Tjáningarfrelsi Loga - vinstrimenn þegja

Lögbann er sett á tjáningarfrelsi Loga Bergmann. Vinstrimenn, sem þykjast sérstaklega næmir á tjáningarfrelsið, þegja þunnu hljóði. Engin öskur á samfélagsmiðlum, ekkert fréttaflóð frá fjölmiðlum vinstrimanna.

Eru vinstrimenn aðeins hlynntir tjáningarfrelsi þegar það þjónar pólitískum hagsmunum þeirra?


mbl.is Lögbann á störf Loga
Tilkynna um óviðeigandi tengingu við frétt

Vinstri grænir endurtaka mistök Pírata

Vinstri grænir eru að tapa kosningabaráttunni. Þeir falla í sömu gildru og Píratar fyrir síðustu kosningar; hafa helst enga skoðun en annars tvær til þrjár ólíkar á sama málinu.

Fyrir kosningarnar sl. haust voru Píratar með um 30 prósent fylgi. Í kosningabaráttunni vildu þeir ekki rugga bátnum, sigla fylginu heim. Vinstri grænir nota sömu aðferð núna. Og hún gefst jafn illa og Pírötum fyrir ári.

Vinstri grænir kynna sig ýmist sem skattaflokk eða boða lága skatta; stundum eru þeir með ESB-aðild en annars á móti. En mest reyna Vinstri grænir að halda kjafti og vera sætir. Það virkar ekki.

Samfylkingin er óðum á ná vopnum sínum og nagar fylgið af Vinstri grænum.


mbl.is Sjálfstæðisflokkurinn með 19,9%
Tilkynna um óviðeigandi tengingu við frétt

Má banna bullið? - Falsfréttir Vinstri grænna

Lögaðilar, fyrirtæki eða einstaklingar, geta fengið lögbann að tilteknum skilyrðum uppfylltum. Handhafar framkvæmdavaldsins, sýslumenn, taka afstöðu til krafna um lögbann. Dómstólar skera úr um hvort synjun eða veiting lögbanns standist lög.

Ríkisstjórnin á vitanlega ekki að grípa inn í þessa atburðarás. Hún er lögformleg og sett til að handahófskenndu mati verði ekki beitt.

Lögbannskrafa þrotabú Glitnis á fréttaflutning úr stolnum skjölum er gerð að pólitísku áróðursmáli. Fjölmiðlar og samfélagsmiðlar þyrla upp falsfréttum til að koma höggi á Sjálfstæðisflokkinn.

Vinstri grænir draga fram sínar stórkanónur, Katrínu formann og Svandísi Svavarsdóttur, og boða fund undir yfirskriftinni Má banna fréttir?

Í fundarboði er falsfrétt: 

Lögbann sýslumanns á umfjöllun Stundarinnar um fjármál forsætisráðherra vekja alvarlegar spurningar um tjáningarfrelsi og frelsi fjölmiðla á Íslandi.

Sýslumaður bannaði ekki umfjöllun um fjármál forsætisráðherra. Þetta er hreinn uppspuni, falsfrétt. Glitnir fór fram á lögbann á stolnum gögnum sem varða þúsundir Íslendinga.

Almenningur stendur óvarinn gagnvart falsfréttum af þessu tagi. Í lýðræðisríki má hvorki banna bull né fréttir enda enginn munur þar á milli nú um stundir.

 


mbl.is Vill að stjórnvöld afturkalli lögbannið
Tilkynna um óviðeigandi tengingu við frétt

Lýðræði tapast, Ísland - Svíþjóð

Tækniveldið gengur af lýðræðinu dauðu í Svíþjóð, segir nýr sendiherra Svía hér á landi. Hann vísar í sænska orðræðu, t.d. Georg Henrik von Wright, sem skrifaði þegar árið 1993: ,,Tækniveldið þarfnast yfirskins lýðræðis til að fela valdbeitingu sína."

Svíþjóð er regluveldi en ekki Ísland. Í Svíþjóð kemur atlagan að lýðræðinu frá sérfræðingum, en þeir eru ekki hátt skrifaðir hérlendis.

Lýðræði á Íslandi er mest hætta búin frá skrílsvæðingu umræðunnar í skjóli samspils fjölmiðla og samfélagsmiðla.

Bjarni Benediktsson forsætisráðherra hélt fund á Seltjarnarnesi í gær. Um 200 manns mættu, hlýddu á framsögu Bjarna og Óla Björns Kárasonar þingmanns. Á eftir framsögum var spurt og svarað um aðskiljanleg mál, s.s. skatta, uppbyggingu innviða, menntun, kjör eldri borgara, málefni hælisleitenda og fleiri atriði stjórnmálanna.

Á meðan fundurinn á Seltjarnarnesi stóð geisaði stormur á rafmiðlum, bæði fjölmiðlum og samfélagsmiðlum, sem gekk út á að forsætisráðherra stæði fyrir lögbanni á fjölmiðil. Enginn af fundarmönnum úti á Nesi var með hugann við samsæri netskrílsins. En fundarmenn í Valhúsaskóla voru aðeins um 200 á meðan netumræðan nær til þúsunda.

Skrílsumræðan á netinu grefur undan lögmæti stjórnmála. Múgæsingamenn búa til falsfréttir og kynna sem staðreyndir í netumræðunni. Stórir fjölmiðlar, RÚV sérstaklega, taka virkan þátt.

Lýðræði sem tapar lögmæti er á fallandi fæti. Í Svíþjóð yfirtaka sérfræðingar völdin, á Íslandi er netskríllinn helsti óvinur lýðræðisins.


mbl.is Sendiherra Svía veldur fjaðrafoki
Tilkynna um óviðeigandi tengingu við frétt

Bloggfærslur 18. október 2017

Innskráning

Ath. Vinsamlegast kveikið á Javascript til að hefja innskráningu.

Hafðu samband