Hærri vextir bæta hag fátækra - hlutfallslega

Lágir vextir og stóraukið framboð af ódýr lánsfé eykur misskiptingu auðs á vesturlöndum. Til að draga úr misskiptingu auðs ætti að hækka vexti og draga úr lánsframboði. 

Þetta er greining sem birtist í vinstriútgáfunni Guardian. Ef við yfirfærum greininguna yfir á Ísland, líkt og formaður Samfylkingar flytur inn erlenda umræðu um ójöfnuð, ættu kratar að krefjast hærri vaxta til að minnka muninn milli þeirra efnuðu og alls almennings.

En þó fátækir yrðu betur settir hlutfallslega miðað við efnafólk væru þeir samt verr staddir með hærri vöxtum. Hlutfallslegur efnahagur er eins og hlutfallsleg hamingja - elur aðeins á óánægju.

Hlutfallsleg eign gefur ranga mynd

Tjámerki og tortíming

Óhugnanlega stutt er á milli tjámerkja á samfélagsmiðlum og stríðsátaka kjarnorkuveldanna, Bandaríkjanna og Rússlands. Trump Bandaríkjaforseti tilkynnti í tísti, með viðeigandi tjámerkjum, að vegna eiturefnaárásar í Sýrlandi, sem mögulega er sviðsett, er stórveldið í vestri tilbúið í allsherjarárás á Sýrland.

Fyrir örfáum dögum sagði Trump að Bandaríkin ætluðu að draga sig úr borgarastyrjöldinni í Sýrlandi. Meint eiturefnaárás snýr þeirri stefnu á haust; nú skal allt gert til að steypa forseta landsins, Assad, af stóli.

Stórveldi sem stýrist af tilfinningaflóði á samfélagsmiðlum mun fyrr heldur en seinna gera óafturkræf mistök.      

Bandaríkin hafa ekki ákveðið næstu skref

Skömm Ragnars Þórs er skömm KÍ

Hvað bauð verðandi formaður Kennarasambands Íslands, Ragnar Þór Pétursson, mörgum börnum heim til sín? Hvað gerðist á heimili kennarans? Einn nemandi kærði Ragnar Þór. Kennarinn svaraði: ,,viðkomandi er líklega sjúkur."

Tveir aðrir nemendur hafa staðfest að Ragnar Þór tíðkaði að bjóða nemendum heim til sín. Ragnar Þór neitar að hafa boðið börnum heim til sín en kannski hafi einhverjir ,,bankað uppá".

Þing KÍ stendur nú yfir. Um 250 þingfulltrúar sitja þingið. Ef enginn þeirra leggur fram vantrauststillögu gegn Ragnari Þór Péturssyni tekur KÍ undir málsvörn verðandi formanns - um að nemendur sem kæra kynferðisbrot séu ,,líklega sjúkir".

Dagur: Sjálfstæðisflokkurinn og Vigdís Hauks

Vitað er að Sjálfstæðisflokkurinn er líklegastur til að sigra Samfylkinguna og vinstrimeirihlutann í borginni. Aftur voru þeir ekki margir sem gerðu ráð fyrir að Vigdís Hauksdóttir og Miðflokkurinn greiddu vinstrimönnum náðarhöggið.

En Dagur borgarstjóri stillir Vigdísi upp við hlið Sjálfstæðisflokksins sem höfuðandstæðingum vinstriflokkanna.

Vigdís má vel við una.

Dagur ósáttur við fréttina og myndina

Nýja kalda stríðið: tilfinningar í stað hugmyndafræði

Nýja kalda stríðið er hættulegt vegna þess að það gæti stigmagnast í bein stríðsátök kjarnorkuveldanna, Bandaríkjanna og Rússlands, skrifar ritstjóri vinstriútgáfunnar The Nation.

Vesturlönd verða að forðast nýtt kalt stríð við Rússland, segir í greiningu íhaldsútgáfunnar The National Interests.

Kalda stríðið, sem háð var 1945-1991, snerist um hugmyndafræði. Sovétríkin og Varsjárbandalagið stóðu grá fyrir járnum í nafni kommúnisma andspænis Bandaríkjunum og Nató sem kenndu sig við vestrænt lýðræði.

Nýja kalda stríðið er án hugmyndafræði. Tilfinningar, ýmist byggðar á samsæriskenningum um rússneskt eiturtilræði í breskum smábæ eða meintri eiturefnaárás á börn í Sýrlandi, stjórna ferðinni.

