Góða fólkið og félagsleg harðstjórn

Freki karlinn og góða fólkið eru heiti á meginstraumum í pólitík í grein Þórðar Snæs Júlíussonar. Þórður segir m.a. um góða fólkið

Það er oft stutt í vandlætinguna hjá góða fólkinu. Þá breytist ætlað umburðarlyndi í heiftúðlega andúð gagnvart skoðunum þeirra sem horfa öðruvísi á heiminn en með þeirra góðu gleraugum. Þrátt fyrir allt frjálslyndið er alltaf ein skoðun „réttari“ en önnur. 

Eitt annað einkenni góða fólksins, sem Þórður nefnir ekki, er stöðug viðleitni þeirra til að búa til hópa, bæði á samfélagsmiðlum og í kjötheimum á Austurvelli. Góða fólkið er í stöðugri leit að meirihluta í þessu eða hinu málinu. Og meirihlutinn er alltaf notaður til að berja á einhverjum sem nýtur ekki hylli góða fólksins. Þetta einkenni, ásamt rétttrúnaðinum, fellur eins og flís við rass að skilgreiningu stjórnspekinga eins og Mill og Tocqueville á félagslegri harðstjórn.

Forsætisráðherra rekur eitt dæmi af mörgum í áramótaávarpi í Morgunblaðinu í dag af harðstjórn góða fólksins. Hagstofan birti upplýsingar um fólksflutninga til og frá landinu sem voru í andstöðu við þann spuna góða fólksins um að landið væri að tæmast af ungu fólki. Góða fólkið gerði hróp að embættismönnum sem tóku saman tölfræðilegar upplýsingar.

Ógnarorðræða góða fólksins er aðeins orð á meðan það er án valda. Komist góða fólkið í valdastöðu, líkt og gerðist kjörtímabilið 2009-2013, flyst ógnarorðræðan inn í stjórnarráðið. Enda logaði Ísland í illdeilum allt það kjörtímabil.

Vinstrasvekkelsi út í 365-miðla

Egill Helgason og Ólína Þorvarðardóttir auglýsa svekkelsi vinstrimanna með val Fréttablaðsins/365-miðla á viðskiptum ársins og verðlaunum til leiðtoga ríkisstjórnarinnar, Sigmundar Davíðs og Bjarna Ben.

Björn Bjarnason rifjar upp að vinstrimenn töldu sig eiga hauka í horni þar sem Baugsútgáfan var. Fjölmiðlapólitískt bandalag Baugsmiðla og Samfylkingar var ein skýringin á kosningasigri flokksins 2007. ,,Baugsstjórnin" var nafn sem framsóknarmenn kölluðu samstjórn Samfylkingar og Sjálfstæðisflokks - sem síðar fékk viðurnefnið ,,hrunstjórnin." 

Jón Ásgeir stýrir Baugsmiðlum í þágu viðskiptahagsmuna sinna. Vinstrimenn líta svo á að með verðlaun til forsætis- og fjármálaráðherra sé lokið skjallbandalagi Baugsmiðla og vinstriflokkanna, einkum Samfylkingar. RÚV er þá eini öryggi fjölmiðill vinstrimanna. Það má svekkja sig af minna tilefni.

Sanngjörn laun bankastjóra, vanþroska umræða

Meðallaun á Íslandi eru á milli 500 og 600 þús. á mánuði. Við erum hátekjuland í alþjóðlegum samanburði. Það hljómar ekkert út úr korti að bankastjóri ríkisbanka sé með ferföld meðallaun.

Umræðan um hækkun mánaðarlauna bankastjóra Landsbankans sýnir að launaumræðan hér á landi er vanþroska.

ASí og verkalýðshreyfing almennt ætti fyrir löngu að efna til umræðu um sanngjörn laun og launabil ólíkra starfa. Miðað við fyrirferð launadeilna og kjarasamninga í þjóðfélagsumræðunni er óskiljanlegt að launahlutföll starfa skuli ekki fá athygli.

Laun bankastjóra hækka um 41%

Ríki íslams er meira en landssvæði

Gangi það eftir, að Ríki íslams í Írak og Sýrlandi verði afmáð á næsta ári, mun öfgahyggjan að baki engu að síður lifa áfram.

