Fjallkonan kynlífstákn karla

Fjallkonan var áður þjóðarmóðir. Forn, virðuleg og ljóðmælt. Fjallkona ársins 2018 verður í höfuðborginni kynlífstákn karla, dragdrottning.

Bæld kynhvöt karla þarf á frelsun að halda að mati vinstrimeirihlutans í höfuðborginni og fær uppreist æru á þjóðhátíðardaginn.

Vinstrimenn urðu eitthvað svekktir vegna kvennaframboðs í nýliðnum borgarstjórnarkosningum. En að gera borgarmóður að kynlífstákni er kannski óþarflega langt gengið í hefndarhug. 

Dragdrottningin Gógó Starr fjallkonan í ár

Metnaður, málefni og flokkar

Málefnalegur ágreiningur innan stjórnmálaflokka er viðurkenndur, það er hluti af lýðræðinu. Þess vegna reynir fólk yfirleitt að klæða persónulegan metnað í málefnalegan fatnað. Nakinn metnaður er ekkert sérstaklega geðþekkur.

Í Eyjum tókst uppreisnarliðinu í Sjálfstæðisflokknum ekkert sérstaklega vel upp að gera ágreining sinn málefnalegan.

Fyrir utanaðkomandi sýnist nakinn metaður stjórna ferðinni. Traustur meirihluti er fallinn og fórnarlömbum fjölgar fremur en hitt.

 

„Reynt að finna sök hjá öðrum“

Bretar hafna hjálendustöðu Íslands

Ísland er hjálenda Evrópusambandsins, ásamt Noregi og Liechtenstein, í gegnum EES-samninginn. Bretar hafna aðild að EES eftir úrsögn úr ESB, Brexit.

Ákvörðun Breta felur í sér dauðadóm yfir EES-samningnum. Um leið og Bretland er komið með samning við ESB, eða sleppir því alfarið, verður öllum morgunljóst að EES er valdaframsal sem stenst enga skoðun.

Í dag er EES-samningurinn í öndunarvél embættismanna í Reykjavík og Osló. Tímabært er að pólitísk yfirvöld kippi öndunarvélinni úr sambandi. EES-samningurinn á heima á sama stað og Gamli sáttmáli - á ruslahaugi sögunnar.

Breskir þingmenn hafna EES

Spáð verðbólgusamningum

Atvinnulífið gerir ráð fyrir verðbólgusamningum næsta vetur. Verkalýðshreyfingin er herská og krefst meiri launahækkana en innistæða er fyrir.

Í stað þess að gefa eftir ættu stjórnvöld og atvinnurekendur að þreyja þorrann og góuna í verkföllum fremur en að skrifa upp á verðbólgu.

Allir tapa á verðbólgusamningum.

Væntingar ekki minni í áratug

Evrópa, flóttamenn og nýlendustefna

Frakkar og Ítalir eru komnir í hár saman vegna flóttamanna. Austur-Evrópa neitar að taka við þeim. Aðalhöfundur flóttamannastefnunnar, Angela Merkel kanslari Þýskalands, er kominn í minnihluta á heimavígstöðvunum.

Kjósendur í Evrópu snúa unnvörpum bakinu við opingáttarstefnu gagnvart flóttamönnum frá Norður-Afríku og miðausturlöndum. En samt halda þeir áfram að koma í leit að betri lífskjörum.

Flóttamenn verða ekki stöðvaðir á Miðjarðarhafi, það er fullreynt. Ítalir hafa reynt að gera samninga við uppreisnarhópa í Líbíu um að takmarka strauminn og orðið nokkuð ágengt.

Fyrr heldur en seinna horfast Evrópuríki í augun við þann veruleika að án skipulagðra inngripa í samfélög í norðurhluta Afríku og í miðausturlöndum verður flóttamannastraumurinn ekki stöðvaður.

Innrás í anda 19. aldar nýlendustefnu, sbr. Íraks-tilraun Bandaríkjanna 2003, er útilokuð. Reynslan sýnir að síðnýlendustefna leysir ekki vandann heldur eykur hann. 

Fjölhliða samvinna á sviði stjórnmála, öryggishagsmuna og efnahagsmála milli Evrópuríkja og nágranna þeirra í suðri og suðaustri er eina raunhæfa lausnin.

En til að koma á slíkri samvinnu þarf að vera vísir að pólitískum stöðugleika i heimalöndum flóttafólksins. Og þar skortir nokkuð á. Tveir kostir eru í stöðunni. Að Evrópuríki bíði þolinmóð eftir því að Eyjólfur hressist. Það gæti tekið áratugi. Í öðru lagi að taka upp hernaðarsamvinnu við skástu ofbeldisseggina til að koma á friði með valdi.

Engin samstaða er í Evrópu um hvernig skuli taka á vandanum vegna flóttamanna. Skýrir kostir taka ekki á sig mynd fyrr en vandamálið verður yfirþyrmandi. Ekki er enn komið að þeim tímapunkti.   