Tilfinningar eru óútreiknanlegri en hugmyndafræði. Í heimi tilfinninganna þarf færri rök til aðgerða en í veröld hugmyndafræðinnar. Stríðsaðgerðir verða líklegri. Kalt stríð breytist í heitt með stríðsaðgerðum.

Vara Bandaríkjamenn við

EES: íslenskt fullveldi framselt til Noregs

Norðmenn reka EES-samninginn á þeim forsendum að Noregur ákveður samskiptin við Evrópusambandið en Ísland fylgir. Norskir ráðamenn eru meðvitaðir um að í samanburði við Ísland er Noregur stórveldi.

Afleiðingin verður að íslenskir hagsmunir eru fyrir borð bornir, norskir hagsmunir eru einráðir.

EES-samningurinn felur í sér grófa íhlutun Norðmanna í íslensk málefni, núna síðast í orku- og virkjanamálum.

Eftir ítarlega úttekt á EES á að segja upp samningnum. Þótt fyrr hefði verið.

Samþykktu beiðni um EES-skýrslu

Botnlaust góðæri - erfið vandamálaleit

Á Íslandi ríkir botnlaust góðæri; hagvöxtur, ekkert atvinnuleysi, heimilin bæta eignastöðuna jafnt og þétt. 

Vandamálaleitendur eiga erfiða tíma enda eru þeir farnir að skyggnast inn í einkalíf fólks til að kanna hvort uppeldið sé ekki í lagi. Þá er fámenn heilbrigðisstétt í uppnámi vegna þess að hún er í röngu stéttarfélagi. Bílastæði á Keflavíkurflugvelli eru einnig undir smásjánni.

Vandamálaleitendur í fjölmiðlum eru orðnir svo örmagna á góðærinu að þeir krefjast niðurgreiðslu frá ríkinu til að manna vælubílinn.

Fjáreignir heimilanna jukust um 8,9%

Norskur þingmaður: Noregur er stórveldi gagnvart Íslandi

Í EES-samstarfinu er Noregur stórveldi, segir norskur þingmaður, og á við að Ísland fylgi Noregi eins og hundur í bandi. Af þessum sökum, sagði þingmaðurinn, ætti Noregur ekki að bjóða Bretlandi inn í EES-samstarfið.

Ummælin falla í frétt af deilum á norska Stórþinginu um afskipti Norðmanna af samningaviðræðum Breta og Evrópusambandsins. Þingmaðurinn Heidi Nordby Lunde er jafnframt formaður samtaka ESB-sinna.

Heidi Nordby Lunde og félagar hennar vinna skipulega að útvíkkun EES-samstarfsins til að gera Noreg að ESB-ríki í gegnum bakdyrnar. Norðmenn taka ákvarðanir og Ísland fylgir eins og hver önnur hjálenda stórveldisins.

Fólk eignast börn, ekki kerfið

Í umræðunni um börn á glapstigu og hvort og hve mikið ,,kerfið" á að grípa inn í líf þeirra vill ábyrgð foreldranna gleymast.

Foreldrar eignast börn og það er ekki ,,kerfisins", barnaverndar eða annarra opinberra aðila, að ala börnin upp og koma þeim til manns. Aðeins í undantekningatilfellum, þegar foreldrarnir bregðast, á að koma til afskipta opinberra aðila.

Barn á villigötum er foreldravandamál fyrst og síðast.

Drepandi vestræn velvild í Sýrlandi

Vestræn velvild gerði Assad Sýrlandsforseta að glæpamanni gegn mannkyni þegar hann var hvorki betri né verri en leiðtogavinir vestrænna ríkja í Tyrklandi, Sádí-Arabíu og Kína. Eftir að búið var að útmála Assad sem glæpamann studdu vesturlönd ýmsa hópa uppreisnarmanna með vopnum og fégjöfum.

Borgarastríðið í Sýrlandi er komið á áttunda ár. Í Guardian segir Simon Jenkins að eina vonin til að binda endi á blóðsúthellingar sé að Assad fari með sigur af hólmi. Jenkins klykkir út með þessu orðum: vesturlönd verða að láta af þeim leiða vana að ætla sér að stjórna heiminum.

Assad forseti er ábyggilega ekki besti vinur barnanna. Stjórnmálamenn eru það sjaldnast. Sum varmenni þarf einfaldlega að umbera þar sem aðrir kostir eru verri.

Verða látnir svara til saka