Auðmýkt Sigurðar Inga skilar Framsókn auðmýkingu

Sigurður Ingi formaður Framsóknarflokksins segist á mbl.is ekkert skilja í því hvers vegna aðrir stjórnmálaflokkar vilji ekki tala við sig um stjórnarmyndun:

[Sigurður Ingi] sagðist ekki hafa skýr­ing­ar á því hvers vegna aðrir flokk­ar hefðu ekki leitað sam­starfs við Fram­sókn­ar­flokk­inn, eng­inn full­trúa hinna flokk­anna hefði sagt við hann hverju það sætti.

Á RÚV kvartar Sigurður Ingi undan forsetanum, sem láti ekki Framsókn fá stjórnarmyndunarumboð þegar fullreynt var að aðrir flokkar náðu ekki saman.

Sigurður Ingi felldi sitjandi formann Framsóknarflokksins, Sigmund Davíð, kortéri fyrir kosningar með auðmýkt sem slagorð. Framsóknarflokkurinn átti að biðjast afsökunar á því að hafa leitt Ísland úr hruni til velsældar.

Stjórnmálaflokkur sem biðst afsökunar á stærstu afrekum sínum uppsker ekki aðdáun heldur fyrirlitningu.

 

Ríkið gegn múslímavæðingu

,,Lýðræði, réttarríkið og þýsk gildi eru vörnin gegn hatursfullum hryðjuverkum," er meginboðskapur Angelu Merkel kanslara Þýskalands, samkvæmt Spiegel. Hatursfullu hryðjuverkin eru að stærstum hluta framkvæmd í nafni múslímatrúar.

Múslímatrú er ekki trú í vestrænum skilningi, segir þýsk-egyptski höfundurinn Hamed Abdel-Samad, heldur lífsháttur. Í bókinni Uppgjör við Múhameð útlistar Abdel-Samad hvernig þrenningin Múhameð, Allah og Kóraninn gegnsýra lifnaðarhætti múslíma. Vestrænn skilningur er að trú sé einkamál hvers og eins. Múslímar skilja trú sem pólitískt og félagslegt samfélag manna þar sem orð spámannsins eru ofar öllum mannasetningum. Vestræn gildi og múslímsk eru ósamrýmanleg. Annað tveggja verður að víkja.

Þjóðverjar eru óðum að átta sig á valkostunum. Trjóuhestur múslímavæðingarinnar heitir fjölmenning. Enda eru þýskir alveg hættir að tala um fjölmenningu. Ríkið ætlar sér að þýskvæða múslíma sem búa í landinu. Kannski tekst það - en kannski ekki.

Svari hryðjuverkum með samheldni

Pútin bjargar Trump úr gildru Obama

Obama Bandaríkjaforseti engdi gildru fyrir arftaka sínum, Donald Trump, með því að reka 35 rússneska sendiráðsmenn úr landi þrem vikum fyrir embættistöku Trump.

Obama gerði ráð fyrir að Pútín Rússlandsforseti myndi svara í sömu mynt og reka bandarískt sendiráðsfólk úr landi. Þar með væru hendur Trump bundnar - hann yrði að sýna Rússum hörku.

Obama tilheyrir þeim væng bandarískra stjórnmála sem lítur á Rússland sem óvin sinn númer eitt í alþjóðastjórnmálum. Trump er á hinn bóginn fulltrúi raunsæismanna sem vilja samvinnu við Rússland, m.a. til að berjast við uppgang múslímskra öfgasamtaka.

Með því að Pútín sat á sér, og rak ekki bandaríska sendiráðsmenn úr landi, fær Trump meira svigrúm en ella til að bæta samskiptin við Rússa.

Trump hrósaði Pútín

Tap Pírata forðaði Íslandi frá lýðskrumi

Píratar eru flokkur lýðskrumara, popúlista. Andóf gegn hefðbundnum stjórnmálaflokka bar flokkinn upp í hæstu hæðir í skoðanakönnunum, 30 prósent og yfir. Þjóðin hafnaði lýðskrumi í haust og skar fylgi Pírata niður í 14,5 prósent.

Mesti lýðskrumaraflokkur Íslandssögunnar, Samfylkingin, fékk makleg málgjöld og var við það að þurrkast úr af þingi.

Lýðskrumið í kringum okkur, austan hafs og vestan, er afleiðing af misheppnuðum samfélagstilraunum vinstrimanna síðustu áratugi með fjölmenningu og úthýsi þjóðlegra gilda.

Íslendingar báru gæfu til að standa í ístaðinu og láta ekki fjölmenningu ræna okkur samfélaginu.

