Blekking í þágu 3. orkupakka ESB

Með orkustefnu ESB fáum við samkeppni á íslenskum raforkumarkaði, segja talsmenn þess að framselja vald yfir raforkumálum okkar til Brussel.

Það er blekking. Samkeppni verður aldrei á íslenskum raforkumarkaði þannig að íslenskir neytendur njóti góðs af. Til þess er markaðurinn of lítill. 

Það er þykjustusamkeppni undir handleiðslu Orkustofnunar sem gæti sparað meðalfjölskyldunni andvirði einnar bíóferðar fyrir einn eða tvo einu sinni á ári. Eyjan gerir sér mat úr þykjustunni.

Íslendingar greiða lágt raforkuverð í samanburði við Evrópu. Ef þriðji orkupakkinn verður samþykktur, og sæstrengur lagaður, munu orkufyrirtækin fremur selja dýrt til Evrópu en ódýrt til Íslendinga.

Það er mergurinn málsins.

Flökkusögur um vændi, sjálfsmorð og Gunnar Braga

Kona segist hafa selt líkama sinn og meðal kúnna séu ,,þekktir menn". Almannarómur fyllir út í eyðuna.

Flökkusaga um aukna sjálfsmorðstíðni í hruninu var jörðuð - tíu árum síðar.

Flökkusaga um Gunnar Braga drukkinn í leikhúsi jarðaði trúverðugleika fjölmiðils.

Netvæddur almannarómur er síljúgandi.

Þekktir menn á meðal vændiskaupenda

Klausturþingmenn fá stuðningsyfirlýsingu

Þeir þingmenn sem töluðu ógætilega á ólöglegri upptöku á veitingastaðnum Klaustri fengu óvænta stuðningsyfirlýsingu. 

Boðað var til mótmæla á Austurvelli vegna orðræðunnar á Klaustri. Um 100 manns mættu, Bára hljóðmaður meðtalin, en Helga Vala sást ekki svo vitað sé.

100 manna mótmæli eru stuðningsyfirlýsing.

Ósátt við Klaustursþingmenn

Alþingi þjóðarinnar - eða götunnar

Alþingi þjóðarinnar er skipað löglega kjörnum fulltrúum. Alþingi götunnar vill breyta þessu fyrirkomulagi, að þeir einir sitji alþingi sem ekki fá á sig mótmæli á samfélagsfjölmiðlum.

Alþingi götunnar veit á upplausn og óreiðu; alþingi þjóðarinnar er forsenda stöðugleika og velferðar.

Á hverjum tíma sitja 63 fulltrúar þjóðarinnar alþingi. Þeir eru með sínum kostum og göllum. Við skulum halda því fyrirkomulagi.

Vilja Klaustursþingmenn ekki aftur á þing

Evrópa: kristni, kommúnismi og ESB

Í yfirlitsriti um miðaldir, sem fyrst kom út um miðja síðustu öld, segir i fyrstu efnisgrein: Þessi bók gæti heitið Evrópa miðalda. En það væri rangnefni. Þá sjaldan að notað var hugtak yfir alla álfuna var hún kölluð ,,hinn kristni heimur" - ekki Evrópa. 

Kristindómur, bendir höfundurinn á, Denys Hay, var stærri en Evrópa, náði inn í Asíu. Þar að auki voru hlutar Evrópu nútímans, austurhluti Þýskalands og slavneskar þjóðir þar fyrir austan, ekki taldar með kristni fyrr en seint á 14. öld.

Miðaldir náðu yfir þúsöld, 500 til 1500. Almenn sátt er um upphaf þeirra, hrun Rómarveldis, en nokkrir atburður í kringum 1500 þykja marka endalok miðalda: prentverk Gutenberg um miðja 15. öld, fall aust-rómverkska ríkisins í Miklagarði 1453, ferð Kólumbusar til Ameríku 1492 og mótmæli Lúthers 1517.

Tímabilin sem brúa miðaldir við löngu 19. öldina eru kennd við endurreisn annars vegar og hins vegar upplýsingu. Kristni var ráðandi hugmyndafræði bæði þessi tímabil. Blóðugt 30 ára stríð kaþólikka og mótmælenda 1618-1648 sýndi að menn drápu og dóu fyrir rétta útgáfu af kristni.

Langa 19. öldin frá frönsku byltingunni 1789 til fyrra stríðs 1914 bauð upp á kristna heimsvaldastefnu. Kristnu stórveldin, einkum Bretland og Frakkland, stunduðu stórfelldan útflutning á hugmyndafræðinni og fléttuðu saman við landvinninga í Afríku og Asíu. Önnur þróun í kristnu heimaríkjunum, einstaklingsfrelsi og lýðræði, gróf jafnt og þétt undan kristinni hugmyndafræði á löngu 19. öldinni.

Fyrri heimsstyrjöld var síðasta kristna stórstríðið. Enginn einhugur er um hvað hleypti af stað stríðinu. Bókin sem stendur upp úr á aldarafmælinu heitir Svefngenglar. Titillinn er kenningin; leiðtogar stærstu Evrópuríkja álpuðust í stríð. Fyllri titill væri Kristnir svefngenglar. 

