Hamas stjórnar Gaza, ekki Ísrael

Hryðjuverkasamtökin Hamas stjórna Gaza og því er ekki um neitt hernám Ísrael að ræða. Palestínumenn stjórna Gaza frá árinu 2005. 

Mannréttindastjóri Sameinuðu þjóðanna fer villur vegar þegar hann segir Ísraela hernámsþjóð á Gaza.

Aftur er vitað að Hamas gengur illa að stjórna Gaza og efnir reglulega til átaka við Israel til að draga athyglina frá óstjórninni.

Harkan í ósamræmi við mótmælin

Hverjum er treystandi fyrir banka?

Síðast þegar einkaaðilar áttu banka á Íslandi settu þeir þjóðina á hausinn. Ríkið og lánadrottnar þrotabankanna eignuðust bankakerfið í heild sinni eftir hrun.

Vandinn við að íslenskir einkaaðilar stjórni banka er sá að freistnivandinn er yfirþyrmandi. Þeir Íslendingar sem eiga á annað borð peninga til að kaupa banka eru í viðskiptum þvers og kruss í samfélaginu. Og eignarhald banka verður notað til að fjármagna þau viðskipti. Það er eins víst og nótt fylgir degi.

Bankar framleiða peninga með lánum. Einkaaðilar munu alltaf freistast til þess að framleiða lánsfé í eigin þágu. Eins og aðdragandi hrunsins sýndi svart á hvítu. Bankar voru rændir að innan og líkinu hent í fang ríkissjóðs.

Til skamms tíma var lífeyrissjóðum ætlað að eignast ráðandi hlut í Arion banka. Þeir þorðu ekki, líklega vegna freistnivandans. Nú eru það útlendingar sem eiga að leysa vandann. Við verðum að krossa fingur og vona að það verði ekki útlendingar af sömu gerð og keyptu hlut í forvera Arion, Kaupþingi, í viðskiptafléttu sem kennd er við Al Thani. 

„Mikilvæg vegferð fyrir Arion og kerfið“

Hamas viðurkennir mannfórnir

Hryðjuverkasamtökin Hamas, sem stjórna Gaza, stóðu fyrir árás á landamærin við Ísrael. Hamas beitti fyrir sér börnum og almenningi gagngert til að fórna þeim í þágu málstaðarins.

Hamas viðurkennir mannfórnirnar, samanber viðtengda frétt. Þá eru einnig til upptökur sem sýna svart á hvítu að Hamas setti börn og konur í fylkingarbrjóst til að vera mannlegir skildir hryðjuverkamannanna.

Hamas notar mannslíf miskunnarlaust í pólitískum tilgangi.  

Segir flesta hinna látnu liðsmenn Hamas

Verkafólk þarf ekki að selja sig

Ef við, verkafólk, eigum að sætta okkur við að þurfa að selja aðgang að vinnuaflinu okkar til þess að mega lifa, þá er það augljóslega grundvallarkrafa að við fáum nógu mikið í laun til þess að við getum átt ánægjulegt og gott líf.

Ofanritað er upphaf greinar frambjóðanda Sósíalistaflokksins og formanns Eflingar, Sólveigar Önnu Jónsdóttur.

En verkafólk þarf ekki að selja sig til að eiga ofan í sig og á. Það er hægt stofna fyrirtæki. Og ef fyrsta fyrirtækið fer á hausinn þá má stofna nýtt, svo koll af kolli.

Formaður Sósíalistaflokksins, Gunnar Smári Egilsson, lék þennan leik allan sinn starfsferil. Eða þangað til hann stofnaði Sósíalistaflokkinn.

Sólveig Anna, ekki horfa langt yfir skammt. Slagorðið er ekki lengur ,,öreigar allra landa sameinist" heldur: öreigar, horfið til formannsins og stofnið fyrirtæki.

Fjármagna þingflokkar Stundina og Kjarnan?

Þingflokkar fá tugi milljóna króna á ári til að kaupa sérfræðiþjónustu. Þetta er opinbert fé sem þingflokkarnir þurfa ekki að gera grein fyrir hvernig þeir nota.

Það skýtur skökku við að á meðan ferðagreiðslur einstakra þingmanna eru greindar niður í einstakar ferðir skuli sérfræðikostnaður þingflokka ekki vera gegnsærri en raun ber vitni.

Fjölmiðlar eins og Kjarninn og Stundin lifa á styrkjum sem ekki eru gefnir upp. Það skyldi þó ekki vera að fjármagn frá þingflokkum vinstrimanna sé notað til að kaupa almannatengslaþjónustu frá Stundinni og Kjarnanum?

