Mótsögnin í framboði Sigurðar Inga

Rökin fyrir framboði Sigurðar Inga til formennsku í Framsóknarflokknum eru þau helst að sitjandi formaður, Sigmundur Davíð, standi höllum fæti í fjölmiðlaumræðunni. Þessi rök eru klædd í ólíkan búning, eftir því hver á í hlut. Samþingmaður Sigurðar Inga úr Suðurkjördæmi sagði til dæmis að þingflokknum ,,liði illa" vegna árása fjölmiðla (les RÚV) á Sigmund Davíð.

Ef rökin fyrir framboði Sigurðar Inga héldu ætti Framsóknarflokkurinn að standa betur í fjölmiðlaumræðunni með hann í brúnni.

Engar líkur eru á því að það gangi eftir. Pólitísk umræða gengur út á tvennt: hugmyndir og hagsmuni og samhengið þar á milli. Ef flokkur ber fram hugmyndir án tengsla við hagsmuni verður úr froða, samanber Pírata. Ef hagsmunir einir eru í fyrirrúmi nær umræðan engu flugi, samanber dæmigerðan landsbyggðaþingmann sem talar fyrir kjördæmið sitt.

Sigmundur Davíð sameinar í pólitík sinni hugmyndir og hagsmuni. Hann bjó til slíka pólitík í tengslum við Icesave-máli og aftur í umræðunni um skuldaleiðréttingu heimilanna. Og Framsóknarflokkurinn fékk 25 prósent kjörfylgi.

Andstæðingar Framsóknarflokksins vilja nær allir að Sigurður Ingi verði formaður Framsóknarflokksins. Að upplagi og eðli er Sigurður Ingi dæmigerður landsbyggðarþingmaður, sem treysta má að tali um alvörumál sem engu flugi ná í pólitískri umræðu. Búvörulögin eru dæmi um slíkt alvörumál. Stuðningur við þau mælist lítill og maður eins og Sigurður Ingi mun engu breyta þar um. Sigmundur Davíð getur á hinn bóginn flutt orðræðu sem tengir búvörulögin við stærra pólitískt samhengi. Þetta vita andstæðingar Framsóknarflokksins og því vilja þeir Sigmund Davíð feigan.

Andúð á Framsóknarflokknum er inngróin í margar vinstrikreðsur. Stundum kemur þessi andúð upp á yfirborðið í tærri mynd, eins og þegar fréttamaður RÚV uppnefndi Sigurð Inga ,,þann feita."

Ef framsóknarmenn gera andstæðingum sínum þann greiða að kjósa Sigurð Inga sem formann gera þeir flokkinn að hornkerlingu stjórnmálanna.

Spenna í Framsóknarflokknum

Ónýta Íslandi skipt út fyrir nýja Ísland

Vinstriflokkarnir lærðu af rassskellingunni sem þeir fengu í kosningunum 2013, þegar ónýta Ísland var slagorð þeirra, og tala nú hver í kapp við annan um nýja Ísland.

Stefna vinstriflokkanna er enn sú sama: hækka skatta, eyðileggja stjórnarskrá lýðveldisins, etja landsbyggðinni gegn þéttbýlinu og flytja fullveldið til Brussel.

Nýja Ísland verður ónýta Ísland ef vinstriflokkarnir ná meirihluta 29. október.

Vilja besta heilbrigðiskerfi í heimi

Nató stundar stríðsæsingar - og býr til ónýt ríki

Írak er ónýtt ríki eftir innrás Bandaríkjanna 2003, Sýrland og Líbýa eru sömuleiðis vígvöllur eftir inngrip Bandaríkjanna. Úkraína er ónýtt ríki eftir afskipti Bandaríkjanna og Evrópusambandsins.

Nató nýtti ekki sigurinn í kalda stríðinu til að stuðla að friði og öryggi heldur til að efna til óvinafagnaðar í Austur-Evrópu og skipta um ríkisstjórnir í miðausturlöndum.