Popúlistaflokkar náðu verulegum vinsældum

Smári pírati og samskiptin við Bandaríkin

Ef einhver heldur að Píratar séu stjórntækir í lýðveldinu ætti viðkomandi að lesa afhjúpun Eyjunnar á umræðuhefð Pírata. Þar kallar einn forsprakki Pírata, Smári MacCarty, nýkjörinn forseta Bandaríkja nasista og segir honum að fróa sér - sjö sinnum.

Smári skrifaði skilaboðin á ensku til að alþjóð fengi öll að heyra álit Pírata á Donald Trump.

Ef Píratar tækju sæti í ríkisstjórn Íslands væri óðara skollin á kreppa í samskiptum við Bandaríkin.

Frjálslyndir vinstrimenn í nýju köldu stríði

Seinna kalda stríðið á milli Bandaríkjanna og Rússa er rekið áfram af vinstrimönnum eins og Obama forseta og Clinton-hjónunum, Bill og Hillary. Í gamla kalda stríðinu, sem lauk fyrir aldarfjórðungi, tíðkuðu stórveldin að reka heim sendiráðsfólk hvors annars. Sá leikur er endurtekinn með brottrekstri 35 Rússa frá Bandaríkjunum að skipun forseta sem lætur af störfum eftir þrjár vikur.

Í Bandaríkjunum takast á tveir hópar um utanríkisstefnuna: hugmyndafræðingar og raunsæismenn. Hugmyndafræðingarnir vilja útflutning á bandarískum gildum og sjá óvini í öllum þeim sem efast um yfirburði bandarískra lífshátta. Raunsæismenn telja heiminn aðeins of flókinn fyrir svart-hvíta heimsmynd hugmyndafræðingana.

Bandarískir hugmyndafræðingar í alþjóðamálum stóðu fyrir innrásinni í Írak 2003 þar sem fornu menningarríki skyldi breyta í skjólstæðing Bandaríkjanna með því einfaldlega að skipta um stjórnvald. Það mistókst og Írak er ónýtt ríki. Sömu öfl stóðu fyrir tilrauninni í Úkraínu 2014, í bandalagi við Evrópusambandið, þar sem Úkraína skyldi gerð vestræn. Í dag er landið klofið í tvo hluta. Sýrland er þriðji vettvangurinn og það ríki er í molum.

Hugmyndafræðingarnir bandarísku eru af tveim stofnum, kaldastríðshægrimenn eins og John McCain og frjálslyndir vinstrimenn á borð við Obama forseta og Clinton-hjónin. Íhaldssamir hægrimenn, t.d. Patrick J. Buchanan, og vinstrimenn af gamla skólanum, Stephen F. Cohen, eru í liði raunsæismanna.

Ástæða þess að frjálslyndir vinstrimenn eru orðnir ákafir í herskárri utanríkisstefnu hugmyndafræðinganna er sú að heima fyrir gengur illa. Erfiðleikar bandaríska fjölmenningarsamfélagsins, með kynþáttaóeirðum og vaxandi efnahagslegri misskiptingu, verða minna áberandi þegar barist er fyrir bandarískum gildum á alþjóðavettvangi - sérstaklega þegar óvinurinn er stór og máttugur.

Raunsæismenn skilja heiminn betur en hugmyndafræðingar. Dæmi um yfirvegaða og skýra greiningu á sambúðarvanda Bandaríkjanna og Rússlands er eftir Raymond Smith. Hann bendir á hið augljósa, að sérhver þjóð skilgreinir sína eigin öryggishagsmuni, og rekur utanríkisstefnu á þeim forsendum.

Donald Trump endurskilgreinir bandaríska hagsmuni og telur þá liggja heima fyrir en síður í útlöndum. Endurskilgreiningin kippir fótunum undan utanríkisstefnu hugmyndafræðinganna. Svar frjálslyndra vinstrimanna er að Trump hljóti að vera höfundarverk Pútíns Rússlandsforseta.

 

Ráku 35 Rússa úr landi

Útvarpsstjóri lýgur blákalt

Í yfirlýsingu útvarpsstjóra um fréttaflutning RÚV af fjármálum Sigmundar Davíðs og Önnu Sigurlaugar segir:

Þetta er ekki í fyrsta sinn sem Sigmundur Davíð finnur að umfjöllun fjölmiðla um störf sín. Sú gagnrýni hefur beinst að ýmsum fjölmiðlum þó hann hafi vissulega beint spjótum sínum í auknum mæli að RÚV eftir umfjöllun Kastljóss um Panamaskjölin. Í aðdraganda þáttarins fullyrti hann að þátturinn væri herferð RÚV gegn sér en á daginn kom að margir af helstu fjölmiðlum heims fjölluðu um málið með sambærilegum hætti. (undirstrikun pv)

Undirstrikuðu orðin eru bláköld lygi. Erlendir fjölmiðlar, t.d. Guardian, sem voru með sömu skjöl undir höndunum og RÚV tóku sérstaklega fram að hvorki Sigmundur Davíð né Anna Sigurlaug höfðu svikið undan skatti, né gert eitt eða neitt óheiðarlegt í fjármálum sínum. Hvergi í fréttaherferð RÚV var tekið fram að þau hjón væru saklaus af áburði um skattandanskot eða óheiðarlegum ávinningi.

