Píratar biðja um fleiri Piur á alþingi

Píratar leggja til að handahófsúrtak ráði vali á tíu einstaklingum er fái að ávarpa alþingi. Fordæmið, sem Píratar vísa til um fólk sem ekki er alþingismenn en fá engu að síður leyfi til að tala á fundi alþingis, er Pia Kjærs­ga­ard.

Píratar mættu ekki þingfundinn með Piu, af því hún hafði rangar skoðanir, en fannst allt í lagi að skála við hana enda kunna Píratar ekki útlensku.

Spurning hvort frekari skilyrði Pírata verði sett á þá tíu sem fái að tala á alþing, t.d. að þeir hafi skoðanir sem Píratar þola og að þeir tali íslensku.

Almenningur fái að ávarpa Alþingi

Menntun skýrir launamun, ekki kynferði

Yngri konur eru með meiri menntun en karlkyns jafnaldrar þeirra. Af því leiðir eru konur á aldr­in­um 18-27 ára í vinnu hjá hinu opinbera með hærri laun en karlar í sama aldursflokki.

Í meira en tvo áratugi útskrifast fleiri konur en karlar með stúdentspróf, sem er undirbúningur fyrir háskólanám. Í nær öllum deildum háskóla eru konur fleiri en karlar.

Fólk hefur frjálst val um hvaða nám og störf það tekur sér fyrir hendur. Kynbundinn munur kemur fram í þessu vali. Þannig eru konur 80 prósent kennara en innan við 1% flugvirkja.

Það örlar á þeirri hugsun að ,,kvennastéttir" fái lægri laun en dæmigerðar ,,karlastéttir". En starfsgreinar eru mannaðar eftir framboði á starfsfólki. Fyrir tveim kynslóðum var kennarastéttin býsna karllæg.

Ólíkt val karla og kvenna á námi og störfum sýnir að það er munur á milli kynjanna. Sá munur er ekki föst stærð heldur tekur þróast hann í menningunni. 

Rangar ályktanir um launamun kynja

Sósíalistar réttu Gylfa bikar af eitri

Gylfi Arnbjörnsson forseti ASÍ kveður embættið með orðum Forn-Grikkjans Sókratesar: Nú skilj­ast leiðir en hvor fer betri för er öll­um hulið nema guðunum.

Sókrates var dæmdur til að drekka eiturbikar fyrir hálfu þriðja árþúsundi fyrir að hafa rangar skoðanir.

Síðustu orð hans voru samkvæmt Platón lærisveini hans: við eigum skuld að gjalda.

„Allt er breytingum háð“

Trump heiðarlegasti forsetinn

Trump er heiðarlegasti seinni tíma forseti Bandaríkjanna. Nei, staðhæfingin kemur ekki frá Fox-fréttum eða fréttablaði Ku Klux Klan heldur stórblaðinu Washington Post sem er í óvinaliði forsetans.

Dálkahöfundurinn Marc A. Thiessen segir Trump heiðarlegan á þann mælikvarða sem öllu skiptir fyrir forseta - og stjórnmálamenn almennt - sem er hvort hann haldi kosningaloforðin.

Og þar stendur Donald sterkur. Hann lækkaði skatta, lækkaði atvinnuleysi þeldökkra, flutti sendiráð Bandaríkjanna til Jerúsalem, hætti í loftslagssirkusnum, flutti iðnaðarstörf heim til Bandaríkjanna, setti ferðabann á múslíma og skar niður íþyngjandi regluverk sem hamlaði atvinnulífinu. Trump gaf loforð og efndi þau.

Jú, segir Thiessen, forsetinn tístir oft ýkjum og ósannindum. En hann er orðheldnari en flestir aðrir forsetar Bandaríkjanna síðustu áratugina. Það má treysta kosningaloforðum fasteignasalans frá New York.

Trump segir ósatt um fólkið í göngunni

Lækkum hæstu ASÍ-launin, til að hækka þau lægstu

Í Kastljósi kvöldsins voru tveir frambjóðendur til forseta ASÍ sammála um að það yrði að hækka lægstu launin, sem eru um 300 þús. á mánuði, upp í 425 þús. kr. á næstu 3 árum.

Meðallaun ASÍ-félaga eru rúm 700 þús. kr. á mánuði. Sem þýðir að sumir þéna hressilega þar fyrir ofan, með milljón eða meira á mánuði (í þeim hópi eru líklega allir topparnir í ASÍ-hreyfingunni).

Samtök atvinnulífsins ættu að gera ASÍ tilboð sem ekki er hægt að hafna: Ná upp lægstu launum með því að lækka þau hæstu. 

Málið dautt.

Vill gera breytingar og hreinsa til

Þjóðkirkjan og RÚV: ólík herfræði og gagnólíkur árangur

Þjóðkirkjan eins og RÚV má muna fífill sinn fegurri. Einu sinni voru þessar ríkisstofnanir óskoraðar í veldi sínu trúmálum annars vegar og hins vegar rafrænni fjölmiðlun.

