Stríðsþreyta í Trump-landi

Trump lofaði að draga úr hernaðarævintýrum Bandaríkjanna á fjarlægum slóðum. Hann kallaði heim bandarískt herlið frá Sýrlandi. Þingið vill ganga skrefinu lengra og hætta stuðningi við hernað Sádí-Araba í Jemen.

Borgarastríðið í Jemen er staðgenglastríð tveggja öflugustu ríkja múslíma í miðausturlöndum. Sádar, sem eru súnní-múslímar, styðja stjórnvöld í Jemen á meðan Íran, shía-múslímar, styðja uppreisnarmenn.

Sádar hafa tök á bandarískum stjórnvöldum. Þeim var fyrirgefið að skaffa flesta flugræningjana sem flugu á tvíburaturnana í upphafi aldar og einnig að drepa Khashoggi með köldu blóði í Tyrklandi. 

Trump forseti styður Sáda í stríðinu í Jemen og vill klerkastjórnina í Íran feiga. En bandaríska þingið virðist fylgja stefnu Trump frá kosningaárinu, þegar hann lofaði að hætta tilgangslausum hernaði í langt-í-burtu-löndum.

Vilja bandaríska herinn á brott frá Jemen

Gunnar Smári: gyðingar eru nasistar

Sósíalistaforinginn Gunnar Smári skrifar:

Júróvision í Ísrael eru próf á borð við ólympíuleikana í Berlín 1936. Nú eigum við að segja nei

og

Svona menningarviðburðir eru ætíð notaðir af fasískum stjórnvöldum til sjálfsupphafningar og til að sannfæra sitt fólk um blessun heimsbyggðarinnar yfir ofbeldi gegn borgurunum og stríði gegn nágrönnum,

Huggulegt, eða hitt þó heldur.

Fangelsisbætur bankastjóra Landsbanka - fyrirfram

Auðmaðurinn Jón Ásgeir á Fréttablaðið. Í viðskiptablaðhluta útgáfunnar í dag er kauphækkun bankastjóra Landsbankans rædd. Þar segir: 

Stjórnendur hafa undanfarinn áratug fengið áralanga fangelsisdóma í bunkum fyrir ákvarðanir sem þeir tóku við störf sín. Í sumum tilfellum virðist þunn lína milli þess hvort verið sé að refsa þeim fyrir efnahagsglæpi, eða einfaldlega slæmar viðskiptaákvarðanir, sem jafnvel hafa verið teknar undir fordæmalausri pressu. Í því samhengi er það spurning um sjónarhorn hvort bankastjórnendur teljist hafa of há laun.

Skoðun útgáfu Jóns Ásgeirs er þessi: stjórnendur eiga að fá fyrirframgreiddar bætur fyrir fangelsisdóma sem þeir kunna að hljóta.

Innifalið í þessari skoðun Fréttablaðsins er að íslenskir stjórnendur geti einfaldlega ekki starfað heiðarlega. Bragð er að þá barnið finnur.

Sammála um taktleysi launahækkana

Efling: þjóðin vill sósíalisma, Gallup segir það

Á tíma útrásar vildi þjóðin að auðmenn eins og Jón Ásgeir í Baugi stjórnuðu landinu. Það sögðu a.m.k. skoðanakannanir sem Gunnar Smári þáverandi aðstoðarmaður Jóns Ásgeirs gerði á ritstjórn Fréttablaðsins.

Gunnar Smári er orðinn sósíalisti eftir auðmannavolkið og gerir út pólitíska unglinga í því skyni. Aðferðin er sú sama, að fá ,,rétta" niðurstöðu í könnun um hvað almenningur vill.

Einn unglingurinn rekur Eflingu fyrir Gunnar Smára. Sólveig Anna segir þjóðinni að Gallup mæli traustan stuðning við kröfur um sósíalískt Ísland.

Í ríkisútvarpi vinstrimanna er hnykkt á boðskapnum: við eigum digra verkfallssjóði til að skapa úlfúð og óreiðu í samfélaginu, er haft eftir smáríska ungstirninu.

Hvort það eru auðmenn eða sósíalistar sem ráða för er í raun aukaatriði. Eins lengi og Gunnar Smári fær að vera memm. Ekkert mál er að láta skoðanakönnun sanna það. 

Vísindi sem mannlegur harmleikur

Skásta líffræðikenningin um tilvist mannsins á jörðinni er frá miðri 19. öld, eignuð Darwin. Tegundin verður til fyrir tilviljun fyrir um 200 þúsund árum. Jörðin er aftur um 4,5 milljarða ára.

Nú er reynt að telja okkur trú um að við séum að eyðileggja loftslag og náttúru jarðarinnar. Hver ætli hafi eyðilagt vistkerfið sem ól risaeðlurnar, en þær dóu út fyrir 65 milljónum ára eftir 165 milljón ára tilvist?

Og ætli maðurinn hafi valdið síðustu ísöld, sem var rétt handan við hornið í jarðsögulegum tíma, eða fyrir 12 þúsund árum?

Vísindi sem boða manngerðar hamfarir eru í hlutverki trúarbragða frá miðöldum, sérhæfa sig í mannlegum harmleik, og reyna að blekkja grandvart fólk til fylgis við pólitíska hugmyndafræði.

 

Skilja ekki umhverfisvanda jarðar

Tölur, áróður og skynsemi

Ensk orðskviða segir á þessa leið; til eru lygar, bölvaðar lygar og tölfræði. Innflytjendur á ónýtu kjöti frá útlöndum stunda þann hráskinnaleik að efna til könnunar á matvælaverði á Ísland og gera erlendan samanburð þegar krónan hefur veikst. Þar með fá þeir skotfæri í áróðurstríði gegn landbúnaði.

ESB-grátkórinn grípur til samanburðar á vöxtum á Íslandi og í ónýtu álfunni þegar staðan er þannig i Evrópu að hjól atvinnulífsins snúast ekki nema fá peninga á núll-vöxtum.

Og svo má áfram telja lygarnar klæddar í tölfræði.

Hvað laun áhrærir er þetta að segja: Ísland er jafnlaunaland og jafnframt hálaunaland. Við hertum sultarólina í fjármálakreppunni og söfnuðum launafitu frá og með velferðarstjórn Sigmundar Davíðs. Núna, í yfirstandandi kjarasamningum, gerum við ekki betur en að halda í horfinu. En erum samt þjóð er lifir í vellystingum praktuglega.

Trump-sjálfsmark RÚV

Trump-andófið á RÚV skoraði sjálfsmark í aðalfréttatíma. Fyrirsögnin var ,,Metfjöldi gegn Trump" og átti að keyra heim þau pólitísku skilaboð að enginn Bandaríkjaforseti væri jafn óvinsæll og Trump.

Hængurinn er sá að eftir því sem fleiri demókratar bjóða sig fram ,,gegn Trump" styrkist staða sitjandi forseta. Bæði er að andstaðan dreifist en einnig hitt að þegar frambjóðendur eru ,,gegn Trump" en ekki fyrir málstað spilar það upp í hendurnar á forsetanum. Trump er fulltrúi bandarísku þjóðarinnar.

Ef demókratar þægju kosningaráðgjöf RÚV byðu þeir fram gegn bandarísku þjóðinni. Þeir eru miklir snillingar þarna á Efstaleiti. 

 

Launavísitala forstjóra

Ef tekin eru saman þau fyrirtæki og stofnanir sem ríkið á annars vegar og hins vegar þar sem lífeyrissjóðir eru stórir fjárfestar yrðu ekki mörg stór fyrirtæki eftir.

Ríki og lífeyrissjóðir gætu sammælst um að reikna og birta opinberlega launavísitölu forstjóra, og eftir atvikum millistjórnenda.

Þar með lægi fyrir hvað forstjórar hafa í laun og mætti jafnvel tengja þau við þróun almennrar launavísitölu.

Allir hljóta að sjá að núverandi fyrirkomulag er ótækt.

Hækkanir forstjóra „óþolandi“

Líf: vinstriflokkarnir þurftu atkvæði - og því var svindlað

Vinstriflokkarnir virkjuðu Reykjavíkurborg til að sækja atkvæði í síðustu kosningum. Líf Magneudóttir borgarfulltrúi Vinstri grænna viðurkennir þetta: ,,þátt­töku fólks af er­lend­um upp­runa, kvenna yfir átt­rætt og ungs fólks í kosn­ing­um er ábóta­vant."

Meginhugsunin í lýðræðislegum kosningum er að fólk hafi frjálst val. Einn valkosturinn er að sitja heima - kjósa ekki. 

Vinstriflokkarnir vildu takmarka valkosti ákveðinna kjósendahópa og létu Reykjavíkurborg fjármagna áróður sem beint var að tilteknum kjósendum. 

Hvernig sem á málið er litið er um að ræða kosningasvindl. Spurningin er aðeins um pólitískar afleiðingar.

Þarf álit utanaðkomandi

Sæland nýjasti sósíalistinn

Þeim fjölgar sem kenna sig við sósíalisma. Logi formaður Samfylkingar talar sósíalískt og núna Inga Sæland sem er Flokkur fólksins.

Framboð af pólitískri orðræðu er takmarkað á íslensku. Gunnar Smári bjó til nokkra orðaleppa sem klæddu öfund og vanmetakennd í sósíalískan búning. Og ístöðulitla fólkið fylgir svarta forystusauðnum.

Aumt, en með ákveðið skemmtanagildi.

 

Kusu ekki „auðkýfinginn Sigmund“