RÚV hefur þvert á móti lagt sig fram um að gera fjármál hjónanna tortryggileg og opinber störf Sigmundar Davíðs og stungið undir stól upplýsingum sem sýna fram á hið gagnstæða.

RÚV hefur aldrei lagt fram nein gögn sem réttlæta herferðina gegn Sigmundi Davíð og jafnvel viðurkennt að þau séu ekki til.

Útvarpsstjóri er ekki starfi sínu vaxinn þegar hann beitir lygum til að réttlæta RÚV-herferðina gegn Sigmundi Davíð og Önnu Sigurlaugu.

 

Engin þörf á að biðjast afsökunar

Dómsmorð RÚV er aðför að réttarríkinu

Lögmæt yfirvöld á Íslandi s.s. lögregla, ríkisskattstjóri, skattrannsóknarstjóri eða jafnvel umboðsmaður alþingis sáu enga ástæðu til að rannsaka fjármál hjónanna Sigmundar Davíðs og Önnu Sigurlaugar. En RÚV bæði ákærði og dæmdi hjónin sek og knúði fram afsögn Sigmundar Davíðs sem forsætisráðherra.

Það heitir dómsmorð þegar saklausir eru dæmdir fyrir glæpi sem þeir drýgðu ekki.

Blaðamenn breska blaðsins Guardian höfðu undir höndum sömu gögn um Sigmund Davíð og Önnu Sigurlaugu og RÚV, Panama-skjölin. Í frétt Guardian frá 3. apríl í ár segir

Guardian hefur ekki séð neinar sannanir fyrir skattaundanskotum, undabrögðum eða óheiðarlegum ávinningi Sigmundar Davíðs, Önnu Sigurlaugar eða Wintris. (The Guardian has seen no evidence to suggest tax avoidance, evasion or any dishonest financial gain on the part of Gunnlaugsson, Pálsdóttir or Wintris.)

RÚV bjó til sekt úr sakleysi með því að höfða mál fyrir dómstóli götunnar og efndi til mótmæla 4. apríl í beinni útsendingu af Austurvelli.

RÚV stundaði ekki fréttaflutning af málum Sigmundar Davíðs og Önnu Sigurlaugar. Hér var um að ræða hannaða atburðarás þar sem öll viðurkennd vinnubrögð hlutlægrar fréttamennsku voru brotin til að sýna fram á að sakleysi væri sekt.

Dómsmorði RÚV er ekki hægt að áfrýja. Engin rannsókn fer fram á vinnubrögðum RÚV þrátt fyrir að það hrikti í stoðum réttarríkisins þegar RÚV fremur óhæfuverk.

 

Fer fram á afsökunarbeiðni

Gleymda frétt ársins: vinstra hrunið

Kjörtímabilið 2009 til 2013 voru Samfylking og Vinstri grænir með meirihluta á alþingi og yfir 50 prósent fylgi í kosningum. Í haust fengu þessir flokkar samtals 21,6 prósent fylgi.

Gleymda frétt ársins er hvað varð af vinstriflokkunum og hvers vegna þeir fóru úr meira en 50 prósent fylgi niður í liðlega tuttugu prósent.

Vinstriflokkarnir tveir og forverar þeirra, Alþýðubandalag/Sósíalistaflokkur og Alþýðuflokkur, fengu í ár lélegustu kosninguna í lýðveldissögunni.

Og öllum er hjartanlega sama.

 

Afsögn, kosningar og nýr forseti

Gróa á Efstaleiti er maður ársins

Gróa á Efstaleiti, í daglegu tali kölluð fréttastofa RÚV, er maður ársins. Á fyrri hluta ársins knúði Gróa fram afsögn forsætisráðherra og bjó til stjórnarkreppu.

Um miðbik ársins sigraði frambjóðandi Gróu forsetakosningarnar.

Tilraun Gróu til að ná þrennunni á seinni hluta ársins, með aðför að hæstarétti, fór að vísu út um þúfur þótt öllu væri tjaldað til, meira að segja Jóni Steinari.

Gróa á Efstaleiti er fjármögnuð úr ríkissjóði til að sturla þjóðina. Á liðnu ári tókst henni vel upp. Hún er maður ársins 2016.