RÚV er skandalfréttastofa

RÚV leitar uppi skandalfréttir til að réttlæta tilveru sína. Þegar sérstaklega stendur á boðar RÚV til fundar á Austurvelli til að valdefla múginn.

Fyrr á tíð, þegar dagblöðin voru flokksmálgögn, stóð RÚV fyrir hlutlægni og yfirvegun, forðaðist hávaðafréttamennsku. En eftir dauða vinstridagblaðanna Þjóðviljans, Alþýðublaðsins og helgarútgáfu sem spratt úr sama jarðvegi og lengi hét Helgarpósturinn fyllti RÚV upp í tómarúmið og varð vinstramálgagn.

Ríkissjóður á ekki að fjármagna skandalfréttastofu sem í ofanálag situr yfir hlut annarra fjölmiðla á auglýsingamarkaði.

Samskipti frétta- og heimildarmanna verði skoðuð

Hamfarahlýnun er pólitík, ekki vísindi

Manngert veður er ímyndun, hönnuð og kynnt í pólitískum tilgangi. Stjórnmálamenn eru margir ginnkeyptir fyrir glópahlýnun því hún réttlætir skattheimtu eins og enginn sé morgundagurinn.

Hér er nýlegt viðtal við alvöru vísindamann í loftslagsfræðum, Nils-Axel Mörner, sem segir helstu hættuna í loftslagsmálum þá að fólk sem ekkert veit um loftslagsmál ræður ferðinni.

Mörner var áður hjá IPCC, þeirri stofnun Sameinuðu þjóðanna sem helst ber ábyrgð á hamfarahlýnunin í fjölmiðlum og opinberri umræðu.

Alvarlegar afleiðingar óumflýjanlegar

Mugabe, mannréttindi og kjarnavandi vinstrimanna

Mugabe forseti Zimbabwe var einu sinni eftirlæti vinstrimanna en varð harðstjóri, skrifar Will Hutton í vinstriútgáfuna Guardian, og vill draga lærdóm af. Vinstrimenn taka upp á sína arma frelsishetjur sem verða harðstjórar. Gerðist líka á Kúbu og Venesúela.

Lausn Hutton er að gera mannréttindi að viðmiði fyrir ríkisvald. Hugmyndin er að setja það ríkisvald út á guð og gaddinn sem ekki virðir mannréttindi.

Mannréttindi eru óhugsandi án samfélags. Í náttúrunni eru engin mannréttindi, skrifaði Thomas Hobbes á 17. öld. Algild mannréttindi eru aðeins möguleg í algildu samfélagi. En slíkt samfélag er ekki til og verður aldrei. Samfélag er, eins og orðið segir, samlíf fólks. Og fólk er margskonar. Algilt samfélag er vísindaskáldskapur sem verður óðara að Gulagi ef reynt er að hrinda skáldskapnum í framkvæmd.

Vinstrimenn trúa á algilt samfélag. Einu sinni var það kommúnismi, þá kratismi, á seinni árum fjölmenningarsamfélag og nýjasta nýtt er loftslagssamfélag.  Meginvandinn í vinstripólitík er hugmyndin um algilt samfélag. Draumórarnir snúast upp í martröð. En vinstrimenn læra ekki.

  

Vilhjálmur, vinurinn og pöntuð niðurstaða frá Evrópu

Róbert Spanó, sem þrátt fyrir nafnið, er íslenskur og situr sem fulltrúi Íslands í Mannréttindadómstól Evrópu. 

Róbert er líklega aðalhöfundur dómsins í landsréttarmálinu sem núna verður endurskoðaður af yfirdeild dómstólsins.

Róbert og Vilhjálmur H. Vilhjálmsson, sá sem kærði málið upphaflega, eru æskuvinir.

Minnihlutaálit mannréttindadómstólsins, sem formaður dómstólsins Paul Lemmens skrifar, talar um að Róbert og félagar í meirihlutanum taki þátt í ,,pólitískum uppþotum" á Íslandi.

Að Róbert þessi Spanó skuli yfir höfuð koma nálægt því að semja dóm þar sem æskuvinur á hlut að máli er sérkennilegt að ekki sé meira sagt.

