ESB-lýðræðið, þetta litla, deyr í Katalóníu

Evrópusambandið er valdablokk ríkisstjórna, sem í orði kveðnu þykist byggja á lýðræðishugsjón. En þegar 7,5 milljón manna þjóð, Katalónar, rís upp og krefst sjálfstæðis frá Spáni segir ESB pass, þetta kemur okkur ekki við.

Viðbrögðin voru önnur og harkalegri þegar Krím fór frá Úkraínu til Rússlands á grunni þjóðaratkvæðagreiðslu. ESB setti viðskiptabann á Rússa, sem Ísland er illu heilli aðili að.

ESB tuktar líka til Breta vegna ríkisborgara ESB er búa og starfa þar í landi og krefst að réttindi þeirra séu tryggð eftir Brexit.

En ESB lítur á sjálfstæðisbaráttu Katalóna sem spænskt innanríkismál þar sem lögreglukylfur og táragas eru leyfileg verkfæri gegn friðsömum borgurum.

Guardian, bresk útgáfa hliðholl ESB, dregur saman stöðuna. Evrópusambandið er í felum frá lýðræðinu í Katalóníu.

Spánarkóngur fordæmdi sjálfstæðisbaráttuna

Ótti við vinstristjórn lækkar krónuna

Vaxtalækkun Seðlabankans er traustsyfirlýsing á hagkerfið. Krónan ætti að hækka í verðgildi við þessar kringumstæður. En hún lækkar í viðskiptum á gjaldeyrismarkaði.

Ástæðan er nærtæk. Sama dag og vaxtalækkun var tilkynnt birtist skoðanakönnun sem veit á vinstristjórn.

Ríkisstjórn Vinstri grænna, Samfylkingar og Pírata er uppskrift að efnahagslegum óstöðugleika, með tilheyrandi verðbólgu og hallarekstri á ríkissjóð.

Fólk og fyrirtæki munu kaupa gjaldeyri til að búa sig undir gjaldeyrishöft og fallandi verðgildi krónunnar.

Harðindavetur vinstristjórnar má enn forðast - ef við notum atkvæði okkar skynsamlega 28. október.

Óvissa í stjórnmálum ekki áhrifavaldur

Varúð: vinstristjórn Vg, Samfó og Pírata

Ísland yrði ekki Norður-Kórea ef ríkisstjórn Vinstri grænna, Samfylkingar og Pírata tæki við völdum um næstu mánaðarmót. En lýðveldið okkar myndi láta á sjá.

Stöðugleiki og góðæri yrðu um næstu áramót minning um veröld sem var.

Könnun Fréttablaðsins er áminning um að hrollvekja vinstristjórnar er því miður ekki fjarlægur möguleiki.

Eina vörnin gegn vinstristjórn er sterkur Sjálfstæðisflokkur.

VG langstærsti flokkurinn

Dulúð, RÚV? Virkilega?

,,Fáum við einhvers konar dulúð?" spyr fréttamaður RÚV skattalögfræðing um skattaskil Sigmundar Davíðs og Önnu Sigurlaugar.

,,Já, jafnvel," svarar lögfræðingurinn.

Samtalið er úr frétt RÚV.

Nei, þetta er ekki brandari heldur dagsatt atvik úr veruleikafirringunni á Efstaleiti.

„Fara hamförum í útúrsnúningum“

Í bólinu með blaðamanni

Samskipti blaðamanns og heimildamanns geta verið snúin, einkum þegar dómgreindin stjórnar ekki ferðinni. Ung blaðakona á mbl.is tekur viðtal við miðaldra karl og þau hugsa helst um bólfarir; hann með því að líkja pólitík og skattamál við að sofa hjá og hún að gera fyrirsögn úr neðanbeltispælingum.

Samfarirnar voru þó ekki góðar, ef marka má útkomuna, sem er viðtengd frétt.

Fyrir það fyrsta vita turtildúfurnar ekki að Wintris-félagið var skattayfirvöldum löngu þekkt þegar það komst í hámæli eftir alræmda aðför RÚV. Hjónin Anna Sigurlaug og Sigmundur Davíð höfðu greitt skatta og skyldur af félaginu.

En eftir að Wintris-félagið varð opinbert voru hjónin sökuð um að skjóta undan skatti. Til að fá úr því skorið hvort ekki væri allt með felldu sendu Sigmundur Davíð og Anna Sigurlaug bókhald Wintris til skattayfirvalda til endurmats.

Eftir að skattayfirvöld fóru yfir skattskil var niðurstaðan EKKI að leggja álag á vangoldinn skatt, ekki heldur að að beita sektum og enn síður að höfða refsimál. En þetta eru þau þrjú úrræði sem skattayfirvöld hafa til að beita við undanskot og skattsvik.

