Jón Ásgeir og upprisa auðmanna

Auðmennirnir sem stjórnuðu landinu fyrir hrun sáust ekki á opinberum vettvangi í áratug, nema á leið inn og út úr réttarsal.

Til auðmanna sást í matvörubúðum opnar um nætur þar sem þeir greiddu með reiðufé.

Tilnefning Jóns Ásgeirs í stjórn Skeljungs er birtingarmynd upprisinna auðmanna.

Við skulum halda fast um veskið okkar.

Jón Ásgeir tilnefndur í stjórn Skeljungs

Gulli og Áslaug kaupa orkupakkarök

Pólitísku rökin fyrir innleiðingu 3. orkupakka ESB eru aðkeypt þjónusta. Gulli utanríkis neitar að gefa upp hve hátt gjald Carl Baudenbacher tekur fyrir afskipti af íslenskum innanríkismálum.

Áslaug Arna formaður utanríkisnefndar alþingis notar rök Baudenbacher sem uppistöðu í þeirri kenningu að ESS-samningurinn sé í hættu ef orkupakkinn verður ekki innleiddur í íslensk lög.

Staðan er sem sagt þessi: forysta Sjálfstæðisflokksins kaupir pólitísk rök frá útlendingi um mikilsvert málefni er varðar fullveldi þjóðarinnar. Allur þingflokkur sjálfstæðismanna þegir þunnu hljóði og samþykkir ráðslagið. Ekki er Valhöll rismikil þessi misserin.

Hatursorðræða minnihlutahópa, stéttafordómar háskólalöggu

Davíð Þór Björg­vins­son dómari vekur máls á því að dómur í hatursorðræðu bitnaði á minnihlutahópi; efnalitlu, óskólagengnu fólki lítt þjálfuðu að koma fyrir sig orði.

Eyrún Eyþórsdóttir háskólalögga frá Akureyri er þó ekki á því að þessi minnihlutahópur eigi að fá vernd fyrir lögum. Líklega af þeirri ástæðu að þessi hópur er alíslenskur og gagnkynhneigður.

Eyrún háskólalögga er að hætti pólitíska vinstrirétttrúnaðarins með alla sína samúð hjá þeim ekki eru íslenskir, ekki eru í þjóðkirkjunni og ekki eru gagnkynhneigðir.

Blessuð háskólalöggan ætlar að uppræta hatur í völdum minnihlutahópum. Það er misnotkun á opinberu valdi. 

Morðhótanir í kjölfar verkefnis

Kristni og konungsvald, orkupakki og ESB-vald

,,Sérkenni á kristnun Íslendinga var að þeir hleyptu Kristi inn í landið en héldu konunginum fyrir utan," skrifar Gunnar Karlsson um valdakerfi þjóðveldisins, gullaldar Íslendinga.

Orkupakkasinnar á alþingi taka annan pól í hæðina. Þeir segja efni orkupakkans snúa að neytendavernd og samkeppi. En í stað þess að efla neytendur með íslenskum lögum vilja þeir flytja forræði auðlindanna til Brussel. Eins og það sé háborg neytenda en ekki valdahreiður stórbokka.

Þriðji orkupakkinn flytur inn í landið útlent vald, sem tekur ekki minnsta tillit til hagsmuna 300 þúsund Íslendinga þegar hagur 500 milljóna Evrópubúa er í húfi.

Það er þyngra en tárum taki að horfa upp á meirihluta alþingismanna svo snauða af dómgreind og heilbrigðri skynsemi að þeir selja fjölskyldusilfur þjóðarinnar í hendur útlendinga í nafni ESB-trúar.

Að sama skapi hljótum við að lofa snarpan málflutning Miðflokksins og Flokks fólksins. Á alþingi eru ekki aðeins aumar liðleskjur, - þótt þær séu illu heilli í meirihluta til næstu kosninga.

Héldu uppi málþófi um orkupakkann í nótt

Rósa B. flýgur en aðrir eiga að skammast sín

Rósa B. Brynjólfsdóttir þingmaður Vinstri grænna segir lofthita á jörðinni hækka af mannavöldum og kallar á ,,róttækar samfélagsbreytingar". Samtímis trúboðinu flýgur Rósa B. eins og enginn sé morgundagurinn - og allt á kostnað skattgreiðenda.

Rósa B. flaug á síðasta ár fyrir þrenn útborguð mánaðarlaun meðalmannsins, 1,2 milljónir króna. Þingmaðurinn er í hlutverki bindindispostula sem hallmælir áfengi en stundar sjálfur dagdrykkju.

Tvær flugferðir til Evrópu menga jafnmikið og einn fjölskyldubíll á ári, segir umhverfisverkfræðingur. Rósa B. ein og sér mengar sem nemur nokkrum fjölskyldubílum á ári. En það eru aðrir sem eiga að skammast sín, breyta lífsháttum sínum. 