Ítölsk stjórnvöld saka Frakka um hræsni

Vinstri-Viðreisn fæst ódýrt

Að kveldi kjördags sagði formaður Viðreisnar, Þorgerður Katrín Gunnarsdóttir, að flokkurinn myndi selja sig dýrt í höfuðborginni.

Verðmiðinn er kominn, tildurembætti forseta borgarstjórnar. Viðreisn selur sig ódýrt vinstrimeirihlutanum, humarinn kemur án hvítvíns - kók nægir.

Vinstri-Viðreisn stimplar sig inn á óreiðuvæng stjórnálanna enda á flokkurinn þar heima.

Borgarlína „lykilmál“

Trump sigrar kommúnisma - múslímaheimurinn bíður

Handaband leiðtoga hins frjálsa heims og lítils kommúnistaríkis með kjarnorkuáætlun er tekið sem tákn um heimsfrið. Norður-Kórea er síðasta kommúnistaríkið sem ógnar heimsfriðnum. Kína er að vísu kjarnorkuvopnað kommúnistaríki en þykir of tengt heimsviðskiptum til að kveikja ófriðarbál.

Kommúnismi er ekki lengur lifandi hugmyndafræði í samkeppni við vestrænt lýðræði. Á milli Bandaríkjanna og Norður-Kóreu liggur aftur Íran, múslímskt klerkaveldi með kjarnorkuvopnametnað. Islam er lifandi hugmyndafræði með ítök víða um heim, líkt og kommúnisminn áður, þótt kjarnasvæði hugmyndafræðinnar sé miðausturlönd.

Næsta áskorun vestrænnar siðmenningar er múslímaheimurinn. Sitjandi leiðtogi hins frjálsa heims er betur í stakk búinn en forverinn í hólmgönguna. Sá hét Barack Hussein Obama.

Trump og Kim undirrituðu sáttmála

Sérfræðikostnaður þingflokka og huldublaðamennska

Þingflokkar fá ótaldar milljónir króna árlega frá ríkinu til að kaupa ,,sérfræðiþjónustu." Hluti af þessum peningum fer í að kaupa almannatengslaþjónustu sem vefmiðlar selja undir formerkjum blaðamennsku.

Ekki fyrr en þingflokkum verður gert að opna bókhaldið og sýna hvert sérfræðingakostnaðurinn rennur er hægt að koma í veg fyrir huldublaðamennsku af þessu tagi.

Flokkar eins og Píratar, Viðreisn og Samfylking hljóta að ríða á vaðið og opna bókhald þingflokkanna. Þarf nokkuð að vera á huldu?

Nafnlausar herferðir ekki ólöglegar

Próf sem flokkun, refsing og kennsla

Próf, hvort heldur í íslensku eða öðrum námsgreinum, eru tíðast notuð sem flokkun. Nemendur eru prófaðir til að kanna hvar þeir standa gagnvart námsefninu.

En það ber einnig við að próf eru refsing eða umbun fyrir (oft) forstokkaðar hugmyndir um hvað nemandi eigi að kunna og hvernig á að skilja hlutina. Í þeim tilfellum standa skapandi nemendur verr að vígi en þeir sem temja sér páfagaukslærdóm.

Ekki er hægt að komast hjá því að flokka nemendur að einhverju marki með prófum. En próf sem refsingu eða umbun er hægt að leggja af. Í staðinn komi próf sem eru liður í kennslu. Þau próf koma nemendum ekki á óvart, eins og oft vill verða, með opnum spurningum og fleiri en einum möguleika á réttu svari.

Lífið er einu sinni þannig að í fæstum tilvikum býður það aðeins eitt rétt svar.

Viðhorf til íslenskunnar mikilvægt

Fjórða kynið: internetkynið

Úr Bretaveldi berast þær fréttir að fyrsti einstaklingurinn er formlega greindur með internetfíkn. Um er að ræða unglingsstrák með ástríðu fyrir tölvuleikjum. Eftir því sem internetinu vex fiskur um hrygg og lífið á veraldarvefnum verður altækara er hætt við að þeim fjölgi sem eiga þar betur heima en í kjötheimum.

Fyrirsjáanlega finnst innan tíðar internetkyn sem hvorki er karl né kona, heldur ekki þriðja kynið, intersex. Læknisfræðilegar rannsóknir gætu sýnt fram á að internetkynið tilheyri ekki hversdagslegum lífheimi heldur sé af veröld vefsins. Í slíkum tilfellum væri ætlað samþykki viðkomandi, að tilheyra mannkyni, augljóst brot á mannréttindum.

Pólitískir rétttrúnaðarriddarar verða að undirbúa sig undir næstu baráttu, sem verður um annars heims kyn. Ekki er að efa að rétttrúnaðarriddararnir eigi hauka í horni þar sem eru Íslandsdeild Amnesty og heilbrigðisráðuneytið á Fróni.

Brotið gegn mannréttindum fólks