Reykjanesbær og næsta hrun

Viðskiptaráð leggur til Reykjanesbæjarleiðina að næsta hruni. Sniðmát Reykjanesbæjar er að selja fasteignir sínar og verða gjaldþrota nokkrum árum síðar.

Sniðmátið felur í sér að einkaaðilar mergsjúgi bæjarsjóð/ríkissjóð í gegnum leigutekjur af opinberum fasteignum.

Viðskiptaráð starfar við að finna leiðir til að sækja skattfé og færa það einkaaðilum á silfurfati. Örugg leið að útvega einkaaðilum skattfé er að stela, afsakið selja, fasteignir ríkisins til einkaaðila með langtímaleigusamningum.

Í þessu fyrirkomulagi er engin samkeppni. Einkaaðilar fá ríkistryggða mjólkurkú sem má blóðmjólka fram að næsta hruni.

Ríkið selji hundruð fasteigna

Skyndilegt áhugaleysi RÚV á Sigmundi Davíð

Þingflokkar tefla fram stórskotaliðinu þegar þingfundir eru í beinni sjónvarpsútsendingu. Sigmundur Davíð talar fyrir Framsóknarflokkinn, auk formanns og varaformanns.

Það þykir frétt á mbl.is enda hafa óvandaðir fjölmiðlar gert því skóna að köldu andi á milli fráfarandi formanns og þess sem nú situr embættið.

Fréttastofa RÚV þegir þunnu hljóði um að Sigmundur Davíð tali í kvöld. Samt er það fréttastofan sem segir frá stórum og smáum atburðum í tilveru þingmannsins. Hvað veldur skyndilegu áhugaleysi RÚV?

Sigmundur talar fyrir Framsókn

Samfylkingin svíkur baklandið

Samfylkingin er með þrjá þingmenn á alþingi. Þeir koma allir úr landsbyggðarkjördæmum þar sem andstaðan við aðild Íslands að Evrópusambandinu er sterkust.

Samfylkingin hyggst svíkja bakland sitt með tillögu um að endurvekja misheppnuðu ESB-umsóknina frá 2009.

Eins og alþjóð veit er Samfylkingin giska snjöll að svíkja umbjóðendur sína. Síðustu tíðindi segja okkur að flokkurinn hefur engu gleymt og ekkert lært.

Múslímar banna bækur, óttast hugmyndir

Múslímar eru á miðöldum þegar þeir banna bækur. Rökin um að bækur séu ,,menningarleg innrás" eru lýsandi fyrir trúarmenningu sem þolir ekki frjálsa umræðu.

Rannsóknir á trúarmenningu múslíma staðfesta víðtækan stuðning þeirra við forneskju um að trúarsetningar séu æðri mannréttindum, eins og þeim að velja sér trú eftir sannfæringu sinni.

Hamed Abdel-Samad ólst upp í múslímatrú, sonur klerks. Hann líkir trúnni við áfengi sem alltof margir taka í alltof stórum skömmtum. Trúarmenning múslíma lokar skilningarvitunum. Ein leið til að útiloka að þau opnist er að banna bækur.

 

Vill ekki sjá bækur sínar brenndar

Staðreyndir og falsfréttir

Madonna sagðist opinberalega íhuga að sprengja Hvíta húsið. Það er staðreynd. En hún sagðist líka hafna ofbeldi. Það er staðreynd. Hvorri staðreyndinni eigum við að trúa? Ef við trúum báðum erum við komin í mótsögn. Við metum staðreyndir út frá samhengi þeirra. En oft fær maður ekki allt samhengið.

Falsfréttir eru sumar uppspuni frá rótum. En falsfréttir eru líka spurning um hvaða staðreyndir eru valdar af fjölmiðlum sem mikilvægastar; fá fyrirsagnir og uppslátt.

Fjölmiðlar velja sumar staðreyndir og gera fréttir úr þeim en hafna öðrum. Hér heima stundar RÚV að gera aukaatriði að aðalatrið, samanber umfjöllun um tímasetningu skýrslu um aflandsfélög. Það er ein tegund falsfrétta að stinga undir stól fréttum sem ganga í berhögg við þá heimsmynd sem viðkomandi fjölmiðill heldur að fólki.

Í Bandaríkjunum eru fjölmiðlar flokkaðir eftir því hve hlutdrægir þeir eru. Meginuppspretta falsfrétta er í þeim miðlum sem eru hlutdrægastir og óvandaðastir að virðingu sinni.

Ástæðan fyrir stóraukinni umræðu um falsfréttir er að stjórnmálamenning er víða í uppnámi. Við þær kringumstæður er erfiðara að koma við hlutlægri mælistiku á fréttaflutning. Samþykkt viðmið eru ekki fyrir hendi. Falsfrétt eins er hlutlæg staðreynd annars.

En, sem sagt, ég trúi ekki að Madonna hvetji til ofbeldis. Henni var bara heitt í hamsi. Það má. 

