Gríska veikin breiðist út í ESB

Grikkir kusu sér marxískan æskulýðsleiðtoga á mótorhjóli að varpa af sér ógreiddum reikningum frá Evrópusambandinu vegna eyðufyllerís á þýskum vöxtum í átta ár. Grikkinn Tsipras er orðinn fyrirmynd skuldseigra Suður-Evrópumanna án greiðsluvilja.

Takist Tsipras að knýja ESB til að veita Grikkjum skuldaafslátt eru önnur evru-ríki í Suður-Evrópu, s.s. Spánn og Portúgal, þegar í röð að krefjast sömu kjara.

Þess vegna verður Grikkjum ekki bjargað nema þeir haldi gerða samninga um niðurskurð og hreinsun í opinberum rekstri. Grikkir segjast standa frammi fyrir norður-kóreskum veruleika eftir hálfan mánuð án nýrra neyðarlána.

Líkur eru á því að ráðandi öfl í Evrópusambandinu líti svo á að Grikkland sé drep í evru-skrokknum og verði að skera burt áður en drepið gengur af sjúklingnum dauðum.

Fjöldamótmæli í Madrid eru vísbending að gríska drepið sé þegar komið í önnur skuldseig evru-ríki.

 

Tugþúsundir Spánverja mótmæla

Ólafur Ragnar lóðsaði okkur í gegnum brimskaflinn

Ólafur Ragnar Grímsson var kjölfestan í stjórnskipun okkar þegar hrunið reið yfir. Hann lóðsaði til valda vinstristjórn sem var eini raunhæfi kosturinn eftir fall hrunstjórnar Sjálfstæðisflokks og Samfylkingar.

Þegar vinstristjórnin fór fram úr sér i heimsku og hroka og ætlaði þjóðinni að bera Icesave-skuldir einkabanka greip Ólafur Ragnar í taumana og vísaði málinu til visku þjóðarinnar, sem brást ekki frekar en fyrri daginn.

Ólafur Ragnar talaði máli þjóðarinnar í Icesave-deilunni við alþjóðasamfélagi þannig að eftir var tekið um víða veröld. Hann var þar brimbrjóturinn sem breskar og hollenskar reiðiöldur brotnuðu á.

Ólafur Ragnar er búinn að vinna sér inn lífstíðarábúð á Bessastöðum.

Skorar á Ólaf Ragnar að bjóða sig fram

Tvær kostulegar fréttir um laun og tækifæri

Allir sem komnir eru til vits og ára skilja að tækifæri detta ekki af himnum ofan. Tækifæri, að ekki sé talað um atvinnutækifæri, verða til þegar einstaklingur les í umhverfi sitt; en ekki þegar ríkisvald ákveður að búa til stofnun og ráða til sín sérfræðinga.

Þeir sem segja ekki tækifæri á Íslandi og það sé ástæðan fyrir brottflutningi fólks umfram aðflutta eru í raun að segja að fólk nenni ekki að lesa í umhverfi sitt. Það er ekki líkleg skýring. Hitt er líklegra að fólk leiti hófanna í útlöndum til að öðlast reynslu og þekkingu af öðru umhverfi en hér heima. Og það er harla gott.

Hin kostulega fréttin er af yfirborguðu bæjarstarfsmönnunum í Kópavogi. Yfirbragð fréttarinnar er undrun yfir því að laun gætu lækkað ef einhver kærir launamismunun og vill leiðréttingu. Hvers vegna ætti leiðréttingin alltaf að vera upp á við?

Skortir tækifæri á Íslandi

Fjármálaráðherra vissi ekki að ríkið ætti banka

Um Samfylkinguna er sagt að þangað safnist fólkið með minnsta fjármálavitið. Katrín Júlíusdóttir fyrrverandi fjármálaráðherra og þingmaður Samfylkingar staðfestir orðsporið af fjármálaólæsi krata.

Katrín sté í pontu á alþingi og spurð með þjósti hvenær íslenska ríkið hafi átt Arion banka og Íslandsbanka. Henni var bent á ríkisreikning 2008 þar sem stendur svart á hvítu að ríkið leysti bankana til sín.

Í stað þess að viðurkenna fjármálaóvitaskapinn segir Katrín fyrrum fjármálaráðherra fúsk að ríkið hafi átt bankana.

Ríkið átti alla þrjá bankana; Landsbankann, Íslandsbanka og Arion árið 2009 þegar ríkisstjórn Jóhönnu Sig. tók völdin á Íslandi. Í lok kjörtímabilsins átti ríkið aðeins einn banka, Landsbankann.

Hvað varð um hina tvo? Hverjir fengu þá banka á hvaða verði? Hvers vegna voru þeir ekki seldir í opnu ferli?

 

Kjánaorðræða ASÍ og SA

Maður sem ræður sig til vinnu hjá hinu opinbera fær útborgað samkvæmt launatöflu, sem er opinber. Í undantekningatilfellum er samið um fasta óunna yfirvinnu. Maður sem ræður sig til vinnu hjá fyrirtæki fær ekki útborgað samkvæmt launatöflu nema í undantekningatilfellum. Nær alltaf er um að ræða yfirborgun, jafnvel fyrir sumarstarfsmenn.

Munurinn liggur í því að kjarasamningar opinberra starfsmanna eru hámarkslaun en kjarasamningar á almenna markaðnum eru lágmarkslaun.

