Fylgni og orsök er sitthvað

Fylgni milli tveggja breytna, t.d. bólusetningar og dauðsfalla, þýðir ekki að orsakasamhengi sé þar á milli. Meint orsök þarf að valda meintum afleiðingunum til að um orsakasamband sé að ræða.

Ís selst betur á góðviðrisdögum en í rigningu. Það þýðir ekki að aukin íssala valdi góðviðri (en sólskin er aftur orsakaþáttur íssölu).

Svo við gerumst heimspekileg: líf orsakar dauða í þeim skilningi að enginn deyr án lífs. Náum við háum aldri endum við líklega á hjúkrunarheimili. Þar deyjum við, - með eða án bólusetningar.

 

Sjö andlát tilkynnt í kjölfar bólusetningar

Trump, frelsari frjálslyndra vinstrimanna

Stærsta hlutver Trump er að fylkja saman góða fólkinu, frjálslyndum vinstrimönnum. Lykilsetningin er ,,ég er á móti Trump og því er ég góður" - alveg sama þótt hornsteinn mannréttinda, tjáningarfrelsið, molist mélinu smærra.

Af Trump er það að segja að í grunninn er hann frjálslyndur, þótt ekki sé hann vinstrimaður. Í forsetatíð sinni reyndi hann að skafa af verstu agnúa æðibunugangsins, s.s. tilgangslaus hernaðarævintýri í fjarlægum löndum, fátæktargildru alþjóðavæðingar, hreinni heimsku um að líffræðilegu kynin séu ekki tvö heldur þrjú, fimm eða seytján og annarri álíka um að veðurfar jarðarinnar sé manngert.

Embættistíð Trump lýkur eftir viku og þar með samstöðu frjálslyndra vinstrimanna. Þegar góða fólkið fær völdin verður fjandinn laus enda frelsarinn horfinn á braut.

Verður Trump píslarvottur?

Jón Ásgeir á stjá, banki til sölu

Skeljungur flyst kannski úr landi, en kannski verður fyrirtækið netverslun. Kannski verður fyrirtækið fjárfestingafélag en kannski selji það fjárfestingar í Færeyjum og einbeiti sér að kjarnasamstarfi á Íslandi.

Mótsagnirnar hér að ofan eru augljósar öllum sem kunna að lesa. En áður en eitthvert ,,kannski" raungerist þarf Jón Ásgeir Jóhannesson að eignast allan Skeljung. 

Hraðar hendur vinna betur en margar hendur. Vasaþjófar birtast ekki í hópum heldur sérhver einn og stakur. Bandalagið, sem þeir hafa með sér, er allt á bakvið tjöldin. Fundirnir ýmist í Öskjuhlíð eða á snekkju í Karabíska hafinu.

Jón Ásgeir var í útrás I kenndur við Baug. Í útrás II er viðskeytið Skeljungur. Sniðmátið er það sama, fyrst Bretland síðan heimurinn og loks hrun á Íslandi.

Menn eins og Jón Ásgeir gefa kapítalisma vont orðspor. ,,Umbreytingin" sem hann talar um er að taka eigur, blása þær upp í verði, en stökkva frá borði áður en blaðran springur. Koma svo heim aftur, fá eigur á útsöluverði og byrja á ný.

Og nú er gamli bankinn hans Jóns Ásgeirs til sölu, Íslandsbanki. Við, almenningur á Íslandi, eigum bankann núna. Í sumar verður bankinn seldur.

Jón Ásgeir eða einhver af sama sauðahúsi kaupir bankann og byrjar að tala um ,,umbreytingu" og tækifæri erlendis. Allir læsir sjá skriftina á veggnum. Bitamunur en ekki fjár er á útrás I og útrás II. 

Erum við ófær að læra af reynslunni Bjarni, Katrín og Sigurður?

Mikil tækifæri í rekstri í Bretlandi

Kolbeinn: RÚV er Þjóðviljinn

Þingmaður Vinstri grænna, Kol­beinn Ótt­ars­son Proppé, er bersögull um RÚV. Fjölmiðillinn tryggi að ekki séu óþarflegar margar staðreyndir að þvælast fyrir okkur. Orðrétt:

[Kolbeinn] seg­ir að at­b­urðir heims­ins und­an­far­in miss­eri und­ir­striki mik­il­vægi þess að hafa sam­eig­in­leg­an skiln­ing á staðreynd­um mála. Í því skyni gegni sterk­ur rík­is­miðlill lyk­il­hlut­verki.

