Kennarar á hærri launum en annað háskólafólk

Grunnskólakennari í Reykjavík er með hærri meðaltekjur en aðrir háskólamenntaðir starfsmenn borgarinnar. Í skýrslu Reykjavíkurborgar kemur fram að meðaldagvinnulaun kennara hjá borginni voru 526.553 kr. í mars 2017 en 482.432 kr. hjá öðrum háskólafélögum.

Á fundi Kennarafélags Reykjavíkur í gær var spurt hvort frambjóðendur til borgarstjórnar væru tilbúnir að hækka kennaralaun um 100 þús. kr. á mánuði. 

Undanfarin misseri hafa kennarar ítrekað fellt kjarasamninga, ekki síst vegna róttækra afla sem Ragnar Þór Pétursson formaður KÍ fer fyrir. Róttæklingarnir náðu yfirráðum í Félagi grunnskólakennara og hóta verkföllum í haust.

Krossapróf frambjóðenda

Hamas stundar mannfórnir

Hryðjuverkasamtökin Hamas, sem stjórna Gaza, boðuðu til allsherjarverkfalls til að fá sem flesta í mótmælin við landamæri Ísraels. Skipulagðar rútferðir voru til landamæranna og hvatning kom úr hátalarakerfi bænaturna. Hamas vonaðist til að fá 100 þúsund mótmælendur en 50 þúsund mættu.

Ofanritað er frásögn Die Welt. Þar segir ennfremur: Talsmaður Hamas er ánægður með framvindu dagsins. Þessi fjöldi látinna mun vonandi hreyfa við alþjóðasamfélaginu.

Í fyrndinni var fólki fórnað til að friðþægja goðin. Hamas fórnar börnum á altari stjórnmála. 

Átta börn á meðal hinna látnu

Arabar og útflutningur óreiðu

Flutningur sendiráðs Bandaríkjanna frá Tel Aviv til Jerúsalem skapar alþjóðlega óreiðu, segir samningamaður Palestínuaraba í fréttaviðtali.

Arabar neita í 70 ár að viðurkenna Ísraelsríki. Ríkisstjórnir Arabaríkja hóta Ísrael reglulega gereyðingu. Í miðausturlöndum er Ísrael eina lýðræðisríkið og stingur í stúf við ríkjandi stjórnmálamenningu múslímaríkja, sem er allt annað en lýðræðisleg. 

Aröbum gengur erfiðlega að lifa í sátt. Innanlandsfriður í Arabaríkum er ýmist ótryggur eða alls ekki fyrir hendi; Írak, Sýrland, Jemen og Líbía eru vettvangur borgarastyrjalda.

Hótun samningamanns Palestínuaraba er í takt og tón við aðalútflutning Araba, næst á undan olíu; óreiðu.

„Stór dagur fyrir Ísrael“

80% andstaða gegn ásælni ESB

Evrópusambandið ætlar sér yfirstjórn orkumála á Íslandi með einhliða breytingum á EES-samningnum. 80 prósent Íslendinga eru andvígir því að yfirstjórn orkumála flytjist frá Íslandi til Brussel samkvæmt nýrri könnun.

Ríkisstjórnin og alþingi geta hafnað ásælni Evrópusambandsins í orkuauðlindir landsins með því að segja nei við breytingum á EES-samningnum.

Þegar þjóðarviljinn er jafn skýr og afgerandi ætti ekki að vera tiltökumál að segja þvert nei við breytingum á EES-samningnum.

Vilja vald yfir orkumálum áfram á Íslandi

Gyðingahatur - lögmætur rasismi

Vinstrimenn stunda gyðingahatur einkum af tveim ástæðum. Í fyrsta lagi eru vinstrimenn ginnkeyptir fyrir trúarofsóknum, einkum ef ofsóknirnar beinast að fólki sem vegnar vel efnahagslega. Í öðru lagi eru vinstrimenn þjakaðir af fórnarlamablæti. Arabar eru duglegir að sviðsetja eymdina og kenna Ísraelsmönnum um.

Linda Ósk, talsmaður gyðingahatara, harmar að Ísrael fái að ,,sýna sínar bestu hliðar". Linda Ósk vill að gyðingar sjáist aðeins í versta mögulega ljósi - þannig er gyðingahatrinu viðhaldið.

Stolt sýnir brosandi Linda Ósk ásjónuna í fjölmiðlum og mætir þar með fjölskylduna vitandi að gyðingahatur er lögmætur rasismi. 

Stórkostlegt ef Ísland tæki ekki þátt

Humarinn, Peterson og Rousseau

Humarinn er 350 milljón ára gamalt krabbadýr með samfélagsskipan töluvert eldri en maðurinn, homo sapiens, sem aðeins er 200 þúsund ára tegund. Á þessum forsendum byggir einn þekktasti pólitíski hugsuður samtímans, Jordan Peterson, volduga kenningu um að líffræði trompi félagsleg og pólitísk úrræði.

