Alþjóðahagkerfið er á dópi ódýrra peninga

Í kreppunni 2008 ákváðu stærstu seðlabankar heims, í Bandaríkjunum og Evrópu, að veita ógrynni fjár án vaxta að láni. Efnahagskerfi margra ríkja urðu háð ódýru lánsfé sem átti að koma í veg fyrir verðhjöðnun.

Fyrr heldur en seinna lætur verðbólga á sér kræla og vextir hækka. Atvinnustarfsemi og hlutabréf sem eru háð ódýru fjármagni munu láta á sjá.

Góðu fréttirnar eru þær að seðlabanki Íslands tók ekki þátt í leiknum. Ísland býr við eðlilega vexti enda krónan hvað stöðugasti gjaldmiðillinn á veraldarvísu.

Herði peningastefnuna hægum skrefum

Ekkert eitur, eintómt rugl

Breski blaðamaðurinn Robert Fisk heimsótti vettvang meintrar eiturefnaárásar í Sýrlandi og fann hvorki ummerki né vitni að eiturefnaárás. 

Eiturefnaárásin er líklega samstofna og gjöreyðingarvopn Saddam Hussein í Írak, skáldskapur í Washington og London.

Ríki sem réttlæta stríðsaðgerðir með skáldskap enda í tómu rugli.

„Ég ruglast ekki í ríminu“

Kynjað atvinnulíf: konur ekki í flugvirkjun, karlar ekki í hjúkrun

Aðeins fjórar konur eru í 560 manna stéttarfélagi flugvirkja. Karlar fara ekki í hjúkrun, jafnvel þótt reynt sé að kaupa þá til þess. Aftur yfirtaka konur kennslu í leikskólum, grunnskólum og framhaldsskólum. Konur eru 80 prósent kennara.

Menntun og störf fólks eru valfrjáls. Með frjálsu vali einstaklinga verða til kvennastéttir og karlastéttir en vitanlega einnig blandaðar starfsstéttir beggja kynja. Ekki er hægt að tala um mismunun í þessu samhengi eða ,,glerþak". Fólk velur sér störf sem einstaklingar en ekki hópsálir.

Opin spurning er hvort og þá í hve miklum mæli ríkisvaldið ætti að skipta sér af niðurstöðu sem verður til við frjálst val. Einna helst kæmi það til greina í skólamálum.

Ef drengir fá aðeins kvenkynskennara er hætt við að þeir, stúlkur raunar líka, fái þá ranghugmynd að menntun sé aðeins fyrir annað kynið. Þá er augljóst að mæðrahyggja, að ekki sé talað um mæðraveldi, verði ráðandi í skólastarfi. Hvorki stúlkum né drengjum yrði það hollt.

RÚV hælbítur Sigmund Davíð enn og aftur

Stærsti stjórnmálamaður landsins á RÚV er Sigmundur Davíð Gunnlaugsson. Fjölmiðillinn grípur hvert tækifæri til að framleiða neikvæðar fréttir um formann Miðflokksins.

Aðeins einn annar stjórnmálamaður í víðri veröld kemst í hálfkvist við þráhyggjuáráttu RÚV gagnvart Sigmundi Davíð. Það er Donald Trump Bandaríkjaforseti.

Á meðan RÚV hagar sér svona er Sigmundur Davíð í ágætisfærum að verða valdamesti maður landsins á ný. 

Kom ekki nálægt Veggnum.is

Macron: borgarstríð í Evrópu

Borgarastríð geisar í Evrópu, segir forseti Frakklands, þar sem lýðræðissinnar takast á við valdhyggju í ýmsum útgáfum.

Lýðræðissinnar eru Vestur-Evrópa í orðaforða Macron forseta en valdhyggja tröllríður Austur-Evrópu.

Macron ásamt leiðtogum Bretlands og Bandaríkjanna, fyrirskipaði eldflaugaárás á Sýrland fyrir fáeinum dögum. Það var hrein og klár valdhyggja. Árásin var hvorki í umboði þjóðþinga né alþjóðastofnana. Jafnvel Nató gaf ekki grænt ljós fyrr en eftir að allt var um garð gengið.

Valdhyggjan leynist víða.

Árásin til að verja heiður alþjóðasamfélagsins

Sýrlenskt blóð smurning í íslenskar vinstrierjur

Um 400 þúsund eru taldir fallnir í stríðinu í Sýrlandi. Blóð þeirra föllnu smyr Nató-flokkurinn Samfylkingin á stjórnarflokkinn Vinstri græna til að þykjast hótinu betri.

Nató-ríkin, með Bandaríkin fremst í flokki, settu sér markmið að steypa Assad Sýrlandsforseta af stóli, líkt og áður Hussein í Írak og Gadaffi í Líbýu. Uppreisnarhópar og málaliðar, sáu um framkvæmdina en Nató-ríkin studdu með peningum og vopnum. Þegar Assad var kominn að fótum fram urðu Rússar bjargvættur og stríðsgæfan snerist forsetanum í lið.

