Stafræna þjóðin: skemmdarverk í þágu málstaðarins

Alnetið og félagsmiðar eru verkfæri til að hanna stafrænan þjóðarvilja. Skipulagður hávaði á félagsmiðlum leiðir til eftirtektar fjölmiðla, sem bera í bakkafullan lækninn, og þá er hafist handa við stafrænar undirskriftir.

Aðgerðahópurinn sem kennir sig við nýju stjórnarskrána er yngsta dæmið um stafrænu þjóðina. Í síðasta mánuði var stafræna þjóðin virkjuð í þágu Bræðralags múslíma sem þurfti að fá inni á Íslandi fyrir útsendara sinn og fjölskyldu.

Aðgerðasinnar framkalla stafrænan þjóðarvilja í þágu málstaðar sem annars fengi ekki áheyrn. Stafræna þjóðin er skemmdarverk á viðurkenndum siðum og háttum og oft einnig á lögum og reglum. Stafræna þjóðin er forstig stjórnleysis.

Myndu aldrei hvetja til eignaspjalla

Veiran er rasisti með lífstílsfordóma

Kórónaveiran ræðst af meiri krafti á minnihlutahópa en hvíta. Samkvæmt Mayo-Clinic eru þeldökkir og rómanskir Bandaríkjamenn 4-6 sinnum líklegri til að leggjast inn á spítala vegna COVID-19 en hvítir. Hreinn og klár rasismi.

Vitað er að veiran herjar fremur á þá sem eru í yfirþyngd og lítið fyrir hreyfingu. Veirukvikyndið er þar með einnig fordómafullt gagnvart kviðmjúkum lífstíl.

Umræðunni er ekki lokið hvort veiran sé kínversk hryðjuverkaárás eða náttúrulegur tilbúningur. Ef tilfellið er að Kínamenn séu höfundar verða þeir asísku að svara fyrir. Sé veiran náttúruleg er sköpunarverkið sjálft komið á sakabekk.

Til að bæta gráu ofan á svart er vísindaheimurinn þverklofinn í afstöðu til sóttvarna. Enga hjálp þaðan að fá.

Vandast nú málið fyrir dómstóla að deila út sekt og sýknu í farsóttartíð.

Verði fróðlegt að sjá niðurstöðu dómstóla

Múslímar hafna vestrænu frelsi, en krefjast lífsgæðanna

Vestrænt frelsi felur í sér að ekkert er heilagt fyrir skopi og ádeilu. Í trúarmenningu múslíma er rík hefð fyrir bókstafstrú á Kóraninn. 

Múslímar í milljónavís flytja til vesturlanda. Þeir afneita vestrænu frelsi en krefjast veraldlegra lífsgæða sem finnast ekki í frumheimkynnum þeirra en vesturlönd státa af.

Tvöfaldir í roðinu, fylgismenn spámannsins.

Afhöfðun kennara hryðjuverk

Sjötugir unglingar

Sumir verða gamlir fyrir aldur fram en aðrir eru sprækir þangað til þeir detta niður dauðir á ráðsettum aldri. 

Þeim sem gamlast snemma stendur til boða sveigjanleg starfslok. Sjötugum unglingi er aftur gert að láta af störfum strax. Þó þekkist að stofnanir bjóði starfsmönnum á áttræðisaldri skammtímasamninga, til sex mánaða í senn. 

Varla er flókið að finna sanngjarna lausn á því ,,vandamáli" að fólk heldur heilsu lengur en það almennt áður gerði.

Leggja til afnám 70 ára reglunnar

Bókabúð MM lokar

Fyrir daga alnetsins og Amazon var bókabúð Máls og menningar alþjóðleg vin á Laugaveginum. Deild erlendra bóka var oft sú besta sem völ var á. Oft, vegna þess að stundum stjórnuðu verslunarstjórar með meiri áhuga á undirgreinum fagurbókmennta, s.s. sakamálum og hrollvekjum, en fræðiritum.

Á meðan Bókabúð stúdenta var enn við Hringbraut með takmarkað úrval stóð bókabúð MM sig í stykkinu á Laugarveginum. Þær eru ófáar bækurnar maður handfjatlaði fyrst á efri verslunarhæðinni í Rúblunni og urðu félagar. Ein er hvað minnisstæðust, eftir Michael Howard um stríð í Evrópusögunni. Hún var keypt í kalda stríðinu, einn kaflinn er raunar um það, og hefur elst verst, en gaf að öðru leyti innsæi i átakasögu frá Pelópsskagastríðinu að telja. Meginkenningin er að stríð og sálfræði mannsins haldast í hendur. Howard er engisaxneskur Clausewitz-sérfræðingur.

Alnetið og stafræn útgáfa grófu undan bókabúðum. Það mál kalla það framfarir. En það er eftirsjá af bókabúð MM. 

Máli og menningu lokað varanlega

Samfélag, frelsið og kófið

Í fullkomnu einstaklingsfrelsi myndi hver og einn ákveða sínar sóttvarnir sjálfur. Engar samfélagslegar sóttvarnir væru viðhafðar, hver og einn færi sínu fram. Ósagt: í fullkomnu einstaklingsfrelsi er ekkert samfélag, engir sameiginlegir siðir og enn síður lög og reglur.

Það liggur fyrir að vísindarökin með og móti samfélagslegum sóttvörnum núllast út. Vísindin eru með samfélagssóttvörnum en líka á móti. Fer eftir því hvaða vísindamenn talað er við.