Vilhjálmur H. sló í gegn sem vinstrimaður í pólitík á sínum yngri árum. Hann talaði m.a. af svölunum á heimili Ólafs Ragnars Grímssonar á Seltjarnarnesi þegar Ólafur Ragnar var fyrst kjörinn forseti.

Framavonir Vilhjálms H. í pólitík urðu að engu þegar hann varð uppvís að ritstuldi í kandídatsritgerð við lögfræðideild Háskóla Íslands.

Það er hægt að falsa veruleikann þegar maður kann á því lagið og á góða að.

Fallist á að taka Landsréttarmálið fyrir

Kjaftastéttirnar niðurgreiddar með almannafé

Stjórnmálaflokkar frá 744 milljónir í ár, laun þingmanna ekki meðtalin. Fjölmiðlaútgjöld ríkisins eru samkvæmt meðfylgjandi frétt 5,3 milljarðar króna.

Kjaftastéttirnar, stjórnmálamenn og fjölmiðlamenn, fá yfir sex milljarða á ári af almannafé.

Hvað fær almenningur í staðinn?

Fjármögnun fjölmiðlafrumvarps liggur fyrir

Katrín og Bjarni framseldu íslenskar valdheimildir til útlanda

Ríkisstjórnin framseldi yfirráð þjóðarinnar yfir raforkunni til útlanda með orkupakka þrjú. Breski fjárfestirinn Edmund Truell, sem hyggst leggja sæstreng milli Íslands og Bretlands, hefur ekki fyrir því að ræða við íslensk stjórnvöld.

Hann veit sem er að sæstrengur er lagður til Íslands mun Evrópusambandið líta á það sem hindrun á frjálsum viðskiptum ef íslensk stjórnvöld leyfa ekki sæstrenginn.

Unglingarnir í stjórnarráðinu eru einfaldlega ekki starf sínu vaxnir.

Hótar að færa sæstrengsverkefni til Þýskalands

Hægt að ganga inn í ESB, en ekki út

Innganga í Evrópusambandið er möguleg en þjóðríki sem reynir að ganga úr sambandinu er dauðans matur.

Bresk stjórnmál eru sundurtætt eftir að breska þjóðin samþykkti að ganga úr sambandinu sumarið 2016.

Evrópusambandið leggur óreiðuöflunum í Bretlandi lið og gerði landamæri Írlands og Norður-Írlands að ásteytingarsteini. Hótunin er að kljúfa Bretland, gera Norður-Írlandi ókleift að vera hluti Bretlands.

Til lengri tíma litið þjónar það ekki hagsmunum ESB að beita kúgun og yfirgangi. Þetta vita þeir ósköp vel í Brussel. En örvæntingin um fullvalda Bretlandi vegni vel utan ESB er svo mikil að öllum ráðum skal beitt til að svíða breska jörð.

 

Bresk stjórnvöld þurfi að axla ábyrgð á Brexit

Frjálslyndar náttúruhamfarir: völdin til góða fólksins

Macron Frakklandsforseti er ljósberi frjálslyndra stjórnmála á vesturlöndum. Macron gerði skógarelda í Brasilíu að alþjóðlegu stórvandamáli er kallaði á yfirþjóðleg afskipti af innanríkismálum stærsta ríkis Suður-Ameríku. 

Margir fjölmiðlar á vesturlöndum tóku undir ásökun Macron um að heimili alls mannkyns stæði í ljósum logum.(Ásökun Macron varð að þjarki um útlit eiginkonu Frakklandsforseta.)

Frjálslynd stjórnmál byggja á þeirri forsendu að góða fólkið, frjálslyndir, viti betur en aðrir hvernig eigi að stjórna heiminum. Frjálslynd stjórnmál réðu ferðinni á vesturlöndum eftir seinna stríð og fram til 2016 þegar sigur Trump og Brexit settu strik í reikninginn.

Eftir 2016 reyna frjálslyndir að telja okkur trú um að alþjóðlegur vandi, loftslagsbreytingar af mannavöldum, beinlínis krefjist þess að fólk eins og Trump og niðurstaða eins og Brexit verði lýst ómarktæk og að engu hafandi.

