Breiðholts-Lilja og Vesturbæjar-Kata

„Stuðning­ur við Lilju er mest­ur meðal tekju­lágra og þeirra sem hafa minnsta mennt­un. Þessu er öf­ugt farið meðal stuðnings­manna Katrín­ar en traust til henn­ar styrk­ist eft­ir því sem tekj­ur hækka og mennt­un eykst.“ 

Lilja Alfreðsdóttir ólst upp í Breiðholtinu. Félagslegt bakland stuðningsmanna hennar, samkvæmt tilvitnun hér að ofan, dregur dám af æskustöðvunum. Katrín forsætis er aftur nátengd vesturbænum og fær mestan stuðning frá háskólafólki og þeim tekjuhærri.

Við viljum trúa því að Ísland sé stéttlaust. Í fámenni bændasamfélagsins var félagslegur hreyfanleiki. Börn hjáleigubænda gátu stofnað til fjölskyldutengsla við afkomendur meðalbænda sem aftur gátu tengst stórbændum og fjölskyldum embættismanna. Í sveitum var breytileiki, betri bændur og þeir sem máttu sín minna, en sá breytileiki var ekki meitlaður í stein. Járnhörð lögmál gerðu þó sumum erfitt fyrir. Vinnuhjú gátu almennt ekki gert sér vonir um hjúskap nema að komast fyrst yfir jörð til að hokra á. Í góðæri fjölgaði bændum á nýbýlum en í hallæri fækkaði þeim er þeir leituðu griða í vistarbandinu.

Vaxandi þéttbýli á síðustu öld breytti þeirri stöðu að hvert sveitarfélag og borgarhverfi nyti félagslegrar breiddar sveitasamfélagsins. Sum bæjarfélög, t.d. Garðabær og Seltjarnarnes, bjuggu að íbúum með hærri tekjur og meiri menntun en önnur. Sama gilti um hverfi borgarinnar. Þegar Reykjavík var skipt upp í tvö kjördæmi var ákveðið að skipta ekki eftir landafræði í austur og vestur heldur draga kjördæmamörk þvert á landafræði og félagslega stöðu borgarhlutanna. Mörkin eru frá Ufsakletti við upphaf Hringbrautar og austur eftir. Kjördæmamörkin kljúfa vesturbæinn í tvennt í norður- og suðurhluta. Þetta var meðvituð ákvörðun til að framkalla félagslegan fjölbreytileika í kjördæmum höfuðborgarinnar. Lítill eða enginn pólitískur ágreiningur var um þessa ráðstöfun.

Við viljum stéttlaust samfélag. En þegar nánar er að gætt, samanber tilvitnaða könnun, fléttast saman félagslegur bakgrunnur stjórnmálamanna og stuðningsliðs þeirra. Ekkert stórt við því að segja. fólk finnur til samstöðu ekki endilega vegna hugmynda heldur tilfinningu fyrir uppruna og manngildi stjórnmálamanna. Sá stjórnmálamaður sem sækir fylgi sitt þvert á hreppamörk og í sem flesta félagshópa er líklegastur til frama. Stjórnmálamenn vissu þetta þegar á Sturlungaöld enda sígild sannindi. 

 

Flestir treysta Lilju

Pútín er Sesar samtímans

Frjálslynd alþjóðahyggja er úrelt, segir Pútín Rússlandsforseti. Einarðir vinstrimenn og fjölmenningarsinnar, t.d. dálkahöfundur Guaridan, rjúka upp til handa og fóta og fordæma Pútín en viðurkenna jafnframt að forsetinn fer með rétt mál.

Sesar boðaði endalok lýðveldis Rómar á fyrstu öld fyrir Krist. Róm var orðið heimsveldi en stjórnkerfi lýðveldisins var hannað fyrir bændasamfélag í kringum borgina sem Rómúlus er sagður hafa stofnað 753 fyrir okkar tímatal og verð lýðveldi rúmum tveim öldum síðar.

Alþjóðavædd fjölmenning hefur riðið húsum á vesturlöndum frá og með hippakynslóðinni. Grunnurinn var lagður með velferðarkerfinu eftir seinna stríð en hipparnir héldu að staðbundið fyrirkomulag kristinna gilda gæti átt við alla heimsbyggðina mínus kristnu gildin. Allsherjarhrun þessarar grunnhyggnu hugmyndafræði hófst með vestrænni innrás í Írak 2003, útþenslu ESB inn í rússneskt áhrifasvæði nokkrum árum síðar og síðast en ekki síst stórfelldum innflutning á múslímum til vesturlanda, sem þiggja vestræna velferð en fyrirlíta vestræn gildi.