Þegar RÚV sá fram á dauða og tortímingu vegna breyttrar fjölmiðlunar ákvað stofnunin að gera sig ómissandi fyrir hóp fólks sem fer bæði með bein og óbein völd í samfélaginu; vinstrimenn. Með stuðningi vinstrimanna er RÚV enn á fjárlögum og fær ríkisframlag til að þjóna sínum umbjóðendum - vinstrimönnum.

Þjóðkirkjan fór þveröfuga leið. Hún leitaði friðar og sátta við fjandmenn sína, útþynnti boðskapinn og gerði gælur við tískustrauma í dægurumræðunni. Kirkjan missti stuðning þeirra sem telja hana mikilvæga fyrir kristna menningu en fékk aðeins fyrirlitningu frá fjandmönnum fyrir linkuna og aumingjaháttinn.

RÚV lifir á bandalaginu við valdablokk í samfélaginu en þjóðkirkjan fellur milli skips og bryggju.

Færri treysta þjóðkirkjunni

Vinnan skapar hamingju, Katrín

Hvort sem maður ráðfærir sig við sígilda snillinga eins og Ciceró, sálkönnuð á borð við Sigmund Freud eða félagsvísindamanninn Charles Murray er niðurstaðan ein og söm: vinnan er snar þáttur í hamingju mannsins.

Vinnan er þátttaka í samfélagi, forsenda sjálfsbjargar og þar með sjálfsvirðingar.

Forsætisráðherra Íslands ætti að gjalda varhug við þeirri tísku að hallmæla vinnunni. Ónytjungar á vinstri kanti stjórnmálanna eru ekki leiðarvísir að heilbrigðu samfélagi.

Íslendingar alltaf að hugsa um vinnuna

Innrás í bandaríska velferð

Velferðarríkið í Bandaríkjunum er ekki öfundsvert, séð frá evrópskum, og hvað þá norrænum, sjónarhóli. Aftur eru Bandaríkin segull fyrir fátækari þjóðir sunnan við stórveldið. 

Flóttamannalestin frá Hondúras, sem stefnir að suðurlandamærum Bandaríkjanna og stækkar óðfluga, er í tilefni þingkosninganna. 

Augljóst er að Trump forseti og Repúblíkanaflokkurinn eru líklegastir til að fá aukið fylgi vegna flóttamannalestarinnar. Þegar landamærum ríkis er ógnað fá þeir stuðning sem lofa að verja þau. Umræðan er aftur öll í þá áttina að andstæðingar Trump séu helstu bakhjarlar flóttamannanna.

 

Mörg þúsund á leið að landamærunum

Vegurinn, sannleikurinn og nýja verkó

Sósíalistarnir sem yfirtaka verkalýðshreyfinguna eru sértrúarsöfnuður með einn sannleika. Orðfærið er beint upp úr byltingarbókmenntum 19. aldar: 

Sól­veig Anna Jóns­dótt­ir, formaður Efl­ing­ar, hjól­ar í Hörð Ægis­son, rit­stjóra Markaðar­ins, í pistli sem hún birt­ir á Face­book nú í kvöld, en þar seg­ir hún leiðara Harðar í Frétta­blaðinu á föstu­dag­inn lýsa „sturlaðri“ stemmn­ingu í „her­búðum óvina vinn­andi stétta“. Seg­ir hún að í pistli sín­um hafi Hörður reynt að kúga vinn­andi fólk til hlýðni „með sjúkri og viðbjóðslegri orðræðu“ þar sem til­gang­ur­inn sé að „skelfa fólk til hlýðni“.

Sértrúasöfnuður sósíalista vill gera verkalýðshreyfinguna að framfærslufélagi. Launþegar eiga ekkert sameiginlegt með nýju verkó.

„Breytingar keyrðar áfram af mannvonsku“

RÚV: Darwin hafði rangt fyrir sér

Þróunarkenning Darwin liggur til grundvallar skilningi okkar á þróun lífs á jörðinni. Án kenningarinnar verður óskiljanlegt hvernig eitt lífsform leysti annað af hólmi í jarðsögunni sem telur um 4,5 milljarða ára.

Í upplýstri umræðu er þróunarkenningin tekin sem gefin. RÚV stimplar sig úr upplýstri umræðu þegar stofnunin gengur að því vísu að kynin séu fleiri en tvö. Fyrirsögnin ,,Breyta skilgreiningu á kynjum" er á frétt um að bandarísk heilbrigðisyfirvöld staðfesti að kynin séu aðeins tvö.

Í meðförum RÚV eru þau hversdagssannindi, að kynin séu aðeins tvö, gerð tortryggileg. Og auðvitað er það Trump að kenna.

Þegar RÚV er á annað borð komið út í móa í vitsmunalegri umræðu mætti kannski rukka stofnunina um hve kynin eru mörg. Og í leiðinni spyrja hvaða rétttrúnaðarlíffræði er stunduð á Efstaleiti núna þegar Darwin hefur verið úthýst.