Trú, firring og hagnaðarvon

Falstrúin á manngert veðurfar skapar viðskiptatækifæri. Í stjórnarsamstarfinu skaffa Vinstri grænir trúarbrögðin og sjálfstæðismenn eru meira en tilbúnir að taka þátt í leiknum - út á prósentur auðvitað.

Trúarsetningin um manngert veðurfar er orðin álíka viðurkennd og hugmyndin um himnaríki og helvíti á miðöldum.

Maðurinn er náttúruafurð rétt eins og veðurfarið. En það er hægt að gera sér mat úr trúgirni fólks. Kaþólska kirkjan kunni það á miðöldum og seldi aflátsbréf. Núna er verslað með mengunarkvóta.

  

21. öldin ekki bara um hagvöxt

Katrín vonar, Miðflokkurinn býður eina svarið

Katrín forsætis vonar að ekki verði lagður sæstrengur til Íslands. Sú von veikist ef 3. orkupakki ESB verður innleiddur í íslensk lög.

Orkupakkinn færir ESB forræði yfir hvernig raforkumálum skuli háttað hér á landi. 

Eina raunhæfa leiðin til að tryggja að ekki verði lagaður sæstrengur er að hafna orkupakkanum. Ágætis byrjun er að fresta orkupakkamálinu.

Miðflokksmenn einir í salnum

Málsvörn þjóðarhagsmuna er ekki málþóf

Miðflokksmenn standa fyrir málsvörn þjóðarhagsmuna í orkupakkamálinu. Þeir fara í einu og öllu eftir þingsköpum. Ótækt er að fjölmiðlar éti upp áróður andstæðinga nýja þjóðarflokksins um að hér sé á ferðinni málþóf.

Þingstörf geta haldið áfram eins og ekkert hafi í skorist, eins lengi og ríkisstjórnin geymir orkupakkann áfram ofan í skúffu - en hann hefur verið í geymslu frá 2009.

Orkupakkinn er ósvífin tilraun til að blekkja þjóðina. Góðu heilli sá Miðflokkurinn ekki ástæðu til að taka þátt í blekkingunni og beitir viðurkenndum aðferðum til að hindra meirihluta alþingis að ganga erinda lítils minnihluta þjóðarinnar.

 

„Væntanlega lengra þing“

Sterkir menn, veikir flokkar

Farage í Englandi, Le Pen í Frakklandi, Salvini á Ítalíu, Urban í Ungverjalandi og Kurz í Austurríki eru sigurvegarar ESB-kosninganna 2019. Allir til hægri og gagnrýnir á yfirþjóðlegt vald.

Miðjan hrynur í Evrópu samtímis sem fleiri kjósendur taka afstöðu en áður. Stórir meginflokkar, t.d. í Englandi og Frakklandi, eru rúnir trausti og standa á barmi glötunar.

Hamskiptin í Evrópu munu hafa áhrif á íslensk stjórnmál. Eftirspurn eftir afgerandi afstöðu eykst en þolinmæði fyrir moðsuðu minnkar.

„Svona er að upplifa tortímingu“

Orkupakkinn er Brexit-gildra XD

Siðir breytast og samfélagsgildi þróast. Stjórnmálaflokkar sem verða viðskila við kjörfylgi sitt lenda í tilvistarvanda.

Breski Íhaldsflokkurinn er að liðast í sundur sökum þess að þinglið og forysta varð viðskila við kjósendur, sem vildu fullfremja Brexit, úrsögn úr ESB. Ráðandi öfl í flokknum vildu halda Bretum í klóm ESB. Afleiðingin er öllum kunn, gamall flokkur er kominn á vonarvöl.

Í orkupakkanum stendur Sjálfstæðisflokkurinn frammi fyrir Brexit-gildru. Ef ráðandi öfl fá sínu framgengt, og orkupakkinn verður knúinn í gegn, heggur það í grunnfylgi flokksins.

Sjálfstæðisflokkurinn getur illa bætt sér upp þá kjósendahópa sem yfirgefa flokkinn vegna orkupakkans. Það er ekki líklegt að kjósendur Samfylkingar krossi við XD. Aftur gæti viðreisnarfylgi snúið heim, en það er varla upp í nös á ketti.

Um aldamótin var talað um tvo turna í íslenskum stjórnmálum. Yngri turninn, Samfylking, féll með brauki og bramli 2013. Sá eldri, Sjálfstæðisflokkur, fer brátt sömu leið. Evrópumál fella báða turnana. Forysta beggja flokka er ESB-sinnuð en almenningur ekki.

 

 

XD fagnar í Fréttabl., Styrmir á Austurvelli

90 ára afmælisgrein formanns Sjálfstæðisflokksins birtist í Fréttablaðinu. Morgunblaðið birti grein eftir Sigríði Andersen, sem var hrakin úr ríkisstjórninni til að þóknast vinstraliðinu.