Bakslagið gegn bláeygri fjölmenningu hófst með látum árið 2016 þegar Bretar kusu úrsögn úr ESB, Brexit, og Bandaríkjamenn gerðu Trump að forseta.

Ekki frekar en Sesar fyrir 2050 árum veit Pútín hvað tekur við eftir úreldingu frjálslyndrar alþjóðahyggju. Brútus og félagar í öldungaráði lýðveldisins drápu Sesar áður en hann náði að móta nýtt fyrirkomulag. Öldungaráð samtímans er framkvæmdastjórn ESB. Þar eru fyrir á fleti fyllibyttan Juncker og andlitslausir og ólýðræðislegir embættismenn sem hugsa ekki um annað en maka krókinn.

Ef lýðræðið á ekki að fara fjandans til með frjálslyndu fjölmenningunni þurfa vesturlönd að efla samheldni í sínum þjóðríkjum. Pútín barði samheldni inn í rússnesku þjóðina eftir 75 ára misheppnaða tilraun með kommúnisma, sem lengi var eftirlæti hippakynslóðarinnar.

Skarpur maður, Pútín.

Blogggáttin lokar - hver tekur við keflinu?

blogg.gattin.is tilkynnti í gær án fyrirvara að hún lokaði. Blogggáttin var safnþró fyrir bloggsíður. Lesendur gátu á einni síðu fengið yfirlit yfir bloggskrif og fylgst þannig með umræðunni.

Það er skarð fyrir skildi þegar blogggáttin lokar.

Vonandi tekur einhver við keflinu og safnar á eina síðu reglulegum bloggskrifum og veiti yfirlit yfir dægurumræðuna.

Miðflokkurinn tekur af Framsókn og XD - 3OP er skýringin

Fylgið fer frá Framsókn og Sjálfstæðisflokki yfir til Miðflokksins. Aðeins ein skýring kemur til greina. Kjósendur umbuna Miðflokknum andstöðuna við 3. orkupakkann.

Fá mál hreyfa jafn mikið við kjósendum og fullveldismál. Ef 3. orkupakkinn verður samþykktur á alþingi flyst forræði virkjana og raforkumála til ESB. Aðeins Miðflokkurinn stendur gegn þeim áformum.

Eina von Sjálfstæðisflokks og Framsóknar að sleppa við fylgishrun er að 3. orkupakkinn verði ekki samþykktur. Ef orkupakkinn fer í gegn á alþingi hefst umræða um stórauknar virkjunarframkvæmdir og lagningu sæstrengs. Almenningur mun átta sig á að meintir fyrirvarar halda ekki og refsa stjórnarflokkunum fyrir framsal náttúruauðlinda Íslands.

Miðflokkurinn tekur flugið

Hrun í stuðningi við EES-samninginn

Árið 2004 voru 72 prósent þjóðarinnar sannfærð um að EES-samningurinn væri jákvæður fyrir Ísland, samkvæmt könnun Gallup. Í nýrri könnun utanríkisráðuneytisins mælist jákvæðni gagnvart EES aðeins 55 prósent.

EES-samningurinn heggur jafnt og þétt í fullveldi þjóðarinnar. Þriðji orkupakkinn færir Evrópusambandinu forræði yfir raforkumálum okkar, verði pakkinn samþykktur á alþingi.

Aðeins einn þingflokkur á alþingi, Miðflokkurinn, stendur í vegi fyrir óafturkræfum skaða sem EES-samningurinn veldur á náttúru landsins sem verður undirlögð virkjunaráformum, verði 3. orkupakkinn samþykktur.

Miðflokkurinn fer fyrir sístækkandi kjósendahópi sem telur EES-samninginn til óþurftar.

Píratar í vanda: segir Þórhildur Sunna af sér?

Siðbót er meginerindi Pírata í stjórnmál, að eigin sögn. Píratar hafa ofurtrú á reglum og vilja nýja stjórnarskrá til stokka upp grunnreglur samfélagsins.

Nú þegar forsætisnefnd alþingis kemst að þeirri niðurstöðu að þingmaður Pírata, Þórhildur Sunna Ævarsdóttir, hafi brotið siðareglur alþingis eiga Píratar aðeins tvo kosti í stöðunni.

Í fyrsta lagi að Þórhildur Sunna segi af sér þingmennsku og axli þar með ábyrgð. Í öðru lagi að Píratar gefi út þá yfirlýsingu að siðareglur séu ómarktækar og brot á þeim eigi ekki að hafa neinar afleiðingar.

Yfir til ykkar, sjóræningjar.