Tvöfalt siðferði Rósu B. er lýsandi dæmi um hroka valdafólks sem býður almenningi sult og seyru en lifir sjálft í vellystingum praktuglega.

Þúsund flugferðir þingmanna

Sigmundur Davíð er Farage Íslands

Í Bretlandi berst flokkur Nigel Farage fyrir því að stjórnvöld hlýði niðurstöðu þjóðaratkvæðagreiðslu um úrsögn úr ESB, Brexit.

Á Ísland er Miðflokkur Sigmundar Davíðs eina fyrirstaðan við að Evrópusambandið fái ítök í náttúruauðlindum þjóðarinnar.

Stjórnmál á seinni tímum kalla á einstaklinga sem skilja samtíma sinn. Þingflokkar sem skilja ekki og vita ekki eru einfaldlega fortíðargóss.

Áslaug: Ísland beygir sig fyrir Noregi

Ísland þarf að beygja sig fyrir norskum hagsmunum í 3. orkupakkanum, segir Áslaug Arna þingmaður Sjálfstæðisflokksins í nefndaráliti.

Áslaug Arna skrifar undir álitið sem formaður utanríkismálanefndar. Hún gerir keypt sérfræðiálit svissnesks lögmanns að sínu: ,,Ísland væri bundið af hollustuskyldu gagnvart Noregi og Liechtenstein og taka yrði tillit til lögmætra hagsmuna þeirra við innleiðinguna."

Hvað er Áslaug Arna að gera á alþingi Íslendinga sem talsmaður norskra hagsmuna? Og hvað er þingflokkur Sjálfstæðisflokksins að hugsa? Er einbeittur vilji að gera Sjálfstæðisflokkinn að 3 prósent flokki norskra hagsmuna á Íslandi?

Deilur um pakkann halda áfram

Leiðari Mbl: 3% Sjálfstæðisflokkur?

Leiðari Morgunblaðsins í dag spyr hvort Sjálfstæðisflokkurinn fari sömu leið og Íhaldsflokkurinn í Dammörku:

Flokkn­um er nú spáð þriggja pró­senta fylgi í kosn­ing­un­um í næsta mánuði í Dan­mörku og því ekki úti­lokað að hann fái menn á þing.

Þegar stórt er spurt.

Katrín, fóstureyðing og rétturinn til lífs

,,Sjálf hefði hún [Katrín] viljað ganga lengra og treysta kon­um til fulls með því að hafa eng­in tíma­mörk á þung­un­ar­rofi."

Orð forsætisráðherra fela í sér að móðirin ein og alfarið ráði lífi einstaklings áður en klippt er á naflastrenginn. Kvenréttindi trompa mannhelgi.

Nýfætt barn er álíka ósjálfbjarga og fóstrið sem það var augnablikum áður. Hvers vegna má móðirin ekki eyða nýfæddu barni alveg eins og hún hefði leyfi til þess fram að fæðingu? Fæstar konur geta án utanaðkomandi aðstoðar fætt barn - hvað þá búið það til. Hvaðan kemur sá réttur að móðirin ein skuli ráða lífi einstaklings fram að fæðingu?

Mannhelgi getur ekki vikið fyrir kvenréttindum vegna þess að kynjaréttindi eru afleidd af mannhelgi. Án mannhelgi eru engin önnur réttindi. 

Hefði sjálf viljað ganga lengra

Áslaug Arna bregst hlutverki sínu

Þriðji orkupakkinn er hvergi nærri fullræddur þegar Áslaug Arna tekur málið úr nefnd til að fá það samþykkt með hraði.

Meðal þess sem ekki hefur verið rætt er orkusamband ESB, sem 3. orkupakkinn er hluti af. Ný skýrsla ESB liggur fyrir um orkusambandið, dagsett 9. apríl 2019. Áhrif orkusambands ESB á Ísland hafa ekki verið rædd vegna þess að Áslaug Arna og félagar hennar keppast við að gera orkupakkann að smámáli.

Í umsögn Samtaka iðnaðarins kemur fram ótti um áhrif næsta orkupakka ESB, s.k. ,,vetrarpakka". Engin umræða hefur farið fram um þann pakka, sem er þó handan við hornið. Ekki heldur er umræða um hvort samþykkt 3. orkupakkans feli í sér að við þurfum einnig að taka við þeim fjórða, - vetrarpakkanum.

Ekkert liggur á að samþykkja 3. orkupakkann. Hraðmeðferð Áslaugar Örnu og stjórnarmeirihlutans sýnir að yfirvöld óttast umræðuna. Það er ekki vel gott þegar stjórnvöld eru á flótta frá umbjóðendum sínum.

Ekki verið að keyra málið í gegn