Vinstri græn steinöld

Til að útblástur koltvísýrings, CO2, af mannavöldum hefði áhrif á magn náttúrulegs koltvísýrings í andrúmsloftinu yrði yfirstandandi heimskreppa að vera fjórfalt verri en hún er í raun.

Loftslagsvísindamaðurinn Roy Spencer reiknar út þennan nauðsynlega samdrátt í efnahagsstarfsemi mannsins á jörðinni til að maðurinn hafi áhrif á náttúrulegar sveiflur CO2 í andrúmsloftinu.

Trúarsetning Vinstri grænna og ,,loftslagsleiðtoga" á borð við Grétu Thunberg er að manngerður koltvísýringur hækki hitastig jarðarinnar. Engin vísindi sanna þetta samhengi, aðeins trú.

Við þurfum sem sagt vinstri græna steinöld til að minnka CO2 svo að nokkru nemi.

Munu Vinstri grænir leggja til að atvinnuleysi fari upp í 60 prósent, Icelandair í gjaldþrot og landinu verði lokað til að Ísland leggi sitt af mörkum til trúarkenningarinnar?

Eða er trúin á manngert veður aðeins dygðaskraut góða fólksins?

Útblástur CO2 aldrei minnkað meira

25 eineltir þingmenn

Pólitík er einelti. Dag inn og dag út stundar þorri þingmanna einelti með því að væna hina og þessa um spillingu, gerræði, mannvonsku, óréttlæti eða almennt heimshatur. Án eineltis engin pólitík.

Þegar könnun meðal þingmanna segir að nær fjórir af hverjum tíu þykjast hafa orðið fyrir einelti í vinnunni er annað tveggja að 25 þingmenn vita ekki hvað pólitík gengur út á eða þeir ljúga upp á sig einelti í skjóli nafnleyndar. Svona eins og sumir þingmenn ljúga upp á sig prófgráðum.

Alþingi er illa mannaður vinnustaður. Þótt sómafólk sé þar innan um, og þökk sé þeim að umbera afturkreistingana, er drjúgur hluti alþingismanna illa gefinn og verr innrættur. Siðferðilegir mínusvaríantar komust til þings eftir útrás og hrun þegar lausung hljóp í lýðinn sem leitaði að hirðfíflum í mótmælakosningum gegn máttarvöldum sem sváfu á verðinum.

Hirðfíflin gáfu sig óðara fram, stofnuðu jafnvel heilu flokkana. Mótmælaaldan skolaði þeim á Austurvöll. Þar stunda viðrinin skemmdarverk, einatt í samspili við samfélagsmiðla og RÚV.

Skemmdarverkin eiga þann samnefnara að hér búi ónýt þjóð í hörmungarlandi. Gripsvit hirðfíflanna segir þeim að þjóð fái þá þingmenn sem hún á skilið: ónýt þjóð fær ónýta þingmenn.

38% þingmanna orðið fyrir einelti

Svandís þakkaði fúsk WHO

Svandís heilbrigðis þakkaði Alþjóðaheilbrigðismálastofnunni, WHO, vinnubrögð sem einkenndust af fúski og undirlægjuhætti gagnvart Kínverjum.

Í WHO birtist gerspilling alþjóðavaldsins í sinni tærustu mynd. Vanhæfir og ábyrgðalausir embættismenn fá framgang í baktjaldamakki. Framganginn þakka þeir með þrælslund gagnvart stórveldum sem þeir eiga frama sinn að þakka.

Betur hefði farið á því að Svandís minntist þess að hollur er heimafenginn baggi. Íslendingar náðu tökum á farsóttinni með séríslenskum ráðstöfunum en ekki leiðsögn frá alþjóðlegri ruslahrúgu sem nú er til rannsóknar.

Samþykkja sjálfstæða rannsókn á WHO

Flugfreyjur í 40% skotgröf

Flugfreyjur gerðu þau mistök í upphafi samninga við Icelandair að segja tilboð félagsins jafngilda 40 prósent launalækkun.

Tilboðið félagsins fól í sér meiri vinnu fyrir sambærileg laun. Það má kalla það launalækkun en líka tilraun til að bjarga verðmætum, sjálfu fyrirtækinu. Án Icelandair er einfaldlega engin vinna. WOW datt ekki í hug að semja við stéttarfélagið Flugfreyjufélag Íslands. Næsti flugrekandi mun heldur ekki gera það.

Flugfreyjur tóku Eflingu á tilboðið. Máluðu skrattann á vegginn og hrópuðu á torgum um óréttlæti heimsins.

En það er sem sagt munur á raunsæi og Eflingaræði.

 

 

Engin niðurstaða eftir ellefu tíma fund

Samfylkingin styður ekki Nató-aðild lengur

Enginn þingmanna Samfylkingar tók þátt í umræðu á alþingi í dag um uppbyggingu aðstöðu Nató hér á landi.

Alþýðuflokkurinn, forveri Samfylkingar, var að jafnaði hlynntur aðild Íslands að Nató.

Þögn þingmanna Samfylkingar er býsna hávær.

Ályktunarhæfnin „fremur á borði hinna skapandi greina“

Krónan og vonlausa kratahagfræðin

Hagspekingar Samfó og Viðreisnar láta ekki á sér kræla nú um stundir. Krónan með stýrivexti upp á 1,75%.

