Anna Frank, dagbókin og tölfræðin

Anna Frank og dagbókin hennar, sem greinir frá hversdagslegum hlutum eins og rifrildi fullorðinna og hrifnæmi unglinga, eru líkast til þekktasti vitnisburður um helför gyðinga í Hitlers-Þýskalandi ef frá er talin miðstöð útrýmingarherferðarinnar, Auschwitz.

Örlög Önnu og hversdagslega dagbókin hennar setja helförina í persónulegt samhengi sem grípur skilningarvitin fastari tökum en tölfræði um að nasistar hafi drepið sex milljónir gyðinga.

 


mbl.is Lést Anne Frank mánuði fyrr?
Tilkynna um óviðeigandi tengingu við frétt

ESB-elítan vill Saga class lífstíl

Sex ára samfelldar umræður um kosti og galla aðildar Íslands að Evrópusambandinu og einar þingkosningar skila afgerandi niðurstöðu: þjóðin vill ekki inn í ESB.

Elítufólkið hjá hagsmunasamtökum eins og SA og ASí, sem drýgir góð laun með reglulegum Brunsselferðum, en þar fást dagpeningar og ferðapunktar, vill ekki skilja niðurstöðu lýðræðislegs ferlis og heimtar aðild að ESB hvað sem öllu öðru líður.

Elítufólkið var í klappliði útrásarinnar og komst þar upp á lagið að maka krókinn. Eftir hrun var stefnan tekin á ljúfa lífið í ESB.

Nær ekkert af elítufólkinu tekur þátt í umræðunni um Evrópusambandið og hvert það stefnir. Elítufólkinu finnst það heldur ekki skipta máli; aðalatriðið er að það sjálft ferðist á fyrsta farrými.


mbl.is Heppilegra að losa höftin með evru
Tilkynna um óviðeigandi tengingu við frétt

Fjölskyldur og hælisumsóknir

Stóraukin fjöldi flóttamanna til Evrópu, með tilheyrandi samfélagslegum vandamálum, leiðir til þess að ríkisstjórnir taka upp stífari reglur um heimsóknir. Í Bretlandi eru dæmi um að fjölskyldum sé splundrað vegna hertra reglna.

Við eigum að læra af reynslu annarra þjóða og leyfa málum ekki að þróast hér á þann veg að fjölskyldum sé splundrað til að framfylgja reglum um hælisvist.

Þá er einfaldara og mannúðlegra að stöðva komu flóttamanna. Líkt og á flestum sviðum samfélagsins er íhaldssöm forvörn heppilegri en misráðin tilraunastarfsemi. 


mbl.is Fjölskyldan má ekki koma í heimsókn
Tilkynna um óviðeigandi tengingu við frétt

Einkalíf á opinberum vettvangi, með og án nektar

Einkalíf fólks er æ meira opinbert. Fólk byrjar saman á opinberum vettvangi og stundar fjölskyldulífið með síbylju sjálfsmynda á samfélagsmiðlum fyrir framan alþjóð.

Eftir því sem einkalífið færist í auknum mæli á opinberan vettvang verður erfiðara að draga mörkin milli réttar einstaklingsins til að vera með sig og sitt í friði annars vegar og hins vegar hvað er almenningur

Nekt er einkamál, eða var það til skamms tíma. Tilraun til að gera brjóst kvenna að sjálfsögðum hlut leiddi í ljós að samhengið skipir öllu.

Undir formerkjum hefndarkláms virðist réttarkerfið með tiltölulega skýra skilgreiningu á því hvar mörkin liggja milli löglegra og ólöglegra myndbirtinga af nekt. Skilin verða ógleggri þegar huglægar frásagnir fólks af misheppnuðu parsambandi rata á opinberan vettvang.

Einkalíf er verðmæti sem sífellt erfiðara er að verja fyrir opinberum ágangi.

 


mbl.is „Takk fyrir ad halda framhja mer sæta“
Tilkynna um óviðeigandi tengingu við frétt

Össur gefst upp á Árna Páli, kýs Jón Gnarr

Fyrsti formaður Samfylkingar, Össur Skarphéðinsson, telur ekki að sitjandi formaður, Árni Páll Árnason, eigi möguleika að fylkja flokknum í stjórnarráðið og alls ekki í forsætisráðuneytið.

Össur telur Jón Gnarr eigi burði til að ná forsætisráðuneytinu úr höndum Framsóknarflokksins og leiða vinstristjórn til valda, samkvæmt frétt DV byggðri á fasbókarfærslu Össurar.

Össur er þekktur spriklari á vinstri vængnum og kom m.a. á koppinn Bjartri framtíð. Eftir því sem fyrsti formaður Samfylkingar spriklar meira verður vinstri vængur stjórnmálanna brotakenndari.


