Óhamingja sósíalista og pírata útskýrð

Sá sem er í vinnu og sýnir ráðdeild í fjármálum er sjálfbjarga. Þeir sem ekki eru upp á aðra komnir skapa sér aðstæður til að öðlast hamingju. 

Frá embætti landlæknis berast þessi skilaboð:

fólk sem er í vinnu sé yf­ir­leitt ham­ingju­sam­ara en það fólk sem er án at­vinnu. Eins eru gift­ir yf­ir­leitt ham­ingju­sam­ari en ógift­ir enda skipta náin tengsl miklu þegar kem­ur að ham­ingju.

Sumir eru þannig gerðir að þeir ætlast til að aðrir sjái þeim fyrir lífskjörum. Það er uppskrift að óhamingju.

Hamingjusamir veikjast sjaldnar

RÚV boðar til verkfalla

Kl. sex í gær flutti RÚV frétt með yfirskriftinni ,,Á fullum launum í verkfalli." Fréttin var endurvinnsla á 1. maí ávarpi Ragnars Þórs formanns VR um að launamenn gætu farið í skæruverkföll á fullum launum.

Rúmum klukkutíma síðar var fréttamaður RÚV á skrifstofu Eflingar þar sem stóð yfir fundur trúnaðarmanna. Formaður Eflingar var kallaður út af fundi til að tilkynna í beinni útsendingu RÚV að kjaraviðræðum yrði slitið og boðað yrði til verkfalla.

Fyrirfram er vitað hvar verkfallsmiðstöðin verður: í Efstaleiti - höfuðstöðvum RÚV.

Viðræðum slitið í dag?

Sigurjón á Spáni: gerum byltingu á Íslandi

Sigurjón Egilsson er útbreiðslustjóri bróður síns, sósíalistaforingjans Gunnars Smára. Sigurjón rekur málgagnið Miðjuna frá Spáni, en þangað flutti hann í haust til að spila golf og njóta lífsins.

Sigurjón skrifar núna: 

Þau eru sammála um að fullkomin stöðnun verði í lífskjörum þeirra verst settu. Það má aldrei verða. Það verður að stöðva áform þeirra.
Þjóðin kann aðferðina, hefur beitt henni áður og þarf sýnileg að grípa til neyðaraðgerða nú.

Sigurjón skreppur til Íslands í eins og eina byltingu, sólbrúnn og sæll. Bróðir hans, öreiginn með 125 milljón króna húsið, þarf á stuðningi að halda við að telja þjóðinni trú um að hún lepji dauðann úr skel.

Geta ekki orðið grundvöllur sátta

Krafa ASÍ: hækkum launin, skerðum velferðina

ASÍ krefst lægri skatta til að hækka útborguð laun félagsmanna sinna. Skattar borga samneysluna, velferðaþjónustuna, menntakerfið og ekki síst laun opinberra starfsmanna.

Gangi ríkið að kröfum ASÍ og sósíalistanna í verkó verður að skerða velferðina og segja upp opinberum starfsmönnum - í það minnsta halda aftur af launahækkun.

Hefur ASÍ kannað vilja félagsmanna sinna að skera niður velferðakerfið? Eru opinberir starfsmenn sáttir við að ASÍ þrengi að lífskjörum þeirra?

Verkföll líkleg í mars

Simpansar í Senegal og félagarnir í verkó

RÚV sýndi á mánudagskvöld dýralífsmynd um apanýlendu í Senegal. Foringinn var óvígur og sá sem gerði tilkall til forystu lét öllum illum, gretti sig, gólaði og kastaði grjóti. Þannig, sagði þulurinn, gerir simpansi í apahjörð sig að foringjaefni.

Félagarnir í verkó gátu ekki beðið í gær eftir tækifæri til að auglýsa sig reiða. Skaga-Villi skellti hurðum, Ragnar Þór skrifaði reiða fréttatilkynninu og Gunnar Smári veinaði að fjölmiðlar væru ekki nógu sósíalískir.

Reiðikast foringjaefna verkó-hjarðarinnar er herútboð til vina og félaga að taka nú þátt í sósíalískri uppreisn. Næsta aðgerð er að smala hjörðinni á Austurvöll. RÚV, sem sérhæfir sig í frumeðli manna og dýra, verður ábyggilega með beina útsendingu.  

Viðbrögð verkalýðsfélaganna koma á óvart

Verkó í pólitík, kjarasamningar yfirvarp

Sósíalistar í verkó nota kjaraviðræður sem yfirvarp til að herja á ríkisstjórnina um pólitísk stefnumál. Sósíalistarnir eru ,,reiðir" ef ríkisstjórnin lætur ekki að vilja þeirra, skella hurðum og ganga af fundum.

