Ísland er á engilsaxnesku áhrifasvæði, Katrín

Útganga Breta úr ESB, Brexit, breytir stöðu Íslands á alþjóðavísu. Heimssýn Breta snýst ekki lengur um meginland Evrópu heldur hverfist hún um náin tengsl við Bandaríkin.

Þýska útgáfan Die Welt myndskreytir nýja stöðu á norðurslóðum. Ísland, Grænland og Færeyjar eru brúin á milli Bandaríkjanna og Bretlands.

Rússland, og þar áður Sovétríkin, gera sig gildandi á norðurslóðum. Kínverjar eru nýliðar sem þarf að hafa auga með.

Aftur er morgunljóst að Evrópusambandið er á útleið sem valdaafl á norðurslóðum. 

Verkefni íslenskra stjórnvalda næstu ára er að losa Ísland úr viðjum ESB. 

Samningurinn, sem við sitjum uppi með, EES, er frá tíunda áratug síðustu aldar, þegar ESB ætlaði sér stóra hluti í okkar heimshluta, með Bretland, Noreg og Ísland innanborðs. En þegar Norðmenn afþökkuðu aðild, Ísland lét samfylkingarumsóknina deyja drottni sínum og Bretland gekk út eru forsendur gjörbreyttar.

Katrín forsætis er vonandi nógu raunsæ til að sjá hvert stefnir og tala í takt við hagsmuni Íslands. Kannski verða henni fyrirgefin mistökin frá 16. júlí 2009.

 

Mikilvægt að forðast hernað á norðurslóðum

Biden í kjallaranum, húsbóndavald Trump

Mótframbjóðandi Tump Bandaríkjaforseta, Joe Biden, kallaður Linku-Jón, er geymdur ofan í kjallara enda ekki treyst til annars en að fara með nafnið sitt og varla það. Á meðan grafa farsótt, menningarstríð og efnahagsþrengingar undan fylgi Trump.

Trump tístir þeirri hugmynd að fresta forsetakosningunum. Snjallt útspil með þríþættar afleiðingar.

Í fyrsta lagi verður Biden svældur úr kjallaranum til andsvara. Hann kemur hikandi, hóstandi og stamandi og segir að víst verði kosningar að fara fram á tilsettum tíma. Þögn yrði túlkuð sem samþykki.

Í öðru lagi slær Trump spilin úr höndum þeirra sem gera hvað mest úr farsóttinni til að koma höggi á forsetann. Nái móðursýkin vegna farsóttar og glæpaöldu í skjóli Svartra lífa meiri hæðum er komið neyðarástand sem réttlætir frestun kosninga.

Í þriðja lagi sýnir forsetinn myndugleika sem hrífur þá með sér er telja lýðræðið komið í ógöngur. Í Bandaríkjunum, og víðar á vesturlöndum, er lýðræði óðum að komast á stig óreiðu. Á tímum óreiðu er góðlynt húsbóndavald þegið með þökkum.

 

Trump vill fresta kosningunum

Farsóttin er veiran plús pólitík

Á meðan farsóttin kennd við COVID-19 geisar eru minni líkur á endurkjöri Trump 3. nóvember. Fyrir forsetann er bráðnauðsynlegt að farsóttin gangi yfir og/eða að mótefni verði aðgengilegt.

Að sama skapi eru andstæðingar Trump áfram um að halda lífi í farsóttarógninni sem allra lengst.

Vísindin vita enn fremur lítið. Deilt er um hvort önnur bylgja sé á ferðinni eða að sú fyrsta sé enn að rísa. Ófyrirséðar afleiðingar dúkka upp, t.d. fækkun fyrirburafæðinga, og betra efnahagsástand en fyrst var ætlað.

Þegar fárið sjatnar og hægt að draga lærdóm af, sem vit er í, verða forsetakosningarnar löngu afstaðnar. 

Tekur í sama streng og sonurinn

Píratafylgið og vinstrióreiða

Svört líf skipta máli, Trump-andúð og vinstrifasismi eru erlend áhrif á íslensk stjórnmál þetta sumarið. Vinstrimenn og frjálslyndir eru einkum móttækilegir fyrir erlendum áhrifum enda skortir þá þjóðlega kjölfestu.

