Leitin að sakleysi Jóns Ásgeirs

Jón Ásgeir, kenndur við Baug, var hvað djarftækastur útrásarmanna. Engu eirði hann, hvorki voru bankar, fjölmiðlar, byggingavöruverslanir né prentsmiðjur, hér heima og í Englandi, óhultar fyrir ásælni Baugsstjórans. Lífeyrissjóðir voru í skotlínunni, þeim var gert að skaffa hlutafé ellegar fá samkeppni frá máttarvaldinu.

Að ekki sé talað um orðspor stjórnmálamanna sem lögðu stein í götu unga athafnamannsins. Þeirra beið ekkert annað falsfréttir og útskúfun af hálfu Baugsmiðla. Ítök Jóns Ásgeirs í samfélaginu voru slík að heil ríkisstjórn var skírð í höfuðið á veldi hans: Baugsstjórnin 2007. Ári seinna knúði hrunið dyra og á einni nóttu varð óskabarn auðjöfursins að hrunstjórninni. 

Strax eftir hrun flutti Jón Ásgeir inn viðskiptafélaga frá Bretlandi til að kaupa íslensk verðmæti á slikk.

Útgáfu bókar um sakleysi Jóns Ásgeirs seinkar. Skal engan undra. Það er djúpt á sakleysi Seltirningsins. Mjög djúpt.

Útgáfu Málsvarnar Jóns Ásgeirs Jóhannessonar seinkar

Andlát barns sem fóður fyrir skelfingu

Kínaveiran og umræðan um hana eru tveir aðskildir heimar í þeim skilningi að skelfingin í umræðunni er stórum meiri en heimild er fyrir í staðreyndum.

Veiran er hættuleg, já. Sóttarvarnir, já. Skelfing, nei.

Í viðtengdri frétt er sagt frá andláti barns í Noregi af völdum veirunnar. Fyrsti ,,barnadauðinn í Noregi" segir í fréttinni. Barnið var með undirliggjandi sjúkdóm, ótilgreindan.

Skelfingarumræðan krefst sérstakra helgisiða. Forsætisráðherra Noregs og aðrir ráðherrar senda foreldrum samúðarkveðjur. Hvað ætli mörg börn deyi í Noregi á ári hverju án þess að fyrirmenni sendi aðstandendum samúðarkveðjur?

Þyngra er en tárum taki þegar barn deyr. En því miður gerist slíkir sorgaratburðir í mannlífinu, oftast af völdum slysa eða sjúkdóma.

Kínaveiran mun, þegar upp er staðið, ekki breyta stóru um andlát á ári hverju. Hlutfall þeirra sem deyja er, góðu heilli, það lágt.

Skelfingarumræðan á hinn bóginn er vís með að hafa margvísleg áhrif og þau jafnvel langvarandi. Almennt má segja um skelfingu er að hún er ónotaleg tilfinning sem skerðir dómgreind. Samfélag ótta og ímyndaðra hamfara er ekki eftirsóknarvert.

Barn lést af völdum Covid í Noregi

Heimssýn, ESB-flokkar og stjórnarskráin

ESB-flokkar á alþingi, Samfylking og Píratar,  standa að frumvarpi um stjórnskipunarlög. Í umsögn Heimssýnar er vakin athygli á því að frumvarpið gerir ráð fyrir að einfalt verði fyrir Ísland að ganga í Evrópusambandið.  

Í öllum þeim tilvikum sem tilgreint er að aukinn meirihluta þurfi er um að ræða afturkræfar ákvarðanir eða ákvarðanir sem vart munu skipta sköpum fyrir Íslendinga.  Á hinn bóginn er ekki gert ráð fyrir auknum meirihluta í uppskrift frumvarpsins að inngöngu Íslands í Evrópusambandið í 113. grein. Þar er þó um að ræða ákvörðun sem mjög erfitt, ef ekki ómögulegt, er að draga til baka.  Ósamræmið er hér himinhrópandi, en væri auðvelt að leysa með því að bæta við 113. grein ákvæði um að ¾ hluta Alþingis og þjóðarinnar þyrfti til að samþykkja valdaframsal á borð við aðild að Evrópusambandinu, eða öðrum samningum sem þar gætu fallið undir.  Óháð því frumvarpi sem hér er lagt fram væri slík málsmeðferð eðlileg. 

