Góða fólkið í skotgrafirnar gegn Sigmundi Davíð

Sigmundi Davíð var bolað úr embætti forsætisráðherra á grundvelli skjala sem ekki eru til. Já, þið lásuð rétt: Panama-skjölin eru ekki til og Reykjavík Medía/RÚV viðurkenna það. Eins og lögmaður þeirra segir:

„Þeir hafa ekki aðgang að gögn­un­um með þeim hætti að þeir geti bara af­hent ein­hver gögn. Þetta er „fís­ísk­ur“ ómögu­leiki. Þú get­ur ekki af­hent eitt­hvað sem þú ert ekki með.“

Góða fólkið, vinstrimenn af ýmsum sortum með RÚV sem bakhjarl, bjó til atburðarás sem leiddi til stjórnarkreppu í vor og afsagnar forsætisráðherra.

Nú þegar Sigmundur Davíð boðar endurkomu fer góða fólkið í skotgrafirnar, vopnað skjölum sem eru ,,„fís­ísk­ur“ ómöguleiki." Verði þeim að góðu.

 

Fer á fullt í stjórnmálabaráttunni

Brexit í Bretlandi, bylting í Tyrklandi

Úrsögn Breta úr Evrópusambandinu, Brexit, er niðurstaða lýðræðislegs stjórnarfyrirkomulags. Breska þjóðin vildi fullveldið sitt tilbaka. Bylting hersins í Tyrklandi og gagnbylting Erdogan forseta er afleiðing af vanmáttugu lýðræði, sem ekki lengur stendur undir nafni.

Að Tyrkland skuli enn vera í biðröð eftir aðild að Evrópusambandinu en ekki hafnað algerlega og afdráttarlaust er enn ein staðfesting á því að ESB er ekki í þjónustu lýðræðis heldur þjakað af stórveldaórum. ESB er valdahyggjan uppmáluð en metur lýðræðið til fárra fiska.

Evrópusambandið er söguleg tilraun - sem mistókst.

Ekki í stöðu til þess að ganga í ESB

ESB er í sjokki - engin stækkun til 2020

Johannes Hahn stækkunarstjóri Evrópusambandsins segir í Guardian að engin ný ríki fái inngöngu í ESB næstu árin og alls ekki fyrr en eftir 2020. Útganga Breta út ESB, Brexit, setur sambandið í uppnám. 

Gamla hugsunin um sístækkandi Evrópusamband er úrelt. Engin önnur framtíðarsýn er í boði. Carl Bildt, sænski ESB-sinninn, skrifar grein í Morgunblaðið í dag um nauðsyn nýrrar hugsjónar um ,,meiri Evrópu en minna Brussel" sem er orðalag yfir misheppnað samrunaferli ESB síðustu áratuga. (Hér er ensk útgáfa greinar Bildt).

Viðurkenning Giuliano Amato, fyrr­ver­andi for­sæt­is­ráðherra Ítal­íu, í viðtengdri frétt, á merkingarleysu greinar 50 í Lissabonsáttmálanum, sem leyfir úrsögn úr ESB, er enn annað dæmið um rörsýn sambandsins. Höfundar ESB töldu sambandið sögulegan óhjákvæmileika sem ekki væri hægt að endurskoða.

Með Brexit hefst uppstokkun Evrópusambandsins. Enginn veit hvort ESB lifir af þessa uppstokkun og allra síst þeir sem stjórna sambandinu. Með Brexit tók lýðræðið yfirhöndina og vestrænt lýðræði er óútreiknanlegt nú um stundir.

 

Greinina átti aldrei að nota

Þjóðkirkjan er offjármagnaður pólitískur saumaklúbbur

Þjóðkirkjan tekur til sín 5,4 milljarða króna árlega, meðtalið framlag til kirkjugarða, samkvæmt Viðskiptablaðinu. Fjárhæðin er stór fyrir verkefni sem sífellt smærri hluti þjóðarinnar nýtur góðs af.

Þjóðkirkjan nýtti ekki tækifærið sem hún fékk eftir aftrúarvæðingu síðustu aldar til að verða boðberi menningar, sögu þjóðarinnar og siðferðisumræðu. Prestar þjóðkirkjunnar eru sumir rugludallar sem í skjóli kirkjunnar stuðla að lögbrotum, eins og nýlegt dæmi úr Laugarneskirkju sýnir svart á hvítu.

Þjóðkirkjan er orðin að pólitískum saumaklúbbi sem stekkur á tískumál til að þykjast ,,í umræðunni" en vanrækir sögulegt hlutverk sitt frá árdögum kristni hér á landi, sem er að stuðla að samheldni þjóðarinnar.

