Raunsæi eða óreiða; Nató eða ekki

Ísland er aðili að Nató frá 30. mars 1949 með samþykkt á alþingi. Mestu götuóeirðir Íslandssögunnar urðu þennan dag, svo að ljóst má vera að skiptar skoðanir voru í lýðveldinu unga um aðildina.

Nató var stofnað sem hernaðarbandalag Bandaríkjanna og Vestur-Evrópu í upphafi kalda stríðsins. Vitanlegan átti að leggja Nató niður þegar kalda stríðinu lauk fyrir tæpum 30 árum. En það var ekki gert og Nató varð verkfæri Bandaríkjanna og ESB að herja á fjarlæg lönd, t.d. Úkraínu og Írak.

Frá siðferðislegu sjónarmiði ætti Ísland að segja sig úr Nató. En í alþjóðamálum trompar valdið alltaf siðferðið. Ef Ísland tæki siðferðilega rétta afstöðu, og segði sig úr hernaðarbandalaginu, yrði valdatómarúm á Norður-Atlantshafi. Ísland yrði leiksoppur í viðleitni stórvelda, Bandaríkjanna, Rússlands, Bretlands og Evrópusambandsins að tryggja hagsmuni sína í þessum heimshluta.

Það er ekki gott fyrir smáríki að verða leiksoppur stórvelda. Það veit á óreiðu í innanríkismálum þar sem ólíkir hópar viðra sig upp við útlenda hagsmuni. Þess vegna eigum við að halda okkur við skásta kostinn í öryggis- og varnarmálum, standa við samþykktina frá 30. mars 1949 og dvelja áfram í Nató. Jafnvel þótt hernaðarbandalagið sé oftar á röngunni en réttunni hin síðari ár.

Ræða afstöðu Íslands í kvöld

Dramadrottningin í KÍ

Ragnar Þór Pétursson var ekki tekinn við formennsku í KÍ áður en vantrausti var lýst á hann. Það er einsdæmi í sögu stéttarfélaga. 43 prósent þingfulltrúa lýstu vantrausti á Ragnar Þór.

Ragnar Þór sló í gegn sem dramadrottning í Kastljósi og með bloggskrifum þar sem hann sagðist ofsóttur af vondu fólki vegna skoðana sinna. Þegar að var gáð reyndust ofsóknirnar þær einar að fyrrum nemandi kærði Ragnar Þór fyrir að sýna sér klám.

Á meðan Ragnar Þór var einn um að skrifa fjölmiðladrama í kringum sína persónu leið honum fjarska vel í sviðsljósinu. En þegar réttar ályktanir voru dregnar af framgöngu hans fannst nýkrýnda formanninum það ekkert sérlega sniðugt.

Menn flýja ekki sjálfa sig. Ragnar Þór mun sýna í starfi sínu hvaða mann hann hefur að geyma. Sá naumi meirihluti sem studdi Ragnar Þór á þingi KÍ mun naga sig í handarbökin fyrir dómgreindarleysið.

Formaður KÍ skammaði fjölmiðla

Ísland réðst ekki á Sýrland

Í gær var umræða um afstöðu Íslands til flugskeytaárása á Sýrland. Látið var að því liggja í RÚV, með spurningum til ráðamanna, að Ísland ætti einhvern hlut að máli.

Flugskeytaárásin kemur Íslandi ekki hið minnsta við. Þrjú ríki, Bandaríkin, Bretland og Frakkland ákváðu að skjóta á Sýrland og spurðu hvorki kóng né prest. Alþjóðleg samtök sem Ísland á aðild að, t.d. Sameinuðu þjóðirnar og Nató, voru ekki höfð með í ráðum.

Tilraunir RÚV og annarra álitsgjafa í fjölmiðlum til að gera Ísland meðsekt eru ekki í neinum tengslum við veruleikann.

