CO2 af mannavöldum breytir ekki loftslagi

Mennskur koltvísýringur(C02) er innan við 4 prósent af koltvísýringi andrúmsloftsins. Náttúran ber ábyrgð á 96 prósentum efnisins. Í ofanálag er koltvísýringur ekki nema örlítið brot af svokölluðum gróðurhúsalofttegundum.

Spár um hlýnun loftslags af mannavöldum byggja ýmist á ófullkomnum gögnum eða lélegri forritun, oftast hvorutveggja, segir japanski loftslagsvísindamaðurinn Mototaka Nakamura.

Náttúran breytir loftslagi, ekki maðurinn. Grænlandsjökull var t.d. minni fyrir hálfu árþúsundi en hann er í dag.

Hlýnun af mannavöldum er fyrst og síðast pólitísk hugmyndafræði. 

 

Samkomubönn hafa engin áhrif á hlýnandi loftslag

Boðaðri kreppu aflýst

Í byrjun ágúst birtust ársfjórðungstölur hagkerfa og sýndu hressilegan samdrátt vegna farsóttar. Viku seinna trítla inn hagtölur fyrir júlí og segja allt aðra sögu. Útflutningur Þýskalands eykst meira en hann hefur gert í 30 ár, um tæp 15 prósent.

Sérfræðingur Telegraph í viðskiptum segir breska hagkerfið taka við sér og biður þá svartsýnu að anda í poka.

Enn er of snemmt að aflýsa formlega margboðaðri kórónukreppu. Fyrirsjáanlega munu sumar atvinnugreinar, t.d. ferðaþjónusta, glíma við erfiðleika næstu mánuði.

En það er ekki bannað að vera bjartsýnn.

Útflutningsgreinar líða fyrir samdrátt erlendis

Veðurfréttir Grétu

Á bls. 20 í Mogga dagsins segir af veðri:

Nýliðinn júlí var fremur kaldur miðað við það sem algengast hefur verið á síðari árum, samkvæmt tíðarfarsyfirliti Veðurstofunnar. Árið í heild hefur til þessa verið kaldara en meðaltal síðustu 10 ára.

Engin hlýnun sem sagt. Borgaralegar útgáfur eru smátt og smátt að átta sig á að glópahlýnunin er mest glópska og svindl en minnst hlýnun, t.d. þýska útgáfan Die Welt.

Hvað gera glópar þá? Jú, bíða eftir nýju handriti, - eins og Gréta Thunberg.

 

Þróunarhjálp Samherja í Namibíu

Samherji bjó til verðmæti í Namibíu, störf og sjávarafurðir. Þetta má kalla þróunarhjálp en er auðvitað fyrst og fremst viðskipti.

Arðrán er pólitískt hugtak, ættað frá Karl Marx. Öll launavinna, þar sem einn selur vinnu sína en annar kaupir, er arðrán í ströngum marxískum skilningi. Allir launþegar eru þar með arðrændir, sem sýnir að hugtakið er merkingarleysa.

RÚV tók að sér að draga upp þá mynd af starfsemi Samherja í Namibíu að þar færi fram arðrán. Öll umfjöllun RÚV byggði á einni heimild sem, vægt til orða tekið, er ekki trúverðug. 

Í Namibíu er spilling, um það er engum blöðum að fletta. En Samherji er hvorki upphafið né endirinn á þeirri spillingu. Saga Samherja í Namibíu er um viðskipti, sem urðu bitbein og súrnuðu.

Hafna ásökunum um arðrán

Veiruþreytan og unga fólkið

Unga fólkið smitast öðrum fremur í seinni bylgju veirunnar. Það er háttur ungmenna að kássast upp á hvert annað, hluti af líffræðinni.

Veiruþreyta er aftur farin að gera vart við sig. Beggja vegna Atlantsála eru mótmæli og hér heima er pirringur í loftinu.

Áhlaupið gegn veirunni, sem nú stendur yfir, verður líklega það síðasta. Ef ekki tekst að hemja farsóttina á næstu 3-5 vikum verður veiruþreytan varúðinni yfirsterkari.

Unga fólkið verður síður veikt en þeir sem eldri eru. Það er tvíbent að grípa til hræðsluáróðurs gagnvart ungmennum. Eðlilega hegðun ætti ekki að gera tortryggilega. Ungmenni á tíma samfélagsmiðla þurfa fremur meira en minna af félagslegu samneyti. 

Varaáætlun, sem líklegt er að yfirvöld grípi til, bæði hér og erlendis, er að leyfa veirunni að geisa án stórtækra varúðarráðstafana en verja þá sem veikir eru fyrir og aldraða.

Dragist seinni bylgjan fram undir jól verður varaáætlun sett í framkvæmd, ef að líkum lætur.

Eitt atriði í viðbót. Vestur í Bandaríkjunum er pólitískur áhugi að viðhalda veiruótta fram yfir forsetakosningarnar í byrjun nóvember. Veirufréttir litast nokkuð af þeim áhuga.  

Sama undirtegund náð að dreifa sér víða

Öllu aflýst, nema ferðaþjónustu - gengur ekki

Meira og minna öllum hátíðum og viðburðum innanlands næstu vikur er aflýst vegna kórónuveirunnar. Áhöld eru um hvort skólar hefjist um miðjan mánuðinn.