Forkólfar verkó eru ekki með neitt umboð til að hlutast til um hvernig landinu er stjórnað. Þjóðin kýs sér alþingi og þaðan kemur umboð fyrir landsstjórnina.

Yfirgangi sósíalista verður að svara af ákveðni með því að stjórnvöld sendi frekjurnar aftur í karphúsið að gera kjarasamninga.

Reiði og sár vonbrigði

Sanngjörn laun og markaðurinn

Meðallaun í landinu eru um 700 þús. kr. á mánuði. Þingmenn eru með um tvöföld mánaðarlaun, ráðherrar þreföld og bankastjóri Landsbankans fimmföld.

Hvað eru sanngjörn laun? Ef svarið er að þau laun sem markaðurinn greiðir séu sanngjörn þá eru meðallaunin sanngjörn, um 700 þús. kr.

Bankastjórar starfa ekki á markaði, þeir eru aðeins þrír, þar af tveir sem starfa hjá ríkisbanka.

Laun þingmanna, sem margfeldi af meðallaunum eru ekki ósanngjörn og heldur ekki ráðherra. Fimmföld meðallaun bankastjóra eru aftur farin að hljóma eins og sanngirni komi lítið við sögu - fremur fákeppni og hugsun kennd við,,ég-á-það-ég-má-það".

 

Telur launin hófleg og ekki leiðandi

Færri ferðamenn, minna til skiptanna

Sætaframboð Íslandsferða flugfélaga dregst saman um tæp 30 prósent frá Bandaríkjunum og rúman fimmtung frá Bretlandi. Þetta eru tveir stærstu markaðir ferðaþjónustunnar.

Fréttir af fyrirsjáanlegri fækkun ferðamanna leiddu til lækkunar hlutabréfa. Bréf Icelandair hækkuðu þó, enda meiri óvissa um framtíð WOW. Eins dauði er annars brauð.

Hagvöxtur síðustu ára stafar ekki síst af vaxandi fjölda ferðamanna. Fækkun þeirra leiðir sjálfkrafa til þess að minna er til skiptanna.

Sætaframboð til Bandaríkjanna hrynur

Trump elskar Ísland og Austur-Evrópu, hatar ESB

Trump vill tortíma Evrópusambandinu, segir utanríkissérfræðingur vinstriútgáfunnar Guardian. Trump og valdamenn í Washington hygla Austur-Evrópuríkjum í ESB (og Íslandi, sem fékk heimsókn til að bæta frjálslynda vanrækslu, ódýrt af Guardian að tak það ekki fram) til að valdefla þjóðernissinna í sambandinu.

Trump hatast við alþjóðahyggju og ESB er miðstöð alþjóðahyggjunnar. New York Times heggur í sama knérunn og Guardian, segir samband Trump og ESB markast af gagnkvæmri fyrirlitningu.

Evrópusambandið er á milli steins og sleggju, Bandaríkjanna og Rússlands. Hvað gerir helsti leiðtogi sambandsins, Angela Merkel kanslari Þýskalands? Jú, hún biður um margpóla heim þar sem ekkert eitt ríki (les: Bandaríkin) setur einhliða skilmála.

Merkel setti fram þessa skoðun á öryggisráðstefnu í Munchen um helgina.

Gráglettni örlaganna hagar því svo til að á sömu ráðstefnu fyrir 12 árum setti annar þjóðarleiðtogi fram ósk um margpóla heim. Sá heitir Pútín.

Evrópusambandið hlustaði ekki á Pútín. Þvert á móti tók ESB fullan þátt, með Bandaríkjamönnum, að einangra Rússa á alþjóðavettvangi. ESB var giska sátt við einpóla heimsvald á meðan sama alþjóðahyggjan réð ferðinni í Washington og Brussel.

En nú er Snorrabúð stekkur og berin súr.

Íslendingar geta þakkað það ríkisstjórn Sigmundar Davíðs að setja ESB-umsókn Samfylkingar kirfilega ofan í skúffu. Það hefði verið napurt hér á miðju Atlantshafi að sitja fast í ESB og fá yfir sig bandaríska andstyggð.

Samfylking, systurflokkur og Brexit

Breski Verkamannaflokkurinn er systurflokkur Samfylkingar. Meginástæðan fyrir klofningi systurflokksins er Brexit, úrsögn Breta úr Evrópusambandinu.

Klofningshópurinn telur að forysta Verkamannaflokksins hefði átt að hafna niðurstöðu þjóðaratkvæðagreiðslunnar um Brexit og koma í veg fyrir úrsögn úr ESB.

Samfylkingin komst ekki á það stig að klofna vegna ESB. Örlög flokksins gætu þó orðið verri; að sitja uppi til langframa með ónýtt stefnumál.

Sjö hætta í Verkamannaflokknum