Eichmann-rökin tekin gild í héraðsdómi

Adolf Eichmann vildi náðun vegna þess að hann framfylgdi fyrirskipunum. Fyrir ofan Eichmann voru Heydrich, Himmler og sjálfur foringinn.

Héraðsdómur Reykjavíkur tekur Eichmann-rökin góð og gild í Chesterfield-málinu. Engin gögn, segir dómurinn, staðfesta að fyrirskipun hafi verið gefin um tefla stórum fjárhæðum í hættu. En hvaða kom fyrirskipun um að reka banka eins og mafíuverkefni þar sem allir topparnir græddu, og nota gróðann til að reisa hótel um allar þorpagrundir, en samfélagið sat uppi með tapið?

Héraðsdómur á eftir að útskýra hvaða yfirvald var æðra æðstu stjórnendum Kaupþings. Annars ganga Eichmann-rökin ekki upp í tilfelli bankamanna sem keyrðu fjármálakerfi þjóðarinnar í þrot.

Kannski eru héraðsdómararnir þeirrar skoðunar að guð almáttugur hafi verið að verki? Er búið að kanna hvort viðkomandi dómarar tilheyri sértrúarsöfnuði?

Niðurstaða dómsins skýr

Nýtt stjórnmálaafl: læknaflokkurinn

Læknarnir Kári Stefánsson og Magnús Karl Magnússon hljóta að formgera stjórnmálahreyfinguna á bakvið undirskriftarsöfnun um aukið fjármagn til heilbrigðiskerfisins.

Læknaflokkur Kára og Magnúsar Karls kann sitthvað fyrir sér í pólitískum vinnubrögðum, enda komnir með 50 þúsund undirskriftir. Í kjarabaráttu lækna, fyrir tveim árum, sýndu læknar fram á að hugvitsamleg notkun almannatengla, sem plöntuðu ,,fréttum" í auðtrúa fjölmiðla, skilar árangri í baráttunni um hylli almennings.

Kári og Magnús Karl vekja athygli á Icesave-málinu, en einmitt baráttan þar kallaði fram nýjan Framsóknarflokk. Læknafélagarnir tveir geta ekki látið staðar numið hér. Þeir eru byrjaðir í pólitík og verða að fylgja því eftir með flokksstofnun. Annars dæmast þeir úr leik sem óábyrgir eins-máls-menn. Undirskriftarsöfnunin hlýtur að vera forsmekkurinn að öðru og stærra.

Læknaflokkurinn er kannski ekki gott nafn. Hvað með Heilbrigðisflokkinn? Eða Hamingjuflokkurinn? Við-vitum-allt-best-flokkurinn? Mest lýsandi væri þó: Topparaflokkurinn.

„Ráðamenn hlusta ekki á þjóðina“

Valdefling Kára þýðir veikara stjórnkerfi

Kári Stefánsson er ígildi stjórnmálahreyfingar. Með eins-máls-undirskriftarsöfnun hyggst hann breyta heilbrigðiskerfinu.

Ekkert eitt átak mun breyta heilbrigðiskerfinu. Löngu eftir að undirskriftarsöfnuninni lýkur, og Kári gleymdur, verður rætt um fjármögnun heilbrigðisþjónustunnar og tekist á um opinbert fé hvað skuli gert með það.

Nái Kári árangri með erfiði sínu verður það á kostnað stjórnfestu með því að viðurkennd stjórntæki, alþingi og stjórnarráð, eru sniðgengin. Fordæmi eru komin fyrir einsmálshreyfingum sem lýsa frati á þekktar aðferðir til málamiðlunar. Lýðveldið okkar verður ekki betra heldur eykst sundurþykkjan.

Veikra stjórnkerfi og orðræða á borð við ,,forsætisráðherra er fýldur út í allt og alla" er líklega ekki tilgangur Kára. Vegurinn til vítis er varðaður góðum áformum.

Forsætisráðherra „fýldur út í alla“

Glæpir í orði og verki

Flóttamenn frá löndum múslíma taka með sér menningu sína til vesturlanda. Hluti menningarinnar er kvenfyrirlitning. Í stað þess að ræða opinskátt kvenfjandsamlega trúarmenningu múslíma, er skipulega reynt að þagga niður í umræðunni, ekki síst í Svíþjóð.

Sænsk yfirvöld ráða ekki við flóttamennina sem koma til landsins. Samkvæmt Guardian er beðið um nokkur þúsund fleiri lögregluþjóna til að hafa hemil á flóttamönnum.

Engum er greiði gerður með andvaraleysi sem felst í að taka við flóttamönnum umfram það sem menningarlegir og efnislegir inniviðir samfélagsins þola.

Viðbrögðin við fréttum af glæpnum í Moln­dal verða eftir því ofsafengin sem klén frammistaða yfirvalda rennur upp fyrir fleiri Svíum.