Lekamálið var pólitík frá a til ö

Lekamálið var pólitískt mál frá uppþhafi og til loka. Pólitíkin byrjaði með því að aðgerðasinnar með samband við fjölmiðla, einkum DV og RÚV, gerðu hælisleitanda að baráttumáli sínu og kröfðust þess að við veittum viðkomandi hæli.

Hælisleitandinn var ekki eins góður pappír og aðgerðasinnar gáfu hann út fyrir að vera. Starfsmaður í innanríkisráðuneytinu veitt fjölmiðlum upplýsingar um hælisleitandann, sem aðgerðasinnar og DV og RÚV vildu ekki að kæmu fram, enda sýndu upplýsingarnar hælisleitandann í miður heppilegu ljósi.

Almenningur átti rétt á þessum upplýsingum enda óskaði heilisleitandinn eftir aðgangi að íslensku samfélagi. Við eigum rétt á að vita sem mest um slíka menn, ekki síst þegar búið er að gera hælisumsóknina að opinberu máli.

Eftir að upplýsingar frá innanríkisráðuneytinu komu fram lögðust aðgerðasinnar og DV/RÚV á eitt að gera upplýsingafjöfina að ,,lekamáli". Þingmenn vinstriflokkanna á alþingi lögðu þeim lið og ríkissaksóknari Jóhönnustjórnarinnar kom í humátt á eftir.

Pólitík lekamálsins varð kristalstær eftir að ítarleg rannsókn og dómsmál leiddi í ljós að starfsmaður innanríkisráðuneytisins lék einleik með því að gera upplýsingarnar opinberar. En það stóð aldrei til að komast að sannleikanum í málinu heldur átti að nota það til að flæma ráðherra úr stjórnarráðinu. Embættismenn tóku þátt í pólitíkinni með glannalegum yfirlýsingum sem ekki eru í neinu samræmi við viðtekna háttsemi.

Umboðsmaður alþingis sýndi starfsfélögum sínum hjá ríkissaksóknara samstöðu og stökk á vagninn með þekktum afleiðingum.

Frá sjónarhóli aðgerðasinna og DV/RÚV og vinstriflokkanna var lekamálið vel heppnuð aðgerð þar sem stök fjöður varð að pólitísku hænsnabúi.

Fyrir almenna borgara var lekamálið lexía um hvað bíður okkar ef upplausnaröflin ná tökum á samfélaginu.

 


mbl.is Ýmislegt athugavert í áliti um lekamálið
Tilkynna um óviðeigandi tengingu við frétt

Feðraveldið, femínistar og karlinn sem nauðgari

Feðraveldið er álíka aktúelt hugtak í dag og segulbandsspólur eru fyrir útgáfu tónlistar. Sú tíð er löngu liðin að karlar sitji yfir hlut kvenna.

Á mikilvægum sviðum samfélagsins, t.d. menntun, eru karlar eftirbátar kvenna; þeim gengur verr í skóla og konur eru duglegri að taka æðri háskólagráður en karlar.

Jafnrétti karla og kvenna verður líklega seint nógu fullkomið til að jafna út hlutfall nauðgara meðal kynjanna.

Einmitt af þeirri ástæðu leggja herskáir femínistar sífellt meiri áherslu á karlinn sem nauðgara enda er karlkynið þar veikast fyrir.

En þegar karlímynd femínista er nauðgarinn verður málflutningurinn eins marktækur og ef kvenkynið er metið út frá mæðrum sem misþyrma börnum.

 


mbl.is Sakar Kvennablaðið um drusluskömmun
Tilkynna um óviðeigandi tengingu við frétt

Heimurinn minnkar - en stríðsbröltið eykst

Hraðbraut milli London, Moskvu og New York hljómar eins og vestrænar þjóðir og Rússar sitji á sátts höfði. En það er öðru nær, vesturlönd og Rússar berjast um forræðið yfir Úkraínu sem liggur á milli Evrópusambandsins og Rússlands.

Bandaríkin kynda undir ófriði í Úkraínu og freista þess að sýna mátt sinn og megin með því að skutla vígtólum fram og til baka um Evrópu. Þýska blaðið Frankfurter Allgemeine segir frá mótmælum í Prag í Tékklandi gegn amerískri vígvæðingu.

Evrópusambandið vill auka á vígvæðingu álfunnar með ESB-her til að styrkja stöðu sína andspænis rússneska birninum.