Í grein í Le Monde er fjallað um afleiðingar herskárrar stefnu Bandaríkjanna og ESB, með Nató sem verkfæri. Fyrirsögnin, Svefnganga til stríðs, vísar í bók sagfræðingsins Christopher Clark um hvernig Evrópa álpaðist út í fyrra heimsstríð 1914.

Lýðræðisríki í Vestur-Evrópu eru meira og minna fylgihnettir Bandaríkjanna í Nató-samstarfinu, Ísland meðtalið. Uppdráttarsýki herjar á Evrópusambandið, sem ræður ekki við að stjórna eigin landamærum.

Mótsagnakennt eins og það hljómar eru meiri líkur á friði í heiminum ef Trump sigrar í forsetakosningunum í haust. Frú Clinton er fangi herskáu valdaelítunnar sem mótaði utanríkisstefnu Bandaríkjanna eftir kalda stríðið. Sú stefna færir okkur æ nær þriðja heimsstríði.

Flug Rússanna ekki ólöglegt

Lamandi áhrif framboðs Sigurðar Inga

Vegna framboðs Sigurðar Inga til formennsku grafa framsóknarmenn djúpar skotgrafir fyrir landsfund. Liður í þeim hernaði er að hvorki formaður né forsætisráðherra tala til þjóðarinnar á eldhúsdegi.

Framboð Sigurðar Inga er vanhugsað og án innihalds - engin málefnaleg rök eru færð fram fyrir framboðinu.

En framboðið stórskemmir möguleika Framsóknarflokksins að tala til þjóðarinnar.

Sigmundur og Sigurður tala ekki

Besta heilbrigðiskerfið - versta umræðuhefðin

Ísland stendur sig best í heilbrigðismálum, samkvæmt þekktasta læknariti heims, The Lancet. Nær tvö þúsund vísindamenn standa að baki niðurstöðunni.

Umræðan hér heima, þökk sé Kára og öðrum vinstrimönnum, gengur út á að allt sé í kalda koli í heilbrigðismálum.

Umræðuhefðin hér á landi er á verulegum villigötum.

Skarar fram úr í heilbrigðismálum

Frosti fékk RÚV-meðferð

Frosti Sigurjónsson þingmaður Framsóknarflokksins var í fremstu víglínu þegar Icesave-II samnignarnir voru til umræðu meðal þjóðarinnar. Hann hélt m.a. úti umræðuþræði um hlutdrægni RÚV undir heitinu ,,Eftirlit með hlutleysi RÚV."

Í umræðuþræðinum var vakin athygli á því hvernig RÚV dró taum þeirra sem vildu samþykkja Icesave. Eftir að þjóðin hafnaði Icesave-II í þjóðaratkvæðagreiðslu var Frosti tekinn fyrir af RÚV. Í DV er frásögn af því hvernig Frosti skynjaði meðferðina.

„Það er bara „public execution“ í gangi,“ sagði Frosti við nemendurna um framferði RÚV [...] RÚV þoldi skrif Frosta svo illa, að sögn Frosta, að hann varð persona non grata í augum fréttastofunnar. „Allt sem ég segi er núna algjörlega tekið úr samhengi; þeir vilja bara setja mig af. Og það er enginn sem getur stoppað þá,“ sagði hann og bætti við að nauðsynlegt væri að hafa eftirlit með slíkum starfsháttum.

 

RÚV hefur fyrir löngu sagt skilið við hlutlæga og málefnalega fréttamennsku. RÚV keyrir áfram sína eigin pólitísku dagskrá, sem er iðulega ættuð úr vinstriflokkunum.

 

Sigurður Ingi fer með rangt mál

Í hádegisfréttum RÚV, auðvitað, segir Sigurður Ingi að þingflokkur Framsóknarflokksins hafi ákveðið í apríl að lýsa vantrausti á Sigmund Davíð formann og forsætisráðherra. Þetta er rangt.

