Grikkir hata ESB - en þora ekki út

Aðeins 23% Grikkja bera traust til Evrópusambandsins, en þetta hlutfall var 51% árið 2007, samkvæmt gagnvirkri tölfræði á Telegraph, sem birt er undir fyrirsögninni ,,Evrópski draumurinn deyr í hverju ríkinu á fætur öðru".

Grikkir telja Evrópusambandið og evruna sérstaklega undirrót ömurlegrar efnahagskreppu sem staðið hefur í sex ár og ekki sér fyrir endann á. Í grískum fjölmiðlum birtast myndir af Angelu Merkel kanslara Þýskalands íklædda Hitlers-múderingu.

Grikkir fóru á neyslufyllerí fyrir kreppu enda bjuggu þeir við sömu vaxtakjör og Þjóðverjar þótt hagkerfi þeirra stæði nær miðöldum en nútíma.

Þegar kreppan skall á urðu Grikkir að borga en gátu ekki. Í reynd eru Grikkir í skuldafangelsi annarra evru-ríkja, sem neita Grikkjum um afskrift af lánum sem óhugsandi er að þeir muni nokkru sinni borga.

Grikkir freista þess að kjósa Syriza til valda enda flokkurinn með harðskeyttustu yfirlýsingarnar gegn Evrópusambandinu. En hvorki Syriza né Grikkir almennt þora út úr evru-samstarfinu og taka tilbaka tapað fullveldi.

Það er svo miklu notalegra að láta aðra sjá um sig þegar maður venst því að standa ekki á eigin fótum.

Grikkir ganga að kjörborðinu

RÚV stundar pólitísk launmorð

Útvarp RÚV kl. 18:00 kynnti í fyrstu frétt að sjónvarp RÚV kl. 19:00 yrði með frétt um Hönnu Birnu sem afhjúpaði að Hanna Birna Kristjánsdóttir nyti einskins stuðnings þingflokks sjálfstæðismanna.

Þessi fréttaflétta RÚV hófst í hádeginu í dag þegar fyrsta frétt tilkynnti að stjórnmálafræðingur teldi Hönnu Birnu rúna trausti.

Og hvað gerðist svo í sjónvarpfréttum RÚV þann 24. janúar 2015 kl. 19:02? Hversu marga þingmenn Sjálfstæðisflokksins leiddi RÚV fram sem sögðu Hönnu Birnu einskins trausts njóta?

Svar: ekki einn einasti þingmaður Sjálfstæðisflokksins lýsti vantrausti á Hönnu Birnu.

Niðurstaða: RÚV stundar pólitísk launmorð. 

Rökrétt afleiðing: við eigum að afþakka fréttaþjónustu RÚV, sem ekki heldur máli.

Hentisemi umboðsmanns alþingis, starfar án siðareglna

Umboðsmaður alþingis starfar ekki eftir skráðum siðareglum. Hentisemi umboðsmanns ræður hvaða mál hann tekur til athugunar að eigin frumkvæði. Á heimasíðu umboðsmanns segir

getur umboðsmaður fjallað um hvers konar háttsemi stjórnvalda sem honum þykir rannsóknarverð.

Engar siðareglur kveða á um hvaða rök skuli standa til þess að umboðsmaður ákveði hvaða mál skuli rannsaka og hver ekki.

Umboðsmaður alþingis er í raun með gerræðisvald í hendi sér sem samrýmist illa hugmyndum um hlutlæga og málefnalega stjórnsýslu.

Sérfræðingur fer yfir niðurstöðurnar

Ísland virkar, ESB ekki

Hagvöxtur, vaxandi kaupmáttur og lítið sem ekkert atvinnuleysi einkennir íslenska hagkerfið. Samdráttur, fallandi kaupmáttur og mikið atvinnuleysi er hlutskipti hagkerfis Evrópusambandsins.

Forsenda þess að Ísland náði sér hratt úr öldudal kreppunnar eftir hrun er fullveldi og sjálfstæður gjaldmiðill.