Á seinni tíð er ráðandi kennisetning, einkum í vinstripólitík, að samfélög séu skipulögð á félagslegum forsendum en ekki líffræðilegum. Peterson kippir fótunum undan gervallri vinstripólitík síðustu 200 ára með sögunni af krabbadýrinu, sem vel að merkja er undirbyggð með vísindalegum rannsóknum. Það er ekki hægt að ýkja þær menningarpólitísku hamfarir sem leiða af kenningu Peterson - verði hún tekin góð og gild.

Kenningin um félagslega skipun samfélagsins, sem er ær og kýr vinstrimanna, er ættuð úr upplýsingunni á 18. öld, forvera frönsku byltingarinnar. Franski samfélagsrýnirinn, Jean-Jacques Rousseau, skrifaði hana inn í bókina Samfélagssáttmálinn. (Sem, innan sviga, er með sterkustu upphafssetningu nokkurs bókmenntaverks, á eftir Biblíunni; Maðurinn er fæddur frjáls, en er hvarvetna í hlekkjum).

Rousseau orðar kenninguna um félagsskipun mannfélagsins á eftirfarandi hátt:

Samfélagsskipan á ekki að skilja sem valdaskipulag, hún er heilagur réttur, sem allur annar réttur hvílir á. Samfélagsskipanin kemur ekki frá náttúrunni, svo hún hlýtur að vera byggð á samkomulagi.

Humarinn, myndi Peterson segja, les hvorki bækur né pælir hann í siðaboðum. Samfélag krabbadýrsins er skipulagt með valdi sem byggir á líffræðilegri þróun og kemur pólitík ekkert við.

Peterson boðar pólitísk pólskipti, ekkert minna. Kennisetningar upplýsingarinnar fara út um gluggann. Stofustássið verður járnhörð kenning um takmörk pólitísks frjálslyndis.

 

 

 

 

 

Evrópa með Rússum gegn Bandaríkjunum

Deilan um stöðu Íran í alþjóðasamfélaginu snýst á yfirborðinu um útbreiðslu kjarnorkuvopna en er í reynd um viðskiptahagsmuni og áhrifasvæði. Trump Bandaríkjaforseti sýnir Evrópu fingurinn með því að hætta aðild að afvopnunarsátt við Íran, segir þýska útgáfan Spiegel.

Íran þróaði kjarnorkuvopn og var líkt og Norður-Kórea á svörtum lista alþjóðasamfélagsins. Eftir samkomulag um að Íran hætti kjarnorkuvopnaþróun var landið tekið í sátt. Áhöld eru um hvort Íran hafi haldið samkomulagið. Bandaríkin og Ísrael segja nei en Evrópa, Kína og Rússland segja já.

Stórir viðskiptasamningar evrópskra fyrirtækja eru í húfi. Þeir hagsmunir vega þyngra en meint brot Íran á loforðum um kjarnorkuafvopnun. En meira býr undir.

Íran stækkar áhrifasvæði sitt í miðausturlöndum undanfarin ár. Írak er orðið að bandamanni og staða Assad í Sýrlandi styrkist með hjálp hersveita frá Íran. Helsti skjólstæðingur Bandaríkjanna í heimshlutanum, fyrir utan Ísrael, er Sádí-Arabía, sem keppir við Íran um forræði í múslímaríkjum fyrir botni Miðjarðarhafs.

Sádar, Ísraelar og Bandaríkin vilja Íran áfram í herkví viðskiptahindrana. Evrópa, Rússland og Kína eru andstæðrar skoðunar og taka Íran í sátt.

Miðausturlönd eru í viðvarandi valdapólitískri upplausn. Stórveldi, bæði innan svæðisins og utan, keppa um stöðu til að stunda viðskipti og færa út kvíarnar í valdatafli. Síðustu vendingar tengdar Íran gefa til kynna að Evrópa nálgist Rússa í andstöðu við Bandaríkin. Það eru nokkur tíðindi.

Evrópuríki standi saman gegn refsiaðgerðum

Málaferli RÚV

RÚV kaupir sig frá málaferlum með annarri hendinni en með hinni stefnir RÚV gagnrýnendum  fyrir dómstóla. Magnús Geir útvarpsstjóri gerir grein fyrir afstöðu stofnunarinnar til þess að kaupa sig frá málaferlum. En hann á eftir að útskýra hvers vegna RÚV á það til að stefna þeim sem gagnrýna stofnunina. 

Bloggari varð fyrir málssókn fréttamanns RÚV og skrifaði í framhaldi tölvupóst til Magnúsar Geirs þann 27.3. 2014. Svar hefur enn ekki borist. Tölvupósturinn er birtur hér að neðan.

