Kári toppar Svandísarfrétt RÚV

Kári Stefánsson er toppari Íslands, ekki vafi þar á. Hann stjórnar dagskrá RÚV. Þegar hann fær ekki sæti honum samboðið kemur yfirlýsing: RÚV er með drottingarstæla.

Fréttastofa RÚV er með sömu hneigð og Kári og telur betra að veifa röngu tré en öngu. Dymbilvikuna toppaði RÚV með svandísarsmelli um fjármál eiginkonu forsætisráðherra. Svandís samdi fréttina á Laugarvatni í góðu stuði með gömlum allaballafélögum og RÚV birti: efnahagslegt fullveldi Íslands er að falli komið.

Kára Stefánsson var ekki mönnum sinnandi páskavikuna enda erfitt að toppa Svandísarfrétt RÚV. Lykilhugtakið er fullveldi, hugsaði Kári með sér og spurði sjálfan sig: er ekki klént að bankareikningur Önnu Sigurlaugar stúti fullveldinu? Verður ekki að finna eitthvað bitastæðara?

Pabbi Kára og pabbi Svandísar voru félagar í Alþýðubandalaginu sáluga. Kára hefur verið hugsað til orðræðunnar þar á bæ og dottið niður á snilldarlausn til að toppa RÚV-Svandísi.

Sigmundur Davíð er ,,uppvís að landráðum" skrifar Kári í Morgunblaðsgrein í dag, þriðjudag eftir páska.

Enginn toppar Kára.

Ráðleggur Sigmundi að segja af sér

RÚV minnkar, 365 miðlar vaxa

RÚV flæddi dymbilvikuna með einnar heimildar ,,fréttum" þar sem þingmenn stjórnarandstöðu fengu að úttala sig um fjármál eiginkonu forsætisráðherra. Viðtöl við þá sem báru blak af forsætisráðherra voru afflutt þannig að viðmælendur urðu að skrifa bloggfærslur til leiðréttingar.

Toppurinn hjá RÚV var fréttin með Svandísi Svavarsdóttur þingmanni Vinstri grænna þar sem hún sagði efnahagslegt fullveldi landsins í hættu vegna bankareiknings eiginkonu forsætisráðherra.

Öllum mátti vera ljóst að RÚV stundar pólitík ekki fréttamennsku í málinu. Þegar Sigmundur Davíð og Anna Sigurlaug tóku saman greinargerð til að svara ásökunum gerði RÚV þau viðbrögð tortryggileg.

365 miðlar sýna meiri fagmennsku en RÚV í fréttaflutningi af þessu máli.

Líklega rætt á þingflokksfundi

Trump svarar ákalli eftir hetjunni

Í bandarískri menningu er teiknimyndahetjan miðlæg. Hetjan er grípur afgerandi inn í atburðarás þar sem illmenni gera á hlut almennings. Einföld heimsmynd og skýr skilaboð eru aðall teiknimyndasagna sem oft verða að kvikmyndum.

Á þessa leið greinir Annika Hagley sókn Trump í bandarískum stjórnmálum.

Eftir tvípóla heim austurs og vesturs, kommúnisma og kapítalisma, Bandaríkjanna og Sovétríkjanna, góðs og ills er skortur á einfaldri heimsmynd - og hetju.

Trump skaffar hvorttveggja.

Ted Trump kominn í heiminn

Múslími um and-vestrænt uppeldi múslíma

Yasmin Alibhai-Brown er múslími sem gagnrýnir trúbræður sína og systur fyrir and-vestrænt uppeldi. Hún segir að trúarlegt uppeldi múslíma standi í vegi aðlögunar ungmenna að vestrænum lífsháttum.

Í verstu tilvikum fóstri múslímsk ungmenn með sér hatur á vestrænum gildum og leiðist út í hryðjuverk gegn samborgurum sínum.

Pistill Yasmin Alibhai-Brown er áminning um hve gjörsamlega mistókst að aðlaga múslíma að vestrænu borgaralegu samfélagi. Í nafni fjölmenningar komu múslímar sér upp hverfum víða á vesturlöndum þar sem múslímsk trúarmenning er allsráðandi. Trúarmenning múslíma stríðir gegn grundvallaratriðum vestrænna mannréttinda.