Hvorki er þetta lýðræðislegt né heiðarlegt, segir Heimssýn í umsögn sinni.

Ísland er einbúi (staðfest)

Einbúi er algengasta örnefnið hér á landi, samkvæmt Landmælingum Íslands. Örnefni hljóta að einhverju marki lýsa hugarþeli samfélagsins þar sem þau verða til.

Elstu sögur herma að landnámsmenn tóku sér stórt land til ábúðar, gáfu vinum og vandamönnum skika hér og hvar en alla þó í hæfilegri fjarlægð.

Einbúarnir vildu ekkert þéttbýli, gerðu t.a.m. sérstaka samþykkt árið 1490, Píningsdóm, sem girti fyrir vetursetu útlendinga og þar þorpsmyndun.

Þegar einboðið var að þjóðin héldi ekki í við lífskjör nágrannaþjóða nema með útgerð var fallist með semingi á illa nauðsyn og einbúinn sættist á margbýli - með skilyrði um séreign.

Þetta eru algengustu örnefni Íslands

Krónusamtal Loga og Tobbu Kötu

Síminn hringir hjá Loga sem teflir við páfann í kytru á Austurvelli.

Logi; já, ég er svolítið upptekinn...

Tobba Kata: Upptekinn!!! Ég skyldi halda það, við hvað þá? Að sturta niður samstjórn okkar, ykkar og Pírata eftir kosningarnar í haust?

Logi; Tja, sturta niður, hvað áttu við?

Tobba Kata: Logar ekki á öllum hjá þér? Geiri seðló var að lækka stýrivextina niður fyrir eitt prósent. Minna en eitt fokkings prósent. Hvernig eigum við að selja fólki hugmyndina um vaxtaokur, hávaxtakrónu og ónýta í þokkabót þegar stýrivextir eru undir núlli?

Logi: Tja, er ekki evran með enn lægri vexti. Getum við ekki keyrt á þann punkt?

Tobba Kata: Halló Hafnarfjörður, það eru mínusvextir í Evrópu. Ætlar þú að bjóða þann kost? Veistu hvað það gerði lífeyriskerfinu okkar? Sumir verða utan þings eftir kosningar og fara beint á lífeyri...

Logi; Þú segir nokkuð, verðum við bara ekki að hætta að tala um krónuna?

Tobba Kata: Hvað kæmi í staðinn fyrir ónýta krónuumræðu?

Logi: Nú, loftslagsmál, auðvitað. Sláum tvær flugur í einu höggi. Hótum hamfarakrísu og stelum fylgi af Vinstri grænum.

Tobba Kata: Brilljant Loginn minn, brilljant, þó þú sért með allt niðrum þig.

Logi: Ef þú bara vissir...

Tobba Kata: Heyrðu, ég má ekki vera aðessu, á bókaðan rástíma á Hveragerðisvelli. Verðum í bandi.

Logi sturtar niður. Tjaldið fellur.

Önnur stýritæki þróuð ef stýrivextir fara í 0%

70 milljónir hælisleitendur - hve margir til Íslands?

Um 70 milljónir einstaklinga eru hælisleitendur á heimsvísu, samkvæmt Sameinuðu þjóðunum. Hver og einn þeirra getur komið til Íslands og krafist alþjóðlegrar verndar.

Áslaug dómsmálaráðherra segir að sérhver umsókn fái ,,rétt­láta og vandaða málsmeðferð."

Á augabragði getur landið orðið hæli - fyrir alla aðra en Íslendinga.

 

 

Fjöldi þegar með vernd áhyggjuefni

Menntun til góðs eða ills?

Samfélagsólga vestrænna ríkja síðustu ára er rekin til offramboðs af menntuðu fólki sem fær ekki störf við hæfi, segir i frétt Economist.

Annað slagið kemur fram það sjónarmið hér á landi að fólk fái ekki störf er hæfa menntun sinni. Jafnvel örlar á þeirri hugsun að þar sem ríkisvaldið bjóði ungu fólki menntun, og hvetji til hennar, sé ríkið að einhverju marki skuldbundið til að skaffa störf við hæfi að lokinni útskrift.