„Hryllilegur glæpur“ í Svíþjóð

Kári, Trump og pólitíska óánægjan

Vestur í Bandaríkjunum gerir Donald Trump gott mót í forvali repúblíkana. Hann talar enga tæpitungu og málar pólitíska valkosti sterkum litum.

Hér heima sópar Kári Stefánsson til sín undirskriftum til að breyta ríkisfjármálum í þágu heilbrigðiskerfins. Kári kynnir einfaldar og afgerandi lausnir. 

Báðir eru þeir Kári og Donald stjórnmálahreyfingar.

Stuðningsmenn Trump í Bandaríkjunum eru einkum óánægðir hægrimenn vilja breyta Repúbíkanaflokknum.

Kári sækir stuðning sinn til vinstrimanna sem eru án foringja og málefna og sundraðir í nokkra smáflokka.

40.000 skrifa undir hjá Kára

ESB hrynur - frjálslynt lýðræði sekkur

Hótanir eru sagðar upphátt í samskiptum ESB-ríkjanna en áður voru þær hvíslaðar á lokuðum fundum. Innanríkisráðherra Þýskalands hótar Grikkjum útilokun frá Schengen vegna þess að múslímskir flóttamenn streyma óhindrað inn í Mið-Evrópu frá Grikklandi.

Evrópusambandið hótar Pólverjum rannsókn og refsingu vegna fjölmiðlalaga pólsku ríkisstjórnarinnar er þrengja að tjáningarfrelsinu. Í Póllandi og Ungverjalandi, sem einnig er ESB-ríki, eru ríkisstjórnir sem líta á frjálslynt lýðræði ESB sem löst fremur en kost. Hugtakið ,,andfrjálslynt lýðræði", er orðið viðurkennt í pólitískri umræðu, jafnvel þótt það sé næsti bær við andlýðræði. Flokkum með andfrjálslynt lýðræði á stefnuskrá sinni fjölgar í Evrópu og þeim vex fylgi.

Ástæðan fyrir vexti andfrjálslynds lýðræðis er að háborg frjálslynda lýðræðísins, Evrópusambandið, er að hruni komið. Roger Bootle útskýrir í Telegraph samhengi evru-kreppunnar við flóttamanna-kreppuna. Í báðum tilvikum ætar ESB sér um of og ræður ekki við verkefnið. Evrópusambandið sogar til sín valdheimildir frá aðildarríkjum en er of veikt til að stýra viðfangsefnunum.

,,Europa zerfällt," Evrópa hrynur, segir aðalútgefandi Frankfurter Allgemeine Zeitung, FAZ, og bætir við: í húfi er friður, frelsi og velmegun. Útgefandinn hvetur Þjóðverja til að setja saman c-áætlun, þar sem Kjarna-Evrópa kæmi í stað ESB. Kjarna-Evrópa væri Þýskaland, Bnelúx-löndin, Austurríki en líklega ekki Frakkland og varla Ítalía. FAZ túlkar sjónarmið góðborgaranna í Þýskalandi. Þeir eru að missa þolinmæðina gagnvart Evrópusambandinu.

Donald Trump, sá stjórnmálamaður í Bandaríkjunum sem mest er talað um, er andfrjálslyndur í stíl við leiðtoga í Pólland, Ungverjalandi og Rússlandi. Nærtækt er að álykta að tímabil frjálslynds lýðræðis, sem má segja hefjist eftir seinna stríð, sé að renna sitt skeið.

Alþjóðastjórnmál standa frammi fyrir leiðréttingu ef ekki uppstokkun. Áhugaverðir tímar eru framundan.

  

 

„Getum tekið við fleiri með betri samvinnu“

Kiev-stjórnin efnir ekki Minsk, Gunnar Bragi í tómu tjóni

Vesturveldin styðja stjórnina í Kiev, sem deilir við uppreisnarmenn, er Rússar styðja, um yfirráðin yfir austurhéruðum Úkraínu. Minsk-samkomulagið kveður á um sjálfsstjórn austurhéraðanna gegn því að Kiev-stjórnin fái yfirráð yfir landamærum.

Kiev-stjórnin hefur hingað til ekki efnt sinn hluta Minsk-samkomulagsins með því að gera ekki nauðsynlegar laga- og stjórnarskrárbreytingar til að veita austurhéruðunum sjálfsstjórn.

Gunnar Bragi, utanríkisráðherra Íslands, á eftir að útskýra það fyrir okkur hvers vegna Ísland er í viðskiptastríði við Rússa vegna Krímskaga, - sem Minsk-samkomulagið tekur ekki til. Krímskagi verður hluti af Rússlandi.

Viðskiptabanni jafnvel aflétt í sumar

Álverinu ætti að loka núna

Álverið í Straumsvík er barn síns tíma en er löngu orðið úrelt á þeim stað sem það er rekið. Álverið hamlar eðlilegri byggðaþróun með ströndinni og ætti að loka þegar af þeirri ástæðu einni.

