Orð og veruleiki eldgoss

,,Ræfilslegt" og ,,pínulítið" eru orð höfð um eldgosið í Geldingadal við Fagradalsfjall. Sérfræðingar og yfirvöld eru í samstöðu að gera sem minnst úr eldsumbrotunum. Kannski er það til að sefa ótta almennings, kannski til að hemja löngun margra að berja gosið augum og fara sér í voða í leiðinni.

Ef álíka gos og nú stendur yfir yrði nærri byggð væri það óðara kallað hamfaragos. Við metum atburði eftir afleiðingum þeirra. 500 metra eldspúandi gjá fjarri byggð og mannvirkjum er saklaus en lægi gjáin nærri mannvist yrði gripið til sterkra lýsingarorða. Þar með yrði skilningurinn annar og vekti tilfinningar kröftugri en léttúð og kæruleysi.

Fjarlægðin gerir fjöllin blá og mennina mikla, segir máltækið. Púðurhvellurinn i Geldingadal er orðinn hættulegur höfuðborg Íslands í erlendum fjölmiðlum. ,,Icaland volcano: eruption under way in Fagradalsfjall near Reykjavik," segir Guardian. ,,Vulkan nahe Islands Hauptstadt Reykjavik ausgebrochen," skrifar Die Welt.

Orðin sem við notum um atburði móta skilning okkar. Væntingar og ótti eru með í spilinu. Rýmingaráætlun var fyrir Grindvíkinga ef gosið yrði nærri byggð. Samhengi hlutanna skiptir sköpum. Séð frá útlöndum er gosið við túnfót Reykjavíkur.

Góðu heilli virðist Geldingadalsgosið hættulaust sjónarspil náttúrunnar. Haldi það áfram höfum við eitthvað að ræða annað en kófið.

 

 

„Pínulítið gos“

Saklausir menn, herskáir femínistar

 Hildur Lilliendahl Viggós­dótt­ir var dæmd fyrir eftirfarandi ummæli um saklausa menn:

„... þá gríðarlega alvarlegu aðför lögreglunnar að öryggi kvenna í Reykjavík að láta eiga sig að fara fram á gæsluvarðhald yfir körlum sem nauðga konum SAMAN svo yfirdrifið kerfisbundið að þeir hafa til þess sérútbúna íbúð.“

 

Oddný Arnarsdóttir var dæmd fyrir nokkuð ítarlegri ummæli, en upphafið er svona:

 

Það er ekki krafist gæsluvarðhalds yfir mönnum sem hefur í að minnsta kosti tvö

mismunandi skipti tekist að nauðga konum. Ekki nóg með að þeir nauðgi þeim heldur gera þeir það kerfisbundið.

 

Þær Hildur og Oddný töldu lögregluna ekki nógu viljuga til að beita gæsluvarðhaldi. Það má löglega hafa þá skoðun. En stöllurnar gáfu sér að tvímenningarnir sem voru til rannsóknar væru stórhættulegir raðnauðgarar. Þeir reyndust saklausir. Ólögmætt er að staðhæfa um glæpi sem ekki hafa verið framdir.

 

Lærdómur: hugsa fyrst, skrifa svo.

Ummæli í Hlíðamáli dæmd dauð og ómerk í Landsrétti

Orsök og afleiðing í náttúrunni

Til að A orsaki B i rökfræðilegum skilningi þarf A að koma á undan B og knýja fram afleiðinguna, B. Rök á hinn bóginn eru tilbúningur manna, þau eru ekki í náttúrunni.

Einkenni náttúrunnar er óreiða sem lýtur ekki rökum. Síðdegis 3. mars, fyrir rúmum tveim vikum, var tilkynnt að eldgos hæfist á Reykjanesi innan fárra klukkustunda. Yfirlýsingin var byggð á vinnu, athugunum, rannsóknum og sérfræðiþekkingu færustu jarðvísindamanna. En, sum sé, enn er ekkert gos. Nú er gos talið ólíklegt á næstunni. Spálíkön um hegðun óreiðu eru alltaf ágiskanir.

Víkjum sögunni að loftslagi. Sérfræðingar, veðurfræðingar, geta ekki spáð fyrir um veðrið nema nokkra daga fram í tímann. Sæmilega áreiðanlegar veðurspár eru ekki gefnar út nema fyrir næstu fimm til sjö daga. Engu að síður segja sumir sérfræðingar, áherslan er á sumir, að eftir 20 ár verði hlýrra á jörðinni ef koltvísýringur eykst af mannavöldum. 

