Sigmundur Davíð er mótvægi við vinstrafrjálslyndið

Þingmaður Samfylkingar vill úrsögn Íslands úr Nató út af Trump. Formaður Viðreisnar vill Ísland inn í ESB-óreiðusamtökin. Vinstri grænir boða afbyggingu atvinnulífsins í nafni glópahlýnunar.

Sjálfstæðisflokkurinn er smitaður vinstrafrjálslyndinu, samanber 3. orkupakkann og glópatrú á manngert veðurfar.

Sigmundur Davíð og Miðflokkurinn eru borgaralegt mótvægi við raðdómgreindarleysi vinstrafrjálslyndis.

Telur að Sigmundur Davíð verði í næstu ríkisstjórn

Frjálslynd stríð og Trump-lögmálið

Innrásin í Írak 2003 var gerð undir merkjum vestræns frjálslyndis. Markmiðið var að steypa af stóli einræðisherra, Saddam Hussein, og umskapa Írak. Verkefnið mistókst herfilega. Áratug síðar munaði litlu að Írak yrði að Ríki íslams.

Borgarastríðið í Írak og síðar í Sýrlandi styrkti Íran. Trump fékk forsetaembættið 2016 m.a. út á loforð um að hætta frjálslyndum stríðum í miðausturlöndum. Frjálslyndinu heima fyrir sýndi Trump fingurinn með því að loka á straum innflytjenda frá múslímaríkjum. Með frjálslyndum stríðum fór fjölmenningin á haugana.

Slagorð Trump um endurreisn Stór-Ameríku var túlkað sem veikleikamerki í miðausturlöndum. Íran gekk á lagið. Þegjandi samkomulag var á milli Írans og Trump-stjórnarinnar, segir í Jerusalem Post, um að útþensla íranskra áhrifa mætti vera á kostnað bandamanna Bandaríkjanna en ekki bandarískra mannslífa. Stórveldi sem ekki tryggir líf þegna sinna er vitanlega smátt.

Íranir brutu þegjandi samkomulagið með drápi á Bandaríkjamanni í flugskeytaárás í Írak 27. desember. Nokkrum dögum síðar var einn valdamesti maður Írans, og aðalhöfundur útþenslustefnunnar, Soleimani, tekinn af lífi í Bagdad af Bandaríkjaher.

Trump mun ekki hefja landhernað gegn Íran upp á frjálslynda vísu. En hann getur látið eldi og brennisteini rigna yfir Íran, sprengt landið aftur á steinöld.

Trump er ekki heftur af frjálslyndi. Í viðtengdri frétt segir: ,,Trump sagði að ýmis þeirra skot­marka sem væru í sigti Banda­ríkja­manna hefðu mikla þýðingu fyr­ir Íran og ír­anska menn­ingu." Í munni frjálslyndra er tortíming menningar bannorð. Lögmál fjölmenningar leyfir ekki slíkt orðfæri. Trump boðar annað lögmál, sýnu óvægara en það frjálslynda.

Klerkastjórnin í Teheran skilur vonandi Trump-lögmálið áður en það er um seinan.

Reiðubúnir að ráðast á 52 skotmörk

Blóðhefnd sem utanríkispólitík

Íraninn Soleimani, sem Bandaríkjaher tók af lífi, var á vappi í Bagdad, höfuðborg Íraks, og skipulagði umsátur um bandaríska sendiráðið nokkrum dögum fyrir aftökuna. Einn æðsti maður Íran vann með þegjandi samþykki stjórnvalda í Írak að herja á sendiráð Bandaríkjanna, sem á að heita bakhjarl Íraks og bjargaði landinu frá því að verða Ríki íslams að bráð. Ríki íslams var einnig svarinn andstæðingur Írans. Svolítið kúnstugt.