Þegar við bætist að eigendur álversins eru í skæruhernaði gagnvart starfsfólki sem flýr undan þá er einboðið að álverið loki.

Atvinnuástandið í landinu er þannig að eftirspurn er meiri eftir vinnuafli en framboð. Sem sagt: lokum álverinu í Straumsvík.

Fyrirtækið að étast upp innan frá

Machiavelli og Mussolini í forsetaslag

Hillary Clinton er valdapólitíkus sem Machiavelli skrifaði um; gerir það sem til þarf að ná völdum og halda þeim. Samnefnarinn fyrir bakland Donald Trump er krafan um sterkan leiðtoga, n.k. Mussolini.

Öfgalaus, litlaus og áferðasnotur Michael R. Bloomberg telur sig eiga möguleika gegn fyrirbærunum Hillary og Donald.

Eftir átta ár með Obama er hvít útgáfa sitjandi forseta ekki líkleg að selja. Meiri líkur eru að nýsósíalistinn Sanders taki Clinton í forvali demókrata en að Bloomberg skori sem óháður.

 

Bloomberg íhugar forsetaframboð

Sjálfstæðisflokkurinn er á Kvíabryggju

Þrír fangar á Kvíabryggju, sem sjónvarp Jóns Ásgeirs birti viðtal við, eru pólitískt andlit Sjálfstæðisflokksins. Fangarnir komust til álna þegar einkavæðing Sjálfstæðisflokksins stóð yfir og frjálshyggja æðstavald í pólitík.

Þjóðinni gast ekki að föngunum á Kvíabryggju. Þeir eru hrokafullir og þess albúnir að endurtaka leikinn frá útrás til hruns. Þannig er Sjálfstæðisflokkurinn: ætlar að einkavæða bankakerfið á einu bretti, - vegna þess að auðmönnum er svo vel treystandi fyrir fjármálastofnunum þjóðarinnar.

Sjálfstæðisflokkurinn lærði ekkert af hruninu. Flokkurinn heldur í sömu kilisjupólitíkina og leiddi okkur í hrunið. Nýmælin í pólitík Sjálfstæðisflokksins eru helst þau að éta upp misheppnaða fjölmenningarstefnu góða fólksins.

Auðmanna- og fjölmenningarstefna Sjálfstæðisflokksins skilar 19,5 prósent fylgi. Flokkurinn er huggulegur smáflokkur, eins og Halldór Jónsson orðar það.

Sjálfstæðisflokkurinn gat orðið þjóðarflokkur ef hann hefði lesið rétt í spilin kjörtímabilið 2009 til 2013. Þá réð hér vinstristjórn sem gerði atlögu að stjórnskipun lýðveldisins. Stjórnarskránni átti að kollvarpa og flytja fullveldið til Brussel.

Atlögu vinsstriflokkanna á lýðveldið var hrundið. Í nafni hvaða hugmynda? Kom einkavæðing eða frjálshyggja þar við sögu? Nei, lítið sem ekkert.

Fullveldi, gróin borgaraleg gildi um varkárni og íhaldssemi í félagslegum málefnum og ríksfjármálum voru ráðandi í andófinu gegn vinstristjórninni.

Þegar Sjálfstæðisflokkurinn komst í ríkisstjórn vorið 2013, mest fyrir tilstilli kosningasigurs Framsóknarflokksins, þá hélt forysta flokksins að þjóðin hefði veitt umboð fyrir nýrri einkavæðingu á grunni frjálshyggju. Það var mikill misskilingur.

Davíð Oddsson sá fyrir sér hörmungarferlið sem frjálshyggjan var komin í haustið 2003 þegar hann tók út einkasparnaðinn úr Kaupþingi-Búnaðarbanka. Þá voru fimm ár í hrun og engu var hægt að breyta vegna þess að tiltekin pólitísk hugmyndafræði hafði sigrað. Ári eftir reyndi ríkisstjórn Davíðs að setja lög á fjölmiðlaveldi Jóns Ásgeirs en tapaði þeim slag. Einkavæðingar-auðræðið var allsráðandi í samfélaginu.

Með hruni varð einavæðingar-auðræðið að gjalti. Forysta Sjálfstæðisflokksins átti vitanlega að urða líkið sjö fet undir yfirborði jarðar. Orðræða flokksins á að snúast um sígilda borgaralega stefnu s.s stjórnfestu, fjölskylduvelferð og lög og rétt í samfélaginu.

Sjálfstæðisflokkurinn er á Kvíabryggju og losnar ekki þaðan fyrir næsta þingkosningar. Pólitísk orðræða kemur ekki eins og kanína upp úr hatti töframanns kortéri fyrir kosningar.

 

Fylgi Pírata eykst enn