Umhverfisstofnun: loftslag, alnæmi og erfðasyndin

Umhverfisstofnun birti yfirlýsingu til stuðnings þeirri pólitísku afstöðu að manngert veðurfar geri jörðina óbyggilega, ef ekki verður brugðist við.

Netmiðillinn Viljinn spyr Umhverfisstofnun nánar út í yfirlýsinguna og fær þetta svar:

„Ég vitna bara í Andra Snæ [Magnason, rithöfund], og segi ef vísindasamfélagið hefði ekki ekki sameinast um að finna lyf við alnæmi, að þá hefði það ekki tekist.“

Nýstárleg nálgun, óneitanlega. Alnæmi er sannanlega manngerður sjúkdómur með því að menn komust í snertingu við veika simpansa og apaveiran stökkbreyttist í aids, alnæmi.

Maðurinn ber aftur ekki ábyrgð á koltvísýringi í andrúmsloftinu nema að örlitlum hluta. Umhverfisstofnun er komin inn á svið trúarbragða þegar stofnunin kennir manninum um koltvísýring í andrúmslofti.

Næst þegar eldgos verður á Íslandi mun Umhverfisstofnun væntanlega feta slóð Jóns eldklerks sem í upphafi móðuharðindanna kenndi syndugu líferni mannanna um reiði guðs.  

Logi, Viðreisnar-Tobba með Pútín gegn Trump

Logi í Samfó og Þorgerður Katrín í Viðreisn eru sammála Pútín Rússlandsforseta: Trump ætti ekki að afturkalla þá fáeinu hermenn Bandaríkjanna sem enn eru í Sýrlandi.

Brottförin ,,gæti skapað eldfimt ástand", segir talsmaður Pútín.

Forveri Trump, Obama með frú Clinton sem utanríkisráðherra, settu sér markmið að koma Assad Sýrlandsforseta frá völdum. Assad sigraði andstæðinga sína með hjálp Rússa. Brottför síðustu hermanna Bandaríkjanna er viðurkenning á ósigri.

Stefna Trump er að fórna ekki bandarískum mannslífum í átökum sem varða ekki bandaríska hagsmuni. 

Í Norður-Sýrlandi eru í grunninn þrennir hagsmunir: tyrkneskir, kúrdískir og sýrlenskir. Að baki þessum hagsmunum standa tvö fullvalda ríki, Tyrkland og Sýrland. Kúrdar eru þjóð, dreifð um Tyrkland, Sýrland og Írak, en án þjóðríkis.

Bandaríkin geta ekki búið til kúrdískt þjóðríki. Stórveldið getur ekki einu sinni umskapað starfandi fullvalda þjóðaríki, sbr. Írak.

Helsta von Kúrda eru samningar við Sýrland og Rússland um einhvers konar sjálfsstjórnarhérað. Tyrkir vilja ekki slíka lausn enda sjálfsstjórn vísir að þjóðríki, sem fyrirsjáanlega gerir tilkall til landamærahéraða Tyrklands, sem byggð eru Kúrdum.

Þess vegna er ástandið í Norður-Sýrlandi eldfimt. Trump-hatur Loga og Þorgerðar Katrínar er ástæðan fyrir því að skötuhjúin eru komin í eina sæng með Pútín í utanríkismálum. Þau Logi og Þorgerður Katrín reyna að slá pólitískar keilur í innanlandspólitík en afhjúpa í leiðinni fádæma grunnhyggni í utanríkismálum. Enda bæði ESB-sinnar. 

 

Gæti skapað eldfimt ástand, segir Lavrov

Þórður kjarnasósíalisti: peningarnir vaxa á trjánum

Kjarninn er málgagn vinstrimanna, samfylkingarfólks sérstaklega. Ritstjóri Kjarnans segir í fréttaskýringu að peningar verði til upp úr þurru, nánast vaxi á trjánum. Fyrirsögnin slær tóninn:

Tæpur helmingur alls nýs auðs sem skapast fer til ríkustu Íslendingana

Afhjúpandi orðalag, ,,auður skapast". Enda stendur Þórður Snær ritstjóri við peningatréð, þetta sem vex hjá stjórnarráðinu og er skattfé almennings, og krefst þess að fá að plokka seðlana í útgáfu með þann boðskap að ,,auður skapast" án þess að mannshöndin komi þar nærri.

Andlegt slekti ritstjórans er einmitt á talandi stundu að búa til sæluríki sjálfssprottins auðs. Í Venesúela.

Viðreisn afneitar Bandaríkjunum, fylgir X-D?

Þorgerður Katrín formaður Viðreisnar afneitar samstarfi við Bandaríkin. Þorsteinn Pálsson, einn af stofnendum flokksins, heggur í sama knérunn.

Friðjón almannatengill orkufyrirtækja sem vilja leggja sæstreng er borinn fyrir afneitun sjálfstæðismanna á Bandaríkjunum. Það er hægt að græða meira á Evrópusambandinu.