Atkvæði Trump á Íslandi - netlýðræðið

Melania Trump, eiginkona Donald Trump forsetaframbjóðanda í Bandaríkjunum, beitti ritstuldi á ræðu Michelle Obama, eiginkonu sitjandi forseta, til að tryggja ítarlega umfjöllun um sig í helstu fjölmiðlum í nokkra daga.

Áróðursbragðið heppnaðist fullkomlega. Jafnvel á Íslandi, þar sem Trump á ekki mörg atkvæði, fær Melania ítarlega, og að mestu leyti jákvæða, umfjöllun í útbeiddasta miðli landsins, mbl.is

Trump keyrir forsetaframboð sitt á þeim forsendum að betra sé að veifa röngu tré en öngu og hagfelldara sé að vera alræmdur en óþekktur.

Christiane Amanpour á CNN, þessi sem felldi forsetaframboð Ólafs Ragnars Grímssonar, átti viðtal við sagnfræðinginn Ken Burns um Trump. Burns talar um siðlausa netmiðla sem flytja lygar Trump þrisvar í kringum hnöttinn áður en sannleikurinn kæmist á fætur. Viðtalið er samfelld árás á Trump en gerir ekki annað en að undirstrika að pólitísk orðræða hverfist um Trump. Og það er einmitt markmið eiginmanns Melaniu.

Kanadíski fræðimaðurinn Marshall MacLuhan var frumkvöðull kenninga um raffjölmiðla. Fyrir meira en hálfri öld, löngu fyrir daga netmiðla, kynnti hann hugtakið ,,miðillinn er merkingin", The medium is the message. Hugtakið þýðir að ráðandi fyrirkomulag fjölmiðlunar, sjónvarp á dögum MacLuhan en netmiðlar í dag, ræður merkingu innihaldsins.

Netmiðlar eru siðlausir, líkt og Ken Burns segir. Þeir gera engan greinarmun á réttu og röngu. Alger þvættingur fær sömu útbreiðslu og ígrunduð orðræða; það þekkjum við úr umræðunni hér á landi.

Donald Trump er holdgervingur netfjölmiðlunar. Þess vegna mun hann sigra í nóvember og verða forseti í krafti netlýðræðisins.

„Ég stend styrkum fótum“

Góða fólkið þolir ekki lög og reglu

Unnsteinn Manúel Stefánsson formælandi þeirra hljómsveita sem stukku á lúkasarumræðuna um þjóðhátíð í Vestmannaeyjum segist skynja tvær þjóðir í landinu.

Eftir að sættir náðust milli hljómsveitanna og aðstandenda þjóðhátíðar gagnrýndi önnur þjóðin sveitirnar fyrir að hafa ekki ,,tekið lög­regl­una nógu mikið niður í ein­hvern drullupoll.“

Góða fólkið, t.d. þingmaður Pírata og yfirlýst samfylkingarfólk, lagði sig fram um að magna upp lúkasinn í umræðunni með því beita sérkunnáttu sinni, sem er að ala á vantrausti í samfélaginu.

Góða fólkinu er sérlega uppsigað við lögregluna sökum þess að hún stendur fyrir lög og reglu. Unnsteinn Manúel skynjar góða fólkið sem slíkt samfélagsafl að hann kallar það aðra af tveim þjóðum í landinu. Hin þjóðin má fara að vara sig. 

Upplifir tvær þjóðir í landinu

Vestrænn lífstíll, múslímskt kynferðisofbeldi

Í trúarmenningu múslíma hylja konur sig frá hvirfli til ilja og oft einnig ásjónu sína. Múslímskir karlmenn telja vestrænar konur sjálfsagt skotmark fyrir kynferðisóra, einmitt sökum þess að þær hylja ekki líkama sinn. Morgunblaðið blekkir lesendur sína með því að taka ekki fram í viðtengdri frétt að karlmaðurinn sem handtekinn var á Gothia Cup í Svíþjóð vegna kynferðisbrots á ungum stúlkum er frá Marokkó.

Aðrir norrænir fjölmiðlar, til dæmis VG í Noregi og frieord.no, upplýsa lesendur um bakgrunn árásarmannsins.

Í Þýskalandi þurfa sundstaðir að ráða öryggisverði og efna til upplýsingaherferðar vegna kynferðislegs ofbeldis múslímskra karlmanna gagnvart þýskum stúlkum.