RÚV þjónar sama hlutverki og Þjóðviljinn forðum. Munurinn er þó sá að Þjóðviljinn var safnaðarbréf fárra en RÚV er ríkisfjölmiðill. Staðreyndirnar sem Efstaleiti velur fyrir þjóðina eru valkvæðar. Einn ríkisfjölmiðill, einn sannleikur er ekki boðleg pólitík. 

Hagur neytenda og auglýsenda sé tryggður

Merkel þekkir fasisma og alræði

Kanslari Þýskalands þekkir sögu fasisma og kommúnisma þekkir Merkel af eigin raun sem fyrrum þegn Austur-Þýska alþýðulýðveldisins.

Yfirgangur fasisma og alræðis birtist í ýmsum myndum. 

Tæknirisar sem ráða samskiptamiðlum í bandalagi við meinta frjálslynda vinstrimenn í Bandaríkjunum eru ein birtingarmynd fasisma og alræðis 21stu aldar.

Merkel veit sínu viti.

Merkel hissa á banngleði miðlanna

Búsáhöld, Trump og lýðræðið

Árásin á þinghúsið í Washington og búsáhaldabyltingin í Reykjavík fá samanburð í umræðu sem vísir.is tekur saman.

Í báðum tilvikum ræðst æstur múgur á þjóðþing. Atlagan á Austurvelli var svæsin og ofbeldisfull, eins og fram hefur komið hjá fórnarlömbum atgangsins.

Ef lýðræðið er frjáls skoðanaskipti en árás lýðs á þjóðþing tilraun til valdaráns, tja, þá er morgunljóst að byltingartilraunin, sem kennd er við búsáhöld, er engu skárri en atlagan að Þinghól þar vestra.

Þeir sem helst höfðu sig í frammi í búsáhaldabyltingunni með ofbeldi og látum ættu að kannast við gjörðir sínar, stíga fram og biðjast afsökunar. Það væri falleg athöfn auðmýktar fólks sem einatt sér flísina í auga náungans en ekki bjálkann í eigin auga.

En, auðvitað, það mun enginn biðjast afsökunar á ofbeldisverkum í búsáhaldabyltingunni. Risið er ekki hærra á sumu fólki. Meira en áratug síðar stritast það við að úthúða samborgurum sínum fyrir skort á lýðræðiskennd en brennur sjálft í skinninu eftir tækifæri að taka upp grjót á alþingi götunnar.

Hvít lögga hetja demókrata - flóttamenn til Íslands?

Hvítur miðaldra lögreglumaður, Bri­an Sicknick, er hetja frjálslyndra vinstrimanna eftir að hann galt með lífi sínu varðstöðu við Þinghól þeirra Bandaríkjamanna.

Demókratar, þ.e. frjálslyndir vinstrimenn, töldu til skamms tíma lögregluna til óþurftar, vildu leggja hana niður með því að hætta fjármögnun, defund the police. Lögreglan, sérstaklega hvítir karlmenn í lögreglubúningi, voru taldir afkomendur þrælahaldara.

En, sem sagt, Brian Sicknick er hetjan sem reyndi að halda uppi lögum og reglu. Demókrötum var meinilla við lög og reglu á meðan þeir höfðu hvorki forsetaembætti né meirihluta í öldungadeildinni. Núna er valdið þeirra og uppgjör framundan.

Miðstöð skúrkanna í dag er Repúblikanaflokkurinn, Það á að setja flokkinn í heild á ákærubekkinn, segir New Republic. Þeir sem í gær héldu sig vera í góðum og gildum stjórnmálaflokki Abraham Lincoln vakna í dag upp við það að vera í glæpasamtökum - og eiga yfir höfði sér opinbera ákæru. Afturvirk lög eru sérgrein byltingarmanna.

Ísland tekur á móti flóttamönnum frá Venesúela vegna óstjórnar sósíalista. Haldi fram sem horfir má búast við Bandaríkjamönnum að flýja pólitískar ofsóknir í heimalandinu.

 

Andlátið rannsakað sem manndráp

Landvarnir fá nýja merkingu

Kínaveiran er bæld innanlands, eða svo gott sem. Í útlöndum víða geisar hún sem aldrei fyrr.

Af því leiðir er Keflavíkurflugvöllur fyrsti viðkomustaður veirusmits er gæti sett daglegt líf landsmanna úr skorðum á ný með tilheyrandi samfélagslokunum. Við vorum í þessari stöðu í fyrrasumar. Afsláttur var gefinn á millilandaferðir og svo þurfti að skella í lás um haustið.

Ef gefið er að þjóðin verði ekki öll bólusett fyrr en í sumar eru næstu 4-6 mánuðir að mestu út úr myndinni sem tími ferðalaga til og frá landinu.