Fram að háskólanámi þjónar menntakerfið þrennum tilgangi. Í fyrsta lagi að veita einstaklingum tækifæri til þroska, í öðru lagi félagsskap jafnaldra og í þriðja lagi útvega vinnumarkaðnum starfsfólk. Allt eru þetta verðug markmið.

Þegar komið er að háskóla ætti ríkið að láta af öllum tilburðum til að stýra hvort fólk sæki þangað og í hvaða nám. Hvorki ríkið né nokkur annar veit hvernig starfskrafta atvinnulífið þarf eftir áratug eða tvo.

Háskólanám á að vera tilboð til ungs fólks að læra það sem hugurinn stendur til, algjörlega á eigin ábyrgð. Þá verður menntun til góðs en ekki ills. 

Ný menntastefna til ársins 2030

Hvað með loftslagið, Vinstri-græn?

Eitt prósent fólks veldur helmingnum af útblæstri allra heimsins þotuhreyfla farþegaflugvéla, segir ný rannsókn. Vinstri grænir, Gréta Thunberg og sálufélagar segja jörðina óðum að verða óbyggilega vegna útblásturs jarðefnaeldsneytis. 

Kínaveiran snarfækkar farþegaflugum og flugfélög ramba á barmi gjaldþrots. Skyldi ætla að Vinstri grænir og loftslagsglópar myndu fagna veirubjörgun loftslagsins og viðhalda samdrætti útblásturs.

En, nei, það á að liðka fyrir auknum útblæstri, afnema höft og hindranir.

Er ekkert að marka loftslagsvá Vinstri grænna?

Sýnataka á landamærum verður gjaldfrjáls

Veiran skaðar dómgreindina mest

Kínaveiran sýnir sig hafa víðtæk samfélagsleg áhrif, langt umfram þau sem heilbrigðisvandi vegna COVID-19 gefur tilefni til. Efnahagslegar afleiðingar eru alþjóð þegar kunnar. En veiran og vörnin gegn henni ristir dýpra.

Gulli utanríkis segir að í skjóli farsóttar sé alþjóðlegt samsæri gegn fjölmiðlum annars vegar og hins vegar trúfrelsi.

Illt að heyra. Kínaveiran er sem sagt búin að leysa af hólmi loftslagsvá sem mesta ógn mannkyns.

Í gamla daga var þetta einfaldara. Reiði guðs útskýrði bæði Tyrkjaránið og móðuharðindin. Núna er það ýmist manngert veður eða manngerð veira. Þegar alþjóð velur sér jafn ómerkilega óvini er er skammt í raðbilun dómgreindarinnar.

Nota faraldur til að koma höggi á fjölmiðla

Síðasta vígi opins samfélags vinstrimanna fallið

Sænska leiðin í farsóttarvörnum, litlar takmarkanir í opnu samfélagi, er fallið. Sænska ríkistjórnin, kratísk eins og hör og bör, hélt úti vin í eyðimörkinni, að áliti sumra hægrimanna, sem ekki skellti í veirulás.

Vinstrimenn eru glettilega samstíga í viðhorfum til sóttvarna. Almennt vilja þeir loka og sumir harðlæsa samfélögum í glímunni við Kínaveirunni, sbr. Nýja-Sjáland. Hægrimenn aftur, sumir hverjir, vilja halda í opið samfélag og einstaklingsfrelsi og gjalda varhug við lokunum. Sigríður Anderssen og Brynjar Níelsen til dæmis. (Innan sviga: íhaldssamir hægrimenn, t.d. skarfurinn ég, eru frekar á lokunar-línunni).

Góðu fréttirnar, einkum fyrir íhaldsmenn, eru að nú þegar vinstrimenn og frjálslyndir játa sig lokunarsinna er brostin ein meginstoð alþjóðahyggju síðustu áratuga. Að frjálst flæði fólks geri heiminn betri. Þvert á móti verður heimurinn verri og því verri sem frjálsræðið er meira. Aukið frjálsræði veit á ábyrgðarleysi, eins og mýmörg dæmi sanna. Frelsi án ábyrgðar er eins og drykkjumaður sem ætlar aðeins að dreypa á víninu. Góður ásetningur endar alltaf með skelfingu, bæði fyrir drykkjumanninn sjálfan og aðstandendur.

Átta manna samkomubann í Svíþjóð