Skatturinn gaf sem sagt Önnu Sigurlaugu og Sigmundi Davíð hreint sakavottorð í Wintris-málinu.

Margir þola ekki þessar málalyktir. Og leggjast í rúmið. Góða skemmtun.

Úrskurðurinn hafi almennt fordæmisgildi

Vinstriflokkarnir spara: sendum börnin heim

Vegna gæluverkefna vinstriflokkanna í borgarstjórn er ekki til peningur að reka leikskóla. Sparnaðarráð vinstrimanna er að senda þau börn heim sem eiga nýburasyskini.

Hugmyndin er frá Svíþjóð.

Einmitt.

„Það heimskulegasta sem ég hef heyrt“

Glæpa-Kjarninn og upplogið lögbrot

Enginn getur farið til skattayfirvalda og fengið vottorð um að vera ekki skattsvikari. Skatturinn býður ekki upp á slíka þjónustu. Sigmundur Davíð og eiginkona hans voru ásökuð um að svíkja undan skatti - út á það gekk Wintris-málið.

Sigmundur Davíð var flæmdur úr forsætisráðuneytinu vegna Wintris-málsins og í framhaldi bolað úr formennsku í Framsóknarflokknum. Hvað átti hann að gera? Ekki gat hann fengið vottorð hjá skattinum um að hann væri þar með sitt á hreinu.

Hjónin Anna Sigurlaug og Sigmundur Davíð ákváðu að fara með Wintris-félagið í heild sinni til skattayfirvalda og fá mat á hvort ekki væri fyllilega staðið rétt að skattlagningu á félaginu. Ferlið hjá skattayfirvöldum tekur marga mánuði, eins og Sigmundur Davíð rekur í grein í Fréttablaðinu.

Í úrskurði yfirskattanefndar um Wintris kemur fram að greiða þurfti úr túlkunaratriðum vegna skattskila. Skattayfirvöld geta lagt álag á skattgreiðendur ef rök standa til þess að um skattaundanskot hafi verið að ræða. Það var ekki gert í tilviki Önnu Sigurlaugar og Sigmundar Davíðs. Álag á skattgreiðslur er mildasta úrræði skattayfirvalda en því var ekki beitt.

Með málsmeðferðinni staðfestu skattayfirvöld það sem þau hjón hafa ávallt haldið fram, að Wintris-félagið greiddi skatta og skyldur hér á landi. RÚV og aðrir fjölmiðlar góða fólksins hafa haldið hinu gagnstæða fram, að Winstris-félagið hafi skotið undan skatti.

En nú liggur fyrir, svart á hvítu, hjá skattayfirvöldum að Wintris borgaði skatta og skyldur hér á landi. Og það jafnvel ríflega - þau hjón fengu endurgreitt.

Glæpa-Kjarninn lítur öðrum augum á málið. Í tveim greinum í gær (já, tveim) dregur Glæpa-Kjarninn upp þá mynd að víst hafi Winstris verið skattaundanskotafélag. Fyrirsögnin á fyrri greininni tekur af allan vafa: ,,Wintris greiddi ekki skatta í samræmi við lög og reglur."

Nú er það svo að ef maður brýtur lög og reglur gagnvart skattinum er þrennt í stöðunni. Í fyrsta lagi er maður rukkaður um vangoldinn skatt með álagi, oft 25%. Í öðru getur maður fengið sekt, sem er tvöföld eða þreföld skattafjárhæð. Í þriðja lagi fer málið til refsimeðferðar fyrir dómstólum. Ekkert af þessu þrennu var gert í tilviki Önnu Sigurlaugar og Sigmundar Davíðs. Enda engum lögbrotum til að dreifa.

Í seinni grein Glæpa-Kjarnans í gær var engu efnislegu bætt við, aðeins ítrekað að hjónin hefðu framið lögbrot.

Góða fólkið tók ,,fréttaskýringum" Glæpa-Kjarnans fegins hendi og flaggaði þeim á netmiðlum í gær. RÚV bjó til hádegisfrétt úr glæpaútgáfunni og aðra kvöldfrétt. Fyrirsögn RÚV í kvöldfréttum er neyðarlega kjánaleg: ,,Horfðu fram hjá Winstris í skattskilum". Hverjir horfðu framhjá? Og hvað þýðir eiginlega að ,,horfa framhjá". Maður þarf að vera verulega illa gefinn til að skilja ekki að í Wintris-málinu er grundvallarspurningin um sekt eða sakleysi. (Vitanlega einnig framhjáhald RÚV og Glæpa-Kjarnans gagnvart sannleikanum - en það er önnur saga).

