Brynjar leiðréttir RÚV

RÚV hélt áfram í hádegisfréttum herferðinni gegn forsætisráðherra. Í inngangi að frétt RÚV er sagt að Brynjar Níelsson vilji þingflokksfund Sjálfstæðisflokksins til að ræða fjármál eiginkonu forsætisráðherra. Það væri stórfrétt ef stjórnarþingmaður færi fram á þingflokksfund enda gæfi það slúðrinu vængi.

Í inngangi fréttarinnar segir:

Brynjar Níelsson, þingmaður Sjálfstæðisflokksins, segir að Wintris-málið sé óþægilegt fyrir ríkisstjórnarsamstarfið, sérstaklega í ljósi samninga við kröfuhafa og afnáms hafta. Þingflokkur Sjálfstæðisflokksins þurfi að funda um málið og fá allar staðreyndir upp á borð áður en hægt sé að taka afstöðu til þess. (leturbreyting pv).

Þetta er rangt. Brynjar óskar ekki eftir þingflokksfundi til að ræða fjármál Önnu Sigurlaugar. Það kemur fram í meginmáli fréttarinnar, þar sem orð Brynjars eru endursögð.

Brynjar sá sig knúinn að birta bloggfærslu til að taka af öll tvímæli: hann telur forsætisráðherra ekki vanhæfan. En hann gerir ráð fyrir að þingflokkurinn ræði málið, ,,sérstaklega ef fram kemur vantrauststillaga á þinginu."

Það er vitanlega allt annað að gera ráð fyrir umræðum í þingflokki eða að fara fram á að þingflokkurinn ræði þetta tiltekna mál.

RÚV reynir sem fyrr að afbaka umræðuna til að hún þjóni pólitískum tilgangi fréttastofu RÚV. 

Athugasemdir

[Wilhelm Emilsson, 26.3.2016 kl. 00:26]

Væri ekki áhrifameira að tala um krossferð gegn forsætisráðherra?

[Wilhelm Emilsson, 26.3.2016 kl. 02:21]

Brynjar segir í greininni sem síðuhafi vitnar í: "Umræðan um málið er óþægileg fyrir ríkisstjórnina. Stjórnarflokkarnir komast því ekki hjá því að fara yfir málið og ræða það, sérstaklega ef fram kemur vantrauststillaga á þinginu."

Svo segist hann líka elska Framsóknarflokkinn. Það geri ég líka.