Fylgi Pírata tekur stökk í könnun miðsumars og er það mælikvarði á velgengni innfluttu óreiðunnar.

Á meðan heimatilbúin upplausnarmál Samfylkingar voru í forgrunni síðvetrar fékk sá flokkur nokkurn meðbyr í mælingum. Nú eru það Píratar. Ves fyrir sjóræningjana að forsetakosningarnar í Bandaríkjunum verða löngu yfirstaðnar þegar gengið verður til þingkosninga á Fróni.

Píratar með næstmest fylgi

Hagvöxtur eftir farsótt

Spænska veikin var síðasta skæða farsóttin sem reið yfir vesturlönd 1918-1920. Um 500 milljónir sýktust og einn af hverjum tíu dó, að talið er. Bullandi hagvöxtur var í áratug eftir spænsku veikina.

Sumir, t.d. Jeremy Warner á Telegraph, spá viðlíka hagvexti eftir Kínasóttina sem nú tröllríður heimsbyggðinni.

Við ættum þó að fara varlega. Þrælgóðum þriðja áratug síðustu aldar lauk með kauphallarhruni í New York haustið 1929. Heimskreppa, fasismi og heimsstríð sigldu í kjölfarið.

Að vísu erum við að taka út þessi misserin frjálslyndan fórnarlambafasisma og hann endist trauðla fram yfir forsetakosningarnar í Bandaríkjunum í haust. Heimsstríð er ekki yfirvofandi. Þjóðir heims eldast og með aldri kemur viska. 

Þá er aðeins eftir hagvöxtur sem einatt er hringrás með innbyggðri kreppu. Alveg hægt að lifa við það. 

Vísbending í krönum

Skólahald eða ferðaþjónusta

Grunn- og framhaldsskólar hefja haustönn um miðjan ágúst. Samkomubann á 500 manns og fleiri gildir til 18. ágúst vegna farsóttar. Smitið kemur erlendis frá. 

Hagsmunir ungmenna ættu að ganga fyrir ferðamönnum, bæði Íslendingum sem fara til útlanda og erlendum ferðamönnum sem sækja landið heim.

Lok, lok og læs á Keflavíkurflugvelli er rétta niðurstaðan.

Tilslökunum takmarkana frestað um tvær vikur

Ragnar Reykás-verkó

Flugfreyjur höfnuðu kjarasamningi afgerandi 8. júlí. Innan við þrem vikum síðar samþykkja flugfreyjur sama samning, líka afgerandi.

Ragnar Reykás var fígúra í skemmtiþætti, þekkt fyrir að skipta algerlega um skoðun í einu og sama fréttaviðtalinu.

Flugfreyjur héldu, líkt og Sólveig Anna í Eflingu og Ragnar Þór í VR, að hægt væri að breyta heiminum með orðum. Að með því að segja að Icelandair væri ekki nærri gjaldþrota, og hafna kjarasamningi, væri hægt að halda vinnunni og sækja fram til betri kjara.

En sumar staðreyndir lífsins breytast ekki með orðum. Prik til flugfreyja að þær þurftu ekki nema þrjár vikur til að skilja efnahagslegan veruleika. Sólveig Anna og Ragnar Þór eru enn í eyðimörk óskhyggjunnar.

Flugfreyjur samþykktu kjarasamning

Hikandi afdráttarleysi Ragnars Þórs

Formaður VR boðar afdráttarlaust svar við ósk um að hann biðjist afsökunar á því að saka tvo nafngreinda menn um umboðssvik. En hann þarf samt að hugsa málið. Hikandi afdráttarleysi er mótsögn. Eins og málflutningur Ragnars Þórs.

Í viðtalinu í meðfylgjandi frétt er Ragnar Þór á hröðum flótta. Hann segir: ,,Eins og ég hef marg­bent á er verið að benda á ákveðnar grun­semd­ir og óeðli­leg tengsl." Já, Ragnar Þór, þú bendir á eigin ábendingar. Svona eins og þeir sem lifa í hugarheimi laustengdum veruleikanum.