Ríki íslams er afsprengi trúarmenningar múslíma sem tekur mið af heimsmynd miðalda fremur en nútíma. Trúarmenningin er samofin siðum og venjum arabískra múslíma.

Tilraunir til lýðræðis í miðausturlöndum mistakast. Meira en helmingur, 57%, aðspurðra í stórri könnun meðal múslíma segja arabíska vorið hafa verið neikvætt.

Lýðræði er vestrænt fyrirbrigði og ekki sjálfgefið að það verði heimfært upp á aðra menningu. En þegar múslímar hafa fengið smjörþefinn af samfélagi stjórnað samkvæmt kennisetningum spámannsins, eins og Ríki íslams, er tímbært að bjóða upp á valkost sem stendur nær nútíma en miðöldum. Múslímar verða sjálfir að ráða fram úr sínum málum.

Ríki íslams verður „tortímt“

Allir ánægðir með forsetann - nema vinstrimenn

Píratar, hægrimenn og ópólitískir eru allir ánægðir með Ólaf Ragnar Grímsson í starfi forseta. Einu pólitísku afbrigðin sem eru ósáttir við forsetann eru stuðningsmenn Samfylkingar og Vinstri grænna.

41 prósent stuðningsfólks Pírata er ánægt með störf Ólafs Ragnars, en 32 prósent óánægt. Dyggustu stuðningsmenn forsetans koma úr röðum framsóknarmanna, 81 prósent ánægja er með forseta lýðveldisins þar á bæ. Ánægjuhlutfall sjálfstæðismanna er 66 prósent. Þá er afgerandi stuðningur við Ólaf Ragnar meðal þeirra sem standa utan stuðningsmanna flokka og framboða.

Óánægjan með Ólaf Ragnar er bundin við stuðningsmenn Samfylkingar, 55 prósent, og Vg, 49 prósent.

Vinstrimenn fyrirgefa Ólafi Ragnari ekki að senda Icesave-lögin tvisvar í þjóðaratkvæði þar sem almenningur rassskellti ríkisstjórn Jóhönnu Sigurðardóttur og gerði hana óstarfhæfa.

 

47,8% ánægð með störf forsetans

Siðmenningastríð, trúarmenning og snjallvald

Stríðið við Íslamska ríkið er barátta siðmenninga, líkt og Samúel P. Huntington forskrifaði í lok kalda stríðsins. Ríki íslams sækir réttlætingu sína í súnníútgáfu múslímatrúar, sem er ráðandi meðal múslíma, en hún boðar að trúaðir skulu drottna yfir vantrúuðum. Veraldleg hófsemd, sem kristni fóstrar, er víðs fjarri trúarspeki súnna.

Trú er réttlætingin en tilefni hermanna múslímsku fasistanna til að gefa sig í baráttuna eru af margvíslegum toga, segja þeir sem hitt hafa þá að máli, t.d. Martin Chulov.

Sérfræðingar i hernaði telja baráttuna gegn Ríki íslam aðeins að hluta hernaðarlega. Bandaríski eftirlaunaherforinginn James Stavridis segir í grein í Foreign Affairs að úrslit átakanna við Ríki íslam ráðist með snjallvaldi. Með snjallvaldi er átt við aðgerðir til að vinna hug og hjörtu andstæðingsins. Stavridis nefnir nokkrar sem eru tækilegar í eðli sínu s.s. að skipuleggja alþjóðlega umgjörð friðar í miðausturlöndum og tryggja atvinnuframboð þannig að fólk geti orðið matvinnungar og tileinkað sér lífstíl þeirra sem fá fast kaup.

Stóra verkefni snjallvaldsins, segir Stavridis, er að sigra íslamistana á markaðstorgi hugmyndanna. Þótt hægt sé að taka undir með eftirlaunaherforingjanum, að vesturlönd verði að reyna að fá róttæka múslíma til að gerast hófsamir, þá er nokkur bjartsýni að ætla snjallvaldi að trompa 1500 ára trúarmenningu.

Huntington benti á í sinni grein að maður getur verið að hálfu Frakki og að hálfu arabískur. En það er enginn að hálfu kristinn og að hálfu múslímskur. Harla litlar líkur eru á því að vestrænt snjallvald hreyfi við trúarsannfæringu margra múslíma. Ríkjandi súnníútgáfa múslíma er töluvert fjarlæg kristnu menningunni sem bjó til hugmyndina um snjallvald.