Snúin staða, óneitanlega, bæði fyrir yfirvöld og almenning.

17 smit á landamærunum – 3 innanlands

Frjálslyndi í klóm fasista

Frjálslyndi er hugmyndafræði um frelsi til orða og athafna. Nú virðast frjálslyndir í Bandaríkjunum þeirrar skoðunar að forseti sem fékk yfir 70 milljónir atkvæði, en tapaði þó, sé slík ógn við frjálslyndið að honum og fylgismönnum hans skal úthýst af helsta vettvangi skoðanaskipta, sem eru samfélagsmiðlar.

Enginn getur kallað sig frjálslyndan og stutt útilokun frá frjálsri umræðu. Sá sem segist frjálslyndur en bannar frjáls skoðanaskipti er í mótsögn við sjálfan sig.

Frjálslynd skoðanakúgun er fasismi. Valdahyggjan innifalin í fasisma birtist í ýmsum útgáfum, allt frá rétttrúnaði yfir í helför.

Sjálfsmynd frjálslyndra fasista er í grunninn brengluð. Sá sem er andstæðan við það sem hann segist vera gengur kannski heill til skógar í skilningi geðlækninga en ekki í pólitík.

Fyrirsjáanlega verða þrennar pólitískar meginbreytingar eftir að frjálslyndir fasistar koma úr skápnum og yfirtaka sígilda frjálslyndið. Í fyrsta lagi fækkar þeim sem kenna sig við frjálslyndi. Flest fólk er heilt á geði og býr að meðalgreind. Það lætur ekki hafa sig að fíflum fasista. Í öðru lagi forherðast þeir sem halda í rétttrúnaðinn. Það er eðli öfga að magnast við mótlæti, gildir bæði í pólitík og safnaðarstarfi. Frjálslyndir fasistar leita að svikurum innan eigin raða með tilheyrandi hreinsunum og útskúfun.

Í þriðja lagi eykst viðspyrna gegn frjálslyndum fasistum. Sú viðspyrna mun ekki koma frá hófstilltri miðju, þar sem áður sátu sígildir frjálslyndir. Öfgar ala á öfgum. 

Líklega, og vonandi, er ofmælt að við lifum síðustu daga lýðræðis og mannréttinda. En framundan er illvíg hugmyndabarátta þar sem meginstofn vestrænna stjórnmála síðustu tveggja alda er genginn fyrir ætternisstapa. 

Amazon úthýsir vettvangi öfgamanna

Og kjörhiti jarðarinnar er hver?

Enginn veit hver kjörhiti jarðarinnar er. Svolítið skrítið, ekki satt? Ógrynni fjármuna er eytt í að draga úr hlýnun jarðar um 2 gráður á Celcíus næstu áratugi en samt veit enginn hvaða hitastig ætti að vera á jarðkringlunni okkar. Þetta er sagt og skrifað bókstaflega: enginn veit kjörhita jarðarinnar. 

Jörðin hefur hlýnað um 0,07 gráður á áratug frá 1880, segir NOAA sem er bandarísk alríkisstofnun. Árið 1880 er notað sem viðmiðunarár þar sem áhrif mannsins á hitastig jarðar eru útilokuð fyrir þann tíma. Samantekt á öðrum mælingum sýnir svipaða niðurstöðu.

Allan þann tíma sem maðurinn hefur brennt jarðefnaeldsneyti í því mæli að geta mögulega haft áhrif á hitastig jarðar hefur hitinn ekki hækkað nema um eina gráðu á Celcíus (14 áratugir sinnum 0,07 gráður = 0,98)

Tímabilið 1300-1900 er kallað litla ísöld. Þá var kaldara á jörðinni en á tímabilinu þar á undan, sem kallað er miðaldahlýskeiðið, 900-1300. Af þessu leiðir að hitastig jarðar hlaut að hækka eftir lok litlu ísaldar burtséð frá athöfnum mannsins. Almenn og viðurkennd staðreynd er að veðurfar breytist frá einum tíma til annars.

Meðalhita á jörðinni er erfitt að mæla, segja sérfróðir, en hann liggur nálægt 15 gráðum. Hækkun á meðalhita um eina gráðu á 140 árum er eðlileg og ekkert til að hafa áhyggjur af.

Hávaðinn og lætin út af meintum áhrifum mannsins á veðurfarsbreytingar eru í engu samræmi við staðreyndir málsins. Þegar við bætist að enginn veit kjörhita jarðarinnar verður málið allt stórundarlegt. Maður þarf beinlínis að skilja vit og dómgreind eftir heima ætli maður að stökkva á vagn hamfarasinna. 

 

2020 jafnar hitamet 2016