöldin í Sýrlandi verði flóknari þegar fyrrum andstæðingar, Kúrdar og Assad forseti, taka höndum saman.

Það verður ekkert sumar á Sýrlandi í ár.

Umskurður - Þorgeirsdómur

Á vesturlöndum ræður mannréttindatrú, en það eru veraldleg trúarbrögð um mannhelgi. Samkvæmt þeim eru inngrip í líf og limi einstaklings óheimil að honum fornspurðum.

Eldri en mannréttindatrú eru austræn trúarbrögð, misvinsæl á vesturlöndum, s.s. gyðingdómur, kristni og íslam. Í gyðingdómi og íslam tíðkast umskurður án heimildar einstaklingsins enda framkvæmdur á ómálga nýbura.

Fyrir þúsund árum stóðu Íslendingar frammi fyrir innleiðingu nýrra trúarbragða í heiðið samfélag. Þorgeir Þorkelsson, kenndur við Ljósavatn, var fenginn til að útkljá deilur kristinna og heiðinna. Niðurstaða hans var að allir skyldu taka skírn, verða kristnir a.m.k. að nafninu til, en þeir sem vildu enn blóta yrðu að gera það á laun. Jafnframt máttu þeir heiðnu stunda fóstureyðingar að fornum sið með barnaútburði og éta hrossakjöt en hvorttveggja var kristnum bannað. Við dóm Þorgeirs var unað.

Yfirfærður á samtímadeilur um umskurð yrði dómur Þorgeirs eftirfarandi: umskurður er bannaður en yfirvöld sjá í gegnum fingur sér þegar austræn trúarbrögð eiga í hlut og klippa forhúðina af sveinbörnum.

 

Vonaði að kirkjan stæði með börnum

Fyrirmyndarborgar hlýtur uppreisn æru - og tapar henni

Fyrirmyndarborgari hlaut uppreisn æru 2013. Vinstristjórn Jóhönnu Sig. var við völd fram á vor það árið.

Eitthvað virðist æran hafa verið laus og liðug fyrirmyndarborgaranum og fréttir segja hana tapaða á ný.

Nú hljóta fjölmiðlar að grennslast fyrir hverju sætir að vinstriflokkar hafa gefið út hæpna uppreisn æru fyrir fimm árum. Sennilega þó ekki. Fjölmiðlar kenna okkur að æran sé ávallt vinstriflokkanna - allir hinir eru ærulausir.

 

Eiginmaður Sunnu hlaut uppreist æru