Frjálslyndir fjölmiðlar, og þeir eru margir, taka þátt í frjálslyndu pólitíkinni. Í nokkra daga eftir útspil Macron um að eldar í Brasilíu stefndu heimsbyggðinni í hættu birtust raðfréttir í stærstu fjölmiðlum heims um að einmitt þannig væri í pottinn búið.

Ýkjur og lygi ferðast á ljóshraða en sannleikurinn er seinn á fætur. En eftir hik og heimildavinnu bárust upplýsingar um að Macron færi með fleipur: Forbes og RT tóku saman efni sem sýndu að skógareldar væru síminnkandi vandamál og heimsbyggðinni stæði engin ógna af þeim.

Þeir frjálslyndu bíða nú vongóðir eftir næstu náttúruhamförum til að að heimfæra upp á manninn og krefjast alheimsstjórnar góða fólksins. 

Miðflokkurinn og XD-kratar

Borgaraleg stjórnmál með áherslu á fullveldi, hóflegt ríkisvald og félagslega íhaldssemi eiga heima í Miðflokknum.

XD-flokkurinn er aftur gegnsýrður kratisma þar sem ný ríkisútgjöld, t.d. til fjölmiðla og hærra útvarpsgjald til RÚV, eru samþykkt.

Enda fögnuðu Samfylkingarþingmenn ákaft nýjasta ráðherra XD-kratanna.

Stærra bákn og meiri skattbyrði

Ísland og stórveldin 4

Fjögur stórveldi láta sig varða Ísland og norðurslóðir: Bandaríkin, Evrópusambandið, Kína og Rússland. Af þessum fjórum er eitt nýgræðingur í okkar heimshluta, Kína. Eftir Brexit mun Bretland, sem einu sinni var stórveldi, líklega láta til sín taka en þá í samstarfi við Bandaríkin.

Af stórveldunum eru Bandaríkin okkar nánasti bandamaður. Með samkomulagi við ríkisstjórn Ísland í seinna stríði reistu Bandaríkin hér herstöð og sátu hana allt til 2006. Reynslan af hersetunni er sæmileg, telur sá sem þetta skrifar og ólst upp í Keflavík og tók þátt í Keflavíkurgöngu til að mótmæla hersetunni.

Síðustu áratugi er Ísland í samstarfi við Evrópusambandið, í gegnum EES-samninginn. Reynslan af þeim samningi er ekki jákvæð en þó ekki alslæm. Vandinn við EES er að Evrópusambandið notar samninginn til að seilast til áhrifa í íslensk innanríkismál, nú síðast með orkupakkanum. Bandaríkin reyndu ekki að setja bandarísk lög á Íslandi.

Ísland átti farsælt samstarf við Sovétríkin sálugu, þótt aldrei kæmi til greina að við yrðum bandamenn enda kommúnismi og lýðræði sitthvað. Ef Ísland væri ekki eins og hundur í bandi utanríkisstefnu ESB væri samstarfið við Rússland farsælla en það nú er - með gagnkvæmum viðskiptaþvingunum vegna deila ESB og Rússlands um yfirráð í Úkraínu.

Kína reynir í krafti viðskiptaveldis og vaxandi herveldis að koma ár sinni fyrir borð á norðurslóðum. Ísland ætti að eiga eiga vinsamleg samskipti við Kína en gjalda varhug við að láta kínverska hagsmuni koma upp á milli okkar og Bandaríkjamanna. Það verður ekki bæði sleppt og haldið.

Smáþjóðir eiga að hlúa að næsta nágrenni sínu og treysta samstarf við þjóðir á líku reki. Þar skipta Grænlendingar, Færeyingar og Norðmenn mestu máli.

Varnarmálastefna Bandaríkjanna er í endurskoðun. Úrsögn Breta úr ESB mun hafa áhrif á norðurslóðir. Fyrirætlanir Kínverja eru enn óljósar. Þeir létu dátt við Grænlendinga en var settur stóllinn fyrir dyrnar af Dönum með atfylgi Bandaríkjanna. Rússar munu líklega vilja halda óbreyttri stöðu á norðurslóðum til að geta sinnt meginlandi Evrópu og nágrönnum í Asíu betur.

Aðalatriðið fyrir Ísland er dómgreindarlaust fólk ráði ekki ferðinni í utanríkismálum okkar, líkt og síðustu ár.

 

Stórveldin bjóða Íslandi samninga