Vandinn er í hnotskurn þessi: múslímsk trúarmenning setur konur skör lægri en karla. Konur sem ekki sýna körlum undirgefni með því að hylja líkama sinn frá toppi til táar eru taldar glyðrur sem karlar hafa fullan rétt að brjóta gegn.

30-40 drengir umkringdu stúlkurnar

Krónan kveður ónýta Ísland-rökin í kútinn

Vinstrimenn kyrjuðu áróðurinn um ónýta Ísland og notuðu krónuna oftast sem sýnidæmi. Vinstrimenn, að því marki sem þeir kunna eitthvað í hagfræði, vissu vel að það var hagstjórnin en ekki krónan sem var sökudólgurinn.

En krónan var auðvelt skotmark og lítilmenni ráðast aldrei á garðinn þar sem hann er hæstur. Krónan var ástæða verðbólgu og óreiðu í efnahagsmálum, sögðu vinstrimenn: við þurfum evru og Evrópusambandsaðild til að koma skikki á ónýta Ísland.

Krónan dafnar betur en flestir gjaldmiðlar heims. Með krónu og ríkisstjórn Sjálfstæðisflokks og Framsóknarflokks eru efnahagsmál okkar í góðum höndum. Ef við viljum aftur ónýta Ísland þá eru vinstrimenn, viðreisnarfólk og píratar reiðubúnir til þjónustu.

Einsdæmi í hagsögu Íslands framundan?

Lúkas tekinn á þjóðhátíð - umræðunauðgun

Einu sinni var hundur sem týndist. Nokkrir á samfélagsmiðlum sögðu hundinn hafa mætt hræðilegum örlögum dýraníðings.  Fjölmiðlar tóku þátt og sögðu frá kertafleytingum og mótmælum vegna hundsins. ,,Umræðan" tók meintan dýraníðing fyrir og tætti af honum mannorðið. Nokkru síðar kom Lúkas af fjalli ómeiddur.

Síðustu daga hafa samfélagsmiðlar og fjölmiðlar tekið lúkas á þjóðhátíð í Vestmannaeyjum. Aðalfréttatími RÚV í gærkvöldi var með þjóðhátíðarlúkasinn sem fyrstu frétt. Vitnað var í yfirlýsingu fimm hljómsveita sem vitnaði í ,,umræðuna", sem RÚV, aðrir fjölmiðlar og samfélagsmiðlar standa fyrir, þar sem krafan sé að bæjaryfirvöld í Vestmannaeyjum hengi út fyrsta fórnarlamb nauðgunar á þjóðhátíð til áminningar um nauðsyn ,,umræðunnar".

,,Umræðan" telur að bæjaryfirvöld eigi að stilla fórnarlambi kynferðisofbeldis á opinberan stall til að réttlæta umræðu um nauðgun. Mannúðleg málsmeðferð réttarríkisins er algert aukaatriði: ,,umræðan" þarf sitt fórnarlamb.

Ef ,,umræðan" fær sínu fram verður særð, smánuð sál, sem vogar sér að kæra nauðgun, sett til sýnis á opinberum vettvangi strax eftir að glæpurinn er kærður. Þökk sé ,,umræðunni" fær misþyrmda manneskjan ekkert svigrúm til að komast heim í öruggt skjól, heldur verður hún að þola opinbera umræðunauðgun í lóðbeinu framhaldi af líkamlegri nauðgun.

Þjóðhátíðarlúkasinn verður til í andrúmslofti netvæddrar múgsefjunar. Er ekki mál að linni?

Draga sig úr dagskrá þjóðhátíðar

Réttarríkið og glæpir í beinni útsendingu

Fjölmiðlar, RÚV sérstaklega, misstu sig í umræðunni um verklag lögreglunnar í Vestmannaeyjum í tengslum við nauðgunarmál. Páley Borgþórsdóttir lögreglustjóri þekkir nauðgunarmál bæði sem handhafi lögregluvalds en ekki síður vegna fyrri starfa þar sem hún var lögmaður brotaþola í nauðgunarmálum.

Verklagsreglur lögreglunnar í Vestmannaeyjum þjóna tvennum mikilvægum hagsmunum réttarríkisins; brotaþola og málsrannsóknar. Í þessu samhengi er léttvæg krafa fjölmiðla að fjalla um glæpi í beinni útsendingu.

Fjölmiðlar eru komnir langt út fyrir sín mörk þegar þeir þykjast handhafar rannsókna-, ákæru- og dómsvalds réttarríkisins.

Allar upplýsingar veittar