Fjöldahreyfing gegn 3OP - best að fresta

Á alþingi leiðir Miðflokkurinn fjöldahreyfingu gegn innleiðingu 3. orkupakka ESB. Til varnar eru talsmenn djúpríkisins og ESB-sinnar.

3. orkupakkinn var samþykktur af ESB árið 2009. Ekkert liggur á að samþykkja pakkann á Íslandi, enda erum við ekki tengd orkuneti ESB.

Best fer á því að fresta samþykkt 3. OP og efna til umræðu um EES-samninginn, sem er í uppnámi vegna Brexit. Þegar Bretar og ESB ná samkomulagi um frambúðarfyrirkomulag úreldist EES-samningurinn. Það verður ekki pólitískt verjandi á Íslandi og í Noregi að búa við lakari kjör en Bretland gagnvart ESB.

Látum skynsemina ráða, - frestum 3. orkupakkanum.

Miðflokksmenn með 251 ræðu og svör

Tvær Katrínur spila á ótta vegna Brexit og Trump

Katrín forsætis og Þorgerður Katrín formaður Viðreisnar eru báðar slegnar ótta vegna gerbreyttrar stöðu alþjóðamála í kjölfar Brexit og Trump-sigurs, hvorutveggja fyrir þrem árum.

Endurmat á stöðu alþjóðakerfa sem byggðust upp eftir seinna stríð stendur yfir. Enginn veit hver niðurstaða endurmatsins verður.

Óskynsamlegt er að mála sig út í horn og ríghalda í fallandi alþjóðahyggju. Nær væri að meta rausætt stöðu mála út frá íslenskum hagsmunum. Og umfram allt að sýna varkárni og tefla ekki fullveldi okkar í tvísýnu með því að framselja það til útlanda.

Sagði stoðir alþjóðlegs samstarfs titra

Ósjálfstæðisflokkur djúpríkisins

Sjálfstæðisflokkurinn fórnaði innihaldinu fyrir ásýndina. Áferðafalleg forysta flokksins felur þá staðreynd að móðurflokkur íslenskra stjórnmála er verkfæri embættismanna djúpríkisins.

Djúpríkið vildi ekki draga ESB-umsókn Jóhönnustjórnarinnar tilbaka. Djúpríkið vill innleiða 3. orkupakkann til að færa náttúruauðlindir Íslands undir valdamiðstöðina í Brussel.

Þeir stjórnmálamenn sem fá framgang innan flokksins en eru djúpríkinu ekki þóknanlegir, Hanna Birna og Sigríður Andersen, eru umsvifalaust skotnir í kaf. Þægu og stilltu krakkarnir fá að sitja áfram. Börnin í klíku djúpríkisins eru aftur sannfærð um að heimurinn sé þeirra.

Djúpríkið er með það sterk tök á flokknum að þingflokkur sjálfstæðismanna þegir þunnu hljóði um mesta álitamál íslenskra stjórnmála frá Icesave, - 3. orkupakkann.

Þegar það rennur upp fyrir kjósendum að Sjálfstæðisflokkurinn er skrautlegar umbúðir um nakið embættismannavald snúa þeir baki við flokknum í meira mæli en í kosningunum strax eftir hrun. Það er einfaldlega ekki eftirspurn eftir leikbrúðum í búningi stjórnmálamanna.

Það hlakkar í öðrum stjórnmálaflokkum að horfa á Ósjálfstæðisflokk djúpríkisins taka á sig mynd pólitísks ómöguleika. Það verður aldeilis upplit á sætu krökkunum í brúnni á mb. XD þegar ískaldur veruleikinn rífur byrðinginn og fleyið sekkur í beinni útsendingu á kosninganótt.  

Þekkingarleysi eða vísvitandi blekking

Unga EES-fólkið er gamaldags

EES-samningurinn er frá síðustu öld, viðbrögð við pólitískum aðstæðum sem voru þá ríkjandi. Unga fólkið  í auglýsingu Fréttablaðsins rígheldur í gamaldags alþjóðahyggju sem er komin fram yfir síðasta söludag.

Texti auglýsingarinnar staðfestir úrelt viðhorf íslensku unglinganna:

Í aðdrag­anda þjóðar­at­kvæðagreiðslunn­ar í Bretlandi um úr­sögn Breta úr Evr­ópu­sam­band­inu og í for­seta­kosn­ing­un­um í Banda­ríkj­un­um 2016 svaf ungt fólk á verðinum með af­leiðing­um sem eru öll­um ljós­ar.

Brexit og sigur Trump er samtímapólitík. Vörn fyrir valdablokk eins og ESB og bandaríska útþenslustefnu tilheyrir 20. öldinni.

Auglýsingaungmennin 272 ættu að drífa sig inn í 21. öldina og glíma við verðugri verkefni en að berjast fyrir veröld sem var.

