Samfylking verður sósíalistaflokkur

Stefna Samfylkingar er að ríkið taki til sín sífellt stærri hlut launafólks og setji í verkefni sem betur fer á að einstaklingar leysi sín á milli, t.d. húsbyggingar.

Góðærið vill Samfylking nota til að stækka ríkisbáknið sem þýðir að kreppan verður dýpri næst þegar slær í bakseglin.

Skattastefna Samfylkingar kemur til móts við Sósíalistaflokkinn er lítur á valdlausa skattgreiðendur sem óþrjótandi auðlind.

„Tálsýn og draumsýn“

Lög á verkföll eru lögmæt

Lög á verkfall BHM sumarið 2015 voru nauðsynleg, segir Mannréttindadómstóll Evrópu og vísar máli BHM gegn íslenska ríkinu frá.

Í lýðræðisríki er þingið æðsti handhafi fullveldis. Ef löggjafinn telur nauðsyn að setja lög á verkfall brýtur það ekki gegn elleftu grein mannréttindasáttmála Evrópu um félagafrelsi.

Félagafrelsi stendur ekki ofar fullveldinu. Þessi skilaboð frá mannréttindadómstólum ættu að slá á löngun sumra stétta að taka samfélagið í gíslingu með verkföllum.

BHM fær svör frá MDE í dag

Makaheimska og ráðið við henni

Sumt fólk er of vitlaust til að velja sér maka. Makaheimska er mannlegt ástand, verður ekki bönnuð með lögum, og nú er krafa um að kerfið, þ.e. ríkið, bregðist við.

Ríkistryggðir makar er eitt úrræði, sem má kanna. Ríkistryggðir makaður kæmu með ábyrgð frá ríkinu (heilbrigði, geðheilsa, þrifnaður, stjórnmálaskoðanir etc). Þeir sem gangast undir stöðlun sem ríkismakar fengju umbun, t.d. hálfar örorkubætur.

Makaheimska fólkið gæti tryggt sér ríkismaka með sérstökum samningi og yrði um leið að uppfylla skilyrði að vera tækt í makasamband.

Ef útaf bregður og annað tveggja sá makaheimski eða ríkismakinn halda ekki máli er ákvæði í makasamningi um ógildingu - með lögregluvaldi ef þörf krefur.

Þeir sem hvorki eru makaheimskir né hafa áhuga á að verða ríkismakar geta fundið sér maka á eigin ábyrgð - svona eins og normalt fólk. 

„Ég er ekki lengur hrædd við hann“

Valdefling kvenna og hlýnun jarðar

Til að hemja hnattrænar loftslagsbreytingar þarf að valdefla konur, jafna efnahagslegt kynslóðabil og berjast fyrir ,,loftslagsréttlæti", segir í Parísarsamkomulaginu um loftslagsmál.

Grein í Wall Street Journal vekur athygli á hversu langt riddarar réttlætisins ganga í málflutningi sínum. Um leið er bent á að loftslagsumræðan er sprungin blaðra.

Í 20 ár var loftslagsumræðan mál málanna. Viðkvæðið var að jörðin yrði óbyggileg ef við hættum ekki að nota bensín og dísil. Nú er allt loft úr umræðunni. Vandamálin sem umræðan bjó til standa þó eftir. 

Götur í Reykjavík eru þrengdar til að þvinga fólk að nota aðrar samgöngur en fjölskyldubílinn. Fólk lætur ekki segjast. Göturnar hægja á umferð og bílar í lausagangi auka mengun.

Vinstririddurum réttlætisins stendur hjartanlega á sama. Enda hugsa þeir aldrei um afleiðingarnar af stefnumálum sínum. Mannkynsfrelsarar eru dómgreindarlausir í réttu hlutfalli við ragnarökin sem þeir boða.

Sósíalismi og valdlausi skattgreiðandinn

Óopinbert málgagn Sósíalistaflokksins, Miðjan, kynnir áherslur flokksins í kjölfar kosningasigurs í höfuðborginni. Þar segir að notendur opinberrar þjónustu s.s. strætófarþegar, fósturbörn, leigjendur félagslegs húsnæðis og annað ,,valdalaust fólk" ,,verði með beinum hætti settir yfir mótun þjónustunnar."

Þjónustan sem borgin veitir er að stærstum hluta fjármögnuð með skattfé.

En það er ekki gert ráð fyrir að valdlausi skattgreiðandinn hafi neitt um það að segja hvernig skattfé er ráðstafað.

