Rússland fær Úkraínu, Ísrael Sýrland

Áður en Benjam­in Net­anya­hu forsætisráðherra Ísraels fyrirskipaði árás á Írani í Sýrlandi skaust hann til Moskvu að hitta Pútín. Net­anya­hu skreytti sig með Georgsslaufunni við heimsóknina, segir í Spiegel, en Rússum er slaufan kær. Hún er tákn um sigur Rússa yfir Þjóðverjum í seinna stríði.

Georgsslaufan er líka tákn rússneskra uppreisnarmanna í Úkraínu, sem njóta stuðnings Moskvu til að koma í veg fyrir að Úkraína verði Nató-ríki. Net­anya­hu er læs á pólitík. Þótt Ísrael eigi engan hlut í Úkraínudeilunni á ísraelski forsætisráðherrann það sem Pútín skiptir máli, sem er aðgangur að Trump Bandaríkjaforseta.

Uppsögn Trump á samkomulagi um kjarnorkuafvopnun Íran gerbreytir pólitískri stöðu mála í miðausturlöndum. Í augum Bandaríkjanna er Íran orðið Norður-Kórea miðausturlanda. Bandaríkin einsetja sér að knésetja Íran, líkt og Norður-Kóreu.

Íran ætlaði sér stóra hluti í heimshlutanum með stuðningi við Assad Sýrlandsforseta. Sýrland er stökkpallur inn í Ísrael og lykilatriði fyrir gyðingaríkið að Íran fái ekki aðstöðu í Sýrlandi. Linnulausar hótanir klerkanna um gereyðingu Ísraels eru skýr vitnisburður um ætlan þeirra.

Rússar eru bakhjarlar bæði Assad og klerkastjórnarinnar í Teheran. Ástæðan fyrir því að Rússar beittu sér í þágu Assad heitir Úkraína. Ef Bandaríkin fallast á tilslökun gagnvart Rússum í Úkraínu er möguleiki að Pútín gefi eftir í Sýrlandi. Á þetta veðjar Benjam­in Net­anya­hu.

Úkraína og Sýrland eru bæði ónýt ríki vegna innanlandsófriðar. Þau verða skiptimynt í stórveldaslag. Norður-Sýrland verður áhrifasvæði Tyrkja, sem er Nató-ríki en í bandalagi við Rússa. Suður-Sýrland verður afvopnað í þágu Ísraels. Hvort pláss verður fyrir Assad er undir hælinn lagt.

Úkraínu verður skipt upp í sjálfsstjórnarhéruð samkvæmt Minsk-samkomulaginu er felur í sér að Austur-Úkraína verður rússneskt áhrifasvæði en vesturhlutinn hallar sér að Evrópusambandinu.

Í dramatík alþjóðastjórnmála þarf einhvern óþokka. Obama Bandaríkjaforseti gerði Pútín að illmenninu. Trump færir hlutverkið, fyrst yfir á Norður-Kóreu en núna á klerkana í Íran. Þeir eru meira en viljugir að taka að sér hlutverkið, sýndu það með því að kveikja í bandaríska fánanum í þinghúsinu í Teheran. 

Tákn eru öflug vopn í stjórnmálum, hvort heldur Georgsslaufan í Moskvu eða brenndur Bandaríkjafáni í Íran.

„Íranir fóru yfir strikið“

Forsetinn, Kolbrún og ómenning góða fólksins

Við erum íslensk af tungumálinu og búsetunni. Landið og tungan er menning okkar, íslensk menning. Ef annað tveggja tapaðist færi hitt forgörðum í kjölfarið. Þetta eru augljós sannindi sem hvert mannsbarn skilur - nema góða fólkið.

Kolbrún Bergþórsdóttir skrifar leiðara í Fréttablaðið sem byrjar svona:

Ekki er öllum Íslendingum jafn vel við þá staðreynd að þeir búa í fjölmenningarsamfélagi.

Síðan hvenær, Kolbrún? Gufaði íslensk menning upp þegar þú sást fyrsta útlendinginn í Kvosinni sem ekki var ferðamaður?

Menning okkar er íslensk. Þótt fleiri eða færri útlendingar búi hér til lengri eða skemmri tíma er menningin okkar íslensk. Ekki pólsk, múslímsk, bandarísk, dönsk eða afgönsk. Heldur íslensk og hefur verið það í þúsund ár.

Forsetinn flytur ræður í útlöndum um gildi íslenskrar menningar, tungumálsins, á meðan leiðarahöfundar boða ómenningu góða fólksins með forliðnum fjöl.