Íran hótar blóðhefndum og stjórnvöld í Írak óttast að landið verði vettvangur frekari blóðsúthellinga. Bandaríkin senda fleiri hermenn til Íraks, þvert á yfirlýsta stefnu Trump að fækka bandarískum hermönnum í miðausturlöndum. 

Írak er ekki fullvalda ríki, nema að nafninu til. Hermenn annarra ríkja nota landið til uppgjörs sem líkist fremur átökum glæpahópa um hverfisyfirráð en milliríkjasamskiptum.

Fyrrum sendiherra Ísraels hjá Sameinuðu þjóðunum gerir því skóna að viðvarandi stríðsástand í Írak og nærsveitum kalli á uppstokkun, víðtæka friðarsamninga, líkt og eftir stórstríð í Evrópu. 

Munurinn er sá að trúarmenning, siðir og venjur í Evrópu voru og eru einsleitari en í miðausturlöndum.

Meiri líkur eru á auknum blóðhefndum í miðausturlöndum en allsherjarfriði. Því miður. 

 

Víg Soleimanis „stríðsaðgerð“

Íran og Ríki íslams - þjóðríki og himnaríki

Ríki íslams var trúarhugmynd um nýtt kalífadæmi súnní-múslíma. Í fáein misseri 2014-2015 var Ríki íslams til í landamærahéruðum Sýrlands og Íraks. Þar fyrir utan er Ríki íslams neðanjarðarsamtök með sellur hér og þar en ekkert land til að rækta og verja.

Íran er aftur þjóðríki með 80 milljónir íbúa, að stærstum hluta Persa sem játa shíta-útgáfu múslímatrúar.

Leiðtogar Írans geta ekki farið neðanjarðar, þeir missa ríkið fari þeir í felur. Leiðtogar Ríkis íslam gátu sent fylgismönnum sínum hljóðupptökur úr felum; klerkarnir í Teheran verða að sitja stjórnarskrifstofur og vera sýnilegir.

Vesturlönd gátu illa beitt sér gegn Ríki íslams, nema þessa fáeinu mánuði sem ríki þeirra átti landfræðilega tilvist. Íran er aftur skotmark, sitjandi önd. 

Hefðbundið stríð á milli Bandaríkjanna og Íran er ólíklegt. Bandaríkin láta sér ekki innrás til hugar koma, lærðu það af Írak-stríðinu. Íran hefur enga burði til að herja á Bandaríkin nema með hryðjuverkárásum.

Skærur og staðbundin leiðindi verða eftirmál aftöku Soleimani. Klerkarnir í Teheran vilja þjóðríkið umfram himnaríkið.

 

Spurningin bara hvenær stríð brjótist út

Vinstrimenn til varnar bankaauðvaldinu

Fyrrum ráðherra Samfylkingar ritar til varnar bankaauðvaldinu í málgagn Samfylkingar. Í Kjarnagrein Katrínar Júlíusdóttur er æmt og æjað yfir ,,séríslenskum" bankaskatti á Fróni.

Katrín og fleiri vinstrimenn af samfylkingarsortinni studdu með ráðum og dáð bankaauðvaldið fyrir hrun. Ágúst Ólafur, félagi Katrínar, lagði til að enska yrði opinbert mál á Íslandi til að auðvelda hamfarastefnu bankanna.

Íslenskt bankafólk kunni ekki sitt fag. Hrunið leiddi það í ljós. Vinstrimenn kunna sér ekki hóf. Sagan kennir okkur það. Tveir nauðsynlegir þættir í velferð þjóðarinnar eru veikir bankar og áhrifalitlir vinstrimenn.

4% dauði í Bagdad

Olíuverð á heimsmarkaði hækkaði ekki nema um 4 prósent við fréttir af aftöku óopinbers leiðtoga shíta-múslímaríkjanna Írans og Íraks. Þeir dagar eru liðnir að skortur á olíu frá miðausturlöndum stöðvi hagkerfi vesturlanda.

