Hitler var alþjóðasinni ekki þjóðhyggjumaður

Guðni Th. fer villur vegar þegar hann kennir þriðja ríki Hitlers og félaga við þjóðhyggju. Karlamagnús stofnaði til fyrsta ríkisins í kringum 800, samkvæmt sögukenningu nasista, annað ríkið var stofnað í Frakklandi 1871, já í Versölum, og bæði þessi ríki voru alþjóðasinnuð. 

Ef Hitler hefði verið sannur þjóðhyggjumaður myndi hann hafa smalað Þjóðverjum í eitt ríki og látið þar við sitja. En það var aldrei ætlunin. Þriðja ríkið átta að vera yfir allri Evrópu.

Þjóðhyggja er hófstillt og býr að sínu á meðan alþjóðahyggja Hitlers, Stalíns og ESB er til stöðugra vandræða. Eins og dæmin sanna.


mbl.is Mikilvægt að varast þjóðrembu
Tilkynna um óviðeigandi tengingu við frétt

Börnin í Chimú og New York - og góða fólkið

Guardian segir frá uppgreftri í Chimú á líkum 227 barna sem fórnað til að friðþægja veðurfyrirbrigði er kallast El Ninio. Góða fólkið í Chimú trúði að saklaus börn gætu breytt veðurfari.

Góða fólkið er enn að og teflir nú fram börnum og unglingum í New York, Greta Thunberg í fararbroddi, til að breyta loftslagi jarðarinnar.

Börnum er beitt fyrir bábiljur góða fólksins til að smyrja sakleysi yfir hugmyndafræði sem stenst ekki skoðun. 


mbl.is Thunberg mótmælti við höfuðstöðvar SÞ
Tilkynna um óviðeigandi tengingu við frétt

Tvær gerðir af fólki

Í einn stað er fólk sem vill búa að sínu, eiga samfélag við aðra í friði og leyfa hverjum að syngja með sínu nefi, svo lengi sem það veldur ekki óskunda hjá öðrum.

Í annan stað er fólk sem er vakandi og sofandi að hugsa um hvernig aðrir eigi að haga lífi sínu. Þessi tegund fólks er í stöðugri leit að trú og hugmyndafræði sem réttlætir afskipti af lífi annarra.

Þessar tvær grunnútgáfur af manninum eru í stöðugum erjum: frjálsræði gegn stjórnlyndi.

Náttúrulegt ástand mannsins er vitanlega að fá að vera í friði með sig og sitt. Ónáttúran kemur með stjórnlyndinu.


Manngert veður mesta blekkingin frá kommúnisma

Eftir að kommúnisminn leið undir lok, í Tékkó 1968 og formlega rúmum 30 árum síðar, er manngert veður mesta hugmyndafræðilega blekkingin sem völ er á.

Kommúnisminn byggði á vísindalegum sósíalisma, eins og kunnugt er.

Manngert veður hvílir á svindlvísindum sem boða heimsendi ef ekki verður komið á alheimsstjórn sem boðar og bannar fólki að lifa lífinu eins og það kýs. Allt í nafni ástar og friðar, rétt eins og kommúnisminn.

Vinstri grænir eru arftakar Kommúnistaflokks Íslands. Og trúa auðvitað á manngert veður. Tilgangurinn helgar meðalið.


mbl.is Loftslagsmál „brýnasta pólitíska viðfangsefnið“
Tilkynna um óviðeigandi tengingu við frétt

Frestum OP3 fram yfir kosningar

Áform um sæstreng eru komin langt á veg, þótt íslensk stjórnvöld þykist ekkert um það vita. Orkupakki 3 stuðlar að enn frekari markaðsvæðingu orkumála og veikir þar með varnir okkar gagnvart ágengum stórfyrirtækjum að virkja á Íslandi til að flytja rafmagn til Evrópu.

Umræða síðustu missera, stofnun fjöldahreyfingar gegn framsali orkuauðlinda, djúpstæður klofningur í stærsta stjórnmálaflokki landsins sýnir svart á hvítu að orkupakkamálið krefst frestunar fram yfir næstu þingkosninga þar sem þjóðin tekur til máls. Fyrir síðustu kosningar var málið alls ekki á dagskrá og því hefur sitjandi stjórn ekkert umboð til að innleiða orkupakkann.

Frestun málsins er sanngjörn. Orkupakki 3 var samþykktur í Evrópusambandinu 2009, fyrir tíu árum, og ekkert liggur á að við innleiðum hann núna.

Öllum, sem fylgst hafa með umræðunni, hlýtur að vera ljóst að orkupakkinn er stórmál sem ætti ekki að vera afgreitt á meðan djúpstæður ágreiningur er meðal þjóðarinnar um framtíðarstefnu í auðlindamálum. Eftir samþykkt orkupakka 3 er sú stefnumótun komin í hendur ESB.