Fjölmenning Kolbrúnar og góða fólksins beið skipbrot í Evrópu á síðustu öld. Hún leiddi af sér afkimamenningu sem ól af sér hatur minnihlutahópa á samfélaginu er veitti þeim viðtöku. Í Þýskalandi er ekki lengur talað um fjölmenningu heldur aðlögun útlendinga að þýskri menningu.

Kolbrún og góða fólkið ætti að læra af reynslu Evrópuríkja og afleggja tal um ómenningu fjölmenningarsamfélagsins. En kannski er það ekki nógu siglt til að geta lært af reynslu annarra þjóða. Góða fólkið situr ævilangt á krataþúfunni í Kvosinni og trúir boðskap af ruslahaugi sögunnar.

 

Allir tapa ef íslenskan glatast

Ragnar Þór: vantraust á veruleikann - sósíalismi eymdarinnar

Formaður VR, Ragnar Þór Ingólfsson, lýsir vantrausti þann veruleika að kaupmáttur launa sé meiri á tímum efnahagslegs stöðugleika en deilna og úlfúðar á vinnumarkaði. 

Ragnar Þór fer fyrir hópi byltingarfólks í stórum verkalýðsfélögum, VR og Eflingu, sem boða sósíalískt stéttastríð í velferðarríkinu.

Ragnar Þór hafnar opinberum hagtölum ef þær falla ekki að sósíalískum fordómum um verkalýðurinn lepji dauðann úr skel á meðan kapítalistarnir lifa í vellystingum praktuglega.

En líklega hafnar Ragnar Þór ekki tölum frá eigin stéttarfélagi um að meðallaun VR-félaga eru 668 þús. kr. á mánuði. 

Það má alveg lifa af 670 þús. kr. á mánuði, skyldi maður ætla. Skæruliðasveitir sem Ragnar Þór hyggst siga á atvinnulífið á fullum launum bæta ekki lífskjörin heldur tortíma þeim. En það er einmitt uppskrift sósíalista að réttlátu samfélagi: að allir búi við sameiginlega eymd.

 

Hótar vantrausti á ASÍ vegna myndbands

Tveir vinir hanna fréttir í þágu þess þriðja

RÚV og Kjarninn tóku þátt í þeirri fréttahönnun að fráfarandi forstjóri Barnaverndarstofu væri sekur um að misnota embættið vegna barnaverndarmáls. Ögmundur Jónasson fyrrum ráðherra skrifar:

Hún er góð af þér myndin Þórður Snær með æskuvinum þínum, Jóhanni Bjarna Kolbeinssyni, fréttamanni á RÚV, áhugamanni um fréttaskrif um þessi mál þar á bæ og Tómasi Hrafni Sveinssyni, formanni barnaverndarnefndar Reykjavíkur, sem taldi að sér vegið í aðfinnslum Barnaverndarstofu í Kveiksmálinu.

Frétthönnun í þágu vina er sú tegund spillingar sem minnst er fjallað um í fjölmiðlum. Blaða- og fréttamenn slá skjaldborg um þá spillingu.

 

Trump sigrar Íran, eins og Norður-Kóreu

Trúarríkið Íran mun lúta í gras fyrir Trump Bandaríkjaforseta, eins og kommúnistaríkið Norður-Kórea. Leiðtogarnir í þessum tveim ríkjum átta sig á að þeir dagar eru liðnir að Bandaríkin verði höfð að leiksoppi lævísra harðstjóra.

Trump er hvorki háttvís né hlédrægur heldur frekur og hvass. Gagnvart öfgatrúarfólki, hvort heldur múslímsku eða kommúnísku, er hann rétta svarið.

Jú, ætli hvíthærði kallinn í samlita húsinu við Pensilvanínubreiðgötuna fái ekki nóbelinn að lokum.

„Ekki treysta Bandaríkjunum“

Byltingaröflin kljúfa verkalýðshreyfinguna

Almenna verkalýðshreyfingin er sterk þegar hún stendur saman. Byltingaröflin, sem náð hafa undir sig nokkrum stórum verkalýðsfélögum, boða hatrömm verkföll. Afleiðingin verður klofningur.

Í einu af róttæku félögunum, VR, eru meðallaun grunnlauna 622 þús. kr. á mánuði en heildarlaun 668 þús. kr. að meðaltali. Þetta eru hærri laun en kennarar í grunn- og framhaldsskólum eru með. Byltingaröflin geta vælt út í eitt en tilfellið er að laun alls þorra almennings eru vel frambærileg upp í það að vera góð.