Aftakan á Soleimani er áhugaverðust í innbyrðis valdabaráttu múslímaríkja. Shíta-múslímar í Íran, Írak og Sýrlandi sóttu í sig veðrið í baráttunni við súnní-múslíma með Sádi-Arabíu sem valdamiðstöð. Vesturlönd umbáru vöxt og viðgang shíta á meðan Ríki íslams, sem er hreyfing súnní-múslíma, var hættuleg. Soleimani var lykilmaður í útþenslu shíta. 

Shítar eru ekki nema um 20 prósent múslíma, súnnar 80 prósent. Af þeirri ástæðu einni eru útþenslunni takmörk sett. Höfuðríki shíta er Íran sem fyrir daga múslímatrúar hét Persía og gerði bæði Grikkjum og Rómverjum skráveifu í fornöld. Kjarnorkuvopnaáætlun Írans, sem Obama leyfði en Trump stöðvaði, var tilraun til að gera Íran að stórveldi. Landvinningar síðustu ára, í Írak og Sýrlandi, gáfu þeirri ímynd undir fótinn. 

Stefið í útþenslu múslíma síðustu ára, bæði shíta og súnna, er að vesturlönd séu úrkynjuð og veik. Vestrænn almenningur er áhugasamari um kynjapólitík og loftslagsvá en heimsveldi. Misheppnuð tilraun vesturlanda til að umbreyta múslímaríkjum, með innrásum í Írak og Afganistan í kjölfar falls tvíburaturnanna í New York 11. sept. 2001, þótti undirstrika veikleikana. Nú væri tækifæri þjóða spámannsins að láta að sér kveða. Blindaðir af trú sáu múslímar ekki harðan veruleikann: í samanburði við vesturlönd eru múslímaríki á steinaldarstigi í menningu og tækni.

Aftakan í Bagdad í nótt verður ekki án afleiðinga. Jerusalem Post segir aftökuna hafa verið óhugsandi - áður en hún var gerð. Soleimani sendi shítana sína til að narta í veldi Bandaríkjanna með umsátri um bandaríska sendiráðið í Bagdad. Fáeinum dögum síðar er Soleimani dauður.

Soleimani mátti vita að sendiráð eru Bandaríkjamönnum viðkvæm á kosningaári. Carter tapaði forsetakosningunum 1980 vegna sendiráðstöku landa Soleimani í Tehran. Trump stendur til endurkjörs í haust.

Klerkaveldið í Íran er í valþröng. Ef þeir láta aftökuna yfir sig ganga sýnast þeir vanmáttugir. Ef þeir auka ófriðinn og velja sér viðkvæmt bandarískt skotmark hætta þeir á frekari aftökur leiðtoga sinna. Innanlandsástand í Íran er þannig að óvíst er hvort margir gráti mannfall í röðum klerkanna.   

Dýnamít í púðurtunnu?

Tyrkland með heimsveldaáform

Tyrkir ætla að senda herlið til Líbýu, sem er klofið land eftir misheppnaða tilraun frjálslyndra á vesturlöndum að skipa þar málum eftir sínu höfði. Tyrkir herja jafnframt á byggðir Kúrda í Sýrlandi með það fyrir augum að færa landamæri ríkjanna á kostnað Sýrlands.

Austurhluti Miðjarðarhafs liggur á milli Tyrklands og Líbýu. Guardian segir markmið Tyrkja efnahagsleg. Þeir ætli að tryggja sér rétt til vinnslu á gasi og olíu á svæðinu. Áður höfðu Grikkir, Egyptar, Kýpverjar og Ísraelsmenn samið sín á milli um vinnslu á hafsvæðinu.

Jerusalem Post setur hernaðarafskipti Tyrkja í samhengi við heimsveldi Ottómana sem féll í fyrri heimsstyrjöld. Í framhaldi voru landamæri fyrir botni Miðjarðarhafs dregin af gömlu evrópsku nýlenduveldunum, Bretum og Frökkum.