RÚV ræður ekki við texta Sigmundar Davíðs

RÚV kvartar undan texta Sigmundar Davíðs um pólitíska umræðu síðustu daga, sem RÚV er hvað duglegast fjölmiðla að halda á lofti. Í hádegisfrétt RÚV er í annarri efnisgrein tekið fram að texti forsætisráðherra sé heilar ,,12 útprentaðar blaðsíður."

Forsætisráðherra sendi ekki út prentað efni heldur birti hann textann á heimasíðu sinni. Í stað þess að segja efnislega frá greinargerð forsætisráðherra gerir RÚV sér að leik að prenta út textann og gera veður út af aukaatriði.

Fréttamenn RÚV hafa undanfarið endurbirt blogg og fésbókarfærslur stjórnarandstæðinga ásamt affluttum orðum viðmælenda.

Þegar liggur fyrir ítarleg greinargerð forsætisráðherra leitast RÚV enn við að afflytja umræðuna, núna með því að gera tortryggilega lengd greinargerðarinnar.

En kannski að fréttamenn RÚV ráði ekki við ítarlegri texta en nemur stuttri bloggfærslu?

 

Hvað snýr upp og niður?

Tunga, trú og 100 ára uppreisn

Írska páskauppreisnin á aldarafmæli. Leiðtogi uppreisnarinnar, Patrick Pearse, var skáld, hreintungumaður á íslenska vísu og skólamaður með sérstakt dálæti á strákum.

Trú var önnur uppspretta uppreisnarinnar. Írar urðu kristnir á undan Englendingum og héldu í kaþólskuna þegar konungleg hentistefna, vegna hjónabandsvandræða Hinriks sjötta, leiddi til klofnings við Róm og mótmælendatrúar.

Þriðji þáttur uppreisnarinnar var andstaða við nýlendukúgun Englendinga. Þrátt fyrir að umræða um heimastjórn var á dagskrá breska þingsins frá níunda áratug 19. aldar komst ekki hreyfing á málið fyrr en rétt fyrir fyrra stríð. Þegar stríðið skall á var heimstjórn frestað.

Patrick Pearse og félagar töldu stríðið veikja stöðu Englands og hófu uppreisn páskana 1916.

Eftir stríðið tryggði Wilson forseti Bandaríkjanna framgang kúgaðra þjóða í Evrópu undir formerkjum þjóðríkjareglunnar.Írar gætu hafa fengið sömu kjör og Íslendingar, sem náðu heimastjórn 1904 og fullveldi í stríðslok.

Írska uppreisnin var brotin af bak aftur á innan við viku. Pearse og aðrir leiðtogar uppreisnarinnar voru skotnir eftir hraðsoðin réttarhöld.

Írar fengu fríríki og síðar lýðveldi, mínus Norður-Írland, en ekki án frekari blóðsúthellinga þar sem borgarastyrjöld tók stærsta tollinn.

Enn hefur ekki gróið um heilt milli Íra og Englendinga, samanber greinar í breskum blöðum á aldarafmælinu um að Írar eigi inni afsökunarbeiðni frá Englendingum.

Aldarafmælið er einnig tilefni til endurskoðunar á trúarþætti uppreisnarinnar. Efasemdir um hreintunguna eru aftur fáar. Kannski vegna þess að Írar tala ensku.

Bjarni Fel í svart hvítu

Á dögum svart-hvíta sjónvarpsins voru sýndir vikugamlir leikir úr ensku knattspyrnunni. Bjarni Fel flutti að jafnaði inngang að leiknum, sem var sýndur klipptur, kannski 15 til 20 mín. af hvorum hálfleik.

Minnisstætt er að þegar Bjarni kynnti leik Coventry á móti að mig minnir Tottenham. Leikurinn var tíðindalítill fyrir utan vinstri vængmann Coventry, líklega Tommy Hutchinson, sem sýndi eftirtektarverð tilþrif.

Bjarna Fel tókst að glæða áhuga á leiknum með því að vekja athygli á vængmanninum - fyrir leik - þannig að úr varð skemmtun síðdegis á laugardegi.

Frétt RÚV/Guardian um áhrif Bjarna Fel á íslenska knattspyrnumenningu fær ábyggilega marga til að rifja upp atvik þar sem rödd Bjarna í svart-hvítu sjónvarpi var aðalmálið.

