Stutt ofbeldisfrí til Sýrlands

Hundruð Breta af múslímskum uppruna bregða undir sig verri fætinum og skreppa til Sýrlands í stutta stund til að stunda ofbeldi í nafni trúar, sem þeir oft þekkja meira af afspurn en iðkun. Telegraph segir sögu fimm vina frá Portsmouth sem keyptu sér hálfsmánaðarferð til Sýrlands þar sem múslímar drepa hvern annan og þó sérstaklega þá sem eru annarrar trúar.

Breski þingmaðurinn David Davids segir þennan ofbeldistúrisma landráð og kveður hann verri en ef Breti hefði gengið Sovétríkjunum á hönd í kalda stríðinu eða barist fyrir Hitler í seinni heimsstyrjöld.

Davids leggur til að múslímskum Bretum, sem gerast stríðsmenn í átökum fyrir botni Miðjarðarhafs, verði afmunstraðir sem breskri þegnar, þ.e. gerðir ríkisfangslausir. Þar með yrðu viðkomandi dæmdir til að leita sér hælis meðal trúbræðra sinna sem vilja sharía-lög og hatast við vestrænt lýðræði, mannréttindi og lífsgæði.

Stutta ofbeldisfríið yrði ævilöng útskúfun. Og það er kannski ekki eins spennandi tilhugsun.

Telja sig vita hver böðullinn er

Afþakkar Árni Þór peninginn?

Árni Þór Sigurðsson fyrrum þingmaður Vg, sem leiddi þingflokkinn inn í ESB-ferli Össurar og Samfylkingar, er orðinn sendiherra við hæfilegan fögnuð.

Samherjar Árna Þórs senda honum kveðju í tilefni vistaskiptanna. Einn þeirra, Úlfar Þormóðsson rithöfundur, spyr um starfslokagreiðslu frá alþingi, sem Árni Þór á rétt á, þótt hann sé komin á launaskrá stjórnarráðsins. Úlfar skrifar

Það sæmir þeim ekki, að gína við slíkri greiðslu, sem lýst hefur sig sósíalista og sagst berjast gegn spillingu, nema hann hafi ekki skilið orð sín eða ekki meint neitt með þeim. Það rýrir manngildið.

Skaðinn er þó ekki allur skeður enn. Þú gætir afþakkað peninginn.

Árni Þór hlýtur að svara bráðlega.

 

Bjartur í Urðarseli

Sjálfstætt fólk, saga Halldórs Laxness um Bjart í Sumarhúsum, er saga kotbúskapar sjálfstæðismanns í harðbýlu landi. Vinstrimenn, einkum kratar, eru gjarnir að taka eina setningu úr bókinni til marks um fánýti stritsins.

Sagan af Bjarti í Sumarhúsum er saga mannsins, sem sáði í akur óvinar síns alt sitt líf, dag og nótt. Slík er saga sjálfstæðasta mannsins í landinu.

Hvergi kemur fram hver sé óvinur Bjarts. Þeir sem nota þessa tilvitnun láta að því liggja að kúgarinn sé nefndur í setningu á undan eða eftir. Það er rangt. Á undan ofanritaðri setningu stendur þetta:

Það er til í útlendum bókum ein heilög saga af manni sem varð fullkominn af því að sá í akur óvinar síns eina nótt.

Bjartur gerir meira en að sá í akur óvinarins eina nótt; það er iðja hans lífið út í gegn. Samkvæmt því er Bjartur mörgum sinnum fullkomnari en sá útlendi er sáði aðeins eina nótt í óvinaakur.

Hver er þá óvinurinn? Svar Laxness er á ská. Þegar Bjartur tapar Sumarhúsum, vegna þeirrar skammsýni að byggja of stórt og dýrt, fær hann ábúð á öðru örreitiskoti, Urðarseli, og fer þangað með lífsblóminu, Ástu Sóllilju, ásamt tveim börnum hennar og gamalli kerlingu. Guðbjartur er þess albúinn að hefja búskap að nýju.

Óvinurinn er brauðstritið, lífsbaráttan. Allir tapa þeirri baráttu að lokum. Spurningin er hvernig lífsbaráttan er háð; fullkomnun felst í að heyja baráttuna með reisn. 

 

 

Hamas þrífst á stríði

Hamas-samtökin eru hryðjuverkasamtök sem hvorki vilja né geta þrifist án vopnaskaks. Velviljaðir álitsgjafar, svo sem Daniel Hannan og Maurice Ostroff, vekja athygli á því að Gaza gæti verið velmegunarsamfélag.

Ísraelar yfirgáfu Gaza fyrir tæpum áratug og urðu ísraelsk yfirvöld að beita landa sína hörðu, sem höfðu tekið sér þar bólfestu. Allar forsendur voru til að búa arabískum þegnum Gaza betri lífskjör. Landamærin voru opin og iðnaður, verslun og viðskipti á milli Ísraels, Gaza, vesturbakkans og Egyptalands voru í allra þágu - nema þeirra sem kunna helst vopnaskak og hryðjuverk.