Öryggisráðið felldi tillögu Rússa

Segjum upp EES, fáum Breta í EFTA

Bretland var stofnríki EFTA árið 1960. Undir formerkjum fríverslunar gætu Bretar gengið á ný í EFTA eftir úrsögn úr Evrópusambandinu. En ekki á meðan EES-samningurinn er ráðandi um samskipti EFTA-ríkja og ESB.

Ef Guðlaugur Þór utanríkisráðherra er raunverulega áhugasamur um aðild Breta að EFTA með Íslandi, Noregi og Sviss ætti hann að beita sér fyrir uppsögn EES-samningsins.

Bretland gengur ekki inn í EFTA á meðan varaútgáfa af ESB-aðild er við lýði. En EES-samningurinn er einmitt slík útgáfa; skerðir fullveldi og gefur ESB færi á inngripum í löggjöf EFTA-ríkja.

Fíllinn fer úr postulínsbúðinni

Marxismi, tvær útgáfur

Marxismi gæti fengið aukinn hljómgrunn vegna stighækkandi atvinnuleysis sem sjálfvirkni (vélmenni) í framleiðslu leiðir af sér, segir bankastjóri Englandsbanka.

Tvær útgáfur eru til af marxisma, önnur heimspekileg og hugguleg en hin heldur síðri. Húmaníska útgáfan gerir ráð fyrir að við vinnum eftir getu og þiggjum umbun eftir þörfum. Sovéska útgáfa marxismans er að ríkið ákveði þarfir okkar, vinnuframlag og búsetu.

Spurningin er hvor útgáfan verðir ofaná á tímum vélmenna og gervigreindar.

Sprengjur sem pólitísk skilaboð eða stórveldastríð

Deilur stórveldanna í Sýrlandi eru með einkenni sem gætu leitt til heimsstyrjaldar, skrifar Simon Jenkins í Guardian. Gagnkvæmar ásakanir um villimennsku, hótanir og núna sprengjuregn gætu verið undanfari stigmagnandi hernaðarátaka.

Bjartsýnt sjónarhorn á sprengjuárásir Bandaríkjanna, Breta og Frakka er að þær séu pólitísk skilaboð um að bandamaður Rússa í Sýrlandi, Assad forseti, hagi sér innan marka velsæmis í borgarastríðinu.

En það er ekki sérstök ástæða til bjartsýni. Borgarastríð eru í eðli sínu villimannsleg og átökin í Sýrlandi hafa staðið í sjö ár. Pólitísk lausn er ekki í sjónmáli. Því miður. 

Rússar krefjast neyðarfundar

ESB nennir ekki að reka EES-samninginn

EES-samningurinn, sem Jón Baldvin kynnti á síðustu öld sem ,,allt fyrir ekkert", er úreltur. Samningurinn var gerður fyrir þjóðir á leið inn í Evrópusambandið.

Evrópusambandinu finnst ekki taka því að reka EES-samninginn lengur. Eftir að ljóst varð að Bretland færi ekki í EES eftir Brexit eru dagar samningsins í raun taldir.

Evrópusambandið mun einhliða breyta samningnum í þá veru að Ísland og Noregur taki við tilskipunum frá Brussel. Við eigum að segja upp EES-samningnum áður en í óefni er komið.

Tregða að byggja á tveimur stoðum

Sýrland sem smáútgáfa af heiminum

Um 250 þúsund eru látnir í borgarastríðinu í Sýrlandi sem hófst 2011. Heimilislausir Sýrlendingar eru milli 4-5 milljónir. Assad-fjölskyldan stjórnar Sýrlandi frá áttunda áratug síðustu aldar.

Uppreisnin gegn ríkisstjórn Assad var hluti af svokölluðu arabísku vori sem í kringum 2010 var andóf gegn ráðandi öflum í mörgum arabalöndum fyrir botni Miðjarðarhafs og múslímaríkjum í Norður-Afríku. Öflugasti hluti andófsins reyndust herskáir hópar múslíma, Ríki íslams þar fremst í flokki, sem lögðu undir sig stór landssvæði í Sýrlandi og Írak.