Beðið er eftir útspili Gamma-strákanna. Styðji þeir nýja utanríkispólitík Sjálfstæðisflokksins er málið í höfn fyrir ESB-sinna.

Vill endurskoða samskipti við Bandaríkin

Logi biður Trump um hermenn

Logi formaður Samfylkingar er alfarið á móti því að Trump Bandaríkjaforseti afturkalli hermenn frá Sýrlandi.

Lítið heyrðist í Loga þegar Obama og Clinton sendu hermenn upphaflega til Sýrlands, m.a. til að hrekja forseta landsins, Assad, frá völdum líkt gert var 2003 í Írak með hörmulegum afleiðingum.

Stríðsæsingamaðurinn Logi ætti að hugsa áður en hann talar. Einu sinni hlýtur allt að vera fyrst.

„Hryllilegt ef Trump stefnir nú Kúrdum í voða“

Ísland - Evrópa: önnur víglína 2019 en fyrir tíu árum

Vinstristjórn Jóhönnu Sig. sótti um aðild að Evrópusambandinu 16. júlí 2009. Næstu árin var víglínan milli þeirra sem vildu ESB-aðild og hinna sem töldu fullvalda Ísland farsældar Frón.

Tíu árum síðar er víglínan önnur. Hún er á milli þeirra sem telja EES-samninginn upphafið og endir að alþjóðasamskiptum Íslands og hinna sem gjalda varhug við ofríki Evrópusambandsins sem notar EES-samninginn að sækja sér valdheimildir á Íslandi, nú síðast í orkupakkamálinu.

Tveir álitsgjafar, Björn Bjarnason, og ritstjóri Fréttablaðsins, báðir hlynntir EES, staðfesta breytta víglínu.

Andstæðingar ESB-aðildar mega vel við una. Það er pólitískt dautt mál að berjast fyrir ESB-aðild Íslands. Orkupakkaumræðan sýndi að þeir sem styðja valdaframsal frá Íslandi til Brussel verða fyrir þungum búsifjum. 

Sjálfstæðisflokkurinn er í pólitískri sjálfheldu. Þessi fyrrum móðurflokkur borgaralegra stjórnmála flýr á vit gelgjulegra heimsendaspádóma í loftslagsmálum og sér það bjargráð að skattleggja ferðir á bíl og með flugi. Allt í nafni framandi hugmyndafræði glópahlýnunar. 

Flokkur sem útvatnar erfðaefni sitt, sjálfstæðið í flokksheitinu, líkt og gerðist í orkupakkamálinu, er kominn á vonarvöl. Sjálfsmynd flokksins er svo löskuð að andstæðingarnir þurfa ekki einu sinni að nefna flokksmyndina á nafn í gagnrýni sinni. Það þarf ekki að miða skeytunum á skotmarkið. Þau hitta sjálfkrafa.

Stjórnmálaflokkar komast í gegnum ólgusjó umræðunnar með kjölfestu. Vanti kjölfestuna verður fleyið stjórnlaust, steytir á skeri og brimaldan brýtur það í spón.

,,hefnist þeim er svíkur sína huldumey" segir í vísunni. Síðasta vísuorðið verður ekki haft eftir. Ekki skal nefna snöru í hengds manns húsi.

 

Trump vill hætta stríði - skelfilegar afleiðingar?

Trump var kjörinn út á loforð um að Bandaríkin hættu aðild að þessum „fá­rán­legu, enda­lausu stríðum“. Þau eru flest og mannskæðust í miðausturlöndum þar sem innrásin í Írak 2003 er vendipunktur. Til stóð að breyta ríkinu í vestrænan skjólstæðing með lýðræði og fínerí. 

Það gekk ekki eftir. Írakar gerðu uppreisn og Bandaríkin yfirgáfu verkefnið áður en áratugurinn var úti.

Sýrland fékk sömu meðferð, grafið var undan Assad forseta og ,,umbótaöfl" studd. Vestrænt hannaðar hörmunar í Írak og Sýrlandi gáfu Ríki íslams færi á að sýna klærnar og stofna trúarríki um stund.

Trump tilkynnti á síðasta ári að hann ætlaði að kalla bandaríska hermenn frá Sýrlandi og láta heimamenn um afleiðingarnar. 

Staðfastur vilji forsetans að hætta stríðsrekstri veldur úlfúð. Í Ísrael er spurt hvort Trump mun yfirgefa traustasta bandamann sinn í þessum heimshluta.

Brotthvarf Bandaríkjamann frá Sýrlandi er viðurkenning á orðnum hlut. Vestræn ríki, þ.e. Bandaríkin og ESB, töpuðu stríðinu fyrir Assad sem naut stuðnings Rússa. Erdogan hæstráðandi í Tyrklandi, Assad í Sýrlandi og sá rússneski Pútín eru líklega búnir að semja um niðurstöðuna.