Vigdís Hauksdóttir er hluti af þingflokknum og ekki kannast hún við að neitt slíkt hafi verið rætt á vettvangi þingflokksins.

En auðvitað svíkur Sigurður Ingi ekki nokkurn mann. Nema kannski sjálfan sig.

Brigsl, svik og óheiðarleiki

Almenningur og lífeyrissjóðir eignist banka, einn fyrst

Bjarni Benediktsson formaður Sjálfstæðisflokksins stillti upp almannavæðingu bankanna á móti hugmyndum vinstriflokkanna að samfélagsvæða bankakerfið. Málamiðlun þarna á milli er æskileg.

Vandinn við að almannavæða banka þannig að hver Íslendingur fái út á kennitölu sína hlut í banka er að áhættufíklar úr röðum fjármálamanna bjóðist til kaupa hlut almennings á yfirverði, líkt og Útvegsbankann forðum. Áhættufíklar mega ekki komast í bankana.

Leiðin til að komast hjá áhættufíklum er að lífeyrissjóðir kaupi þriðjungshlut og verði þannig kjölfestufjárfestar en tveir þriðju hlutafjár fari til almennings. Ef einn banki er seldur með þessum hætti í fyrstu umferð er tveir enn hjá ríkinu.

Málamiðlunin gæti falið í sér að ein banki, Landsbankinn, verði um ókomna framtíð í höndum ríkisins en tveir bankar seldir, banki nr. 2 ekki fyrr en reynslan sýni að sá fyrsti sé í öruggum höndum. Það tekur 10 til 15 ár að fá slíka reynslu.

Lífeyrissjóðirnir eru vitanlega ekki óskeikulir. En þeir eru ekki áhættufíklar þar sem þeirra hlutverk er að ávaxta lífeyri almennings.

Önnur framboð í frúnni í Hamborg

Benedikt og brennda Evrópa

Evrópa er í forystukreppu, segir forseti frjálslyndra á Evrópuþinginu, Guy Verhofstadt. Evrópa er að brotna upp eins og Júgóslavía, stendur í Politico. Endalok Stór-Evrópu eru á næsta leiti skrifar Ana Palacio, fyrrverandi utanríkisráðherra Spánar.

Hér heima er það að frétta að Benedikt Jóhannesson formaður Viðreisnar á sér draum að koma Íslandi inn í Evrópusambandið á grunni ESB-umsóknar Samfylkingar frá 2009 sem var lögð til hliðar áramótin 2012/2013.

Vonandi verður draumur Benedikts ekki að martröð Íslands.

Loforð er loforð – og loforðið var svikið

Er RÚV stærra en Framsóknarflokkurinn?

Átta blaðamenn Guardian unnu með sömu skjöl og RÚV, þau sem kennd eru við Panama. Blaðamenn Guardian, sem er virt dagblað, komust að þessari niðurstöðu í ítarlegri umfjöllun:

Guardian hefur ekki sé neinar sannanir fyrir skattaundanskotum, undabrögðum eða óheiðarlegum ávinningi Sigmundar Davíðs, Önnu Sigurlaugar eða Wintris.(The Guardian has seen no evidence to suggest tax avoidance, evasion or any dishonest financial gain on the part of Gunnlaugsson, Pálsdóttir or Wintris.)

Niðurstaða Guardian er skýr og ótvíræð. RÚV og undirverktakinn Reykjavik Media voru með sömu upplýsingar og Guardian en hönnuðu fréttaflutninginn þannig að Sigmundur Davíð og Anna Sigurlaug komu út eins og stórglæpamenn.

Núna þegar Sigurður Ingi ætlar að bjóða sig fram gegn formanni Framsóknarflokksins undir þeim formerkjum að ,,enginn er stærri en flokkurinn" þarf hann að svara eftirfarandi spurningu: Er RÚV stærra en Framsóknarflokkurinn?

Enginn maður er stærri en flokkurinn