Ástæðan fyrir því að þjóðir Evrópusambandsins sitja í efnahagslegu kviksyndi er skortur á fullveldi og misheppnaður sameiginlegur gjaldmiðill.

 

Staða heimila ekki betri frá hruni

Hanna Birna og Björgvin; heiftin og fyrirgefningin

Samanburður á umfjöllun fjölmiðla og álitsgjafa á máli Hönnu Birnu Kristjánsdóttur annars vegar og hins vegar máli Björgvins G. Sigurðssonar leiðir í ljós að heift mætir Hönnu Birnu en fyrirgefning Björgvini.

Menn sem gefa tóninn í umfjöllun RÚV og vinstrifjölmiðla, t.d. Illugi Jökulsson og Egill Helgason, leggja sig í framkróka að gera hlut Hönnu Birnu sem verstan. Illugi segir Hönnu Birnu hrollvekjandi og teiknar hana upp sem skaðræðismanneskju. Egill heimtar að Hanna Birna segi af sér varaformennsku.

Þegar Egill fjallaði um mál Björgvins var hann fullur fyrirgefningar, sagði að Björgvin hefði ekki fengið neitt að gera eftir hrun og því sé nánast eðlilegt að hann láti greipar sópa þegar hann loksins, loksins fær tækifæri til. Samkvæmt Agli varð Björgvin ekki uppvís að neinu misjöfnu heldur ,,lenti hann í átökum", samanber

Björgvin lendir í harðvítugum átökum við oddvita Ásahrepps, Egil Sigurðsson, sem er líka þekktur fyrir að vera stjórnarformaður Mjólkursamsölunnar – fyrirtækis sem elur á úlfúð, eins og segir í kvæði Megasar.

Björgvin er sem sagt leiksoppur kringumstæðna, lendir í átökum við vonda menn, en Hanna Birna þykir ekki eiga sér neinar málsbætur.

Fjölmiðlar eins og RÚV og DV voru búnir að fjárfesta orðsporið máli Hönnu Birnu. Menn eins og Illugi og Egill þjóna því hlutverki að réttlæta fréttahönnun RÚV og DV með því að útdeila sekt og sýknu. 

 

„Ég treysti henni fullkomlega“

Játning Þorsteins: þingkosningar ráða ESB-ferlinu

Þingkosningar eru eina leiðin að ákveða hvort Ísland leggi upp í ESB-ferli, segir Þorsteinn Pálsson í bloggi og talar fyrir óstofnaðan ESB-flokk.

Þetta er laukrétt hjá Þorsteini. Þjóðin valdi nei-flokka í síðustu þingkosningum og því á að afturkalla ESB-umsókn vinstristjórnar Jóhönnu Sig. frá 2009. Án afgerandi meirihluta á alþingi er óhugsandi að Ísland sé í ESB-ferli. Núna er það viðurkennt af einum helsta talsmanni ESB-aðildar landsins.

Takk, Þorsteinn Pálsson.

  

ESB-umsóknin er ónýt; gerir Ísland tortryggilegt

Samningsmarkmið vinstristjórnar Jóhönnu Sig., sem samin voru sumarið 2009 vegna ESB-umsóknar, eru löngu úrelt, bæði vegna þróunar á Íslnadi og í Evrópu. Aðalsamningamaður Íslands í ESB-ferlinu, Stefán Haukur Jóhannesson, tekur undir það sjónarmið að umsóknin sé einskins virði lengur.

