Málverkið í Seðlabanka og klaustursmóðursýkin

Einhverri tepru misbauð listaverk í Seðlabanka og var það fjarlægt. Einhverjir vældu yfir frjálslegri orðræðu á miðbæjarbar á síðasta ári og nú skal öllum ráðum beitt að berja á tjáningarfrelsinu á sjálfu alþingi.

Ef alþingi ætlar að kenna mönnum góða siði og háttu væri hægt að taka þá fyrir sem ljúga til sín prófum frá háskólum, brjóta af sér kynferðislega, stunda búðarhnupl og ala af sér misheppnuð börn.

En það er ekki hlutverk alþingis að siða menn til. Almenningur sendir fulltrúa sína á löggjafasamkomuna og þar hafa þingmenn umboð út kjörtímabilið. Punktur.

 

Ólafur og Karl fengu ekki ræðutíma

Lög gegn múslímasiðum

Handaband er siður sem til skamms tíma, áður en múslímar urðu fjölmennir á vesturlöndum, var ekki lögbundinn. Öll lög byggja á siðum en ekki verða allir siðir að lögum.

Danir setja handabandið í lög við veitingu ríkisborgararéttar til að andmæla fjölmenningunni sem gerir ráð fyrir að framandi siðir aðkomufólks séu jafnréttháir siðum viðtökulandsins.

Múslímskir karlmenn neita að taka í hönd kvenna sem eru þeim óviðkomandi. Í Danmörku fá þeir ekki lengur ríkisborgararétt nema fylgja dönskum siðum. 

Handaband orðið lögbundið

Samið til að bjarga andliti forystu verkó

Launþegar vilja ekki verkföll. Verkalýðshreyfingin er klofin, getur ekki samið sem ein heild. Félagsmenn flýja gamalgróin félög eins og VR og leita á náðir lágkostnaðarfélaga. Kallað er eftir útspili ríkisstjórnar, sem þó á ekki aðild að samningum um kaup og kjör á vinnumarkaði.

Róttæk forysta verkó málaði sig út í horn með stríðsyfirlýsingum í haust. Þrándur í Götu samninga eru hégómi einstakra formanna; VR, Eflingar og VA.

Samningar snúast um að bjarga andliti forystu verkó sem ekki er í neinum tengslum við félagsmenn sína og enn síður við efnahagslegan veruleika.

 

Þurfa að komast lengra

Vg í X-D, sem gengur í Vigdísi Hauks

Frjálslynda vinstrið, Samfylking og Viðreisn, segja Vinstri græna gengna í Sjálfstæðisflokkinn. Dagur braggastjóri segir aftur móðurflokkinn ,,genginn í Vigdísi Hauks."

Eljaraglettur eru jafngamlar pólitík. Ásakanir um að einhver gangi í annan flokk eru til marks um sérstaða flokkanna sé ekki jafn skýr og löngum áður annars vegar og hins vegar að flokkarnir eigi erfitt með að fóta sig í breyttu pólitísku landslagi.

Verkalýðsbarátta og kjaradeilur voru til skamms tíma sterkur vettvangur vinstriflokka til að gera sig gildandi. Nema, auðvitað, þegar vinstriflokkur sat í ríkisstjórn - en við það vænkaðist hagur þess sem utan stóð.

Samfylkingin er í minnihluta þessi misserin en fær engan meðbyr í kjaraumræðunni. Það er helst að sósíalistaflokkur Gunnars Smára njóti góðs af.

Utanríkismál voru annar málaflokkur sem skilgreindi stjórnmálaöfl. Ekki lengur. Samfylkingin situr uppi með Svarta-Pétur, ónýta ESB-umsókn, og þriðji orkupakkinn klýfur Sjálfstæðisflokkinn.

Pólitíska svellið verður hált næstu árin. Einn flokkur mun tæplega ganga í annan en flokkar sem ekki eru með bakland sitt á hreinu gætu lent í tilvistarkreppu.

Trump fær óvæntan stuðning minnihlutahóps

Þorri flóttamanna í Bandaríkjunum kemur frá Suður-Ameríku. Löng saga er fyrir fólksflutningum frá ríkjum Rómönsku-Ameríku norður á bóginn, bæði löglegum og ólöglegum.

Ný könnun sýnir að meirihluti Bandaríkjamanna af rómönskum uppruna styður Trump forseta í baráttu hans við flokka Demókrata að auka landamæraeftirlit. Stuðningurinn við forsetann rekinn til þess að hagur minnihlutahópsins er betri en áður.

Óheftur innflutningur ólöglegra innflytjenda grefur undan atvinnuöryggi þeirra sem búa löglega í Bandaríkjunum.

Sáttarboði Trumps hafnað um leið

RÚV: bara íslenska

Fyrsta frétt RÚV-Útvarps í aðalfréttatíma var að vefsíður opinberra stofnana væru ,,bara á íslensku." RÚV lítur á þjóðtunguna sem leiða sérvisku.

Fréttin var löng og ítarleg, studdist við tvo fjölmenningarsinna sem heimildir. Báðir töldu lélega þjónustu við útlendinga, Pólverja sérstaklega, að hafa ekki vefsíður á ensku. Pólverjar, á hinn bóginn, hafa ekki ensku sem móðurmál og sumir þeirra kunna ekkert í ensku.

Hvorki heimildamönnum RÚV né fréttmanninum datt í hug að velta þeirra spurning upp hvort útlendingarnir ættu ekki að læra íslensku, svona fyrst þeir eru hér á annað borð. ,,Bara íslenska" er of ómerkilegt tugumál, að áliti RÚV, til að ætla útlendingum hér á landi að læra. 

