Vinstrimenn stefna í tap vorið 2017

Vinstrimenn tala sig í stöðu hornkerlingar í stjórnmálum. Þeir sæta færis að hrinda frá sér kjósendum sem ekki samsama sig við 101-rétttrúnað í miðborg Reykjavíkur.

Nýjasta dæmið er búvörusamningurinn. Viðskiptablaðið vekur athygli á því að vinstrimenn sæta færis að lemja á bændum og tala um bændalaun eins og það sé ölmusa. Þegar listamannalaun eru til umræðu standa vinstrimenn grjótharðir á því að aðeins menningarfjandsamlegt fólk amist við þeim. Samkvæmt sömu rökum eru vinstrimenn landsbyggðarfjandsamlegir.

Í þingkosningunum vorið 2017 verður kosið um tvær útgáfur af pólitík í tveim afgerandi málaflokkum. Útgáfurnar eru vinstri og hægri. Málaflokkarnir eru efnahagsmál annars vegar og hins vegar félags- og menningarmál í breiðum skilningi.

Vinstrimenn eru í pólitísku talsambandi við um þriðjung kjósenda. Ólíklegt er að það breytist á þeim 15 mánuðum sem eru til kosninga.

Stéttastríð í Evrópu vegna innflytjenda

Straumur innflytjenda til Evrópu breytir pólitísku landslagi álfunnar. Flokkar sem leggjast gegn viðtöku innflytjenda stækka á kostnað valdaelítunnar og efnafólks.

Hagfræðingurinn David McWilliams segir stéttastríð háð í Evrópu, á milli þeirra sem græða á innflytjendum, sem eru fyrirtæki og efnafólk, og hinna sem tapa, fátækir og efnalitlir.

Ástæðan er sú að innflytjendur taka vinnu, húsnæði og félagslega aðstoð frá lágstéttum Evrópu.

 

Rústa hluta frumskógarins

Seðlabankastjóri: evran er dauðadæmd

Í nýrri bók fyrrum seðlabankastjóra Englands, Marvyn King, segir að evran sé dauðadæmd sökum þess að hún geta aldrei þjónað 19 ólíkum hagkerfum.

Þau 19 hagkerfi sem nota evruna eiga aðeins þann möguleika að sameinast um eina ríkisfjármálastefnu, í raun miðstýrð Stór-Evrópa, en fyrir löngu er búið að útiloka það samrunaferli.

King segir að evru-svæðið mun hrekjast úr einni kreppunni í aðra við núverandi fyrirkomulag. Fyrr heldur en seinna munu ríki, einkum í Suður-Evrópu, átta sig á þeirri staðreynd að innan evru-samstarfsins er enginn möguleiki á efnahagslegri framþróun og segja skilið við gjaldmiðlasamstarfið.

Áfall ef Bretar segðu skilið við ESB

Helgi pírati: pólitík án deilna

Helgi Hrafn Gunnarsson þingmaður Pírata biður um pólitík án deilna í afsökunarbeiðni sinni til Birgittu Jónsdóttur.

Ég hef líka stund­um farið óvar­lega með vald sjálf­ur og vil endi­lega að við höld­um þeirri umræðu áfram, en þá frek­ar í góðu rúmi þar sem við get­um tekið málið fyr­ir með sem minnstri hættu á deil­um.

Segir Helgi. Pólitík án deilna er svolítið eins og eggjakaka án eggja. Þar sem engar deilur eru ríkir ein skoðun.

Samfélagið sem Píratar stefna að er ekkert sérlega viðkunnanlegt.

Helgi Hrafn biðst afsökunar

Píratar: valdaflokkur eða mótmælahreyfing?

Deilur Birgittu Jónsdóttur og Helga Hrafns Gunnarssonar, þingmanna Pírata, snúast um það hvort flokkurinn eigi að vera hluti af pólitíska kerfinu eða standa utan við það sem mótmælahreyfing.

Krafa Birgittu um stutt kjörtímabil og þjóðaratkvæði um stjórnarskrá og ESB-umsókn er óraunsæ og fær aldrei framgang í eðlilegu árferði. Helgi vill gera Pírata stjórntæka og laga sig að pólitíska kerfinu.

Lífdagar Pírata verða lengri ef þeir fylgja Birgittu. Á hinn bóginn gætu þeir haft meiri áhrif á landsstjórnina ef Helgi Hrafn verður ofan á. En mótmælahreyfing, eins og Píratar eru að stofni, verður aldrei langlíf þegar hún gengur málamiðlun valdanna á hönd.

Sakar Helga um rangfærslu

Katrín vill losna við Steingrím J. og hans lið

Katrín Jakobsdóttir formaður Vinstri grænna mælist ítrekað vinsælasti stjórnmálamaður landsins. Samt hreyfist fylgi flokksins ekki spönn frá rassi, er undir tíu prósent.

Katrín er komin á þá skoðun að gamla settið, Steingrímur J., Björn Valur, Svavarsdóttir og fleiri, séu dragbítar á flokkinn. Katrín segir á flokksráðsfundi:

Það er því nauðsynlegt að hver og einn í forystusveit flokksins, sem samanstendur að mestu af reynsluboltum, íhugi hvort hann sé rétta manneskjan til að framfylgja stefnunni.

Þetta eru nokkuð skýr skilaboð. Samkvæmt Katrínu eru viðbrögð næsta lítil - alveg í samræmi við fylgi flokksins.

