Vofa sósíalismans - herská verkó

Á meðan opinberir starfsmenn samþykkja hóflega kjarasamninga er almenna verkalýðshreyfingin herská sem aldrei fyrr. Ástæðan er innanmein í ASÍ-félögum.

Uppreisn VR gegn ASÍ og væringar í Eflingu gera það að verkum að forysta annarra verkalýðsfélaga þora ekki annað en að halda stíft í ítrustu kröfur - og helst aðeins umfram það.

Vofa sósíalismans leikur lausum hala í verkalýðshreyfingunni. Og vofur þola ekki raunsæi.

Vilja segja upp kjarasamningum

RÚV leggur sterka stjórnmálamenn í einelti

RÚV stundar að taka fyrir sterka stjórnmálamenn og leggja þá í einelti. Ásmundur Friðriksson er nýjasta fórnarlambið. Önnur síðustu misseri eru Sigríður Á. Andersen, Bjarni Benediktsson og Sigmundur Davíð.

RÚV stundar raðfréttamennsku í útvarpi, sjónvarpi og á netinu og býr til andrúmsloft eineltis þar sem skoðanir verða að staðreyndum. Málsbótum fórnarlamba er stungið undir stól. Hlutlægni og fagmennska eru látnar lönd og leið. Fjölmiðlar eins og Stundin og Kjarninn eru liðtækir í samvinnunni við RÚV og samfélagsmiðlar magna eineltið.

Vinstrimenn standa vörð um ósómann og moka fjármunum í eineltisstofnunina.

 

 

Telur fréttaflutning jaðra við einelti

Reiknuð spilling RÚV til að hrella Ásmund

Þegar ríkið borgar akstur einstaklinga, þingmanna eða opinberra starfsmanna, gengur það ekki þannig fyrir sig að viðkomandi starfsmaður tilkynni fjármálaráðuneyti um tegund og árgerð bifreiðar og fái greitt samkvæmt því.

Ríkið greiðir skv. taxta og gildir einu hvort maður ekur á Rolls Royce eða Kia.

Þegar RÚV reiknar spillingu á Ásmund Friðriksson þingmann gleymist ein mikilvæg forsenda: það er ekki spilling að fara eftir samþykktum reglum.

Rekstur bílsins rúmar 2 milljónir

Hlýnun og siðmenning

Hlýnun jarðar er hvorki alvond né algóð. Yfirmaður bandarísku umhverfisstofnunarinnar EPA vakti máls á þessari staðreynd. Engir ættu að vita það betur en Íslendingar.

Ísland byggðist á landnámsöld, á hlýskeiði. Í framhaldi stunduðu norrænir menn landbúnað á Grænlandi og ferðuðust til Ameríku. Þegar kólnaði á 13. öld eyddist byggðin í Grænlandi og Ísland breyttist úr því að vera hámenningarríki með bókmenntir og landkönnuði á heimsmælikvarða í kotríki fátæklinga sem hvorki skrifuðu né ferðuðust.

Ísland rétti ekki úr kútnum fyrr en tók að hlýna aftur á 19. öld. Við skrifuðum okkur til fullveldis og nýttum náttúruauðlindir til velmegunar.

Heimsendaspádómar vegna hlýnunar, hvort heldur af mannavöldum eður ei, eru ýkjusögur. Enginn vísindamaður getur sagt hvaða meðalhiti á jörðinni sé æskilegastur. Einfaldlega vegna þess að sá meðalhiti er ekki til.

Sjávaryfirborð hækkar sífellt hraðar

Dagur óttast Eyþór

Eyþór Arn­alds, odd­viti sjálf­stæðismanna í Reykja­vík, er borgarstjóralegur í fasi og framkomu.

Sitjandi borgarstjóri, Dagur B. Eggertsson, veit það manna best og beitir klækjum til að koma í veg fyrir að Eyþór sitji fundi og gæti skyggt á Dag.