Meginhlutverk stjórnvalda á hverjum tíma er að skapa sátt í samfélaginu. Ríkisstjórn sem elur á sundurþykkju og flytur forræði íslenskra mála til útlanda er komin í ógöngur. Enn er tími til að leita sátta. Frestun orkupakka 3 er gott fyrsta skref.


mbl.is Vantar grænt ljós í Bretlandi
Tilkynna um óviðeigandi tengingu við frétt

Brynjar útskýrir uppgjöf Sjálfstæðisflokksins

Brynjar Níelsson þingmaður Sjálfstæðisflokksins svaraði fyrirspurn á fésbók með þessum orðum:

ESB myndi aldrei gera samning við smáríki með þessum hætti í dag. Þegar EES amningurinn var gerður á sinum tíma voru EFTA löndin sjö(Austurtíki, Sviss, Svíþjóð og Finnland) og ESB löndin 15. Þau vilja þeessi lönd inn í ESB og finnst óþægilegt þetta flókna samstarf. Þau munu nýta sér að slíta þessu við fursta tækifæri. Ég vil ekki að Ísland afhendi þeim tækifærið.

Viðhorf Brynjars skýrir algera uppgjöf Sjálfstæðisflokksins á fullveldi íslensku þjóðarinnar. Brynjar lítur svo á að EES-samningurinn sé forsenda byggðar á Íslandi.

Tilfellið er að Ísland var velmegunarþjóð fyrir EES-samninginn um miðjan tíunda áratug síðustu aldar. Einnig að EES-samningurinn er upphaflega gerður sem aðlögunarsamningur fyrir væntanlegar ESB-þjóðir. 

EES-samningurinn er hægt en örugglega að gera Ísland að hjálendu Evrópusambandsins. Brynjari og þingflokki Sjálfstæðisflokksins finnst það harla gott.

 


Ísland í endurmati Bandaríkjanna og Bretlands

Bandaríkin og ESB gerðu stórkostleg mistök að úthýsa Rússlandi og þvinga þá í faðm Kínverja. Þetta var verk frjálslyndra vinstrimanna, Obama, Clinton og ESB-tæknikrata. Trump vill Rússa aftur í samfélag þjóðanna. Macron Frakklandsforseti viðurkennir mistök ESB í samskiptum við Rússa.

Rússar einir gera engan óskunda á norðurslóðum, þeir eru ekki nógu öflugir. Aftur gætu þeir í samvinnu við Kínverja orðið til vandræða. En Rússar og Kínverjar eru ekki náttúrulegir bandamenn og ekki líklegt að þýða í samskiptum þeirra leiði til bandalags.

Bandaríkin nota hættu af Rússum og Kínverjum á norðurslóðum til að auðvelda sér endurkomu á Íslandi. Bandaríkjaher yfirgaf Ísland 2006 til að berjast í Afganistan, Írak og víðar í nafni frjálslyndis. Það voru enn stærri mistök en að setja Rússa út í kuldann. 

Samfelld hörmungarsaga ,,frjálslyndrar" utanríkisstefnu Bandaríkjanna síðustu 30 ár er í endurmati. Meðal þeirra hugmynda sem nú eru ræddar er að draga stórlega úr vígbúnaði Bandaríkjanna í Evrópu og færa varnarlínuna yfir á Atlantshaf. Á dögum kalda stríðsins var þessi víglína kölluð GIUK-hliðið, Grænland, Ísland og Bretland. 

Pólitík í Evrópu, úrsögn Breta úr ESB, gæti flýtt fyrir þessari þróun. Bretland vill tengjast Bandaríkjunum nánari böndum. Norðurslóðir sem engilsaxneskt áhrifasvæði kæmi til álita.

Eftir úrsögn Bretlands munu Bretar í öllu falli setja í forgang að tempra áhrif ESB á norðurslóðum. Þeim mun finnast nóg um að glíma við ESB á meginlandinu.

Á meðan þessari atburðarás vindur fram keppast allir flokkar á alþingi, nema Miðflokkurinn, að binda trúss sitt við Evrópusambandið. Blessuð börnin á Austurvelli eru slíkir heimalningar að þau halda að útlönd séu gotterískall með belgískt súkkulaði. Og stíga áköf upp í bílinn í von um meira sælgæti óminnug viðvörunarorða fullorðna fólksins.


mbl.is Hyggst ræða „áhlaup“ Kínverja og Rússa
Tilkynna um óviðeigandi tengingu við frétt

Orkupakkinn breytir íslenskum stjórnmálum

Deilan um orkupakkann snýst um framtíðarsýn fyrir Ísland. Stuðningsmenn pakkans telja yfirþjóðlegt vald Evrópusambandsins, í gegnum EES-samninginn, æskilegt fyrir Íslendinga. Andstæðingar eru þeirrar sannfæringar að allar meginákvarðanir um íslensk málefni skuli teknar í Reykjavík en ekki Brussel.