Útlenskar undirskriftir á Eurovision áskorun

Andstæðingar Ísrael safna undirskriftum með útlendinga til að Ísland taki ekki þátt í næstu Eurovision-keppni. Á Facebook kynna Íslendingar fyrir útlendum vinum sínum staðlað form með beiðni um stuðning við málefnið.

Textinn er á ensku og beinlínis ætlaður til að fá erlenda andstæðinga Ísraels í lið með þeim íslensku.

Undirskriftarsöfnun af þessu tagi er algjörlega ómarktæk. Það eru ekki útlendingar sem eiga að ráða því hvort Ísland taki þátt Eurovision.

20 þúsund á móti þátttöku í Eurovision

Bretar drepa EES - sendum blóm til London

EES-samningur Íslands og Noregs við Evrópusambandið er kominn á líkbörurnar. Ef Bretar afþakka EES, eftir útgöngu úr Evrópusambandinu, er tómt mál að tala um framhaldslíf EES. Nema, auðvitað, maður sé norskur eða íslenskur embættismaður flinkur að stinga hausnum í sandinn.

Allar líkur eru á að Bretar semji tvíhliða við Evrópusambandið en gangi ekki í EES. Það fyrirkomulag staðfestir fullveldi Bretlands. Aðild að EES skerðir fullveldið.

Þegar fyrir liggur að Bretar standi utan EES verður pólitískur ómöguleiki í Osló og Reykjavík að sýna fram á kosti samningsins umfram það að standa utan hans, líkt og Bretland kýs.

„Aðild að EES er dauð eftir þetta“

Hverjir styrkja Kjarnann og Stundina?

Kjarninn og Stundin eru fjölmiðlar sem lifa á styrkjum. Ekki er gefið upp hverjir styrkja þessa fjölmiðla né heldur hvað styrkveitendur fá í staðinn.

Fjölmiðill sem lifir á styrkjum er ekki sjálfstæður. Hann er bókstaflega í vasa þeirra sem leggja til styrktarfé.

Og þegar fjölmiðill gefur ekki upp hverjir veita styrkina þá siglir fjölmiðillinn undir fölsku flaggi og er ómarktækur.

Styrkir stór hluti tekna Kjarnans

Pútín brúarsmiður, vesturlönd klofin

Rússar tengja Krímskaga við heimalandið með nýrri brú. Vesturlönd neita að viðurkenna eignarnám Rússa á skaganum sem löngum var rússneskur en Úkraína fékk gefins á tíma Sovétríkjanna.

Rússar lögðu hald á Krím þegar Bandaríkin og Evrópusambandið reyndu að færa Úkraínu undir áhrifasvæði sitt. Úkraína er klofið land. Stjórnin í Kiev, studd og fjármögnuð af vesturlöndum ræður vesturhluta landsins, en uppreisnarmenn á bandi Moskvu austurhlutanum.

Pútín Rússlandsforseti er með tögl og hagldir í Úkraínu af tveim ástæðum. Í fyrsta lagi er landið í bakgarði Rússlands með stóran rússneskan minnihluta. Tæpur þriðjungur landsmanna er með rússnesku sem móðurmál. Í öðru lagi eru Bandaríkin og Evrópusambandið ekki samstíga í vestrænni útþenslustefnu þegar á móti blæs. Vestræn ríki höfðu afl til að innlima Úkraínu en heyktust á því þegar Rússar spyrntu við fótum.

Vestræn samstaða er iðulega meira á yfirborðinu en í reynd. Það sést enn betur í málefnum Íran. Trump forseti afturkallar stuðning við samkomulag um kjarnorkumál Írans og setur um leið stórfellda viðskiptahagsmuni Vestur-Evrópu í uppnám. 

Brú á milli Rússlands og Krímskaga opnuð

Ungabarn gengur ekki til mótmæla

Átta mánaða hvítvoðungur skreppur ekki á ofbeldismótmæli til að tjá hug sinn. Einhver fullorðinn ákveður að ómálga og ósjálfbjarga barn skuli sett í lífshættu og tekur það á vettvang ofbeldisins.

Glæpamaðurinn er sá fullorðni. En íslenskir vinstrimenn þiggja mannfórnir Palestínuaraba til að æsa sig upp í hatrinu á Ísrael.

Samúð með glæpamönnum er ekki hugþekk pólitík.

Táragasið drap ungbarn