Femínista-nasisti og öfgamenning RÚV

Í einni rapplínu Reykjavíkurdætra í sjónvarpsatriði hjá Gísla Marteini segir ,,ég er femínista-nasisti." Nokkur umræða er um atriðið sem sýnir konur í hlutverki gerenda í kynferðislegum yfirgangi. Þekktur femínisti segir á fésbók: ,,Þetta Reykjavíkurdætra/Ágústu mál er afhjúpun á því hvað stúlkur/konur fá mikið minna pláss til athafna en strákar/karlar."

Annar yfirlýstur femínisti vitar í rapplínur frá karli þar sem konum er lýst á niðrandi hátt og spyr hvers vegna ekki var gert veður út af því.

Báðir þessir femínistar réttlæta öfgar með því að benda á aðrar ekki síðri. Femínista-nasisma atriðið er þá svar við öfgum í karlamenningu sem fyrirlítur konur.

Jafnréttissinnar, þ.e. þeir sem vilja jafnrétti kynjanna byggt á gagnkvæmri virðingu, geta ekki annað en bent á að öfgar stuðla hvorki að málamiðlunum né jafnvægi. Eðli öfganna er að ala á hatri, andstyggð og skilningsleysi.

RÚV er sérstaklega næmt á öfgamenningu og lítur á það sem hlutverk sitt að útbreiða öfgaboðskap. Femínista-nasista atriðið er talandi dæmi um starfsháttu RÚV.

 

 

Kennedy um valdheimsku Bandaríkjanna

Robert F. Kennedy yngri, hvers faðir var myrtur af araba, skrifar grein um afskipti Bandaríkjanna af málefnum miðausturlanda. Greinin afhjúpar Bandaríkin sem höfuðskúrk í óöldinni í miðausturlöndum.

Vald til að stjórna atburðarás þar sem ríkisstjórnum er skipt út eftir þörfum og vald til að ráða yfir frásögninni af atburðarásinni stuðlar að valdheimsku sem ber feigðina í sér fyrir alla hlutaðeigandi. Ríkisstjórnir Bandaríkjanna höfðu þetta vald eftir seinni heimsstyrjöld og beittu því skipulega i miðausturlöndum.

Kennedy lýsir afskiptum Bandaríkjanna af innanríkismálum í Sýrlandi, Íran og Írak áratugi aftur í tímann. Olíuhagsmunir bandarískra fyrirtækja eru í aðalhlutverki. Bandaríska leyniþjónustan, CIA, studdi blóðugar stjórnarbyltingar ef sitjandi ríkisstjórn starfaði ekki samkvæmt bandarískri forskrift.

Assad Sýrlandsforseti varð skotmark Bandaríkjanna vegna þess að hann neitaði að samþykkja olíuleiðslu um Sýrland sem stjórnin í Washington vildi að yrði lögð. Bandaríkin veittu fé til uppreisnarhópa gegn Assad, m.a. hópum sem seinna urðu að Ríki íslam.

Grein Kennedy er í takt við breytta umræðu um afskipti Bandaríkjanna af miðausturlöndum. Æ betur kemur í ljós hve illa Bandaríkin standa að málefnum miðausturlanda og umræðan verður gagnrýnni enda skilja Bandaríkin eftir sig sviðna jörð, t.d í Írak.

Kennedy segir einboðið að arabar sjálfir ráði fram úr sínum málum, Bandaríkin eiga að standa á hliðarlínunni. Það þýddi að Bandaríkin létu af valdheimsku sem þeir hafa stundað í 65 ár í þessum heimshluta. Líkurnar eru ekki miklar að stórveldið sjái að sér í bráð. Því miður fyrir alla viðkomandi.

 

Vopnahlé í Sýrlandi

ASÍ elskar suma neytendur meira en aðra

Alþýðusamband Íslands í gegnum lífeyrissjóðina stendur fyrir stórfelldum hækkunum á útgjöldum fjölskyldna sem tryggja hjá VÍS - um leið arðgreiðslur eru stórhækkaðar. Á sama tíma er Alþýðusambandið á ferðalagi fyrir hönd neytenda að gagnrýna búvörusamninga.

ASÍ ætti að útskýra fyrir almenningi hvers vegna sumir neytendur fá skít úr hnefa frá verkalýðshreyfingunni á meðan aðrir neytendur eru notaðir til að berja á bændum.

Hverskonar þjóðfélag vill ASÍ annars að við búum í?

Þingið hafni vondum samningi

Þjóðarsátt um nýtt bankakerfi

Bankar eru með heimild frá ríkinu að búa til peninga, í formi útlána langt umfram innlán. Ríkið ber einnig ábyrgð á bankastarfsemi og grípur inn í þegar bankar fara í þrot, samanber hrunið 2008.

Tveir af þrír stóru viðskiptabönkunum, Íslandsbanki og Landsbanki, eru í ríkiseigu. Sá þriðji er í söluferli þar sem líklegasti kaupandinn er lífeyrissjóðir.

Kjöraðstæður eru til að bankagróðinn renni þangað sem hann á heima - til almennings. Allar forsendur eru til að skapa þjóðarsátt um nýtt bankakerfi. Við getum tekið okkur næstu tvö til fjögur árin að ræða fyrirkomulag sem yrði bæði sanngjarnt og skilvirkt. Á meðan fáum við í sameiginlegan sjóð tugi milljarða á ári í bankagróða. 

Bankarnir með 107 milljarða hagnað