Koltvísýringur er 0,04% af andrúmsloftinu. Mælieiningin er ppm sem þýðir einingar af milljón. Þess vegna er sagt að magn koltvísýrings, CO2, sé 400 ppm. Gögn sýna að á jarðsögulegum tíma er þetta hlutfall lágt. Hlutfallið hefur farið upp í nær 8000 ppm. Lífi á jörðinni væri hætta búin ef hlutfallið færi niður í 150 ppm.

Koltvísýringur er náttúruleg lofttegund, ekki uppfinning mannsins. Áhrif hennar á loftslag jarðar eru óþekkt. Til að mynda er ekki vitað hvort hlýnun orsaki hærra hlutfall CO2 í andrúmslofti eða hvort CO2 valdi hlýnun. 

Óreiða ofan í jörðinni og óreiða í loftslagi. Náttúran má eiga það að hún er spaugsöm, gerir grín að ,,fræðingum" sem sjá röklegt samhengi í óreiðu.

Ólíklegt að kvika muni koma upp

CO2 orsakar ekki hlýnun jarðar

Grænlandsjökull bráðnaði einu sinni eða tvisvar á síðustu milljón árum ,,þrátt fyr­ir að magn kolt­ví­sýr­ings í and­rúms­lofti hafi þá verið mun lægri en í dag," segir í viðtengdri frétt.

Rökrétt ályktun: koltvísýringur, CO2, veldur ekki hlýnun jarðar.

Loftslagsvísindamaðurinn Roy Spencer útskýrir hvers vegna sumir (Gréta, Gore og Gummi t.d.) trúa að CO2 valdi loftslagsbreytingum. Þeir trúgjörnu gefa sér að náttúrulegt loftslag sé í jafnvægisástandi sem raskist ekki nema vegna áhrifa mannsins. 

Forsenda þeirra trúgjörnu er sannanlega röng. Meint loftslagvá af mannavöldum er tilbúningur, réttnefnt ,,fjölmiðlaloftslag."

Íshella Grænlands hefur áður bráðnað algjörlega

Jóhannes: ferðaþjónustan stjórni landinu - nei, takk

Í útrásinni um aldamót réðu bankar og stórfyrirtæki landinu. Tilrauninni lauk með hruni 2008. Nú er það ferðaþjónustan sem á að stjórna landinu, segir Jóhannes Þór Skúlason æðstiprestur samtaka sölufyrirtækja í ferðabransanum.

„Kosn­inga­bar­átt­an er haf­in,“ seg­ir Jó­hann­es Þór og talar eins og sá sem valdið hefur. Hann hefur í frammi lítt duldar hótanir um að beita peningaafli á viðkvæmasta tíma stjórnmálamanna - í aðdraganda kosninga - til að knýja fram stjórnvaldsaðgerðir í þágu atvinnugreinarinnar.

Jóhannes fær prik fyrir frumlega ósvífni.

Hann [Jóhannes] seg­ir að kom­ist ferðaþjón­ust­an ekki af stað í sum­ar sé hætt við því að mik­il verðmæti fari í súg­inn og þekk­ing og reynsla starfs­fólks fari for­görðum.

Það var og. Ferðaþjónusta er orðin geimvísindi sem aðeins þrautþjálfaðir sérfræðingar ráða við. Gefðu okkur annan, Jói. Vanþróuð og fátæk ríki byggja afkomu sína á fjöldatúrisma.

Nei, takk, ferðaþjónustan á ekki að stjórna landinu. Landið var á góðri leið fyrir kófið að verða að sorphaug fjöldatúrisma. Tugþúsundir útlenskir farandverkamenn voru fluttir inn í landið sem lét á sjá vegna áníðslu. Innviðir brustu, s.s. heilbrigðiskerfi og samgöngur.

Það á að beita fullum þunga ríkisvaldsins til að takmarka óheft innflæði ferðamanna inn í landið og afnema með öllu niðurgreiðslu ferðaþjónustu.

 

 

Þurfum að hefja viðspyrnuna núna

Jafnlaunalandið Ísland - háskólakonur og gröfukarlar

Ísland er jafnlaunaland frá gamalli tíð. Að hluta stafar það að kapítalismi hélt seint innreið og skóp ekki fátæka láglaunastétt sem ekkert átti nema vinnandi hendur. Þá er rík jafnaðarhugsun arfur frá bændasamfélaginu.