Spurningin sem við, hvert og eitt, þurfum að svara er þessi: hvort er skárra að fylgja samfélagslegum sóttvörnum, útgefnum af þar til bærum yfirvöldum, eða segja sem svo að þar sem óvissa er um haldbærni sameiginlegra sóttvarna, og efnahagslegt og félagslegt tjón hlýst af þeim, er engin ástæða fyrir mig að fylgja reglunum?

Upplýstur og yfirvegaður einstaklingur tekur fyrri kostinn. Annars eigum við ekkert samfélag. Án samfélags værum við öll verr á vegi stödd.

Þetta þýðir vitanlega ekki að við eigum að hlýða yfirvöldum í blindni. Skiptar skoðanir eru æskilegar, þær ydda málefnin. Allur þorri þeirra sem eru á öndverðri skoðun við ríkjandi sjónarmið virðast andmæla í góðri trú.

Eins og Þorgeir sagði á kristnitökuþinginu forðum ættum við að varast ,,þá er mest vilja í gegn gangast." En því miður er það einatt þannig að öfgamennirnir ráða ferðinni þegar umræðan verður svart-hvít.

Höfum í huga að án laga og reglna virkar samfélagið ekki. Við sættum okkur við umferðareglur þótt við teljum okkur vel fær að aka af öryggi á meiri hraða en leyfilegum hámarkshraða. Sama gildir um fjölmörg lög og reglur. Samfélag krefst málamiðlana, er að því leyti líkt hjónabandi.

Þegar kurlin koma öll til grafar eru sameiginlegar sóttvarnir spurning um traust. Það er betra að treysta lögmætum yfirvöldum, jafnvel þó að þau geri annað veifið mistök, heldur en að tileinka sér vantraust. Alveg eins og það er betra að elska og tapa en að elska ekki.

 

Leggur ekki til hertar aðgerðir

Veiðileyfi stjórnmálaflokka á unglinga

Stjórnmálaflokkar beina nú þegar athyglinni að aldurshópnum 16 til 18 ára, þótt kosningaaldur sé 18 ár.

Ef kosningaaldur er lækkaður niður í 16 ár eru fermingarbörn komin í pólitískan markhóp.

Það yrði hvorki framför fyrir æskuna né yki það lýðræði þjóðarinnar. 

Fæstir 18 ára bera ábyrgð á sjálfum sér þótt þeir nái lögaldri. Ungt fólk er á framfæri foreldra sinna fram eftir þrítugsaldri. Lýðræði felur í sér ábyrgð.

Leyfum æskunni áhyggjulausa daga.

Vilja lækka kosningaaldur í 16 ár

Hægripólitík ókyrrist

Sama daginn er tilkynnt um fjölmiðil á hægri væng stjórnmálanna og pólitískt framboð. Sameiginlegt einkenni fjölmiðla og stjórnmála síðustu ára er hve auðvelt er að koma ár sinni fyrir borð. Inga Sæland er flokkur og Stundin er fjölmiðill. Ekki ætti að lesa of mikið í tilkynningarnar tvær.

Engu að síður. Það er kosningavetur og stakar bárur verða ólgusjór við snögga veðrabreytingu.

Íslenska hægrið er flugmóðurskipið Sjálfstæðisflokkurinn og beitiskipið Miðflokkurinn. Á vinstri kantinum eru síðri för s.s. rekald sjóræningjaskips, kafbáturinn Viðreisn, flöt samfylkingarbytna og vinstri grænn léttbátur.

Vinstrimenn munstra sig á víxl á smáfleyin, eftir byr og væntingum um herfang, á meðan hægrimenn eru sjóliðar ýmist á móðurskipinu eða á dekki beitiskipsins.

Ef duggunum fjölgar á hægrimiðum kvarnast úr áhöfnum stórskipanna.

Ókyrrðin á stjórnborði rúmast í tveim orðum: Íslendingar - útlendingar. 

 

Fjársterkir aðilar koma að nýjum fjölmiðli

Lífslist í smitlandi

Fólk nýtur útivistar í meira mæli á tíma farsóttar. Þingvellir fyllast á fallegum haustdegi og göngustígar betur nýttir en í venjulegu árferði.

Fyrirsjáanlega dregst núverandi bylgja veirunnar fram undir aðventu.

Eftir smávegis óþol um mánaðarmótin, þegar hertar reglur voru kynntar, er þokkalegt yfirbragð á umræðunni um sóttvarnir.

Þeir þrætugjörnu leita sér að tittlingaskít að pexa um, eins og furðufyrirbrigðið ,,nýju stjórnarskrána". 

Aðrir njóta útivistar.

Allt öðruvísi faraldur en í vetur

Biden-hatur og Trump-von

Eldsneyti kosningabaráttu Joe Biden er hatur, að hvítir hati svarta, að forsetinn hati gamlingja, að miðaldra karlmenn hati minnihlutahópa og að alþjóð hati náttúruna og sé um það bil að ganga af henni dauðri.

Trump boðar endurreisn Bandaríkjanna, minna vopnaskak í heiminum, frið í miðausturlöndum og velferð almennings framar vexti alþjóðafyrirtækja.

Hatrið er máttug tilfinning, með 17 prósentustiga forskot á vonina.

Biden með 17 prósentustiga forskot á Trump