Ragnar Þór vill kalla ,,eft­ir­litsaðila lög­gjaf­ans" að málinu. Hvað umboðsmaður alþingis á að gera í málefnum lífeyrissjóða er á huldu. 

Ragnar Þór er í grunninn pólitískur aðgerðasinni. Hann skilur ekki að formennska í stéttarfélagi er annað hlutverk en að gera hávaða.

 

„Svarið verður mjög afdráttarlaust“

Vestræn mannréttindi og múslímsk eru ósamrýmanleg

Þrjú múslímaríki beittu neitunarvaldi gegn Ingibjörgu Sólrúnu sem mannréttindastjóra ÖSE. Í uppgjörsviðtali í Mogga er ekki einu orði vikið að reginmun vestrænna mannréttinda og múslímskra.

Kjarni málsins er að vestræn mannréttindi eru veraldleg, óháð trúarbrögðum, en þau múslímsku eru byggð á helgiriti, Kóran. Vestræn mannréttindi gilda einfaldlega ekki í múslímaríkjum.

Vestræn mannréttindi byggja á mannréttindayfirlýsingu Sameinuðu þjóðanna frá 1948. Samtök múslímaríkja viðurkenna ekki þau mannréttindi og gáfu út, árið 1990, sína eigin mannréttindaskrá, Kairó-yfirlýsinguna. 

Múslímsk mannréttindi eru fyrir múslíma, karlstýrða trúarmenningu. Ingibjörg Sólrún lætur eins og vestræn mannréttindi gildi í múslímaríkjum. Það heitir að stinga höfðinu í sandinn.

Hafa aðrar hugmyndir um lýðræði

Nóbelshafi: Trump sigraði frjálslynda alþjóðahyggju

Alþjóðahyggja, með frjálsa verslun sem hornstein, var röng, viðurkennir Paul Krugman nóbelsverðlaunahafi í hagfræði og páfi frjálslynds rétttrúnaðar í hagfræði síðustu þriggja áratuga.

Í ítarlegri samantekt á sinnaskiptum Krugman fer ekki mikið fyrir þeirri játningu að sigur Trump 2016 afhjúpaði glópsku aljóðahyggjunnar. Trump sigraði með atkvæðum lág- og millistétta á meginlandi Ameríku. Þar missti fólk vinnuna unnvörpum, þegar framleiðslan var flutt til Mexíkó og Kína. Frjálslynda vinstrið, á austur- og vesturströnd Bandaríkjanna, kaus Clinton.

Frjálslyndisstefnan verður til á 19. öld og ber fram pólitísk réttindi borgara gegn erfðarétti aðalsins sem öllu réði í Evrópu frá miðöldum. Frjálslyndið bjó til heiminn eins og við þekkjum hann en er núna að ganga af okkur dauðum, segir dálkahöfundur Telegraph.

Frjálslyndi gerir ekki ráð fyrir samfélagi, aðeins réttindum einstaklinga. Sérhver einstaklingur á að geta valsað um heiminn og krafist mannréttinda fyrir sig og sína. Tveir hópar hafa einkum nýtt sér öfgafrjálslyndið. Alþjóðlegir sérfræðingar, oftast vestrænir, annars vegar og hins vegar efnahagslegir flóttamenn frá ríkjum þriðja heimsins.

Og hverjir hafa tapað á alþjóðavæddu frjálslyndi? Jú, Jón og Gunna, hversdagsfólkið, sem bæði tapar vinnunni og samfélaginu sínu.

Trump vildi endurheimta töpuð störf og glatað samfélag. Hann er óvinur öfgafrjálslyndis sem óðum tapar trúverðugleika. Krugman viðurkennir mistök frjálslyndrar hagfræði. Rithöfundar og menntamenn úr röðum frjálslyndra kvarta undan oki pólitíska rétttrúnaðarins sem í nafni mannréttinda kæfir önnur sjónarmið.

Árið 2020 hefur Trump þegar sigrað. Fjórum árum eftir sigurinn kveikja frjálslyndir á perunni. Ekki beittustu hnífarnir í skúffunni, frjálslyndir. 

 

100 dagar í forsetakosningar