Að þessu sögðu gerast hlutir á seinni tíma sem minnka launabil milli þeirra sem hafa háskólapróf og starfsstétta þar sem ekki er krafist háskólamenntunar. Samfélagið hefur verðfellt háskólamenntun með tvennum hætti. Í fyrsta lagi taka æ fleiri háskólapróf. Meira framboð þýðir lægra verð pr. háskólapróf. Í öðru lagi er orðinn verulegur kynjahalli á háskólamenntuðum, um 70 prósent konur en aðeins 30 prósent karlar.

Gröfukarlinn fær án efa meiri ævitekjur en háskólakonan. Hvort það sé gott eða illt afspurnar er önnur umræða.

Minni munur á tekjum eftir menntunarstigi

Pútín og Trump, 2016 og 2020

Í forsetakosningunum 2016 var Pútín sagður hafa tryggt Trump sigur. Sú flökkusaga varð að almennum sannindum í meðferð fjölmiðla. Demókratar á þingi stóðu fyrir rannsókn og báru fyrir sig heimildir úr leyniþjónustunni. Allt reyndist haugalygi.

Í kosningunum 2020 er Pútín ,,talinn hafa verið" hliðhollur Trump en klerkastjórnin í Íran hlynnt Biden.

Ekki búast við herferð til að sannfæra almenning um að Biden sé smurður agent klerkastjórnarinnar í Tehran. Biden var jú frambjóðandi ráðandi fjölmiðla.

Telja Pútín hliðhollan Trump

Vísindin, veiran og breska bóluefnið

Vísindin eiga erfitt uppdráttar á kóftímum. Þau voru óráðin í fyrstu um varnir (grímur - ekki grímur; bæling eða hjarðónæmi sbr. sænska tilraunin) og núna eru það bóluefnin. Bjargar bólusetning eða drepur hún?

Eitt bóluefni er í skotmáli, grunað um að valda blóðtappa eða lífshættulegu sjálfsofnæmi, einkum hjá konum á besta aldri. Bólefnið sem um ræðir heitir AstraZeneca víðast hvar en Oxford í Bretlandi þar sem það er framleitt.

Stærstu ríki Evrópu settu tímabundið bann á bóluefnið á meðan nánar skyldi að gætt hverskyns væri.

Kurlin eru ekki öll komin til grafar og á meðan er ekki bólusett með breska bóluefninu.

Ekki er ólíklegt að ,,vísindin", já, höfum þau í gæsalöppum, komist að þeirri niðurstöðu að litlar, jafnvel sáralitlar, líkur séu á að bóluefnið valdi skaða. Hér væri talað um prósentubrot.

Hængurinn er sá að nánast það sama gildir um Kínaveiruna sjálfa. Litlar líkur eru á að fullfrískt fólk veikist alvarlega.

,,Vísindin" í þessu samhengi eru ekkert annað prósentur og brot af þeim. Þau geta enga leiðsögn veitt hvort sé skárra að taka áhættuna af veirunni eða bóluefninu.

Snúið mál, ekki satt?

Ekkert bendi til orsakatengsla við blóðtappa

Þingsæti út á 66 atkvæði - og stuðning fjölmiðla

Þórhildur Sunna fær fyrsta sætið á framboðslista Pírata út á 66 atkvæði. Þessir 66 sem kusu Þórhildi Sunnu í prófkjörinu eru ekki nóg til að hún fái endurnýjað umboð á alþingi í haust.

Þá koma til sögunnar fjölmiðlar eins og Stundin, sem sennilega fær ríkisfé frá þingflokki Pírata, og RÚV sem fær ríkisfé með stuðningi þingflokks Pírata.

Allt er þetta fjarska lýðræðislegt og fullkomlega gagnsætt og laust við spillingu þar sem örfáir hygla sjálfum sér með peningum almennings.

66 völdu Þórhildi í 1. sæti

RÚV, Kínaveiran og breska afbrigðið

Í fyrstu hádegisfrétt RÚV í dag var tönnlast á ,,breska afbrigðinu" af ,,farsóttinni".

Dálítið undarlegt þar sem afbrigðið kennt við Bretland er af veiru sem ber nafn upprunalandsins, sem er Kína.

,,Kínaveiran" er bannorð á Efstaleiti. Þar er aðeins talað um kóf og farsótt en afbrigðin heimfærð upp á þjóðlönd. Mikill er máttur kínverska kommúnistaflokksins.