Rússar fyrir sitt leyti finna veika bletti á vesturlöndum undir þeim formerkjum að óvinir óvinanna eru vinir. Rússar veita Argentínumönnum stuðning sem aftur vilja herja á Falklandseyjar undan ströndum landsins en þær eru undir breskum yfirráðum.

Rússar eru háðir olíuútflutningi og væri fátt kærara en að verðið á svörtu auðlindinni hækkaði. Þess vegna væru þeir vísir að styðja Írani á móti Sádi-Arabíu í forræðisdeilunni yfir Jemen þó ekki væri nema til að bæta viðskiptajöfnuðinn.

Ágreiningur stórvelda, skærur og smástríð hér og hvar í heiminum, sem stórveldin styðja með ráðum og dáð, eru ekki góður fyrirboði um það sem koma skal.

Alþjóðlega öryggiskerfið er í uppnámi eftir lok kalda stríðsins og leitar að nýju jafnvægi. Á meðan reyna bæði stórríki og smælingjar að koma ár sinni fyrir borð.

Næstu ár verða ekki friðsöm í henni veröld.


mbl.is Vill hraðbraut frá London til New York
Tilkynna um óviðeigandi tengingu við frétt

Breivik, Lubitz og sjálfsdýrkun

Myndin sem dregin er upp af þýska flugmanninum Andreas Lubitz, sem fargaði sjálfum sér og 149 farþegum í þotu Germanwings, minnir nokkuð á Anders Behring Breivik sem drap 69 saklaus ungmenni á Útey fyrir fjórum árum.

Breivik var sjálfsdýrkandi, segir í mati sálfræðinga þar sem saman fer félagsleg einangrun, sjálfsupphafning og þráhyggjufull löngun að breyta heiminum. Þýski flugmaðurinn sagði fyrir tveim árum að hann ætlaði sér að vinna frægðarverk sem héldi nafni hans á lofti.

Sjálfsdýrkun helst í hendur við siðblindu enda sjálfsdýrkendur of uppteknir af eigin hugarheimi til að eiga eitthvað aflögu handa öðrum.

Sjálfsdýrkendur búa yfir meiri hæfileikum en meðalmaðurinn til að verða fyrir vonbrigðum. Meðal-Jóninn finnur fyrir vanmati endrum og sinnum en sjálfsdýrkandinn er í stöðugri baráttu við minnimáttarkenndina og leitar á náðir fantasíunnar til að sigrast á þeim djöfli.

Þýski samfélagsrýnirinn Hans Magnus Enzensberger ígrundar hugarfar róttæka einstæðingsins og segir getu sjálfsdýrkenda til vonbrigða vaxa með framþróun samfélagins. Síaukin vonbrigði auka innri spennu sem stundum verður einstaklingnum um megn.

Tækniframfari veita sjálfsdýrkendum fleiri tækifæri til að setja mark sitt á heiminn. Nær allir gera það án þess að valda öðrum fjörtjóni. En inn á milli leynist einn Breivik og stakur Lubitz.


mbl.is Fyrrum kærasta Lubitz tjáir sig
Tilkynna um óviðeigandi tengingu við frétt

Píratar eru nördar - sjálfsímynd þjóðarinnar

Píratar eru nördar á sviði höfundarréttar. Forrík samfélög á Norðurlöndum leyfa sér þann munað að hampa Pírötum á opinberum vettvangi. Og auðvitað verða Íslendingar að trompa það og gera Pírata hluta af þjóðþinginu og að stærsta flokki landsins í skoðanakönnun.

Okkur finnst krúttlegt að gera nördaflokk hátt undir höfði rétt eins og okkur fannst sniðugt að kjósa Jón Gnarr og Besta flokkinn.

Vantraust á starfandi stjórnmálaflokkum og fyrirfólki samfélagins er eðlilegt eftir höggið sem sjálfsímynd þjóðarinnar fékk haustið 2008. Fólk leitaði að öðruvísipólitík til að sýna hefðinni fingurinn. Og alltaf er eitthvað framboð af sérsinnum, þessum sem ýmist er kallaðir sérvitringar, nördar eða spámenn í öðru föðurlandi.

Jarðskjálftakippir þjóðarsálarinnar urðu engu að síður mest á yfirborðinu. Fokk jú yfirlýsingar kjósenda í kosningum og skoðanakönnunum auk smávegis mótmæla á Austurvelli annað veifið eru gárur sem lítt hreyfðu við samfélagsgerðinni.

Kjarni okkar er samur og jafn fyrir og eftir hrun. Okkur þykir vænt um nörda og veitum smælingjum vettvang að láta ljós sitt skína í nafni mannúðar.

En við látum ekki nörda stýra þjóðarskútunni.

 


mbl.is Allir munu þykjast vera Píratar
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband