Þórdís undirbýr svik

Þórdís iðnaðarráðherra hafði um það mörg orð og fögur þegar hún fékk 3. orkupakka ESB samþykktan á alþingi að sæstrengur til Evrópu kæmi ekki í kjölfarið.

Núna segir Þórdís að íslenski raforkumarkaðurinn sé ,,óþroskaður". 

Þórdís og forysta Sjálfstæðisflokksins halda að ,,þroski" komi frá Brussel. En þaðan koma valdboð og inngrip í fullveldi þjóða. Aðeins ,,óþroskaðir" stjórnmálamenn skilja það ekki.

Þórdís segir raforkumarkaðinn óþroskaðan

Ríkissaksóknari ræðst á funda- og félagafrelsi

Sjálfstæðismenn í Kópavogi héldu félagsfund á liðnu ári sem ólöglegir hælisleitendur reyndu að hleypa upp. Vaskir fundarmenn leiddu óreiðufólkið úr sal til að tryggja fundarfrið. Ríkissaksóknari krefst þess að þeir sem sinnu borgaralegri skyldu skuli dæmdir fyrir að þykjast lögreglumenn.

Sitjandi ríkissaksóknari er Sigríður J. Friðjónsdóttir, yfirlýstur vinstrimaður, sem fékk embættið eftir að saksækja Geir H. Haarde fyrrverandi forsætisráðherra fyrir hönd vinstristjórnar Jóhönnu Sig.

Með því að krefjast rannsóknar á þeim sem sinna borgaralegri skyldu að halda fundarfrið í frjálsum félagasamtökum ræðst ríkissaksóknari á stjórnarskrárvarinn rétt almennings.

Sigríður er óhæfur ríkissaksóknari enda gerir hún ekki greinarmun á pólitík og réttlæti. Hvað þá að sú vinstrihneigða skilji stjórnarskrárvarin réttindi borgaranna.

ASÍ: afmenntum Ísland

Drífa Snædal forseti ASÍ segir að meta eigi reynslu til jafns við menntun. Hærra kaup sérmenntaðra starfsmenna er m.a. réttlætt með að þeir nutu ekki tekna á meðan þeir voru í námi.

Ef sá sem byrjar eftir grunnskóla á vinnumarkaði fær sama kaup og starfsmaður með 8 til tíu ára framhalds- og háskólanám er viðbúð að fólk sæki sér síður menntun. Ævitekjurnar yrðu  verulega lægri en hjá þeim ómenntuðu.

Framtíðarsýn ASÍ er að Ísland verði verstöð ófaglærðra.

Ættu að meta reynslu jafnt og menntun

Texti og ræma handa glærum sjálfstæðismönnum

Sjálfstæðisflokkurinn er stokkinn á glópalestina sem trúir á manngert veður, segir í frétt Viljans.

Einn texti og ein ræma af því tilefni. Höfundur textans er Judith Curry loftslagsvísindamaður. 

Curry segir meiri líkur á kólnun en hlýnun næstu áratugi. Náttúran en ekki maðurinn stjórni ferðinni.

Í ræmunni talar Roy Spencer loftslagsvísindamaður, sem í 40 ár hefur með John Christy safnað gögnum um hitastig andrúmsloftsins.

Spencer sýnir fram á að loftslagsmódel ýkja hlýnun umtalsvert. Raunmælingar sýna óverulega hlýnun og engar líkur eru á loftslagsvá næstu áratugi.

Curry og Spencer eru trúverðugir vísindamenn, ólíkt Al Gore og Grétu Tunberg.

Að öðru leyti er skipun loftslagsráðs Sjálfstæðisflokksins jólagjöf handa Miðflokknum. Og það er ekki nema febrúar.

Lífskjör eða sósíalísk verkföll og einkavæðing

Lífskjarasamningar frá síðasta ári eru í boði fyrir starfsmenn ríkis og bæja. Undir forystu sósíalistanna í Eflingu efna opinberir starfsmenn til ófriðar og herja á skattfé almennings.

Það er samdráttur í þjóðarbúskapnum sem þýðir lægri skatttekjur ríkis og sveitarfélaga. Yrði gengið að kröfum sósíalistanna þyrfti að framleiða innistæðulausar krónur - búa til verðbólgu.

Herskáir sósíalistar eru ávísun að eymd og volæði, í gömlu Sovétríkjunum og Venesúela samtímans.

Tangarhald sósíalista á verkalýðsfélögum er semja við ríki og sveitarfélög kallar á endurskoðun opinbers reksturs. Með einkavæðingu yrðu launakjör opinberra starfsmenna næmari á stöðu efnahagslífsins hverju sinni. Án aga veruleikans fá sósíalistar frítt spil til að gera það sem þeir kunna best - að efna til ófriðar.

Verkföll búa ekki til verðmæti heldur tortíma þeim. Pólitísk verkföll sósíalista ganga skrefi lengra; þau eyðileggja samfélagið.

Verkfall BSRB gæti hafist 9. mars

Sólveig, metoo og verktakar

Sólveig í Eflingu líkti stöðu ófaglærðra kvenna í leikskólum borgarinnar við þjáningu stallsystra þeirra í metoo-byltingunni.

Mannúðleg lausn er í sjónmáli, að verktakar yfirtaki þjakaðar Eflingarkonur.

Viðbrögð Sólveigar eru þessi: „Það væri al­gjör­lega tryll­ings­legt inn­legg inn í þessa deilu. Guð hjálpi okk­ur ef við erum kom­in á þann stað.“ 

Það er vandlifað.  

„Guð hjálpi okkur ef við erum komin á þann stað“

Lögbrot í ráðhúsinu

,,Starfsmenn Reykjavíkurborgar brutu lög um skjalavörslu og skjalastjórn í tengslum við uppbyggingu Braggans í Nauthólsvík. Það er niðurstaða frumkvæðisrannsóknar Borgarskjalasafns Reykjavíkur," segir í Fréttablaðinu.

Verður enginn sóttur til ábyrgðar? Er í lagi að stunda stórfellda yfirhylmingu, fela og eyða skjölum og opinberum gögnum? Má hóta starfsmönnum öllu illu, einelti og atvinnumissi, ef þeir voga sér að benda á spillinguna í æðstu yfirstjórn borgarinnar?

Lögbrot og spillingu í ráðhúsi höfuðborgarinnar verður að uppræta. Að öðrum kosti verður daglegt brauð að brjóta lög og siðlaus stjórnunarmenning festir rætur.

Borgin þegar brugðist við bragga-ábendingum

Fólk sér í gegnum blekkinguna um loftslagsvá

Umræðan eykst um ímyndað manngert veðurfar og fólk finnur út, af hyggjuviti og með því að leita mótraka, að náttúran stjórnar veðurfari líkt og hún hefur gert frá örófi alda.

Hlýnun frá árinu 1880 til dagsins í dag er 0,8 gráður á Celsíus. Meðalhiti jarðarinnar er um 15 gráður. 

Litlu ísöld lauk á 19. öld og það hlaut að hlýna af náttúrulegum ástæðum.

Manngert veður er blekking.

Fleiri telja hlýnun jarðar af náttúrunnar völdum

Tilfinningapólitík og veruleikinn

Sósíalísk tilfinningapólitík um að fólk í fullri vinnu lepji dauðann úr skel vegna láglaunataxta er teflt gegn þeim veruleika að hér voru lífskjarasamningar samþykktir, m.a. af Eflingu.

Tilfinningapólitík sósíalista er lýðskrum frá a til ö.

Þeir dagar eru liðnir að verkalýðshreyfingin komist upp með að gera verðbólgusamninga. Samdráttur í hagkerfinu, endalok góðærisins, mun auka atvinnuleysi. Sósíalistar eru búnir að þurrausa tilfinningaskjóðuna í þágu fólks á fullum launum og eiga ekkert eftir handa þeim sem höllum fæti standa, eru atvinnulausir. 

Snúið þegar menn hreyfa sig ekki

Miðflokkurinn lykill að stöðugleika

Sitjandi ríkisstjórn Katrínar Jakobs er einnota. Næsta kjörtímabil eru tvær ríkisstjórnarútgáfur í kortunum. Í fyrsta lagi þriggja flokka stjórn Sjálfstæðisflokks, Miðflokks og Framsóknar/Viðreisnar/Samfylkingar. Í öðru lagi 4-5 flokka vinstristjórn.

Miðflokkurinn er lykillinn að pólitískum stöðugleika.

Ef við fáum ekki sæmilegt hallæri munu nógu margir vera ginnkeyptir fyrir hugmyndinni um endalaust góðæri og telja sig hafa efni á vinstristjórn.

Stuðningur við ríkisstjórnina mælist tæp 42%