Talsmenn ASÍ og SA halda uppi kjánaorðræðu um að ríki og sveitarfélög ríðið á vaðið með hækkun launa sinna starfsmanna. Svo er ekki. Nær ekkert atvinnuleysi er á almenna markaðnum og vantar víða fólk. Það veldur launaskriði sem mótar alla launaþróun í landinu.

Fyrirtæki eru í harðri samkeppni um starfsfólk. Mörg hver hafa samband við skólafólk nú þegar til að tryggja sér starfskrafta í sumar. Samningsstaða launþega er sterk undir þessum kringumstæðum.

Kjánaorðræða ASÍ og SA er ekki í neinum tengslum við veruleikann.

Stefna friði á vinnumarkaði í voða

Vinstridráttur ríkissaksóknara

Hæstiréttir hundskammar embætti ríkissaksóknara fyrir að standa sig ekki í einföldum kynferðisbrotamálum og valda skaða á réttarkerfinu.

Afglöp ríkissaksóknara stafa af rangri forgangsröðun. Embættið undir forystu Sigríðar Friðjónsdóttur eyðir tíma og starfsþreki í pólitískra leiðangra, samanber lekamálið fræga, þar sem tilgangurinn er ekki að bæta samfélagið heldur að slá pólitískar keilur. Á meðan sitja á hakanum mál sem varða kynferðisafbrot.

Sigríður fékk embættið frá Jóhönnustjórinni í þakklætisskyni fyrir saksókn á hendur fyrrum forsætisráðherra, Geirs H. Haarde.

Fundið að drætti hjá ríkissaksóknara

ESB-sinnar fá aðra sjónvarpsstöð

Ný sjónvarpsstöð sem skartar andliti samfylkingarþingmannsins fyrrverandi, Sigmundar Ernis Rúnarssonar, verður með helstu talsmenn ESB-aðildar Íslands sem dagskrárgerðarmenn, Þorstein Pálsson og Þorgerði Katrínu Gunnarsdóttur.

Fyrir áttu ESB-sinnar sjónvarpsstöð, RÚV, sem einnig útvarpar skoðunum aðildarsinna.

Er ekki tímabært að Heimssýni hugi að sjónvarpsútsendingum?

Sigmundur Ernir dagskrárstjóri á nýrri sjónvarpsstöð

Kostnaðurinn við EES-samninginn

Tímabært er að endurskoða EES-samninginn sem gerður var í flýti um miðjan síðasta áratug síðustu aldar og felur í sér sjálfvirka innleiðingu ESB-réttar í íslensk lög.

Við eigum hvorki að fjölga í ráðuneyti utanríkismála né efla móttökugetu stjórnsýslunnar fyrir laga- og reglurétt sem aðeins að takmörkuðu leyti á erindi hingað til lands.

Norðmenn, sem líkt og við eru aðilar að EES-samningunum, eru áhugasamir að endurskoða samninginn. Það er leiðin sem á fara.

Utanríkisráðherra, sem ekki áttar sig á stöðu Íslands, er ekki í réttu starfi. 

Kostnaðarsöm mannfæð í stjórnkerfinu

Pútín hjálpar Grikkjum að sprengja evru-áþjánina

Evran er pólitískt verkefni Evrópusambandins með veika efnahagslega undirstöðu. Þessa staðreynd ætlar ný ríkisstjórn Grikklands að færa sér í nyt í bandalagi við Pútín forseta Rússlands.

Markmið Grikkja er að fá stóran afslátt af skuldum sínum við aðrar evru-þjóðir. Vegna Úkraínudeilunnar er Evrópusambandið í deilum við Rússa sem birtist m.a. í viðskiptabanni. Þýskir fjölmiðlar segja nýja ríkisstjórn Grikklands nána Rússum og ætlar að tala máli Rússa innan ESB.

Valdakerfi ESB byggir á samstöðu. Ef eitt ríki, þótt lítið sé, eins og Grikkland, rýfur þessa samstöðu skapast vandræði. Undir venjulegum kringumstæðum er viðkomandi ríki ýmist mútað eða hótað til að fylgja yfirlýstri stefnu ESB.

En nú stendur þannig á að ekki er hægt að hóta Grikkjum, þeir eru fyrir í óþolandi stöðu. Og múturnar, sem Grikkir krefjast, stórfelldur afsláttur af evru-skuldum, er meira en ESB hefur efni á sökum fordæmisins sem slík niðurstaða væri öðrum skuldugum evru-þjóðum.

Tspiras, nýi sterki maðurinn í Aþenu, ætlar að læsa klónum saman við Pútín til að ná fram pólitískum markmiðum sínum gagnvart ráðandi öflum í ESB. Tspiras er róttækur vinstrimaður en fyrir í vinahópi Pútíns í ESB-ríkjum er t.d. María Le Pen foringi hægrimanna í Frakklandi og eindreginn andstæðingur evrunnar.

Evran verður Evrópusambandinu dýrkeypt áður en yfir lýkur.

Grískir bankar hljóta útreið

Engin hagfræðirök fyrir evru

Engin hagfræðileg rök er fyrir upptöku evru á Íslandi. Aðrir gjaldmiðlar, t.d. norska krónan eða kanadískur dollar, væru raunhæfari kostur að mati Lars Christen­sen, yf­ir­manns grein­ing­ar­deild­ar Danske Bank.

ESB-sinnar á Íslandi flagga evrunni sem meginröksemd fyrir aðild Íslands að Evrópusambandinu. Þegar evru-rökin reynast ónýt er ekkert eftir.

Var umsóknin ekki ábyggilega afturkölluð í gær?

Frekar Kanadadollar en evra