Þegar veirusmit eru takmörkuð, eða upprætt, innanlands, kemur meira af þeim erlendis frá, með íslenskum ferðalöngum og erlendum.

Augljóst er að setja þarf takmarkanir á ferðalög til og frá landinu. Ein leið er að gera þau dýrari, með hækkun á smitgjaldi. Önnur að setja kvóta á lendingar flugvéla. Blanda af báðum aðferðum kemur til greina.

Í öllu falli verða stjórnvöld að sýna að þau taki málið  föstum tökum. Það gengur ekki að aflýsa öllu nema ferðaþjónustunni. Það er samhengi á milli þess hvenær höftum innanlands verður aflétt og umferðaþunga á Keflavíkurflugvelli.

Engar vísbendingar enn um afbókanir

Þríeykið baðst lausnar - enginn hlustaði

Þórólfur sótti, fyrir hönd þríeykisins, baðst lausnar í morgun í spjallþætti á RÚV. Farsóttin er orðin langtímamál, með pólitísk og efnahagsleg álitamál, sagði Þórólfur, og taldi ekki forsendur fyrir neyðarstjórn þríeykisins.

Neyðarstjórnin er óformleg og því geta Þórólfur, Alma og Víðir ekki sagt formlega af sér sem þríeyki. Engu að síður: þríeykið telur eðlilega að til lengri tíma litið sé óæskilegt að embættismenn skeri úr um samfélagsleg álitamál. Það er hlutverk kjörinna yfirvalda.

Þannig vill til að við höfum nú þegar arftaka neyðarstjórnunar þríeykisins. Það vill svo til að hér er starfandi ríkisstjórn með meirihluta á alþingi. Hlutverk ríkisstjórna er að taka á efnahagslegum og pólitískum álitamálum.

Sumarfríið er búið, Katrín, Bjarni og Sigurður Ingi.

Of snemmt að fagna árangri aðgerða

Trump gerir vinstrimenn herskáa kapítalista

Trump setur alþjóðlegum risafyrirtækjum stólinn fyrir dyrnar. Ekki aðeins fyrirtækjum kínverskrar ættar heldur einnig bandarískum sem hyggjast flytja störf úr landi.

Frjálslyndir og vinstrimenn koma alþjóðlegu risunum til varnar. Sama er uppi á teningunum þegar Trump dregur úr hernaði í miðausturlöndum, kallar bandarískt herlið frá Evrópu. Vinstrimenn og frjálslyndir brjálast, vilja meiri hernað og vígtól.

Hér áður voru hægrimenn herskáir og bestu vinir stórfyrirtækja. Vinstrimenn voru vinir litla mannsins og kusu frið fremur en stríð. Nú eru endaskipti höfð á hlutunum. Morgunblaðið birtir leiðara sem gagnrýnir alþjóðleg stórfyrirtæki fyrir að sitja yfir hlut lítilmagnans. Alþjóðavæddir vinstrimenn telja aftur sáluhjálp að rafrænir risar stjórni heiminum.

Herskár kapítalismi vinstrimanna er til marks um umpólun stjórnmálanna. Hægrimenn verða þjóðlegir og íhaldssamir og meðvitaðir um samfélagsleg gildi. Vinstrimenn gerast talsmenn alþjóðakapítalisma sem breytir heiminum í stafrænt kínverskt Disneyland.

Það þurfti Trump til.

Hvað fleira gæti Trump bannað?

Veirusamfélagið og túnið heima

Fjarvinna, fjarnám, fjarlægð milli manna, færri utanlandsferðir, fólksflótti frá þéttbýli í dreifbýli, háttvísi, hreinlæti og ríkari kröfur um mannasiði eru líkleg langtímaáhrif farsóttarinnar, sem ýmist er kenndi við Kína eða COVID-19, og ætlar að verða þrálát.

Pólitísk áhrif verða þau að frjálslyndi dvínar og íhaldssemi eykst. Menn halda sig innan um sína líka. Traust milli vina og kunningja eykst en minnkar til þeirra sem eru framandi.

Fyrirbæri eins og borgarlínan, sem gengur út á að hrúga sem flestum á sömu torfuna og flytja á milli staða í gripalestum, eru dauðadæmd. Krafan er aukin fjarlægð milli manna ekki múgmyndun.

Veröldin er á réttri leið. Öfgafrjálslyndi síðustu áratuga, frá hippamenningunni að telja, var gengin sér til húðar. Farsóttin hraðar breytingum sem þegar voru í kortunum.

Óvíst með töfralausn

Enginn sýktur á hópsmituðu Akranesi

Einn af hverjum tíu Skagamönnum var skimaður fyrir farsóttinni og enginn reyndist smitaður. Fyrir viku var tilkynnt um hópsmit á Akranesi.

Dálítið mótsagnakennt.

Ein túlkun er að smitvarnir Skagamanna séu öflugar. Önnur að hópurinn á Akranesi sem smitaðist, erlendir starfsmenn, sé ekki í smitfæri við aðra bæjarbúa.

Í öllu falli er ástæða til að draga andann djúpt og oftúlka ekki smitfréttir. Yfirvegun er skynsamlegri en ofsahræðsla.

 

 

Ísland næst á eftir Svíþjóð