Vinstriflokkarnir hafa ekki unnið neina vinnu til að uppfæra samningsmarkmið Íslands eftir að ESB-ferlið steytti á skeri. Jóhönnustjórnin komst ekki lengra í ESB-ferlinu sökum þess að ekki var pólitískur vilji í landi til að fórna landhelginni fyrir aðild að Evrópusambandinu.Í stöðuskýrslu ESB frá 2013 er gerð athugasemd við að Ísland hafi ekki aðlagað sig regluverki Evrópusambandsins. Um sjávarútvegsmál segir

Overall, Iceland's fisheries policy is not in line with the acquis. Existing restrictions in the fisheries sector on freedom of establishment, services and capital movements as well as the management of shared fish stocks are not in line with the acquis 

 (Almennt er fiskveiðistefna Íslands ekki í samræmi við lög og reglur ESB. Takmarkanir á frelsi til fjárfestinga, þjónustu og fjármagnsflutninga í sjávarútvegi auk fiskveiðistjórnunarinnar eru ekki í samræmi við lög og reglur ESB)

Stefán Haukur átti fjölmarga formlega og óformlega fundi með samningamönnum ESB tókst ekki að finna sameiginlegan flöt á málefnum sjávarútvegsins. Þess vegna lagði ESB ekki fram rýniskýrsluna sem var forsenda þess að áfram yrði haldið með ferlið. Jóhönnustjórnin gat ekki einu sinni komið sér saman um samningsafstöðu í fiskveiðimálum. Allri vinnu við umsóknina var hætt árið 2012.

Í grundvallarlögum ESB, Lissabonsáttmálanum, er kveðið á um að sjávarútvegsmál heyri alfarið undir framkvæmdastjórn ESB. Framhjá þeirri hindrun komst ESB-ferli Jóhönnustjórnarinnar aldrei.

Ónýt ESB-umsókn í Brussel gerir minna en ekkert gagn; hún torveldar eðlilega þróun utanríkismála Íslands og gerir okkur tortryggileg í alþjóðlegu samstarfi. Við eigum að afturkalla þessa umsókn ekki seinna en strax.

ESB-tillaga lögð fram fyrir 26. mars

Bretar á útleið úr ESB

Eina leið Evrópusambandsins úr yfirstandandi kreppu er að auka miðstýringuna og ganga enn frekar á fullveldi aðildarríkjanna. Bretar eru búnir að fá nóg af miðstýringunni frá Brussel og heimta fullveldið heim.

Sambúð Breta og Evrópusambandsins getur ekki endað nema með skilnaði. Spurningin er aðeins hvenær og hvernig.

Af 28 þjóðum ESB eru 19 með evruna sem lögeyri. Þær þjóðir sem standa utan evru-samstarfsins, t.d. Bretland, Danmörk og Svíþjóð, eru líklegar til að finna sér stað utan ESB-samrunans.

Reiðubúinn að sjá á bak Bretum

Dagur, fatlaðir og eineltir

Fatlaðir fá ekki þjónustu, skólabörn eru lögð í einelti og Dagur Bergþóruson er borgarstjóri.

Auðvitað er tilviljun að vinstrimenn eru í meirihluta í borgarstjórn Reykjavíkur og samtímis verða þeir með minnstu bjargirnar fyrir mesta tjóninu.

Vinstrimenn hugsa um sína.

Harma ástandið í Hagaskóla

ESB gerir þá ríku ríkari - brauðmolahagfræði

Hlutabréfamarkaður í Evrópu tók kipp þegar tilkynnt var um peningaprentun Seðlabanka Evrópu. Ríkasta fólkið í Evrópu verður ríkara en þeir fátæku, sem ekki eiga hlutabréf, eru verr settir enda mun verðbólga fylgja í kjölfarið og gera lífsnauðsynjar dýrari.

Peningaprentun í ESB, sem heitir magnbundið inngrip á fínna máli, er brauðmolahagfræðin holdi klædd. Eftir að þeir ríku eru búnir að taka til sín ókeypis peninga til kaupa hlutabréf og greiða niður skuldir á vöxtum er hugmyndin að brauðmolar af gnægtarborði þeirra ríku falli þeim fátæku í skaut.

Afleiðingin af inngripum Seðlabanka Evrópu verður meiri ójöfnuður milli ríkra og fátækra.

Svona á að bjarga evrusvæðinu