Peningarnir eru í verkó, Gunnar Smári þangað

Gunnar Smári Egilsson plægði akur auðmanna á meðan eitthvað var upp úr því að hafa. Eftir misheppnaðar tilraunir með sjálfstæðan rekstur sneri Gunnar Smári sér að verkalýðnum.

Smárinn stofnaði sósíalistaflokk og nýtti reynslu sína í fjölmiðlun að gera út fólk til áhrifa í félagsdauðri verkalýðshreyfingu.

Sósíalistaflokkur Gunnars Smára gerir kröfugerð verkó að sinni. Smárinn vinnur þó ekki ókeypis, hvorki fyrir auðmenn né verkó.

Kröfugerð SGS nú hluti af stefnu flokksins

Falsfréttir gera Trump að sönnum leiðtoga

Eftirspurn eftir falsfréttum um Trump er óseðjandi og margir um hituna að mæta eftirspurninni. Trump er í stríði við óvini fólksins, frjálslyndu vinstrielítuna og fjölmiðla þeirra. Í hvert sinn sem falsfrétt er afhjúpuð styrkist ímyndin af Trump sem leiðtoga.

Leiðtogaáhrif Trump ná langt út fyrir landsteina Bandaríkjanna. Trump er t.d. stórmál í íslenskum stjórnmálum miðað við umfang hans í hérlendum miðlum. Þá er hann tákn um uppreisn lýðhyggju á vesturlöndum gegn elítunni, góða fólkinu, sem leiðist afskipti almennings af stjórnmálum.

Alþjóðlegt aðdráttarafl Trump skilar sér ekki í trump-flokkum eða hreyfingum um allar jarðir heldur, til þess er Trump of banarískur. Áhrifin eru óbein. Staðbundin andófsöfl sækja sér innblástur í árangur Trump, fremur en að hann sé fyrirmynd.

Gulvestungar í Frakklandi er andóf lýðsins gegn elítunni. Franskur sagnfræðingur rekur andófið til byltingarinnar 1789 þegar þjóðin afþakkaði með blóðbaði einvaldan konung og forréttindastéttir aðals og kirkju.

Falsfréttir samtímans um leiðtogann í Hvíta húsinu eru endurvarp fyrri tíðar þegar kirkjan sagði almenningi hverju skyldi trúa. Fjölmiðlakirkjan útmálar Trump sem satan andspænis góða fólkinu. Almenningur sér frelsara gegn forréttindastéttinni.

 

Fréttin ekki nákvæm

Helga Vala, Ágúst og klaustursfokkið

Samfylkingin gerði Klaustursmálið að pólitísku fóðri á alþingi. Ágúst Ólafur þingmaður gerði kröfu um að forsætisnefnd alþingis fjallaði um drykkjurausið á Klaustri. Nokkrum dögum síðar kemur á daginn Ágúst Ólafur grýtir steinum úr glerhýsi.

Helga Vala Helgadóttir formaður stjórnskipunar- og eftirlitsnefndar alþingis tók við keflinu af Ágústi Ólafi.

Helga Vala beitir sér fyrir yfirheyrslum þingnefndarinnar, þar sem hún gegnir formennsku, yfir Klaustursorðræðunni. Samkvæmt Helgu Völu fer nánast sama dag sú saga á flug að hún sé haldin stelsýki og hafi verið gripin við stuld.

Kjaftasagan berst Helgu Völu furðufljótt til eyrna, eða því sem næst sama dag og sögunni var ýtt úr vör, - segir Helga Vala.

Kjaftasögur ferðast mishratt og þessi fór undraskjótt um landið og miðin, ef trúa má Helgu Völu.

Aðgerðir Helgu Völu voru líka snöggar. Hún pantar yfirlýsingu frá Högum og aðra frá lögreglunni. Valdastaða Helgu Völu er slík að yfirlýsingarnar eru útbúnar nánast á færibandi.

En hvað segja svona yfirlýsingar? Ef maður er sakaður um ofdrykkju hreinsar hann sig af áburðinum með því að framvísa vottorði frá ÁTVR um hófleg áfengiskaup?

Af ástæðum sem Helga Vala ein veit ákvað hún að rjúka upp til handa og fóta vegna söguburðar. Flest venjulegt fólk lætur kjaftasögur sem vind um eyru þjóta. Á berangri umræðunnar deyja þær út. Viðbrögð Helgu Völu eru stórskrítin, hvernig sem á málið er litið.

Brexit klýfur stærstu stjórnmálaflokka Bretlands

Óbreyttir þingmenn hóta formanni breska Verkamannaflokksins úrsögn ef hann styður tillögu um nýja þjóðaratkvæðagreiðslu um úrsögn Bretlands úr ESB, Brexit. Aðstoðarráðherrar hóta May forsætisráðherra og formanni Íhaldsflokksins uppreisn ef hún lofar ekki að semja um úrsögn.

Stærstu stjórnmálaflokkar Bretlands eru klofnir í herðar niður vegna lýðræðislegrar niðurstöðu þjóðaratkvæðagreiðslu um að bresku þjóðinni sé betur borgið utan ESB en innan.

Fram að Brexit var fyrirmyndarríki lýðræðisstjórnmála í Evrópu. Það orðspor er að engu orðið. Hvernig sem fer fyrir Brexit, og breskum stjórnmálum almennt, er deginum ljósara að Evrópusambandið og lýðræðið eru andstæður.

May: Tölum um Brexit