Það má ræða og túlka Sýrlandsstríðið á ólíkum forsendum. Trúmál kom við sögu og einnig erfiðleikar arabískra samfélaga að aðlagast breyttum heimi eftir lok kalda stríðsins.

En aumkunarverðasta sjónarhornið er Samfylkingarinnar. Flokkurinn er genetískur Nató-dindill en kemst núna að þeirri niðurstöðu að ,,hernaðaríhlutun" sé af hinu illa. Er það orðið stefnumál Samfylkingar að Ísland gangi úr Nató?

Hernaðaríhlutun engu skilað

Kynjafræði: fordómar klæddir í fræði

Karlar og konur eru líffræðilega ólík. Engin félagsfræði, eða kynjafræði, breytir því. Það má ræða fram og tilbaka hvaða áhrif líffræðilegur breytileiki hefur í för með sér. En það eru fordómar en ekki fræði að segja, eins og varaþingmaður Vinstri grænna: ,,mik­il­vægt sé að vinna gegn úr­elt­um hug­mynd­um um að eðli og hlut­verk karla og kvenna sé ólíkt." 

Líffræðilegur breytileiki er ekki ,,úrelt hugmynd", nema þingmaðurinn vilji afsetja þróunarkenningu Darwins.

Kynjafræði er aðeins annað nafn á hugmyndafræði femínisma. Það hljómar undarlega, svo ekki sé meira sagt, að alþingi ætli að gera kynjafræði að skyldufagi þegar 80 prósent kennara eru konur. Hvers vegna ekki að ganga hreint til verks og banna karlkennara? Og til að fullkomna verkið; banna stráka í skólum.

Vill að kynjafræði verði skyldufag

Facebooklýðræði

Facebook er verðmætari eigendum sínum eftir því sem almenningur nota samfélagsmiðilinn í meira mæli. En miðillinn lætur ekki við þar sitja að skaffa auglýsendum aðgang að almenningi heldur útvega stjórnmálaflokkum atkvæði.

Tilraun Facebook til að selja þjónustu sína íslenskum stjórnmálaflokkum þarf að upplýsa til fulls og draga rétta lærdóma af.

Það verður seint sagt um Facebook og aðra samfélagsmiðla að þeir bæti umræðuhefðina - þótti fleiri komist að og geti látið ljós sitt skína. Við ættum að hafa varann á okkur þegar miðillinn býðst til að ,,liðka fyrir lýðræðinu" - gegn greiðslu, vitanlega.

Hver var tilgangurinn með hnappinum?

Vestræn mannúð stýrist af reiðibylgjum

Vestræn ríki skutu eldflaugum á Sýrland til að sefa reiði á samfélagsmiðlum vegna meintrar eiturefnaárásar sýrlenskra stjórnvalda á íbúa landsins. Reiðibylgjur samfélagsmiðla og fjölmiðla eru helsta aðferðin til að fá vestræn ríki til aðgerða.

Rétt fyrir meinta eiturefnaárás reyndu hryðjuverkasamtök Hamas á Gasa að efna til reiðibylgju gegn Ísrael með því að fórna palestínskum unglingum í uppþotum. En vestræn mannúð ræður aðeins við eina reiðibylgju í einu. Eftir atburðina í Sýrlandi varð ekkert úr sviðsettu uppþotunum.

Það er svo önnur umræða hvort mannúð verði nokkru sinni rétt tjáð með sprengjum. 

Finna fyrir reiði þingmanna

Heiminum er ekki stjórnað frá Reykjavík, Logi

Trump Bandaríkjaforseti ákvað að sprengja Sýrland og fékk Breta og Frakka í lið með sér. Yfirlýstur tilgangur var að sprengja Sýrland svo að Sýrlendingar sprengdu ekki landið sitt sjálfir - en það hafa þeir dundað sér við í sjö ár. Barnslega einfalt og iðulega kennt við vestrænt frjálslyndi.

Logi Einarsson formaður Samfylkingar og allur þingflokkur Pírata á erfitt með að skilja heimspólitíkina. Loga og Pírötum er fyrirmunað að skilja hvers vegna Ísland var ekki haft með í ráðum.

Í stað þess að kíkja á landakort og rifja upp sögu Íslands, sem hvorugt er með neina tengingu við Sýrland, gera Logi og Píratar stórmál úr orðfæri utanríkisráðherra annars vegar og hins vegar forsætisráðherra.

Guðlaugur Þór utanríkis sagði árásina ,,skiljanlega" en Katrín forsætis sagði hana ,,viðbúna". Loga finnst ótækt að ráðherrarnir noti ekki sama orðalagið.

En, sem sagt, Logi, ríkisstjórn Íslands stjórnar ekki ákvörðunum í Washington, London og París. Orðin sem Guðlaugur Þór og Katrín notuðu gefa til kynna að þau lærðu eitthvað í barnaskóla og hafa hugmynd um hvernig heimurinn virkar. Ekki verður það sama sagt um Loga og Pírata. 

Ótímabærar loftárásir