Hlutlægir greinendur ástandsins í Gaza, t.d. Jeroen Gunning, sem BBC birtir, og Azeem Ibrahim eru sammála um að örvænting Hamas-samtakanna leiddi til blóðbaðsins sem nú stendur yfir.

Landssvæði Palestínumanna er skipt: Gaza, þar sem Hamas ræður, og Vesturbakkanum, þar sem Fatha er yfirvaldið. Munurinn á þessum samtökum er m.a. að Hamas viðurkennir ekki Ísraelsríki og vill vopnaða baráttu en Fatha viðurkennir Ísraelsríki og vill samninga um tveggja ríkja lausn.

Vegna óaldar annars staðar meðal arabískra múslíma, í Egyptalandi, Sýrlandi og Írak missti Hamas fjárstuðning og stóð frammi fyrir gjaldþroti í sumar. Myndun þjóðstjórnar Hamas og Fatha var á dagskrá en fór út um þúfur vegna þess að Hamas neitaði að viðurkenna tilverurétt Ísraelsríkis.

Hamas rændi ísraelskum unglingum og drap þá og hóf eldflaugaárásir á Ísrael til að knýja fram gagnárásir Ísraelsmanna. Blóðbaðið átti síðan að nota til að auka stuðning við Hamas.

Hamas eru hryðjuverkasamtök sem kunna ekki að stjórna nema með ofbeldi. Gaza er slömm, ekki vegna Ísraels, heldur vegna þess að Hamas einbeitir sér að vopnaðri baráttu sem er innblásin trúarofstæki. Tillögur um að gera Gaza að Singapúr Miðjarðarhafs stranda á valdspeki Hamas sem tvinnar saman trú og ofbeldi.

 

Hamas rændi unglingunum

Milljarðaþóknun fyrir undanskot gjaldeyrislaga

Gjaldeyrislögin eru í þágu almennings, sem býr við sterkari skiptigengi krónunnar vegna hamla sem eru á stórviðskiptum með krónuna. Þeir sem selja tryggingar í erlendri mynt fundu leið framhjá gjaldeyrislögum, sem nú er verið að loka.

Það eru ekki rök i málinu að undanskot gjaldeyrislaganna skili hagnaði upp á milljarða til milligöngumanna.

Réttlætismál er að allir sitji við sama borð gagnvart gjaldeyrislögunum.

Sölumenn fengu 4 milljarða

Saksóknari ræðst á upplýsingafrelsið

Sigríður Friðjónsdóttir ríkissaksóknari er talsmaður miðaldaviðhorfa gagnvart upplýstri umræðu. Með því að ákæra vegna meints leka á upplýsingum sem eiga fullt erindi í umræðuna leitast ríkissaksóknari við að þagga niður málefnalega umræðu.

Eftir að Tony Amos og stuðningslið hans gerði hælisumsóknina að opinberu máli, með mótmælastöðu og skipulögðum fréttaflutningi áttu vitanlega allar upplýsingar um hælisumsóknina erindi í umræðuna. Það er í þágu upplýstrar umræðu að efnisatriðin í minnisblaðinu yrðu opinber.

Þeir sem sækja um hæli, hvort heldur á Íslandi eða til annarra ríkja, verða að gera ráð fyrir að upplýsingar um stöðu og persónulega hagi sé hluti af málsmeðferðinni. Og ef málsmeðferðin verður að opinberri umræðu eiga efnisatriðin að vera upplýst til að almenningur geti myndað sér málefnalega afstöðu.

 

Ákærður fyrir brot á þagnarskyldu

Sterkari ríkisstjórn eftir atlöguna að Hönnu Birnu

Ríkisstjórn er ekki sterkari en veikasti hlekkurinn. Í gegnum tíðina eru það oft einstakir ráðherrar og/eða ósamstaða samtarfsflokka sem veikja ríkisstjórnir. Sitjandi ríkisstjórn Sjálfstæðisflokks og Framsóknarflokks hefur sýnt samheldni og ráðherrar allir með tölu verið liðsmenn en ekki einleikarar.

Atlagan að Hönnu Birnu Kristjánsdóttur innanríkisráðherra reynir á samstöðu innan ríkisstjórnarinnar og ekki síst samstöðu þingflokks Sjálfstæðisflokksins. Það væri freistandi fyrir þingmenn sem ganga með ráðherra í maganum að magna upp óvinafagnaðinn í framavon.

Þeir sem mestu valda um hvernig til tekst eru formenn ríkisstjórnarflokkanna, Sigmundur Davíð og Bjarni Ben. Til þessa hafa þeir ekki stigið feilspor.

Sigmundur fellst á beiðni Hönnu Birnu

Tvöfeldni ASÍ og launin í landinu

Alþýðusamband Íslands er beggja vegna borðsins í launaumræðunni. ASÍ tilnefnir stjórnir lífeyrissjóðanna til helminga á móti Samtökum atvinnulífsins. ASÍ er að því marki fulltrúi atvinnurekenda sem  lífeyrissjóðirnir eiga fyrirtækin.