Með því að vísa Eyþóri af fundi gerir Dagur ekki annað en að auglýsa örvæntingu sína um pólitíska stöðu vinstrimanna í borginni.

„Einn hafði ekki eins gaman að þessu“

Arion: banki eða vogunarsjóður?

Fyrir hrun voru íslensku bankarnir reknir eins og vogunarsjóður. Það er önnur meginskýringin á falli þeirra, - hin er að þeir voru rændir að innan af æðstu stjórn og eigendum.

Bankarnir sem stofnaðir voru á grunni hrunbankanna eru með óskýra ímynd, nema kannski Landsbankinn sem hefur það yfirbragð að vera þjóðarbanki.

Arion og Íslandsbanki eru aftur spurningarmerki. Fyrir hvað standa þeir og hvert ætla þær. Það eykur á tortryggnina að eignarhaldi þeirra er að hluta í höndum vogunarsjóða. Við þessar aðstæður er skynsamlegt að lífeyrissjóðirnir haldi að sér höndunum

Framtíðarsýn of óskýr

Brexit ógildir EES-samninginn

Bretar munu ekki ganga inn í EES-samninginn. Það þýðir að Evrópusambandið og Bretland munu komast að samkomulagi, fyrr heldur en seinna, um hvernig samskiptum skuli háttað eftir Brexit, - útgöngu Breta úr ESB.

Þar með er ESB komið með tvöfalt kerfi í samskiptum við grannþjóðir, EES-samninginn sem gildir fyrir Ísland, Noreg og Lichtenstein annars vegar og hins vegar Brexit-samkomulag. Þriðja útgáfan er marghliðasamningur við Sviss. Við þetta fellur pólitískt og efnahagslegt gildi EES-samningsins niður fyrir núll.

ESB hefur gert fríverslunarsamning við Kanada sem í mörgu tekur EES-samningnum fram. Það er fyrirmynd fyrir Ísland. EES-samningurinn er barn síns tíma, ætlaður þjóðum á leið inn í ESB. Hvorki Noregur né Ísland eru á leiðinni inn í ESB.

Vegið að grunnstoðum EES-samningsins

Heimsþorpið, samræða og sundrung

Samfélagsmiðlar eru að stofni lýðræðisvæðing, voru ætlaðir til að auðvelda skoðanaskipti með þá hugsjón að samskipti ali af sér umburðalyndi.

Reyndin féll ekki að kenningunni, skoðanaskipti valda oft meiri ágreiningi fremur en að þau auki skilning.

Heimsþorpið er sennilega ekki raunhæf mennska.

Hótar að hætta að auglýsa á Google og Facebook

Píratar og umræðuhefðin

Pírataspjallið virðist vera orðljótasti vettvangur umræðunnar. Píratar bera siðferðilega og pólitíska ábyrgð á umræðunni á vettvangi sem við þá er kenndur.

Framganga Pírata á alþingi er í senn fóður fyrir umræðuna og hvatning til orðræðu sem ekki er sæmandi siðuðu samfélagi.

Píratar hljóta að taka frammistöðu sína til endurmats þegar fyrir liggur hvert stefnir.

VR skorar ASÍ á hólm - samkeppi í stað samheldni

Verkalýðshreyfingin vann sigra á síðustu öld með samstöðunni. Núna er er það samkeppnin sem gildir; VR skorar ASÍ á hólm þar sem barist er um hvernig afli verkalýðshreyfingarinnar skuli beitt.

ASÍ stendur fyrir hagnýta verkalýðspólitík, vinnur innan þess ramma sem virkar. VR blæs í gamlar hugsjónaglæður um sósíalískt Ísland er lúti pólitískri forystu verkalýðshreyfingarinnar.

Óþarfi er að spyrja að leikslokum. Það hagnýta sigrar ávallt hugsjónir. En stundum er veruleikinn svolítið óljós og þá þarf að takast á um málefni og menn. 

Greiða atkvæði um úrsögn úr ASÍ í haust