 

Íraska fánanum flaggað í Ramadi

Evran og óhamingja ESB

Evran átti að bæta upp skort á hagfræðilegri undirstöðu með vera pólitískur hvati til hraðari samruna ESB-ríkja. Samkvæmt Valdis Dombrovskis, varaforseta framkvæmdastjórnar Evrópusambandsins og yfirmann peningamála, er evran ekki lengur hvati til samruna heldur dragbítur.

Evran leikur efnahagskerfi ríkja grátt, jafnvel þeirra sem fylgja forskriftinni, samanber Finnland.

Eini möguleiki evrunnar til að virka sem gjaldmiðill er að stofnað verði til Stór-Evrópu, evrópsks sambandsríkis sem myndi starfa á líkum grunni og Bandaríkin. Í Evrópu er enginn áhugi á slíku sambandsríki og þess vegna á evran enga framtíð fyrir sér.

Evran ekki eins aðlaðandi og áður

Stefán einn öflugri en vinstriflokkarnir allir

Hvert mannsbarn veit að einkaframtakið ber höfuðábyrgð á hruninu. Einabankar og einkafyrirtæki keyrðu Ísland í þrot. Úr þessum staðreyndum ætti að vera hægt að búa til mikla pólitík. Það ætti að standa vinstriflokkunum næst að setja fram pólitíska valkosti byggða á gagnrýni á einkaframtakið og öfgar þess.

En vinstriflokkarnir stunda hvorki slíka gagnrýni né uppbyggilega pólitík. Þeir eru mest hvergi. Nema þegar tækifæri er til upphlaups í bloggheimum þar sem einhver tittlingaskítur er blásinn upp í tveggja til þriggja daga moldviðri sem ekkert skilur eftir sig.

Stefán Ólafsson, sem skrifar pólitík í hjáverkum, er einn og sér öflugri rýnir og beittari málafylgjumaður en samanlagðir vinstriflokkar. Samt fá stjórnmálaflokkar stórfé frá almenningi til að setja saman pólitík.

Flóttamenn og dauði fjölmenningar

Þjóðverjum þykir ekki verra að Danir leiði andófið gegn opnum landamærum Evrópu fyrir flóttamönnum. Spiegel segir frá ráðstöfunum Dana við að stemma stigu við flóttamannastraumi, m.a. hertar reglur um sameiningu flóttamannafjölskyldna og upptöku reiðufjár flóttamanna, sem fá allt greitt af danska ríkinu.

Færri flóttamenn sækja um hæli í Danmörku en Svíþjóð og Þýskalandi, segir Spieel vera áhrif harðari stefnu danskra yfirvalda.

Á meðan Danir herða reglur um viðtöku flóttamanna eru Þjóðverjar alveg búnir að snúa við blaðinu hvað áhrærir aðlögun þeirra. Til skamms tíma var í nafni fjölmenningar talið sjálfsagt að flóttamenn yrðu ríki í ríkinu, byggju í sér hverfum tíðkuðu sína siði og trú rétt eins og þeir væru heima hjá sér. Ekki lengur.

Jóhanna Wanka menntamálaráðherra Þýskalands segir það skyldu flóttamanna að aðlagast þýsku samfélagi. Samkvæmt FAZ felur það í sér að flóttamenn læri þýsku, skilji þýskt gildismat og fallist á grunnreglur þýsks samfélags.

Vesturlönd eru óðum að læra af þeirri reynslu að fjölmenning elur af sér haturshópa sem í nafni trúarmenningar múslíma ráðast með manndrápum á vestræn gildi.

Ósáttur við flóttamannasáttmála SÞ

Jónas bloggar, Birgitta ritskoðar

Jónas Kristjánsson bloggaði í hádeginu um að lærisveinar Hannesar Hólmsteins Gissurarsonar gerðu sig gildandi á spjallsvæði Pírata.

Birgittu Jónsdóttur höfuðpírata varð svo um að hún lokaði spjallsvæðinu síðdegis.

Píratar umbera aðeins sumar skoðanir.