Lífeyrissjóðirnir eru ráðandi í mörgum stærstu fyrirtækja landsins, til dæmis Högum og Icelandair. Hvað er að frétta af launastefnu ASÍ í stærstu fyrirtækjum landsins?

Yfirlýsinga ASÍ um stéttastríð í landinu vegna launamisskiptingar er ekki trúverðug þegar verkalýðshreyfingin er eins og hundur í bandi forstjóranna.

Mæta misskiptingu með afli

Enginn pólitískur valkostur við ríkisstjórnina

Stjórnarandstaðan er ekki pólitískur valkostur við ríkisstjórn Sjálfstæðisflokks og Framsóknarflokks. Ekki heldur er raunhæfur kostur að annar hvor stjórnarflokkanna taki upp meirihlutasamstarf við stjórnarandstöðuflokka. Þetta eru góðu fréttirnar fyrir stjórnina.

Slæmu fréttirnar eru að ríkisstjórnin sýnir trekk í trekk pólitíska taugaveiklun sem veikir stöðu hennar. Eftirgjöf gagnvart ESB-sinnum í afstöðunni til þess hvort draga eigi umboðslausu ESB-umsóknina tilbaka eða ekki stendur það hæst.

Stuðningsmenn ríkisstjórnarinnar spyrja sig eðlilega fyrir hvaða pólitík stjórnin stendur þegar hún heykist á því að koma í höfn þeim meginmálum sem stjórnarflokkarnir fengu kosningu út á.

Spáir hörðum pólitískum vetri

Heimsfrásögnin er týnd, líka íslenska neðanmálsgreinin

Þeir sem komust til vits og ára síðari hluta síðustu aldar bjuggu við trausta frásögn af heiminum. Frásögnin var um baráttu vesturs og austurs, kapítalisma og kommúnisma. Oft er frásögnin kennd við kaldastríðið eða tveggja póla heim Bandaríkjanna og Sovétríkjanna.

Fall Berlínarmúrsins 1989 gróf undan ráðandi heimsfrásögn áratuganna á undan. Engin ný heimsfrásögn leysti þá gömlu af hólmi. Hægt er að nefna nokkrar sem koma til álita; Evrópusambandið (hvort það stenst eða leysist upp); pólitísk og hernaðarleg spenna í Austur-Evrópu, uppgangur öfgamúslíma fyrir botni Miðjaðarhafs og viðsjár Kína og Japan í Asíu. Engin þessara frásagna er enn nógu altæk til að verða að heimsfrásögn.

Íslendingar áttu sína neðanmálsgrein við heimsfrásögnina á tímum kalda stríðsins. Stjórnmál og mannlíf að nokkur leyti hverfðist um afstöðuna til herstöðvarinnar á Miðnesheiði og aðildar Íslands að Nató. Brottfall heimsfrásagnarinnar hafði gagnger áhrif á íslensku neðanmálsgreinina. Dæmi: á tímum kalda stríðsins var náið bandalag með Sjálfstæðisflokki og Alþýðuflokki. Í dag eru þessir flokkar eins og hundur og köttur. Vg, Alþýðubandalagið, var alltaf stærri en kratar vegna andófsins gegn hernum. Núna er Vg hreinn minnipokaflokkur, þótt formaður flokksins sé margfalt kjósendavænni en formaður Samfylkingar.

Við fall gömlu heimsfrásagnarinnar skrifaði lítt þekktur bandarískur embættismaður, Francis Fukuyama, bók um endalok sögunnar.  Meginkenning bókarinnar var að nýja heimsfrásögnin yrði vestrænt lýðræði og markaðsbúskapur. Fukuyama varð stórstjarna út á bókina. Þegar hann lítur tilbaka, 25 árum eftir að bókin kom út, játar hann að sögunni lauk ekki með endalokum kalda stríðsins. Lýðræði og markaðsbúskapur urðu ekki sigrandi fullhugar 21. aldarinnar - urðu ekki nýja og endanlega heimsfrásögnin - en eru þó skástu sniðmátin fyrir mannfélagið.

Skortur á heimsfrásögn gerir pólitík kvikari, bæði alþjóðastjórnmál og innanlandsstjórnmál, þar sem saklausir neistar geta kveikt bál - ekki vegna ásetnings heldur óðagots.

Helstu sögulegu hliðstæður við alþjóðastjórnmál nú um stundir eru aðstæður í kringum aldamótin 1900 þegar Evrópa var í þeim hamskiptum að losna við gömlu valdastéttina, aðalinn, og íklæðast múglýðræði. Allur almenningur gladdist svo innilega ágústdagana 1914 þegar loksins, loksins eitthvað spennandi gerðist með því að stríð braust út enda trúði fólk að stríðið yrði nett og skemmtilegt og búið fyrir jól.