Síðasta andvarpi kristni fylgdu veraldleg trúarbrögð, fasismi og kommúnismi. Þau nutu hylli víða um álfuna á síðustu öld en bættu ekki mannlífið þegar til lengdar lét.

Upp úr þessari sögu verður til hugmynd um ESB-Evrópu, valkostur fyrir trúlausa menningu skreyttri með hortittum eins og fjölmenningu og frjálslyndi. Menntamenn lýsa yfir áhyggjum að ESB-Evrópa sé að renna sitt skeið.

Í stóra samhenginu er ESB hagkvæmnishjónaband öflugustu ríkja álfunnar, Frakklands og Þýskalands. Önnur ríki eru gestir. Hjónaband af hagkvæmni skortir staðfestu sem aðeins fæst með djúpri sannfæringu, - t.d. trúar.

 

 

Áhlaup á fullvalda þjóð

Venesúela er fullvalda þjóð. Þótt stjórnvöld í landinu séu ekki upp á marga fiska eru þau lögmæt. Það er ekki íslensku ríkisstjórnarinnar að tala fyrir vilja venesúelsku þjóðarinnar.

Vestræn stórveldi, Bandaríkin og ESB, eru búin að ákveða að fella ríkisstjórnina í Caracas. Sömu stórveldi ákváðu að setja af lögmætt ríkisvald í Írak, Sýrlandi og Líbýu fyrr á þessari öld og leiddi það til hörmunga er enn standa yfir.

Vitanlega breytir engu hvað sagt er í Reykjavík um Venesúela. En það er huggulegra að hafa yfir sér stjórnvöld með snefil af dómgreind og eitthvað örlítið af siðviti. Þegar Gulli utanríkis talar eins og eftir er haft í viðtengdri frétt efast maður um að svo sé.

„Ástandið er óþolandi“

Börn mótmæla náttúrunni

Loftslag ræðst af náttúrulegum ferlum og hefur alltaf gert. Þeirri hugmynd er plantað í blessuð börnin að maðurinn stjórni loftslaginu. Börnin, samkvæmt viðtengdri frétt, þyrpast úr skóla til að mótmæla fyrirbæri sem ekki er til - manngerðu veðri.

Börn ætti ekki að blekkja með pólitískum vísindum sem kennd eru við loftslag.

Ranghugmyndir um lífið og tilveruna leiða yfirleitt til ófarnaðar.

Í skólaverkfall gegn loftslagsbreytingum

Evrópa er hugmynd, eins og kommúnismi

Evrópa er að deyja, segir í yfirlýsingu 30 frjálslyndra vinstrimenntamanna sem líkja ástandi álfunnar við tíma fasisma á fjórða áratug síðustu aldar.

Fjölþjóðlegu menntamennirnir er fangar hugmyndarinnar um Evrópu, líkt og sálufélagar þeirra á fyrri hluta síðustu aldar sem lögðu á sig fjötra annars hugmyndakerfis, kennt við kommúnisma.

Ástæða örvæntingar 30-menninganna er framgangur þjóðlegrar lýðhyggju. Evrópuhugmyndin, eins og kommúnismi, er sannfæring um að eitt sniðmát menningar og stjórnskipunar eigi að gilda fyrir alla. Þjóðleg lýðhyggja hafnar þessari hugmynd og segir að hvert samfélag eigi að búa að sínu.

Evrópa reyndi sjálfsmorð tvisvar á síðustu öld, eins og fram kemur í yfirlýsingunni. Í bæði skiptin komu þjóðríki til bjargar, Bandaríkin og Bretland. Rökrétta ályktunin er að skipulag þjóðríkisins sé snöggtum skárra en alþjóðaríkis, sem ýmist er stjórnað frá Brussel eða Moskvu. 

Brexit er andstaða við undirgefni

Írar eru þjálfaðir í undirgefni, voru um aldir undir hæl Englendinga. Þegar ESB knúði Íra til kjósa aftur um Nice-sáttmálann 2002, eftir að hafa fellt sáttmálann í þjóðaratkvæði árið áður, mótmæltu sögulega barðir Írar ekkert sérstaklega.

Bretland er aftur gamalt heimsveldi og ekki vanir að beygja sig fyrir öðrum þjóðum. Það er allt annar handleggur að krefja Breta um nýtt þjóðaratkvæði en Íra.

Brexit er andstaða við undirgefni gagnvart ESB. Brussel-valdið skilur það einfaldlega ekki.

ESB vill að Bretar kjósi aftur

Synd og fyrirgefning - og virkir í athugasemdum

Tvær hliðar eru á málinu kennt við Klaustur með stóru ká-i. Syndin, sem var drýgð, þ.e. orðfæri þingmanna um samferðafólk, og fyrirgefning sem viðkomandi þingmenn biðja á orðum sínum.

Virkir í athugasemdum í fjölmiðlum og á þingi velta sér upp úr syndinni, segja að hún sé of stór til að afsökunarbeiðni verði tekin til greina. Virkir í athugasemdum þrífast á syndinni, bæði eigin og annarra.

Fyrirgefning kemur aðeins til álita hjá þeim sem sigrast á sálarástandi virkra í athugasemdum.

Bað Lilju fyrirgefningar