Kratahagfræðin fullyrti ár og síð að aldrei kæmi til þess að krónan gæti borð lága stýrivexti.

En með skynsamlegri hagstjórn þjónar krónan meginhlutverki allra gjaldmiðla, að halda verðlagi stöðugu.

Skynsöm hagstjórn er kratahagfræðinni framandi.

Spáir verðbólgu og verulegri lækkun stýrivaxta

Trúarmenning múslíma og nútíminn

Vestræn mannréttindi eru ósamrýmanleg karlaveldi múslíma. Í trúarmenningu múslíma er konan á forræði karlmanns: föður, bróður og eiginmanns.

Múslíminn og fræðimaðurinn Hamed Abdel-Samad segir vanda múslíma þann að vestræn upplýsing á nýöld fór framhjá þeim og því kemur samskiptatæki nútímans af tvöföldu afli inn í trúarmenningu þeirra.

,,Heiðursmorð" er birtingarmynd múslímsks karlaveldis. Þeir sem  annars þykjast uppteknir af mannréttindum á vesturlöndum, frjálslyndir vinstrimenn og femínistar, sjá í gegnum fingur sér við múslímska karlaveldið. Það er aftur vestrænn menningarsjúkdómur.

Drepnar eftir birtingu á samfélagsmiðlum

Mannúð og vísindi: Trump og Svíþjóð

Á Íslandi eru fá dauðsföll vegna COVID-19. Þríeykið og ráðherrar votta aðstandendum samúð á blaðamannafundum þegar þau eru tilkynnt. Það er mannúð. En margir deyja án þess að veikjast af kórónuveirunni og fá ekki samúðarkveðjur frá æðstu stöðum. Er það skortur á mannúð?

Obama fráfarandi forseti Bandaríkjanna sakar eftirmann sinn um skort á mannúð vegna dauðsfalla af COVID-19. Skortur á mannúð jafngildir pólitískum dauðadómi. Fólk kýs ekki mannvonskuna. Er Obama mannvinur eða aðeins að slá pólitískar keilur?

Svíar eru almennt taldir mannvinir. Þeir telja sig stunda farsóttarvarnir sem til lengdar eru haldbetri en þær ráðstafanir sem nágrannaþjóðir grípa til. Dauðsföll af COVID-19 eru á talandi stundu fleiri í Svíaríki en í sambærilegum ríkjum. Ræður mannvonska ferðinni?

Vísindin eru ekki með eitt svar við farsóttinni heldur mörg. Þeir sem segja Trump og Svía afneita vísindum í baráttunni við kórónuveiruna gætu allt eins krafist þess að ráðum stjörnuspekinga yrði hlýtt.

Það er einfaldlega ekki vitað hvernig best sé að taka samfélög í gegnum farsótt eins og kórónuveiruna. Engu að síður eru fjarska margir sérfræðingar í því sem ekki er vitað. Þar liggur hundurinn grafinn.

Ekkert lát á blóðtöku Svía

Icelandair ekki of stórt til að falla

Aðalhlutverk Icelandair er sögulega ekki að moka ferðamönnum til Íslands, heldur tryggja flugsamgöngur til og frá landinu. En flugsamgöngur eru ekki háðar sömu lögmálum og fyrr þegar ríkisflugfélög á borð við British Airways, Air France, Lufthansa og SAS réðu háloftunum í samkeppni við bandaríska risa: Pan Am, AA og fleiri félög er voru rekin á markaðsforsendum.

Flugsamgöngur eru nú að heita eingöngu í höndum einkafyrirtækja. Markaðurinn ræður ferðinni, félög rísa og hníga eins og froða i eldhúsvaski.

Flugsamgöngur verða við Ísland þótt Icelandair fari í gjaldþrot og áfram koma ferðamenn til landsins.

Alveg eins og bankar mega aldrei aftur verða of stórir til að falla er beinlínis óæskilegt að nokkurt flugfélag komist í þá stöðu.

Þegar ferðamálastjóri ýjar að þeirri hugsun, að Icelandair sé of stórt til að falla, gerir hann engum greiða nema þeim sem vilja flugfélagið feigt. Því hvenær ef ekki núna ætti flugrisaeðla að taka sitt síðasta flug? Himinhvolfið er hvort eð er svo gott sem tómt af flugvélum.

Óvíst hvort einhver myndi fylla í skarð Icelandair

Auðmenn, fjölmiðlar, RÚV og ríkisfé

Auðmennirnir Björgólfur Thors Björgólfsson, Róbert Wessman og Helgi Magnússon fjárfesta í fjölmiðlum til að hafa áhrif á skoðanamyndun.

Það er sjálfsagaður réttur, bæði ríkra og fátækra, að setja pening í þann rekstur sem hugurinn stendur til. Almannavaldið ætti að tryggja gagnsæi í eignarhaldi fjölmiðla þannig að lesendur og áheyrendur viti hver fjármagnar skoðanamyndunina.

Aftur er ekki hlutverk ríkisins að niðurgreiða fjölmiðla. Stærsta meinsemdin í ríkisaðstoð við fjölmiðla er RÚV. Á Efstaleiti situr fólk sem beitir fjölmiðlavaldi í þágu sértækra sjónarmiða s.s. að Ísland eigi að verða ESB-ríki og Eflingar-sósíalismi sé framtíðarlandið.

Novator helsti bakhjarl DV