Byltingarfélögin munu klofna. Spurningin er hvort þau verði áður búin að kljúfa verkalýðshreyfinguna. Allir tapa, líka byltingarmennirnir, en þeim er hjartanlega sama. 

Framsýn fordæmir myndband ASÍ

Logi: Ísland ónýtt án ESB

Logi Einarsson formaður Samfylkingar klappar enn þann kratastein að Ísland eigi enga framtíð án Evrópusambandsins. Formaðurinn skrifar Moggagrein í dag og segir nánast ólíft á Íslandi án EES-samningsins, sem er aukaaðild að Evrópusambandinu, og beri að verja af ,,öllu afli."

EES-samningurinn var gerður fyrir þjóðir á leið inn í Evrópusambandið. Ísland er ekki á þeirri vegferð. Þjóðríki á leið úr Evrópusambandinu, Bretland, ætlar ekki að ganga inn í EES-samstarfið. Hvers vegna? Jú, vegna þess að í gegnum EES flæða reglugerðir og tilskipanir sem eru inngrip í fullveldi þjóða.

Við höfum slæma reynslu af EES-samningnum. Í skjóli EES gátu íslensku bankarnir stundað bankaviðskipti í Hollandi og Bretlandi og bakað okkur Icesave-vandræðin.

Við eigum að segja upp EES-samningnum til að hamla frekari vandræðum. Brennt barn forðast eldinn. Nema að barnið heiti Logi.

 

Sigmundar Davíðs-góðærinu að ljúka

Sigmundur Davíð, þá forsætisráðherra, bjó í haginn fyrir góðæri síðustu þriggja ára. Í fyrsta lagi með leiðréttingunni og í öðru lagi með samningum um uppgjör þrotabúa gömlu bankanna.

Einhverjir hafa notað góðærið til að lækka skuldir og eiga borð fyrir báru þegar slakar á þenslunni. Aðrir haga sér eins og fífl í fjármálum og trúa á betri hag til eilífðarnóns. Þannig er sumt fólk. En hagkerfið er eins og annað í heimi hér, það skiptast á skin og skúrir.

Krónan hefur gefið eftir síðustu daga á gjaldeyrismarkaði. Þeir sem gerðu ráð fyrir sumarfríi í útlöndum þar sem dollarinn væri á 95-kall og evran á 115 kr. verða að endurskoða eyðsluáætlunina. Gjaldeyrisflæðið inn í landið ætti að vera með mesta móti núna, þegar erlendir ferðamenn staðfesta bókanir. En krónan lækkar sem sagt, dollarinn kominn í 102 kr. og evran 121. Í lok sumars, þegar innstreymið minnkar, lækkar krónan meira.

Næstu vikur og mánuðir verða aðlögunartími í hagkerfinu. Hugsum með hlýju til Sigmundar Davíðs og reynum að láta aðlögunina ekki verða að brotlendingu. 

Vöxtur skulda sá mesti í 9 ár

Hörpusláttur launamisréttis - ábyrgð ríkis og borgar

Forstjóri Hörpu fær 15-20 prósent launahækkun en lægst launaða starfsfólkinu er gert að taka á sig launalækkun.

Ef engar trúverðugar skýringar eru á þessu málatilbúnaði er aðeins eitt í stöðunni. Að ríki og borg reki yfirstjórn Hörpu á einu bretti og komi skikki á málin.

Ótækt er að opinber stofnun fokki upp viðkvæmri stöðu í launaumræðunni.

Þjónustufulltrúar í Hörpu segja upp

Lævís áróður RÚV

Í lok RÚV-fréttar í sjónvarpinu um kjaradeilu ljósmæðra sagði fréttamaður að ekki hefði tekist að ná í heilbrigðisráðherra í dag. Margoft hefur komið fram að ljósmæður, líkt og aðrar starfsstéttir ríkisins, semja við fjármálaráðuneytið um kaup og kjör.

Hvers vegna fann fréttamaður sig knúinn til að segjast ekki hafa fengið heilbrigðisráðherra í viðtal? Jú, til að láta svo líta út að ráðherra væri á flótta í máli sem hann þó á ekki formlega aðild að - er ekki með forræði málsins.

RÚV á að upplýsa en ekki reka eiturnöðrupólitík.

„Við erum að fara fram á leiðréttingu“