Það er mótsögn að þegar stórveldi dregur úr stríðsrekstri verða afleiðingarnar skelfilegar. Fyrirsjáanlega verða Kúrdar í ömurlegri stöðu.

Skynsamleg stórveldapólitík viðheldur valdajafnvægi. Vesturlönd, því miður, ráku ekki skynsamlega pólitík eftir sigur í kalda stríðinu fyrir 30 árum. Vesturlönd ráku útþenslupólitík í Austur-Evrópu og miðausturlöndum. 30 ára mistök leiða af sér skelfingu og því meiri sem dregið er á langinn að viðurkenna mistökin. 

Yrði „svartur blettur“ á sögu Bandaríkjanna

Krím, Kúrdar og vestræn hræsni

Vesturlönd hrukku af hjörunum þegar Rússland innlimaði Krímskaga 2014. Krímskaginn er byggður Rússum en Úkraína fékk skagann að ,,gjöf" á tíma Sovétríkjanna. Ísland er í viðskiptastríði við Rússa útaf Krím, ekki að eigin frumkvæði, heldur vegna aðildar okkar að Nató og ófrelsinu sem fylgir EES-aðild.

Víkur nú sögunni til landamærahéraða Sýrlands og Tyrklands. Þar búa Kúrdar sem lengi dreymir um sitt eigið ríki, Kúrdistan. Allt bendir til þess að Tyrkjum verði leyft að taka sér nýtt land, sem áður tilheyrði fullvalda ríki, Sýrlandi, til að bæta hag sinn, á kostnað Sýrlands og Kúrda.

Verður rokið upp til handa og fóta á Vesturlöndum gegn landvinningum Nató-Tyrklands? Ekki veðja á það.

Sameinuðu þjóðirnar búa sig undir hið versta

Ólafur, Hauck & Auf­häuser og Al Thani

Ólafur Ólafsson í félagi við aðra setti upp tvö keimlík leikrit til að auðgast á siðlausan hátt. 

Fyrra leikritið gekk út á að þýski bankinn Hauck & Auf­häuser væri kaupandi með Ólafi og félögum að Búnaðarbankanum 2003. Ríkisstjórnin hafði sett skilyrði að erlendur aðili yrði meðal kaupenda. Ólafur og kumpánar skálduðu leikrit og fengu að kaupa bankann sem varð að Kaupþingi.

Seinna leikritið er kennt við Al Thani, moldríkan araba, sem Kaupþingsmenn sögðu að hefði keypt hlut í Kaupþingi kortéri fyrir hrun. Tilgangurinn var að fá tiltrú markaðarins. Ólafur og viðskiptafélagar hans fengu fangelsisdóm fyrir Al Thani-málið.

Ólafur klagar sín mál til Evrópu þar sem skúrkar fá áheyrn. Aldrei hvarflar að Ólafi að biðja þjóðina afsökunar á lygum og blekkingum. Ólafur gerir tilkall til að vera tekinn í samfélag siðaðra manna um leið og hann stundar siðleysi.  

Mannréttindadómstóllinn skoðar rannsóknarnefnd

Gréta og óttinn við afhjúpun

Gréta trúir á manngert veður. Hún er andlit og leiðtogi hamfarasinna, þeirra sem trúa að heimurinn sé um það bil að farast vegna loftslags af mannavöldum.

Svo eru hinir, sem ekki trúa á manngert veður, og telja að maðurinn hafi lítil sem engin áhrif á loftslag jarðarinnar.

Í grunninn eru þessir tveir hópar sem eru fylgjendur og andstæðingar Grétu Thunberg.

Hvor hópurinn skyldi óttast meira afhjúpun Grétu?

Svarið liggur í augum uppi. Trúarhópurinn skelfur á beinunum að sannfæringarmáttur sænska unglingsins gufi upp. Til að auka kynngikraf Grétu er hún gerð að fórnarlambi. Píslarvætti er einkenni trúarbragða.

Gréta er viðkunnaleg sænsk stúlka á röngum stað á réttum tíma. Eftirspurn er eftir mannkynsfrelsara og sú sænska er framboðið.

Gréta er fulltrúi þeirra afneita upplýsingunni. Kjarni upplýsingarinnar er að krefjast sannana fyrir staðhæfingum um heiminn. Trúin á manngert veðurfar byggir á spádómum um framtíðina, rétt eins og kenningar Jesú og Múhameðs. Raunveruleikinn sýnir að spálíkön trúarhópsins standast ekki.

Maður þarf ekki að vera snillingur til að sjá í hendi sér að allt mun þetta enda í tárum. En það má vona að Grétu verði ekki förnað. Hún fái að vaza úr grasi og verða fullorðinn þroskaður einstaklingur. Það er ekki fallega gert að gera ungling að mannkynsfrelsara.   

„Feðraveldið að míga í brækurnar“