 

Sæll Magnús Geir og til hamingju með stöðu útvarpsstjóra,

í haust stefndi fréttamaður RÚV, Anna Kristín Pálsdóttir, mér fyrir blogg sl. sumar þar sem ég gagnrýndi frétt sem Anna Kristín flutti 16. júlí sl. um ESB-mál.

Lögmaður Önnu Kristínar er Kristján Þorbergsson, sem lengi hefur starfað fyrir RÚV. Bæði sú staðreynd og ummæli sem Anna Kristín lét falla benda til þess að stefna hennar sé studd beint eða óbeint af RÚV, þ.e. að fyrrverandi útvarpsstjóri og/eða framkvæmdastjóri fréttadeildar hafi haft milligöngum um stefnuna.

Af því tilefni langar mig að spyrja þig að tvennu:

a) veist þú til þess að yfirmenn RÚV hafi með einhverjum hætti skuldbundið stofnunina til að styðja við málssókn fréttamanns RÚV, Önnu Kristínar Pálsdóttur, gegn undirrituðum?

b) telur þú eðlilegt að fréttamenn RÚV stefni einstaklingum út í bæ sem gagnrýna fréttaflutning RÚV?

Frávísunarkröfu minni var hafnað og málflutningur fer fram í næsta mánuði. Mér þætti vænt um að fá svar frá þér innan ekki of langs tíma.

Í viðhengi sendi ég þér greinargerðina sem ég sendi héraðsdómi og hér að neðan er hlekkur á blogg þar sem helstu efnisatriði koma fram.

bestu kveðjur
páll

http://pallvil.blog.is/blog/pall_vilhjalmsson/entry/1311043/

RÚV valdi milli slæmra valkosta

Tilfinningasósíalismi

Stéttabarátta 21stu aldar sósíalista snýst ekki um aukinn kaupmátt launþega heldur um öfund. Sósíalistar virkja tilfinningar en ekki hagtölur til að réttlæta herskáa pólitík. Öfundin er sterk tilfinning, ekki síst í litlu samfélagi samjafnaðar.

Sósíalistar samtímans virkja öfund með vísun í valin dæmi um meint óréttlæti en neita að viðurkenna alþekktar staðreyndir um stígandi kaupmátt annars vegar og hins vegar að óvíða á byggðu bóli er launajöfnuður meiri en einmitt á Íslandi.

Í blönduðu hagkerfi ríkis- og einkarekstrar verður alltaf einhver launamunur. Sósíalistar vilja ekki ræða hver hann ætti að vera. Þeir ræða heldur ekki hvort menntun skuli metin til launa. Um leið og tölur eru lagðar á borðið hrökkva sósíalistar í baklás tilfinninganna.

Fyrri tíma sósíalistar, á 19du öld og framan af þeirri 20stu, boðuðu ríkisrekstur sem lausn á þeirri hneigð hagkerfisins að skila af sér launaójöfnuði. Ríkisrekið atvinnulíf var reynt með hörmulegum árangri.  

Blandað hagkerfi er skásta fyrirkomulag atvinnulífsins. Besta hagkerfið er ekki enn fundið upp. Sama gildir um lýðræðið, það er skásta stjórnskipunin. Það er einfaldlega ekki á valdi okkar að setja saman fullkomið samfélag. Við erum of breysk.

Tilfinningasósíalisminn á það sameiginlegt með klassískum sósíalisma að velja versta kostinn þegar fullkomið samfélag er ekki í sjónmáli. Öfund er eymdartilfinning, rétt eins og kommúnismi er eymdin uppmáluð, bæði í hagstjórn og stjórnskipun.

40-50% hækkun kaupmáttar frá 2013

Persónuhatur í verkó - rök bíta ekki

Vinstrimönnum hættir til, í meira mæli en hægrimönnum, að persónugera pólitísk átök. Löng hefð er fyrir persónuóvildinni. Karl Marx, sem varð 200 ára um daginn, hataðist við nær alla - nema þá sem gáfum honum pening til að skrimta og skrifa um draumaríkið.

Verkalýðshreyfingin er til vinstri í sögunni. Þegar velferðaríkið náði þroska, eftir seinna stríð, urðu mjúkir kratar, stundum kallaðir tæknikratar, ráðandi í hreyfingunni. Tæknikratar, eins og hægrimenn, sjá meginlínur í þróuninni. Ef kaupmáttur vex, atvinnuleysi er lítið og hagvöxtur lofandi eru allir sáttir.

Nema, auðvitað, róttæklingarnir sem sjá auðvaldið í hverju horni, hvort heldur í Hörpu eða húsakynnum ASÍ. 

Rök bíta ekki á róttæklinga. Þeir búa í öðrum hagtöluheimi en fólk flest. Þegar rökin þrýtur er farið í manninn.

Vill vantraust á Gylfa