Hér er dæmi um fréttafölsun Kjarnans, Þórður Snær

Miðlar sem gefa sig út fyrir að vera hlutlausir en ganga erinda hagsmuna eigenda sinna eða tiltekinna stjórnmálaviðhorfa rjúka einatt upp til handa og fóta þegar þeir eru gagnrýndir og krefja gagnrýnendur um dæmi. Þegar dæmi eru nefnd þegja viðkomandi miðlar gagnrýnina af sér.

Þórður Snær Júlíusson ritstjóri Kjarnans er sekur um slíka hegðun. Hann heimtar dæmi um hlutdrægni Kjarnans. Þegar dæmin eru tiltekin, eins og gert var hér í haust undir fyrirsögninni Samfylkingarfréttamennska Kjarnans, sbr. hér að neðan, þagði Kjarninn þunnu hljóði.

Aðeins 13 prósent Íslendinga eru í áhættuhópi vegna fátæktar og félgslegrar útskúfunar. Meðaltalið í Evrópusambandslöndunum er nær tvöfalt hærra eða 24%, eins og segir á bloggi Heimssýnar.

Kjarninn, á hinn bóginn, sver sig í ætt við eignarhaldið og skrifar um hve almenningur hefur það skítt á Íslandi.

Þeir sem lesa upphaflegu heimildina með óbrjáluðum huga sjá í hendi sér að fréttin er ekki hve margir fátækir eru á Íslandi heldur að Evrópa er í fátæktargildru.

Það þýðir ekki fyrir Þórð Snæ að þykjast ekki vita um þessa fréttafölsun í þágu ESB-sinna. Hann er sjálfur höfundur fréttarinnar.

 

Ríkisstjórnin styrkist, vinstrimenn veikjast

Ríkisstjórnin fær meir stuðning sem heild og ríkisstjórnarflokkarnir sækja í sig veðrið. Stærstu mál ríkisstjórnarinnar hingað til, s.s. leiðrétting á skuldum heimila, féll í kramið hjá þjóðinni og auk þess nýtur stjórnin þess að efnahagsástandið er með þokkalegasta móti, og stórfínt i samanburði við ömurleikann í Evrópu.

Þá hagnast ríkisstjórnin á því að meirihluti vinstrimanna í Reykjavík kann hvorki að reka grunnþjónustu, samanber ferðaþjónustu fatlaðra, né geta vinstrimenn haldið innviðum samfélagsins í lagi eins og glöggt má sjá af ástandi gatna í höfuðborginni.

Almenningar ber saman traust tök ríkisstjórnarinnar á stærstu málum landsstjórnarinnar við lausung og reiðileysi vinstrimanna í Reykjavík og dregur rökréttar ályktanir.

36,4% styðja ríkisstjórnina

Hryðjuverkatúrismi unglinga

Ungu fólki af báðum kynjum sem ekki finnst nógu fútt í tilverunni skreppur til Ríki íslams að stunda stríð í smá tíma eða - í tilfelli stúlkna, sem ekki fá að berjast samkvæmt sharia - veita stríðsstrákum atlot.

Hryðjuverkatúrismi af þessari sort stafar af því að sumir unglingar greina ekki á milli fantasíu kvikmynda, áróðurs og tölvuleika annars vegar og hins vegar stríðsátaka.

Fullorðnir vita að stríð er dauðans alvara.

Fyrsti Kóreubúinn í Ríki íslams

Leppaviðskipti banka og lífeyrissjóða

Brynjar Harðarson viðurkennir sig lepp í viðskiptum Glitnis frá fyrir hrun. Leppar voru einatt notaðir í viðskiptum til að fela raunverulega eigendur. Eftir hrun yfirtóku bankar og lífeyrissjóðir að stórum hluta atvinnulífið.

Ýmsar ástæður eru fyrir því að bankar og lífeyrissjóðir vilja ekki beina aðkomu að viðskiptum og allar þær ástæður miða að því að blekkja, ýmist samkeppnisaðila, stjórnvöld eða almenning.

Nær engin umræða er um leppaviðskiptin, sem gefur til kynna að þau séu býsna útbreidd í atvinnulífinu og samstaða sé um að halda þeim innan vébanda viðskiptalífsins. Mafían starfar samkvæmt sömu lögmálum.

 

Segist hafa verið leppur Glitnis

Öfga-Evrópa og byltingarhefðin

Evrópa er vagga byltingarinnar, allt frá þeirri frönsku í lok 18. aldar. Byltingarástand á 19. öld, þegar Evrópa sleit af sér lénsskipulagið, ól af sér öfgar á 20. öld er leiddu til kommúnískra og fasískra byltinga með tilheyrandi blóðbaði.