Forsætisnefnd sammála siðanefnd

Danir setja múslímum stólinn fyrir dyrnar

Dönsk stjórnvöld gefa út lista yfir gettó, hverfi þar sem útlendingar án vestræns uppruna (les: múslímar) eru í meirihluta, þátttaka í atvinnulífi er lítil, glæpir eru algengir,  menntunarstig er lágt og tekjur sömuleiðis.

Danir skilgreindu gettó eftir að þeir vöknuðu upp við þann vonda draum að múslímar hreiðruðu um sig í menningarkimum og sögðu sig úr siðum og lögum dansks samfélags. 

Sameinginlegt markmið danskra stjórnmálaflokka, hvort heldur til hægri eða vinstri, er að koma í veg fyrir gettómenningu. Það þýðir minni innflutningur fólks frá framandi menningarheimum og róttækar aðgerðir til að knýja á um aðlögun aðkomufólks að dönsku samfélagi.

Frederiksen verður forsætisráðherra

Kolbeinn: orkupakki já, Nató nei

Kolbeinn Ó.P. vinstri grænn tekur að sér að auglýsa stefnuleysi flokksins í utanríkismálum. Kolbeinn og félagar vilja samþykkja orkupakka þrjú frá ESB sem færir Ísland nær því að vera hjálenda sambandsins. Samtímis vill Kolbeinn Ísland úr Nató. WTF???

Áttum okkur á samhengi hlutanna. ESB er efnahagslegt stórveldi en hernaðarlegur dvergur og verður eiginlega duglaus eymingi á því sviði þegar Bretar, öflugasta herveldi ESB, fullframkvæmir Brexit.

Nató er hernaðararmur Bandaríkjanna í Evrópu. Ísland er í Nató til að halda valdajafnvægi á Norður-Atlantshafi og leyfa ekki utanaðkomandi, t.d. Rússlandi eða Kína, að ógna forræði Bandaríkjanna á hafssvæðinu. Bretar eru í Nató á líkum forsendum, Norðmenn sömuleiðis.

En snillingarnir í vaffgé, Kolli og kó, vilja gera Ísland að hjálendu veiklulegrar tilraunar meginlandsþjóða Evrópu til sambandsríkis en jafnframt segja okkur úr hernaðarbandalaginu sem heldur öryggismálum Norður-Atlantshafs í jafnvægi.

Ef til væri keppni í heimsku í utanríkismálum tæki vaffgé-liðið gull, silfur og brons.

Nató-aðild Íslands „fíllinn í stofunni“

Vinstri grænir eru núll í utanríkismálum

Forveri Vinstri grænna, Alþýðubandalagið, var með utanríkismálin á hreinu. Fullvalda Ísland, úr Nató og herinn burt. Vinstri græn Steingríms og Katrínar sturtuðu fullveldinu niður í skolpið 16. júlí 2009 þegar þau samþykktu ESB-umsókn Samfylkingar.

Andstaðan við Nató og herinn hvarf eins og dögg fyrir sólu þegar Vinstri græn gengu í eina sæng með Sjálfstæðisflokknum.

Fullveldismál og andstaða við hernaðarbrölt skilgreindu róttæka vinstrimenn á Íslandi í áratugi. Án utanríkismála hefði Alþýðubandalagið ekki orðið til.

Hvað er eftir hjá Vinstri grænum þegar utanríkismálin eru núllið eitt? Jú, gervivísindi um manngerða hnattræna hlýnun annars vegar og hins vegar sykurskattur Svandísar.

Nennir einhver að púkka upp á ósykruð hjávísindi? Tæplega eru þeir margir.

„Hér verður ekki herseta á nýjan leik“

Svefn, unglingar og skóli

Fjölbrautaskólinn í Garðabæ flutti fyrstu kennslustund fram um tæpan klukkutíma fyrir nokkrum árum. Í stað þess að byrja klukkan níu hófst fyrsta kennslustund kl. 8:10. Lítil sem engin breyting varð á fjarvistum og seinkomu nemenda.

Breytingin í Garðabæ var m.a. tilkomin vegna óska foreldra um að nemendur gætu sinnt tómstundastarfi síðdegis, með því að stytta skóladaginn.

Flestir á vinnumarkaði hefja störf klukkan átta eða níu. Það er æskilegt að unglingar byrji daginn með foreldrum sínum í stað þess að sofa fram undir hádegi.

Ef skólahald byrjaði nálægt hádegi er hætt við tómstundastarf verði um kvöldmatarleytið. Tónlistarkennarar og íþróttaþjálfarar færu á kvöldvaktir með tilheyrandi röskun á fjölskylduhögum.

Unglingum er lítill greiði gerður með því að skólahald verði á afbrigðilegum tíma. Það er engum ofraun, hvorki ungum né öldnum, að vaka upp úr sjö á morgnana.

Skólar byrji ekki fyrr en kl. 10