Vill ekki sprengja Hvíta húsið

Viðreisn fjárfesti í forsetaframboði Guðna Th.

Guðni Th. Jóhannesson átti fund með formanni Viðreisnar, Benedikt Jóhannessyni, áður en hann ákvað að bjóða sig fram til forseta. Annar frammámaður Viðreisnar, Helgi Magnússon, var örlátur í kosningasjóð Guðna Th.

Eflaust fundaði Guðni Th. með mörgum áður en hann bauð sig fram. Og hann fékk víða fjárframlög.

En óneitanlega vekur athygli hve viðreisnarmenn voru ákafir að gera Guðna Th. að forseta.

Vinstristaðreyndir á válista

Þrjár staðreyndir, sem vinstrimenn ganga að sem gefnum, eru á válista. Sú fyrsta er að frjálslyndi (kynjajafnrétti, réttur samkynheigðra ofl) samrýmist múslímatrú. Vinstrimenn halda í þessa staðreynd vegna þess að hún er forsenda fjölmenningar. En reynslan sýnir að trúarmenning múslíma og frjálslyndi fara ekki saman, eru olía og vatn.

Önnur vinstristaðreynd er að Rússland, Pútín forseti sérstaklega, sé ógn við heimsfriðinn. Þetta viðhorf er markleysa. Sovétríkin féllu fyrir aldarfjórðungi og Rússland hefur síðan lengst af verið í nauðvörn og engum ógnað.

Þriðja vinstristaðreyndin er að frjálslynd alþjóðahyggja sé uppskrift að velmegun annars vegar og hins vegar friðsamlegri sambúð. Alþjóðahyggjan skilar vaxandi misrétti innan ríkja vesturlanda og varanlegum ófriði, samanber miðausturlönd.

Vinstristaðreyndirnar eru á válista vegna þess að andstæð pólitísk öfl, s.s. Brexit, Trump, þjóðernisflokkar i Evrópu, kalla þær réttu nafni: draumóra.

Marxisti fagnar valdatöku Trump

Vinstripólitík á vesturlöndum er orðin svo léleg og útvötnuð, einkum borin fram af háðfuglum eins og Gísla Marteini og Jon Stewart, að valdataka Trump er fagnaðarefni fyrir alvöru vinstripólitík.

Ok, Slavoj Zizek, nefndi ekki Gísla Martein, aðeins Jon Stewart, í viðtali á BBC í tilefni af innsetningu Trump.

Marxistinn Zizek væntir að úr rústum fjölmenningarvinstrisins rísi pólitík fyrir Jón og Gunnu sem óska sér velferðar án hryðjuverka og smáglæpa. Það má alltaf vona.

Trump gagnrýnir mótmælendur

Ást hippa og netfíkla - Trump og Nixon

Ást og friður voru pólitískt hreyfiafl hippanna. Kynþáttamisrétti, Víetnamstríð, stéttaskipting og feðraveldi voru skotspænir kynslóðarinnar kennda við Woodstock. Forsetinn sem galt dýru verði andúð hippa var Richard Nixon. Hann sagði af sér með skömm 1974.

Hippar voru frjálslyndir en Nixon íhaldsmaður og kaldastríðshaukur. Merkisberi frjálslyndra í forsetakosningunum í nóvember, Hillary Clinton, er jafn mikill kaldastríðshaukur og Nixon. Hún fylgir stefnu andúðar gegn Rússum. Trump vill vinsamleg samskipti við Rússa.

Ást sem elur á andúð er ekki friðsamleg. Enda er ást á tímum netfíkla önnur en hippaástin. Woodstock-kynslóðin ræktaði ástina í samfélagi. Ást á netinu er stunduð á sama hátt og virkir í athugasemdum iðka lýðræði.

 

„Velkomin í byltingu ástarinnar“

Andríki mælir fordóma RÚV

Daginn sem Trump sór embættiseiðinn sýndi RÚV 23 sekúndur af innsetningarræðu hans í fréttatíma. Andstæðingur Trump, leikstjórinn Michael Moore, fékk 33 sekúndur á RÚV fyrir sína ræðu og annar andstæðingur, leikarinn Alec Baldwin, var með 15 sekúndna innslag í fréttatíma RÚV.

Andríki gerði okkur þann greiða að mæla boðskapinn frá RÚV.

Jafn ágætir menn og Moore og Baldwin eru ekki handhafar æðsta framkvæmdavalds í Bandaríkjunum. Trump er á hinn bóginn forseti Bandaríkjanna. Trump er í stöðu til að móta utanríkisstefnu sem m.a. gæti haft áhrif á hagsmuni Íslands. Moore og Baldwin eru aukaatriði í því samhengi.

Starfsmönnum RÚV finnst mikilvægara að komast í óvinalið Trump en að stunda hlutlæga fréttamennsku. RÚV miðlar fordómum á kostnað upplýsinga. 

Sakar fjölmiðla um óheiðarleika