Eftir fall Ottómana byggðu Tyrkir upp veraldlegt þjóðríki undir forystu Atatürk. Á seinni árum færist Tyrkland í átt múslimaríkis undir leiðsögn Erdogan forseta. Á meðan veraldleg pólitík réð ferðinni í Tyrklandi sóttust þeir eftir aðild að Evrópusambandinu en var hafnað.

Heimsveldaáform Tyrkja á austurhluta Miðjarðarhafs kalla á viðbrögð Evrópuríkja sem og annarra sem eiga hlut að máli. Tyrkland ásamt Katar og Ítalíu styðja Trípólí-stjórnina í Líbýu á meðan Egyptar, Frakkar og Rússar styðja stríðsherrann Haftar.

Deilurnar fyrir botni Miðjarðarhafs voru flóknar fyrir. Heimsvaldastefna Tyrkja mun ekki einfalda þær.

Samstaða gegn uppgjöf vinstrimanna

Ríkisstjórn vinstriflokkanna, Jóhönnustjórnin, sem tók við völdum 2009, undirbjó uppgjöf íslenska lýðveldisins. Fyrst átti að gefast upp fyrir kröfum Breta og Hollendinga um að íslenskur almenningur tæki ábyrgð á Icesave-skuldum einkabanka. 

Síðan átti að gefa upp fullveldið til Evrópusambandsins.

Indefence-hópurinn reisti fyrstu varnarlínuna með því að knýja í gegn þjóðaratkvæðagreiðslu um Icesave-samninga Jóhönnustjórnarinnar. Í kjölfarið skapaðist svigrúm til að brjóta á bak aftur ESB-umsóknina frá 16. júlí 2009.

Lýðveldinu var bjargað á síðustu stundu.

Fékk fálkaorðu vegna InDefence

Frjálslynda heimsvaldastefnan og Trump bjargvættur

Bandaríkin stjórnuðu Írak eftir innrásina 2003 og fall Hussein. Í dag er bandaríska sendiráðið í höfuðborg Íraks í umsátri öskrandi múslíma. Hvaða skelfilegu mistök leiddu til niðurlægingarinnar?

Yfirborðsskýringin er að Bandaríkin gerðu árás á sveitir hliðhollar Íran með bækistöðvar í Írak. Tilefni árásar Bandaríkjanna er að þeir innfæddu drápu bandarískan verktaka. Jerusalem Post útskýrir samhengi hefndaraðgerðanna.

Í stærra samhenginu er staða Bandaríkjanna í Írak og miðausturlöndum almennt mistök frjálslyndra á síðasta áratug. Innrásina 2003 má skrifa á reikning Bush forseta og herskárra kaldastríðshauka. Brotthvarf bandaríska hersins undir lok áratugarins var viðurkenning á óförunum. Í byrjun síðasta áratugar var borðið dekkað fyrir skynsama og raunsæja utanríkisstefnu er í grunninn leyfði múslíum í miðausturlöndum að finna lausn á eigin málum. 

Það gekk ekki eftir. Frjálslyndir, Obama, Clinton og kó, tileinkuðu sér herskáa stefnu um að breyta miðausturlöndum í vestræn fjölmenningarsamfélög. Arabíska vorið í byrjun áratugarins var tylliástæða. Gadaffi í Líbýu var steypt af stóli og efnt var til borgarastyrjaldar í Sýrlandi.

Trummp var kjörinn forseti 2016 til að stöðva illa ígrunduð hernaðarævintýri. Herskáir frjálslyndir gengu af göflunum, heimtuðu meira blóð og höfuð Trump á fati; hann væri hvort eð er ekki annað en smurður agent Pútín Kremlarbónda.