Bandaríkin og Rússland sameinuðust í að kveða Ríki íslams í kútinn. Bandaríkin kröfðust jafnframt að Assad forseta yrði vikið frá völdum en Rússar styðja forsetann. Enginn einn valkostur er við valdstjórn Assad. Uppreisnarhóparnir eru margir og sjálfum sér sundurþykkir. Þeir eru þjálfaðir í stríði en ekki friði.

Auk arabískra uppreisnarmanna eru Kúrdar í Norður-Sýrlandi áfjáðir að stofna eigið ríki. Kristnir eru annar minnihlutahópur sem virðast láta sér best líka stjórn Assads. Assad-fjölskyldan tilheyrir alavítum, sem eru shíta-múslímar í landi með súnní-múslíma í meirihluta.

Sýrland er í vissum skilningi smáútgáfa af heiminum. Ólíkir hópar með andstæða sannfæringu og hagsmuni berjast fyrir sinni útgáfu af hvernig málum skuli háttað. Fleiri sprengjur og meiri manndráp bæta ekki hag Sýrlendinga. En það er lenska í ófriði að gefast ekki upp fyrr en öll sund eru lokuð og síðasta blóðdropanum úthellt. Ábyrgðarhluti er að efna til ófriðar. 

Getur þýtt stríð

Sök Ragnars Þórs

Ragnar Þór Pétursson fékk 25. október 2013 vitneskju að fyrrum nemandi hans segði farir sínar ekki sléttar af samskiptum við hann sem kennara og að um væri að ræða kynferðis-/blygðunarsemisathæfi.

Ef málið hefði fengið sína meðferð á réttum vettvangi hefði það eflaust aldrei orðið fjölmiðlamatur. En Ragnar Þór gerir málið sjálfur opinbert 11. desember 2013 með bloggfærslu á Eyjunni, rúmum mánuði eftir að hafa fengið að vita að málið snerist um fyrrum nemanda. Þar leggur hann upp með að vera ofsóttur vegna bloggskrifa og segir vont fólk sækjast eftir æru sinni. Hann skrifar: ,,Það er nefnilega frekar mikið til af frekar sjúku fólki og óstöðugu."

Þarna gefur hann tóninn í opinberri málsvörn sinni. Hún gengur út á að hrakyrða og niðurlægja fyrrum nemanda og setur þar með fordæmi um hvernig skuli tekið á kynferðisbrotum í skólum. Í leiðinni flýtur með skáldskapur um að kennarar búi við stöðugt ofbeldi upploginna ásakana.

Ragnari Þór Péturssyni gekk vel að telja fólki trú um að hann væri ofsóttur enda var hann einn til frásagnar. En málflutningur hans er meira og minna staðlausir stafir sem hann skáldar upp jafnt og þétt.

Fyrrum nemandi Ragnars Þórs ofbauð og steig fram í desember 2017. Ragnar Þór Pétursson var þá búinn að tryggja sér embætti formanns KÍ.

Ragnar Þór Pétursson finnur eflaust leið til að lifa með sjálfum sér, ímyndunaraflið er a.m.k. nógu fjörugt. En KÍ getur ekki lifað með Ragnar Þór sem formann. 

Gæti skapað skaðlegt fordæmi

EES er tvöfaldur lýðræðishalli

Ef æ stærri hluti laga og reglna sem gilda hér á landi kemur frá embættismönnum í Brussel sem starfa í þágu annarra hagsmuna en Íslands myndast hér á landi vaxandi lýðræðishalli.

Við tengjumst embættismönnunum í Brussel í gegnum EES-samninginn, sem upphaflega var gerður fyrir verðandi ESB-ríki. Á seinni árum ber á því að Norðmenn, nánar tiltekið norskir embættismenn, noti EES-samninginn til að seilast til áhrifa hér á landi.

Nú liggur fyrir að Ísland er ekki á leið inn í Evrópusambandið í fyrirsjáanlegri framtíð. Eina rökrétta niðurstaðan er að við segjum upp EES-samningnum.

Augljós hætta á lýðræðishalla