Forysta Sjálfstæðisflokksins og þingflokkur talar eins og útþynnt útgáfa af Samfylkingunni sem barðist eftir hrun, og gerir enn, undir slagorðinu ,,ónýta Ísland". Þórdís iðnaðar sagði hreint út í útvarpsviðtali í vor að Íslendingar kunni ekki að setja reglur um raforku, ESB viti best. Fólk sem þannig talar gerir þjóðinni skömm til.

Frá heimastjórn, fullveldi og lýðveldisstofnun á síðustu öld bjuggu kynslóðir Íslendinga til samfélag sem þótti öfundsvert víða um heim. Skipulega er grafið undan þessu samfélagi með því að flytja forræði íslenskra mála til Brussel og gera okkur að hjálendu ESB líkt og við vorum ósjálfbjarga undir forræði Dana um aldir.

Afleiðingarnar af orkupakkadeilunni verða alvarlegir og djúptækari en af ESB-umsókn Samfylkingar. Nú bregðast þeir sem síst skyldi.


mbl.is Alþingi samþykki ákvæði um auðlindir
Tilkynna um óviðeigandi tengingu við frétt

Breskt lýðræði, fordæmi fyrir Miðflokkinn, þjóðin hlustar

Bretland er vagga nútímalýðræðis. Þingbundin ríkisstjórn er framlag Breta til vestræns lýðræðis. Boris Johnson forsætisráðherra frestar þinginu og flæðir það síðan með lagafrumvörpum. Gagngert til að koma í veg fyrir að valdaklíkur á breska þinginu komi í veg fyrir lýðræðislegur þjóðarvilji nái fram að ganga, Brexit.

Borisarlexían fyrir Miðflokkinn er eftirfarandi. Það á að virkja allar leyfilegar heimildir þingbundins lýðræðis til að þjóðarvilji nái fram að ganga. Þingbundið lýðræði á Íslandi felur í sér að það má tala um mál til eilífðarnóns.

Miðflokkurinn berst fyrir þjóðarvilja í orkupakkamálinu. Meirihluti alþingis hagar sér eins og lokaður valdaklúbbur útvalinna og ætlar sér að samþykkja orkupakkann hvað sem tautar og raular.

Andsvar Miðflokksins er að beita þinglegum rétti að tala til eilífðarnóns, ef þurfa þykir. Krafan ætti að vera eftirfarandi: annað hvort verður orkupakkanum frestað eða boðað til þingkosninga.

Á meðan talar Miðflokkurinn. Þjóðin hlustar.


mbl.is Fer fram á frestun þings
Tilkynna um óviðeigandi tengingu við frétt

Raforkan fyrst og nú fiskurinn: EES drepur sjálfsbjörg Íslands

EES-samningurinn drepur hægt en örugglega íslenska þjóðarbúið í dróma. Formaður sjávarútvegsnefndar ESB-þingsins hótar uppnámi EES-samningsins ef Íslendingar hætta ekki að veiða makríl sem er á beit í landhelgi okkar.

Viðbrögðin eru fyrirsjáanleg. Taugaveiklaðir embættismenn í stjórnarráðinu, sem óttast að missa ESB-spón úr aski, og þingmannshérar, einkum í Sjálfstæðisflokknum ef að líkum lætur, leggjast á eitt að friðmælast við Brusselvaldið; leyfa makrílnum að éta sig feitan í íslenskri landhelgi og verða ESB-ríkjum búhnykkur. Landinn situr eftir með tvær hendur tómar og sultardropa.

Skilaboðin eru að Íslendingar eigi að þiggja skít úr hnefa Evrópusambandsins og beygja sig undir útlenda valdboðið. Fimmta herdeild embættismanna djúpríkisins og málaliða við Austurvöll sjá um að innprenta þjóðinni þrælsótta við hverja stunu og hósta í Brussel.

Íslendingar verða að grípa til varna áður en það er um seinan. Tækifærið er núna að setja ágengu Evrópusambandi stólinn fyrir dyrnar. Látum sverfa til stáls á alþingi. Miðflokkurinn er í þeirri stöðu að krefjast frestunar á orkupakkanum en þingkosninga að öðrum kosti. Hvor tveggja yrði afgerandi skilaboð til Brussel og fimmtu herdeildarinnar: hingað og ekki lengra.

Þjóðin þarf að taka til máls í kosningum þar sem EES-samningurinn er undir. Á meðan ætti ekki að samþykkja nein nýmæli ættuð úr Tinna-landi.   

Ef krafa Miðflokksins fengi ekki framgang er réttast að tala til jóla. Þjóðin hlustar.


mbl.is Tengir makríldeiluna við EES
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband