Zizek: við og múslímar erum ólík

Heimspekingurinn Slavoj Zizek varar vinstrimenn við því að taka fagnandi holskeflu flóttamanna frá miðausturlöndum og Norður-Afríku. Þeir eru góðir grannar, segir Zizek, en við eigum ekki að taka þá inn í evrópska heimilið - þeirra menning þrífst ekki innan veggja þeirrar evrópsku.

Zizek er heimspekingur og kemur úr marxískri hefð. Hann kynnir um þessar mundir nýja bók, Andóf gegn tvöfaldri þvingun, sem fjallar um afstöðuna til flóttamanna. Í viðtali segir Zizek að kristni boðskapurinn, að elska náunga sinn eins og sjálfan sig, feli ekki í sér að náunginn yfirtaki heimili manns.

Garður er granna sættir, heitir það á íslensku, og best að þeir múslímsku sitji áfram heimkynni sín fremur en að þeir verði til vandræða á vesturlöndum. Menning vesturlanda og múslímamenning eru andstæður og þrífast ekki í sama samfélagi.

Píratar þurfa sálfræðing til að skilja orð

Orð eru dálítið misskilin inna Pírata, segir Ásta Guðrún þingmaður, og því þurfti þingflokkurinn vinnustaðasálfræðing til að útskýra merkingu orða.

Sálfræðingum er margt gefið en orðskýringar er ekki sérsvið þeirra. Flestir fullorðnir skilja orð, og það er eitt einkenni fullorðinna að þeir skilja mælt mál.

En Píratar þurfa sem sagt sálfræðing til að útskýra merkingu orða.

„Hvað ertu að meina með þessu?“

Pútín sigrar í Sýrlandi - niðurlægir Obama

Ófriðurinn í Sýrlandi varð að stríði þegar Bandaríkin/Nató ákváðu að koma Assad Sýrlandsforseta fyrir kattarnef fyrir fimm árum. Stríðið var álíka illa undirbúið og innrás Bandaríkjanna/Nató í Írak árið 2003.

Samhliða valdaskaki í miðausturlöndum reyndu Bandaríkin/Nató í samvinnu við Evrópusambandið að klekkja á Rússum með íhlutun í Úkraínu, næsta nágranna Rússlands, og koma sér þar upp bandamanni.

Pútín Rússlandsforseti hóf afskipti af Sýrlandsstríðinu vegna Úkraínu. Með stuðningi við Assad Sýrlandsforseta sýndi Pútín Bandaríkjunum fram á að Washington er ekki höfuðborg alheimslögreglunnar sem ákveður innanríkismál annarra þjóða. Þar fyrir utan sýndi Pútín Obama Bandaríkjaforseta fram á að Rússland er enn stórveldi og getur sett mark sitt á stöðu alþjóðamála.

Fundur utanríkisráðherra Bandaríkjanna og Rússlands um frið í Sýrlandi og sameiginlega baráttu gegn hryðjuverkaöflum er stórsigur Pútíns. Bandaríkin/Nató og Evrópusambandi eru með Rússland í viðskiptabanni vegna Úkraínudeilunnar. Til stóð að einangra Rússa á alþjóðavettvangi og knýja þá til að gefa Bandaríkjunum/Nató og ESB Úkraínu. Styrkur Rússa í Sýrlandi er Pútín nauðsyn vegna Úkraínudeilunnar.

Þýska útgáfan FAZ upplýsir tölfræði stríðsins, um 290 þúsund dauðir og helmingur sýrlensku þjóðarinnar á flótta. Einhver ófriður hefði orðið í Sýrlandi hvort sem stórveldin skiptu sér af eða ekki. En án afskipta stórveldanna hefði stríðið ekki orðið jafn skelfilegt og raun ber vitni.

Komust að samkomulagi um vopnahlé í Sýrlandi