Styrmir Gunnarsson, ritstjóri Morgunblaðsins lengstan hluta lýðveldissögunnar, flutti ávarp á Austurvelli þar sem framsali á náttúruauðlindum var mótmælt. Á meðan fönguðu bernskir flokksmenn í Valhöll.

Fréttablaðið túlkar sjónarmið auðmanna og hefur gert frá tímum útrásar. 90 ára afmælisgrein Bjarna Ben. í auðmannaútgáfunni er til marks um hvar fyrrum móðurflokkur íslenskra stjórnmála leitar athvarfs.

Morgunblaðið er eldra en Sjálfstæðisflokkurinn og hefur sótt fullveldi og varið sjálfstæði þjóðarinnar lengur og betur en flokkurinn. 

 

 

Þingmenn að „bregðast þjóð sinni“

Gulli utanríkis: EES er lélegur samningur

Það er einnig okk­ar mark­mið að koma á fullri fríversl­un með fisk en ESB hef­ur þrá­ast við að fella niður tolla á til­tekn­ar fiskaf­urðir,“ sagði Guðlaug­ur Þór í ræðu sinni.

Gulli utanríkis viðurkennir að EES er lélegur samningur.

En samt vill hann færa raforkumál Íslendinga undir EES/ESB.

Hér er eitthvað málum blandið.

 

Ekki tekist að lækka tollana

Sovét-maðurinn og Sjálfstæðisflokkurinn

Rússneska byltingin var tólf ára þegar Sjálfstæðisflokkurinn var stofnaður. Austur í Moskvu verður til hugmynd um nýja tegund, homo sovieticus. Sovét-maðurinn beygði sig undir marxísk lögmál og þáverandi handhafa sannleikans, Kremlarbændur.

Sjálfstæðisflokknum bar gæfa til hafna sovét-manninum sem fyrirmynd. Eins og Sigríður Andersen skrifar í Morgunblaðið í dag: 

Ég segi ætíð með nokkru stolti frá því að ég er alin upp á miklu sjálfstæðisheimili. Með því á ég við að virðing var borin fyrir sjálfstæði í tvennum skilningi en ekki ótengdum. Fyrir sjálfstæði einstaklingsins. Og fyrir sjálfstæði þjóðarinnar.

Hugmyndin um sovét-manninn féll með Sovétríkjunum fyrir tæpum 30 árum. Í staðinn kom fram ný tegund, Brussel-maðurinn, sem beygir sig fyrir sögulegri nauðhyggju um að þjóðríkið sé að falli komið og yfirstjórn djúpríkis embættismanna sé öllum fyrir bestu.

Sjálfstæðisflokkurinn kolféll fyrir Brussel-manninum. Ráðherrar og þingmenn flokksins, Sigríður Andersen undanskilin, keppast við að telja okkur trú um að reglur frá ESB séu forsenda fyrir þrifnaði íslensks samfélags. Hvort sem um er að ræða kjötinnflutning eða raforkumál; Brussel-maðurinn veit best.

Til lítils var barist gegn sovét-manninum þegar Brussel útgáfan er leidd til öndvegis sem fyrirmynd Sjálfstæðisflokksins.

Helgi Pírati: frestum orkupakkanum

Helgi Pírati á alþingi í dag: ,,sagði að best væri að fresta umræðunni fram á haust," segir á RÚV sem venjulega er í nánu sambandi við hugarástand Pírata.

Þegar jafnvel Píratar eru farnir að fatta að 3. orkupakkinn er feigðarflan er ástæða til að spyrja sig hvað dvelur þingflokk sjálfstæðismanna?

3. orkupakkinn var samþykktur af ESB 2009, já fyrir tíu árum. Hvað liggur á að Ísland samþykki pakkann vorið 2019? Hvers vegna má ekki bíða til hausts?

 

Ný stjórnmál nýrra tíma - Austurvöllur á morgun kl. 14

Flokkakerfið, að Miðflokknum undanskildum, svarar ekki kalli þjóðarinnar um að forræði yfir náttúruauðlindum landsins skuli vera á Íslandi en ekki í Brussel.

Miðflokkurinn hefur einn staðið vaktina fyrir sameign þjóðarinnar á orkuauðlindinni.

Á morgun kl. 14 gefst okkur tækifæri að mæta á Austurvöll og mótmæla gerræði flokkakerfis sem ekki gengur í takt við hagsmuni þjóðarinnar.

Mætum á Austurvöll og leggjum drög að stjórnmálum nýrra tíma.

Sendir Miðflokksmönnum baráttukveðjur