Í ríki sósíalismans eru sumir jafnari en aðrir. 

Þorbjörn faglegur í viðtali við Peterson

Fagmennska einkenndi viðtal Þorbjörns Þórðarsonar við Jordan Peterson á Stöð 2. Þorbjörn var búinn að lesa bók Peterson og hjó eftir þeim atriðum sem honum fannst forvitnileg.

Peterson er hvað merkilegastur menningarrýna á vesturlöndum þessi misserin. Af því leiðir er hann bæði með dygga fylgjendur en jafnframt hatramma andstæðinga.

Þorbjörn fór bil beggja í viðtalinu og á lof skilið.

Vinstrimenn finna leið að hata landsliðið

Sérgrein vinstrimanna er að hatast út í árangur, einkum ef land og þjóð eiga í hlut. Vinstrimönnum líður best við eymd og volæði - það rímar svo vel við sjálfsvitund þeirra.

Og nú hafa vinstrimenn fundið leið til að hatast út í landslið Íslands í knattspyrnu, sem vann sér þátttökurétt á heimsmeistaramóti íþróttagreinarinnar.

Tilefnið sem vinstrimenn stukku á til að þjóna eðli sínu er veggspjald af landsliðinu. Veggspjaldið ýkir líkamsburði fótboltastrákanna og það finnst vinstrimönnum fasískt. 

Ef landsliðsmenn hefðu verið sýndir sem pervisnir vælukjóar myndu þeir skora hátt í vinstrikreðsum sem kjósa einatt volæði fram yfir árangur. Keppnislið aumingja er aftur ekki líklegt til afreka á knattspyrnuvellinum. En það finnst vinstrimönnum harla gott. Því lélegri árangur því betra er mottó vinstrimanna. Í tveim orðum: ónýta Ísland.

Stöðvum íhlutun ESB í íslensk innanríkismál

Í gegnum EES-samninginn reynir Evrópusambandið jafnt og þétt að tryggja sér valdheimildir á Íslandi og í Noregi. Aðferðin er að taka einhliða ákvörðun í Brussel um að útvíkka EES-samninginn og láta hann ná yfir æ víðtækara svið.

Í gegnum EES-samninginn reynir ESB að ná yfirráðum yfir raforkuframleiðslu og núna að taka sér vald yfir persónuverndarmálefnum.

Upphaflega framkvæmd EES-samningsins var að sameiginleg stofnun EFTA-ríkja og ESB-ríkja færi með úrskurðarvald í ágreiningi um samninginn. ESB grefur skipulega undan jafnræðinu og tekur sér auknar valdheimildir á kostnað EFTA-ríkjanna Íslands, Noregs og Liechten­stein.

Evrópusambandið notar EES-samninginn til að ómerkja fullveldi Íslands. Alþingi verður að stöðva valdatilkall Evrópusambandsins í íslensk innanríkismál.

Virðist ekki standast stjórnarskrána

Óbreytt ástand er góðæri, Þorsteinn

Í landinu er góðæri með hagvexti, fullri atvinnu og björtum framtíðarhorfum. Viðreisn mómælir kröftuglega góðærinu, hafnar góðærinu.

Þorsteinn Víglundsson þingmaður Viðreisnar krefst þess að snúið verði baki við góðærinu og gerðar verði samfélagstilraunir að hætti vinstriflokka til að koma því fyrir kattarnef.

Hreinskilinn maður hann Þorsteinn og jákvætt af honum að koma til dyranna eins og hann er klæddur.

Íhaldsstjórn um óbreytt ástand

Þetta reddast; lífsspeki Íslendinga á BBC

Viðkvæðið ,,þetta reddast" er heimspeki Íslendinga, samkvæmt BBC. Lífsviðhorfið, sem orðin endurspegla, var mótað í aldanna rás þegar Íslendingurinn glímdi við náttúröflin. Oft stóð tæpt en þjóðin slapp með skrekkinn í tvísýnni lífsbaráttu.

Löngun Íslendinga að búa að sinu en ekki vera undir aðra komnir er útskýrð þannig að forfeður okkar fluttu frá norsku einveldi Haralds hárfagra. Menn vissu ekki alveg hver væri rétta stefnan, vildu bara burt, og ,,þetta reddast" sá um afganginn.

Eftir þúsund ár erum við enn litlu nær hvert við stefnum. Lífsbaráttan er orðin svo lauflétt að við þurfum ekki að vita það. Þetta reddast.