Brynjar: ekki vanhæfi. RÚV: jú víst, Svandís segir það

Brynjar Níelsson þingmaður Sjálfstæðisflokksins varð að skrifa bloggfærslu í gær til að bera af sér afflutning RÚV í hádegisfréttum þar sem Brynjar var aðalheimildin.

Í bloggfærslunni gefur Brynjar lítið fyrir umræðu RÚV um vanhæfi forsætisráðherra.

Mér finnst hins vegar afar langsóttar kenningar um vanhæfi ráðherrans. Þá er ekki hægt að halda því fram að ráðherrann hafi misfarið með vald í framgöngu sinni gagnvart slitabúunum, hvað þá að aðrir hagsmunir hafi ráðið en almannahagsmunir, sem er auðvitað aðalatriðið.

Brynjar birti pistil sinn síðdegis í gær. RÚV minntist ekki einu orði á afdráttarlausa afstöðu Brynjars, sem þó hafði verið aðalheimild hádegisfrétta RÚV. Svandís Svavarsdóttir þingmaður Vinstri grænna var á hinn bóginn kölluð til vitnis um að forsætisráðherra grafi undan efnahagslegu fullveldi Íslands.

Þessi kostulega frétt var sú fyrsta í fréttum RÚV í gærkvöld. Enginn annar fjölmiðill á Íslandi, og ekki einu sinni stórkarlalegustu bloggarar landsins, hafa kveikt á stóra sannleik RÚV og Svandísar: efnahagslegt fullveldi Íslands er í hættu vegna þess að eiginkona forsætisráðherra á bankareikning í útlöndum.

ESB er stór útgáfa af Belgíu

Hryðjuverkamenn gátu ferðast til og frá Brussel þegar þeir skipulögðu ódæðin í París á síðasta ári. Ráðherrar innanríkis- og dómsmála buðu fram afsögn sína þegar uppvíst varð um margar brotalamir í vörnum gegn hryðjuverkum.

Mistök og vangeta belgískra yfirvalda er Charles Moore í Telegraph tilefni til að meta frammistöðu Evrópusambandsins í málaflokknum varnir gegn hryðjuverkum. Hans niðurstaða er að Evrópusambandið sé stór útgáfa af Belgíu; getulaus að tryggja öryggi borgaranna.

Rétt fyrir hryðjuverkin í Belgíu skrifaði Tim King í Politio um hryðjuverkavarnir Belga undir fyrirsögninni Belgía er ónýtt ríki.

Skotinn í lærið á sporvagnastöð

Brynjar leiðréttir RÚV

RÚV hélt áfram í hádegisfréttum herferðinni gegn forsætisráðherra. Í inngangi að frétt RÚV er sagt að Brynjar Níelsson vilji þingflokksfund Sjálfstæðisflokksins til að ræða fjármál eiginkonu forsætisráðherra. Það væri stórfrétt ef stjórnarþingmaður færi fram á þingflokksfund enda gæfi það slúðrinu vængi.

Í inngangi fréttarinnar segir:

Brynjar Níelsson, þingmaður Sjálfstæðisflokksins, segir að Wintris-málið sé óþægilegt fyrir ríkisstjórnarsamstarfið, sérstaklega í ljósi samninga við kröfuhafa og afnáms hafta. Þingflokkur Sjálfstæðisflokksins þurfi að funda um málið og fá allar staðreyndir upp á borð áður en hægt sé að taka afstöðu til þess. (leturbreyting pv).

Þetta er rangt. Brynjar óskar ekki eftir þingflokksfundi til að ræða fjármál Önnu Sigurlaugar. Það kemur fram í meginmáli fréttarinnar, þar sem orð Brynjars eru endursögð.

Brynjar sá sig knúinn að birta bloggfærslu til að taka af öll tvímæli: hann telur forsætisráðherra ekki vanhæfan. En hann gerir ráð fyrir að þingflokkurinn ræði málið, ,,sérstaklega ef fram kemur vantrauststillaga á þinginu."

Það er vitanlega allt annað að gera ráð fyrir umræðum í þingflokki eða að fara fram á að þingflokkurinn ræði þetta tiltekna mál.

RÚV reynir sem fyrr að afbaka umræðuna til að hún þjóni pólitískum tilgangi fréttastofu RÚV.