Öfgarnar voru einkum bundnar við meginlandið. England bauð upp á borgaralegan kapítalisma sem ekki var fullkominn með sinni misskiptingu en samt hátíð á við öfgar meginlandsins.

Eftir seinni heimsstyrjöld var Öfga-Evrópa í frosti kalda stríðsins um áratugi. Þíðan eftir fall Berlínarmúrsins virðist ekki skila sterkri sannfæringu fyrir kostum borgaralegs kapítalisma með félagslegu ívafi.

Öfga-Evrópa lætur kræla á sér á ný.

Fimmtungur Þjóðverja vill byltingu

Vestrænt frelsi til að berjast gegn vestrænum gildum

Vestræn ríki herja á Ríki íslam í Miðausturlöndum sem eru holdgervingur trúarfasisma og mannfyrirlitningar. Samtímis fara vestrænir karlar og konur af múslímsku bergi til Miðausturlanda að styðja Ríki íslams.

Í Bretlandi er síðustu daga rætt um þrjár unglingsstúlkur á leið til vígamanna íslamista. Dálkahöfundur Guardian vekur athygli á því að stúlkurnar eru í fullum rétti að ferðast hvert þær vilja og leggja þeim málstað lið sem hugurinn stendur til.

Dálkahöfundurinn er með nokkuð til síns máls. Vestrænt frelsi er einstaklingsfrelsi og það má líka nota til að berjast gegn vestrænum gildum.

Heitir „varanlegum sigri“

Ríkið veiti barneignaleyfi

Deilur foreldra um forræði barna kosta tíma og fjármagn opinberra aðila s.s lögreglu, dómstóla og barnaverndaryfirvalda. Aukin íhlutun opinberra aðila í einkalíf fólks sem ekki kann fótum sínum forráð veitir ríkisvaldinu átyllu til afskipta af fjölskyldulífi þegnanna.

Undir þeim formerkjum verður brýnna að fólk sem hvorki kann að velja sér maka né gæta hagsmuna barna sinna geti ekki börn.

Það styttist í orwellskt samfélag þar sem enginn fær að eignast barn sem ekki sannar fyrirfram að vera hæft foreldri.

 

Ofsóttar flýja til Færeyja

Reykjavík: ónýtar götur en atkvæðagreiðsla um gangstíga

Götur í Reykjavík minna æ meira á vegakerfi þriðja heimsins. Borgarstjórn vinstrimanna lætur sér það í léttu rúmi liggja og finnst mikilvægara að þrengja götur fyrir bílaumferð en að halda slitlaginu í lagi.

Forgangur vinstrimanna er auglýstur þessa dagana undir formerkjum hverfakosninga þar sem fólk fær að greiða atkvæði um gangstíga og leikvelli.

Fólk færi ekki að greiða atkvæði um göturnar, hvort þær eigi að vera holóttar eða í lagi. Vinstrimenn í ráðhúsinu eru búnir að ákveða að refsa þeim sem aka bíl með holóttum götum. Ekkert lýðræði þar.

Maður fær höfuðverk af hruni - vöggustofusamfélagið

Vöggustofusamfélagið birtist okkur í ýmsum myndum. Félagsráðgjafi segir okkur að hrunið valdi höfuðverk og streitu. Við vitum á hinn bóginn af reynslu að félagsleg samheldni, t.d. á vinnumarkaði, stórjókst eftir hrun.

Við urðum líka refsiglaðari og um tíma býsna dugleg að mótmæla á götum og torgum.

Tíminn fyrir hrun, kallaður útrás, var einnig uppspretta höfuðverkjar og streitu hjá mörgum sem fannst þeir missa af gullvagninum og geta ekki státað af sömu neyslu og nágranninn.

Langtímaáhrif hrunsins verða ekki mæld í höfuðverkjum og streitu einstaklinga heldur þeirri vöðvabólgu samfélagsins sem heitir pólitík.

Fleiri með vöðvabólgu eftir hrun

Egill Helgason ritstjóri Morgunblaðsins

Egill Helgason, fyrrum starfsmaður Jóns Ásgeirs Jóhannessonar, Baugseiganda, var ráðinn ritstjóri Morgunblaðsins þegar honum tók að leiðast RÚV-tilvistin.

Egill, sem ekki er gefinn fyrir samsæriskenningar, lét verða sitt fyrsta verk sem ritstjóri að afneita ESB-áhuga og sór jafnframt af sér samfylkingarfortíðina.

Öllu ofanrituð færsla er bull í stíl Egils Helgasonar.