Ungt fólk sem styður EES

Þýskt stórblað: Hatarar og stefna íslenskra stjórnvalda

Meðlimir Hatara eru börn íslenskra stjórnarerindreka og utanríkispólitíkusa. Ekki er vitað hvað foreldrunum finnst um uppátækið að flagga fána Palestínu, skrifar þýska stórblaðið Die Welt:

Später folge der Banner-Eklat, bei dem Sänger Matthías Tryggvi Haraldsson gewohnt missmutig in die Kamera blickte. Interessant ist, dass einige Bandmitglieder Kinder isländischer Diplomaten und Außenpolitiker sind – was ihre Eltern von dem Auftritt hielten, ist nicht bekannt.

Íslensku kjánaprikin sem RÚV sendi til Ísrael án fylgdar fullorðinna verða að stórpólitísku milliríkjamáli. Ætlar einhver að axla ábyrgð?

„Mér var aðeins brugðið“

Helga Vala: klúður að sleppa Ágústi Ólafi

Siðanefnd alþingis afgreiddi tvö mál nýlega. Máli Ágústs Ólafs þingmanns Samfylkingar var vísað frá en Þórhildur Sunna pírati var talin brotleg við siðareglur.

Helga Vala Helgadóttir segir alþingi hafa klúðrað siðamálum. 

Gagnrýnina þarf Helga Vala að útskýra betur og svara eftirfarandi spurningu:

Hvers vegna var klúður að sleppa umfjöllun um siðamál Ágústs Ólafs?

Helga Vala vill breyta siðareglum

Palestína, samkynhneigðir og Hatarar

Á meðan stig voru talin frá dómnefndum flögguðu liðsmenn Hatara regnbogafána eins og samkynhneigðir títt gera. Þegar símastigin voru tilkynnt var fána Palestínu hampað af Höturum.

Helftinni af ríki Palestínumanna stjórna Hamas-liðar, herskáir íslamistar sem ofsækja samkynhneigða.

Útkjálkabjánarnir sem við sendum til Ísrael gerðu íslensku þjóðinni skömm til.

Veifuðu palestínska fánanum

Vinstri grænir leyfa áhlaup á náttúru Íslands

Innleiðing 3. orkupakkans felur í sér að Ísland verði hluti af orkusambandi ESB. Yfirlýst markmið orkusambandsins er að útrýma orkueyjum með sameiginlegu orkuneti.

Orkustefna ESB tekur til allra þátta raforkumála, frá virkjunum til neytenda og stórnotenda. Sameiginlegar reglur gilda um framleiðslu og dreifingu.

Ef Ísland verður aðili að orkuneti ESB er einboðið að áhlaup verður gert á náttúru landsins. Raforkuverð í Evrópu er mun hærra en hér á landi. Í húfi er milljarða gróði annars vegar og hins vegar náttúra Íslands. 

Furðu vekur að Vinstri grænir, sem sitja í ríkisstjórn, ætli að innleiða 3. orkupakka ESB með fyrirsjáanlegum afleiðingum fyrir náttúruvernd.

Ber að krefjast markaðsverðs

Vinstriútgáfa: guð, loftslag og máttur orðsins

Guardian er vinstriútgáfa sem gerir það þokkalega beggja vegna Atlantshafs. Sérstök tilkynning útgáfunnar um hvernig eigi að ræða loftslagsmál er ákall til pólitíska rétttrúnaðarins að herða sig í baráttunni fyrir alþjóðaríki vinstrimanna.

Vel fer á því að páfinn, já, þessi eini sanni í Róm, er kallaður til vitnis um að veðurfar á jörðinni sé manngert. Frá miðöldum er páfinn óskeikull. Aðrar heimildir Guardian fyrir hlýnun jarðar af mannavöldum eru aðalritari Sameinuðu þjóðanna og nútímaútgáfan af Jóhönnu af Örk, sænska stúlkubarnið Gréta Thunberg, leiðtogi skólabarna í verkfalli fyrir loftslagið.

Guardian trúir á mátt orðsins og ætlar að kalla veðurfarsbreytingar neyðarástand af mannavöldum. Þeir sem efast um manngert veður fá heitið ,,afneitarar" - sem réttlætir útskúfun frá opinberri umræðu.

Í upphafi var orðið segir í gamalli bók. Viðbót vinstrimanna: aðeins rétttrúaðir fá að taka til máls. Afleiðingin verður ein skoðun, eitt heimsríki og - síðast en ekki síst - ein og sama eymdin fyrir alla.

 

Loftslagsneyðarástand ekki breytingar

Píratar: siðanefnd - en bara þegar hentar

Píratar eru hvað duglegastir að bregða öðrum um spillingu og siðleysi. Ef Píratar væru sjálfum sér samkvæmir ætti Þórhildur Sunna að segja af sér þingmennsku eftir úrskurð siðanefndar.

En Píratar eru upphlaupsflokkur sem virðir enga meginreglu, aðra en þá að betra sé að veifa röngu tré en öngu.

Trúr hentistefnu og tækifærismennsku segir þingflokkur Pírata að Þórhildur Sunna siðbrjótur njóti fyllsta trausts.

Ósammála niðurstöðu siðanefndar