Kaldastríðsfrjálslyndið í Bandaríkjunum er útskýrt í málgangi íhaldssamra hægrimanna, American Conservative. Í gruninn trúir herskáa útgáfan af frjálslyndi að vestrænt samfélag sé sniðmát fyrir heimsbyggðina alla. Í stað þess að viðurkenna hreint út heimsvaldastefnuna klæða frjálslyndir hana í hugmyndafræði mannréttinda og yfirvofandi heimsendis vegna manngerðs veðurfars.

Mannréttindi koma ekki af himnum ofan. Þau verða til í samfélagi manna. Vestræn mannréttindi vaxa úr kristni, eins og Tom Holland sýnir fram á í nýrri bók, og byltingunum í Bandaríkjunum og Frakklandi á seinni hluta 18. aldar. Þessi mannréttindi eru framandi múslímum enda viðurkenna þeir þau ekki.

Trump er bjargvætturinn gegn heimsvaldastefnu frjálslyndra. Hann blés, koltvísýringi auðvitað, á glópahlýnun og boðaði endalok frjálslyndrar heimsvaldastefnu í miðausturlöndum.

Bandaríkin áttuðu sig á að stríðið í Víetnam var tapað 1968 þegar sendiráðið í Saigon varð fyrir árás. Sjö árum síðar lauk 25 ára sneypuför herveldisins til smáríkis í Suðaustur-Asíu. Barátta gegn heimskommúnisma var yfirvarpið sem kostaði milljónir mannslífa. Umsátrið um bandaríska sendiráðið í Bagdad í árslok 2019 fær kannski einhverja fleiri en Trump til að kveikja á perunni í Washington um að frjálslynda heimsvaldastefnan er ferð án fyrirheits.  

Kennir Íran um árásina

Katrín og mótsögnin um manngert veðurfar

Íslendingar þekkja náttúruhamfarir. Eldgos, jarðskjálftar, hafís og harðindaár eru skráð í sögu okkar frá elstu tíð. Katrín Jakobsdóttir forsætisráðherra ræddi í áramótaávarpi aðventuóveðrið á nýliðnu ári og sagði:

Ellefu þúsund manns og 7500 heimili og fyrirtæki voru án rafmagns þegar verst lét. Hross og skepnur féllu, foktjón varð verulegt og við misstum ungan mann norður í Sölvadal – slíkt tjón verður aldrei bætt. Veðurofsinn hefur sýnt og sannað að tryggja þarf innviði um land allt betur en nú er og hafa stjórnvöld þegar hafið vinnu við að skipuleggja þær umbætur.

Hvergi minntist forsætisráðherra á loftslagsvá í tengslum við óveðrið á aðventunni. Enda hefði það verið kjánalegt. Veðurofsi á Íslandi er náttúrulegt fyrirbrigði frá landnámstíð.

En þegar Katrín ræðir veðurfar í öðrum heimshlutum kemur annað hljóð í strokkinn.

Um allan heim hefur krafan um aðgerðir gegn loftslagsvánni orðið háværari í ár. Neyð hefur skapast víða um heim vegna veðurfarsöfga; það eru hitabylgjur, þurrkar, flóð og gróðureldar.

Jæja, Katrín, veðrið í útlöndum er sem sagt manngert en Íslendingar búa við náttúrulegt veðurfar. Eða hvað?

Raunar má finna í ávarpi forsætisráðherra skýringu á þessari mótsögn. Katrín segir:

Þó að aðgengi að upplýsingum sé mikið, eru þær misáreiðanlegar og til eru flókin algrím sem stýra okkur á netinu og halda fólki stundum í eigin samfélagskima sem það heldur að sé samfélagið allt.

Þeir sem trúa á manngert veðurfar, þvert á alla reynslu sögunnar, eru í ,,eigin samfélagskima." Þessi kimi er pólitískur og trúarlegur, biskup Íslands nýjasta dæmið, en hefur mest lítið með náttúrulegan veruleika að gera.

 

 

 

Ungt fólk stöðugt í beinni