Milljón króna spurningin er þessi: hvort er það af heimsku eða illgirni sem Glæpa-Kjarninn, RÚV og góða fólkið skilur ekki að ef maður er uppvís að lögbroti gagnvart skattayfirvöldum fær maður eitt af þrennu: álag, sekt eða refsidóm? Engu slíku er til að dreifa í tilviki Önnu Sigurlaugar og Sigmundar Davíðs. Þar af leiðir var ekki um neitt lögbrot að ræða.

Undirbýr málsókn gegn fjölmiðlum

RÚV skáldskapur frá Sjanghæ til Panama

RÚV endurvinnur frétt Kjarnans, sem aftur er endurvinnsla úrskurðar yfirskattanefndar nr. 146/2017, um að Anna Sigurlaug eiginkona Sigmundar Davíðs ofgreiddi skatta.

RÚV ber ábyrgð á alræmdustu pólitískum ofsóknum á Íslandi í seinni tíð. Svokölluð Panamaskjöl voru grundvöllurinn að þessum ofsóknum. Hvers vegna vitnaði RÚV ekki í Panamaskjölin í stað þess að endurvinna frétt Kjarnans?

Jú, svarið er einfalt. Panamaskjölin eru ekki til sem heimild. RÚV er einfaldlega ekki með nein gögn í höndunum.

Í öllum blaðamannaskólum er kennd sú meginregla að engin frétt er betri en heimildin fyrir henni. Sem sagt: engin heimild þá engin frétt. Allir blaðamenn með sjálfsvirðingu viðurkenna þessa reglu. En ekki ritstjórnin á Efstaleiti.

Fréttastofa RÚV skáldar upp úr slúðri fréttir, eins og í tilfelli Önnu Sigurlaugar, eins og í tilfelli meints mansals á Sjanghæ.

RÚV lætur meginreglur blaða- og fréttamennsku lönd og leið en hagar sér eins og öskrandi samfélagsmiðill.

Og liðið á Efstaleiti er á framfæri ríkissjóðs. Var einhver að tala um bananalýðveldi?

 

ESB: kylfur og táragas gegn lýðræði er gott mál

Spænska ríkisvaldið beitti lögreglukylfum og táragasi gegn friðsömum íbúum Katalóníu sem vildu kjósa um sjálfstæðis. Evrópusambandið kvittar upp á stefnu stjórnarinnar í Madríd og þvær hendur sínar.

Atburðirnir í Katalóníu sýna að lýðræði hefur enga merkingu í höfuðstöðvum Evrópusambandsins. Þegar skerst í odda með þjóðarvilja og óbilgjörnu ríkisvaldi finnst Brussel-valdinu allt í sóma að ríkisvaldið beiti kúgunartækjum á almenning.

En þegar stjórnvöld einstakra ríkja eru mótdræg Evrópusambandinu, t.d. ríkisstjórnir Póllands og Ungverjalands, stökkva embættismenn ESB fram á sviðið og þykjast verja lýðræðið fyrir þjóðkjörnu ríkisvaldi. En kylfur og táragas gegn lýðræðinu í Katalóníu er gott mál að mati Brussel. 

Munu lýsa yfir sjálfstæði

RÚV skuldar Sigmundi Davíð tugi milljóna króna

RÚV hannaði fréttir um að Anna Sigurlaug Pálsdóttir eiginkona Sigmundar Davíðs þáverandi forsætisráðherra væri skattsvikari. Nú liggur það fyrir að Anna Sigurlaug ofgreiddi skatta.

RÚV var aldrei með nein gögn um meint skattsvik. Þegar Sigmundur Davíð gagnrýndi RÚV fyrir rangan fréttaflutning gaf útvarpsstjóri út yfirlýsingu sem er bláköld lygi.

RÚV greiddi 2,5 milljónir króna í skaðabætur vegna fréttaflutnings í máli sem er mun smærra en mál Önnu Sigurlaugar og Sigmundar Davíðs. Samkvæmt því fordæmi eiga hjónin inni tugi milljóna króna hjá RÚV.

Peningar og siðlaus fréttamennska RÚV eru eitt í þessu máli. Annað og verra er að rangur fréttaflutningur RÚV felldi sitjandi ríkisstjórn og stuðlaði að tvennum þingkosningum og stjórnarkreppu sem varir enn.

Fréttastofa RÚV er mesta óþurftarstofnun í sögu lýðveldisins.

Ofgreiddi skatta vegna Wintris